ગીત અને સંગીતની દુનિયામાં કેટલાક કિસ્સાઓ એટલા રોચક અને હસાવનારા હોય છે કે તે કાયમ માટે ઇતિહાસ બની 
જાય છે. બોલિવૂડના જાણીતા અને ગિનિસ વર્લ્ડ રેકોર્ડ ધરાવતા ગીતકાર સમીર અંજાને તેમની લાંબી સફરમાં આવા અનેક અવિસ્મરણીય અનુભવો કર્યા છે.
ખાસ કરીને ડેવિડ ધવનની ૧૯૯૭માં આવેલી સુપરહિટ ફિલ્મ ‘હીરો નંબર વન’ (Hero No. 1)ના ગીત ‘મૈં તુઝકો ભગા લાયા હૂં તેરે ઘર સે, તેરે બાપ કે ડર સે’ પાછળની કહાણી માત્ર મનોરંજક જ નથી, પરંતુ ફિલ્મનિર્માણનાં અનોખાં સમીકરણો પણ ઉજાગર કરે છે.
જ્યારે દિગ્દર્શક ડેવિડ ધવને સમીરજીને એક રોમેન્ટિક સિચ્યુએશન માટે ગીત લખવા કહ્યું, ત્યારે કવિ અને ગીતકાર તરીકે સમીરે સ્વાભાવિક રીતે જ પટકથા અને સંદર્ભની માગણી કરી હતી.
પરંતુ ડેવિડ ધવનનો અંદાજ હંમેશાં હટકે અને મસ્તમૌલા રહ્યો છે. તેમણે જે વાક્ય કહ્યું હતું, તે આજે પણ બોલિવૂડના ફિલ્મી કિસ્સાઓમાં ગુંજે છે : ‘સિચ્યુએશન ગઈ તેલ લેવા, તું મને હિટ ગીત આપી દે. સિચ્યુએશન હું જાતે ગોઠવી લઈશ.’
સમીરે આ વાતને ગંભીરતાથી લઈને એવું ચટપટું મુખડું તૈયાર કર્યું, જેણે આગળ જઈને ધૂમ મચાવી દીધી : ‘મૈં તુઝકો ભગા લાયા હૂં તેરે ઘર સે, તેરે બાપ કે ડર સે.’
આ ગીત કાગળ પર તો શાનદાર ઊતરી આવ્યું, પરંતુ ગીતકારની વ્યાવસાયિક પ્રામાણિકતા જાગી અને તેમણે તરત જ ડેવિડ ધવનને અટકાવીને અસલી લોચો બતાવ્યો. સમીરજીએ કહ્યું કે આ ગીત તમારી ફિલ્મમાં બંધબેસતું નથી, કારણ કે આ પટકથામાં હીરોઈનનો ‘બાપ’ છે જ નહીં! ફિલ્મમાં તો હીરોઈનના પિતાની જગ્યાએ કડક દાદાનું પાત્ર છે. તો પછી ‘બાપ કે ડર સે’ શબ્દો કેવી રીતે યોગ્ય ઠરશે?
આ સાંભળીને ડેવિડ ધવને જે આત્મવિશ્વાસ બતાવ્યો, તે દિગ્દર્શક તરીકેના તેમના આગવા અભિગમની ઝાંખી કરાવે છે. તેમણે હસીને કહ્યું, ‘સમીર, તું આજનો દિવસ યાદ રાખ. જ્યારે ગીત સુપરહિટ થાય છે ને, ત્યારે ફિલ્મની નાની-મોટી વાતો કે પટકથાની વિસંગતતાઓ બધી બાજુ પર રહી જાય છે અને માત્ર જાદુઈ સંગીત તથા ગીત જ બોલે છે.’ અને ખરેખર, ડેવિડ ધવનની આ દૂરંદેશી સાચી પડી.
ફિલ્મ રિલીઝ થઈ ત્યારે ગોવિંદા અને કરિશ્મા કપૂરની કેમેસ્ટ્રીવાળું આ ગીત સિનેમાઘરોમાં સીટીઓ અને તાળીઓ સાથે વધાવવામાં આવ્યું. પ્રેક્ષકોએ ક્યારેય એ નહીં વિચાર્યું કે ફિલ્મમાં બાપ છે કે દાદા. સૌ કોઈ માત્ર આ રમૂજી અને કાનને ગમી જાય એવા ગીતના તાલે ઝૂમી ઊઠ્યા.
સમીર અને ડેવિડ ધવનની આ જુગલબંદી માત્ર એક ગીતની સફર નથી, પરંતુ હિન્દી સિનેમાની એ સર્જનાત્મક આઝાદીની ઝાંખી કરાવે છે, જ્યાં ક્યારેક લાગણીઓ અને ધૂનનો પ્રવાહ વ્યાકરણ કે પાત્રોની જરૂરિયાત કરતાં ઘણો મોટો સાબિત થાય છે.
‘હીરો નંબર વન’નું આ ગીત આજે પણ દાયકાઓ પછી એટલું જ તાજું અને લોકપ્રિય છે, જે સાબિત કરે છે કે ક્યારેક નિયમો તોડીને રચવામાં આવેલી મસ્તી જ ઇતિહાસ રચે છે.
