બીજિંગમાં કાંસ્ય, લંડનમાં રજત

ભારતના સ્ટાર કુસ્તીબાજ સુશીલ કુમારે લંડન ઓલિમ્પિક્સમાં રજત ચંદ્રક જીત્યો છે. રવિવાર, ૧૨ ઓગસ્ટે ૬૬ કિ.ગ્રા. વજનના વર્ગની ફ્રી-સ્ટાઈલ કુસ્તીની ફાઈનલમાં તેનો જાપાનના પહેલવાન તાત્સુહીરો યોનેમિત્સુ સામે પરાજય થયો. આ સાથે જ સુશીલે લગાતાર બે ઓલિમ્પિક્સમાં વ્યક્તિગત રીતે મેડલ જીતીને ભારત માટે ઈતિહાસ સર્જ્યો છે. આ સિદ્ધિ અગાઉ કોઈ ભારતીય એથ્લીટે મેળવી નથી. ચાર વર્ષ પહેલા બીજિંગ ઓલિમ્પિક્સમાં કાંસ્ય ચંદ્રક જીતનાર સુશીલે રવિવારે ફાઈનલમાં પ્રવેશ કરતા પહેલા સેમી ફાઈનલમાં કઝાખસ્તાનના પહેલવાનને ઊંચકીને પછાડી દીધો હતો અને આ વખતે પોતાના મેડલનો રંગ બદલ્યો છે. ફાઈનલમાં પ્રવેશ કરતા પૂર્વે રવિવારે સુશીલે પહેલા તૂર્કીના પહેલવાનને પછાડ્યો, તે પછી ઉઝબેકિસ્તાનના રેસલરને ગેમ્સમાંથી આઉટ કર્યો અને બાદમાં વારો કાઢ્યો કઝાખ કુસ્તીબાજનો.