આ વરસાદમાં કંઈક જુદા પ્રકારના ભાતના કુરકુરા પકોડા પણ અજમાવી લો!
સામગ્રીઃ
- રાંધેલો ભાત 1 કપ
- કાંદા 2
- બટેટા 2
- અજમો ½ ટી.સ્પૂન
- જીરૂ ½ ટી.સ્પૂન
- હીંગ ½ ટી.સ્પૂન
- સમારેલી કોથમીર 1 કપ
- લીલા મરચાં 2-3
- કસૂરી મેથી 1 ટે.સ્પૂન
- હળદર ¼ ટી.સ્પૂન
- ધાણાજીરૂ 1 ટી.સ્પૂન
- લાલ મરચાં પાઉડર અથવા ચિલી ફ્લેક્સ 1 ટી.સ્પૂન
- આદુ ખમણેલું 1 ટી.સ્પૂન
- ચણાનો લોટ 1કપ
રીતઃ કાંદાને લાંબી ચીરીમાં સમારી લો. બટેટાને જાડી ખમણીમાં ખમણી લો.
રાંધેલા ભાતમાં કાંદાની સમારેલી લાંબી પાતળી ચીરી, જાડા ખમણેલા બટેટા, અજમો, હીંગ, જીરૂ, સમારેલી કોથમીર, સમારેલાં લીલા મરચાં, હળદર, ધાણાજીરૂ, લાલ મરચાં પાઉડર, કસૂરી મેથી મેળવી દો. ત્યારબાદ તેમાં ચણાનો લોટ અડધો ઉમેરીને પાણી નાખ્યા વગર મિશ્રણ બાંધી લો. જો મિશ્રણ નરમ હોય તો બાકી રહેલો ચણાનો લોટ પણ મેળવી દો.
હવે કઢાઈમાં તેલ ગરમ કરી લો. તેલ ગરમ થાય એટલે ગેસની આંચ મધ્યમ કરી લો. ભજીયાના મિશ્રણમાંથી નાની સાઈઝના ગોળ અથવા ચપટા ગોળા કરીને તેલમાં ભજીયા તળી લો.
આ ભજીયા લીલી ચટણી કે ટોમેટો કેચ-અપ સાથે પીરસો.
