જ્યારે સિનેમાઘરમાં સંગીતના તાલે પ્રેક્ષકો ઝૂમી ઊઠે છે, ત્યારે ભાગ્યે જ કોઈને ખબર 
હોય છે કે પડદા પાછળ કેવા રસપ્રદ અને રોમાંચક સંઘર્ષો છુપાયેલા હોય છે. ઘણી વાર જે ગીતને દિગ્દર્શક નકામું સમજીને કાઢી નાખે છે, કિસ્મત તેને જ ફિલ્મનું સૌથી મોટું ટ્રેન્ડિંગ હિટ બનાવી દેતી હોય છે. વર્ષ 2010ની સુપરહિટ ફિલ્મ ‘બેન્ડ બાજા બારાત’ (Band Baaja Baaraat) સાથે પણ કંઈક આવો જ દિલચસ્પ કિસ્સો જોડાયેલો છે, જે ફિલ્મી દુનિયાના અજબ સંજોગોની સાક્ષી પૂરે છે.
યશરાજ ફિલ્મ્સના બેનર હેઠળ બનેલી અને મનીષ શર્મા દ્વારા દિગ્દર્શિત આ ફિલ્મ માટે સંગીતકાર જોડી સલીમ-સુલેમાન સંગીત પીરસી રહી હતી. ફિલ્મનાં એક પછી એક ગીતો તૈયાર થઈ રહ્યાં હતાં ત્યારે સંગીતકારોએ એક ખૂબ જ ધમાકેદાર ધૂન બનાવી—‘મેં તો ઐંવઈ ઐંવઈ ઐંવઈ ઐંવઈ લુટ ગયા…’ (Ainvayi Ainvayi).
પરંતુ જ્યારે આ ધૂન દિગ્દર્શક મનીષ શર્માને સાંભળવા મળી ત્યારે તેમણે એક જ ઝાટકે ના પાડી દીધી. તેમનું માનવું હતું કે આ ગીત તેમની ફિલ્મની પેટર્નમાં ફિટ બેસે તેમ નથી, કારણ કે આ ધૂનમાં ક્યાંય ગિટાર વાગતી નહોતી. મનીષની આ ના પછી એ ગીતને પડતું મૂકવામાં આવ્યું અને ટીમ બીજાં ગીતો પર કામ કરવા લાગી.
ગીતોનું કામ પૂરું થયા બાદ જ્યારે નિર્માતા આદિત્ય ચોપરા મનીષ શર્મા સાથે બધાં ગીતો સાંભળવા બેઠા ત્યારે તેમણે એક મહત્ત્વનો સવાલ કર્યો, ‘ફિલ્મનું મુખ્ય અને આઇટમ ગીત ક્યાં છે?’
જવાબમાં સલીમે કહ્યું કે એ ગીત તો મનીષ શર્માએ રદ કરી દીધું છે. આદિત્ય ચોપરાની જિજ્ઞાસા વધતાં તેમણે એ રદ થયેલી ધૂન સાંભળવાની ઇચ્છા વ્યક્ત કરી.
થોડી ધૂન સાંભળ્યા પછી આદિત્યએ મનીષને પ્રશ્ન કર્યો કે આમાં વાંધો શું છે?
મનીષે જવાબ આપ્યો, ‘આ ગીતમાં ગિટાર વાગતી નથી, જ્યારે ફિલ્મમાં જે દૃશ્ય છે તેમાં ઓર્કેસ્ટ્રામાં એક પાત્ર ગિટાર સાથે શરૂઆત કરે છે.’ આદિત્ય ચોપરાનો અનુભવી દૃષ્ટિકોણ તરત બોલી ઊઠ્યો, ‘તું બહુ મોટી ભૂલ કરી રહ્યો છે.’ વાતને સંભાળતાં સલીમ-સુલેમાને તરત જ રસ્તો કાઢીને કહ્યું, ‘અમે એમાં ગિટાર ઉમેરી દઈએ છીએ!’ અને બસ, જેવી ગિટાર ઉમેરાઈ કે ગીતનો આખો મિજાજ જ બદલાઈ ગયો.
શરૂઆતમાં આ ગીત એક સોલો ટ્રેક તરીકે તૈયાર થયું હતું અને ગીતકાર અમિતાભ ભટ્ટાચાર્યના સૂચનથી સલીમ મર્ચન્ટ પોતે જ તેને ગાવાના હતા, કારણ કે રણવીર સિંહ તે સમયે સાવ નવો કલાકાર હતો. પરંતુ મનીષ શર્માએ આગ્રહ કર્યો કે આ એક યુગલ ગીત હોવું જોઈએ. રણવીર સાથે અનુષ્કા શર્મા પણ હોવાથી તેમાં સુનિધિ ચૌહાણનો અવાજ પણ સામેલ કરવામાં આવ્યો.
આ પંજાબી આઇટમ ગીતના રેકોર્ડિંગ દરમિયાન એક નાની પણ મજેદાર ભૂલ પકડાઈ હતી. કોરસના કલાકારોએ ગાયું હતું, ‘ક્યૂં તો ઐંવઈ ઐંવઈ ઐંવઈ ઐંવઈ લુટ ગયા…’
રેકોર્ડિંગ બાદ ધ્યાન જતાં સંગીતકારે તેને સુધારીને ‘તું તો ઐંવઈ ઐંવઈ ઐંવઈ ઐંવઈ લુટ ગયા’ કર્યું, જે આજે પણ સૌના હોઠ પર રમે છે.
જે ગીતને દિગ્દર્શકે નકામું સમજીને ડસ્ટબિનમાં નાખી દીધું હતું, તે ગિટારના જાદુ અને બેજોડ ગાયકીના સહારે ફિલ્મ ‘બેન્ડ બાજા બારાત’નું સર્વાધિક લોકપ્રિય અને આઇકોનિક ગીત બની ગયું.
‘બેન્ડ બાજા બારાત’ ફિલ્મનાં બાકીનાં આઠ ગીતો પણ ખૂબ સરસ હતાં, પરંતુ આ ‘ઐંવઈ ઐંવઈ’ ગીતે જે ધમાલ મચાવી હતી તેની તો વાત જ અલગ હતી. આ ગીત માત્ર ફિલ્મનો એક ટ્રેક બનીને ન રહેતાં દેશભરના યુવાનો માટે લગ્નો અને પાર્ટીઓની ઓળખ બની ગયું.
