ચેન્નઈ – એક્ટર, ડિરેક્ટર, પ્રોડ્યૂસર કમલ હાસનની તમિલ, તેલુગુ અને હિન્દીમાં બનેલી ફિલ્મ ‘વિશ્વરૂપમ’નો વિવાદ વકરતો જ જઈ રહ્યો છે. ‘વિશ્વરૂપમ’ આજે શુક્રવારે દેશનાં અન્ય રાજ્યોમાં રિલિઝ થઈ ગઈ છે પરંતુ બેંગ્લોર શહેર અને આંધ્રપ્રદેશનાં કેટલાય શહેરોમાં આ ફિલ્મોને રિલિઝ નહીં કરાય. થિયેટર માલિકોએ જાતે જ શોને રદ્દ કરી દીધા છે.
આંધ્રપ્રદેશનાં ગૃહ મંત્રી સવિતા રેડ્ડીનાં નિર્દેશઅનુસાર હૈદરાબાદ અને સાયબરાબાદમાં આ ફિલ્મની રિલિઝ પર મનાઈ ફરમાવી દેવાઈ છે. મુસ્લિમ સંગઠનનું એક પ્રતિનિધિમંડળ ગુરૂવારે ગૃહ મંત્રી સવિતા રેડ્ડીને મળ્યું હતુ અને હૈદરાબાદ, સાઈબરાબાદમાં ફિલ્મ રિલિઝ ન કરવા અંગે અરજી આપી હતી.
આ પહેલા તામિલનાડુ સરકારે પણ ફિલ્મની રિલિઝ પર ૧૫ દિવસ માટે મનાઈ ફરમાવી છે. રિલિઝનાં મનાઈની વિરૂદ્ધ કમલ હાસને મદ્રાસ હાઈકોર્ટમાં અરજી આપી છે જેના પર ૨૮ જાન્યુઆરીએ હાઈકોર્ટનો ચુકાદો આવશે.
