નવી દિલ્હીઃ કેનેડાનાં કવયિત્રી, નિબંધકાર અને પ્રાચીન સાહિત્યનાં વિદ્વાન એન કાર્સનને 2026નો સાહિત્યનો નોબેલ પુરસ્કાર એનાયત કરવામાં આવ્યો છે. નોબેલ સમિતિએ જણાવ્યું હતું કે કાર્સનને તેમની સાહસિક અને નવીન લેખનશૈલી માટે આ પુરસ્કાર આપવામાં આવી રહ્યો છે. તેમના લેખનમાં પ્રાચીન સાહિત્યની પરંપરા સાથે રસપ્રદ સંવાદ જોવા મળે છે, જેના દ્વારા તેમણે સમકાલીન સાહિત્ય માટે નવાં સ્વરૂપો તૈયાર કર્યાં છે.
કયા લેખકોનાં નામની ચર્ચા થઈ રહી હતી?
નોબેલ પુરસ્કારની જાહેરાત પહેલાં અનેક લેખકોનાં નામ ચર્ચામાં હતાં. સટ્ટાબજારમાં ચીનની લેખિકા કાન શ્યુ સૌથી આગળ હતાં. લેડબ્રોક્સ અનુસાર તેમના પર 10/1નો સટ્ટો લગાવવામાં આવ્યો હતો. ગયા વર્ષે તેઓ ટોચના પાંચ દાવેદારોમાં પણ સામેલ નહોતાં, પરંતુ આ વર્ષે ફરી એક વાર સૌથી મજબૂત દાવેદાર તરીકે ઊભરી આવ્યાં હતાં.
આ ઉપરાંત જાપાનના જાણીતા લેખક હારુકી મુરાકામી પણ મુખ્ય દાવેદારોમાં સામેલ હતા. ભારતમાં હારુકી મુરાકામીના વાચકોની સંખ્યા ઘણી મોટી છે. તેમના પર 14/1નો સટ્ટો લગાવવામાં આવ્યો હતો. બીજી તરફ ઓસ્ટ્રેલિયાના લેખક જેરાલ્ડ મર્નેન અને અમેરિકાના લેખક થોમસ પિન્ચન 16/1ના સટ્ટા સાથે મુખ્ય દાવેદારોમાં હતા. મેક્સિકોની લેખિકા ક્રિસ્ટિના રિવેરા ગાર્સા, કેનેડાની માર્ગારેટ એટવુડ, ફ્રાન્સના મિશેલ ઉએલબેક અને રશિયાની લ્યુડમિલા ઉલિત્સ્કાયાનાં નામ પણ ચર્ચામાં હતાં. આ તમામ લેખકો પર 20/1નો સટ્ટો લગાવવામાં આવ્યો હતો.
The 2026 #NobelPrize in Literature is awarded to the Canadian author Anne Carson, “for her bold and inventive oeuvre that, in playful dialogue with the classical tradition, has created new forms for contemporary literature.” https://t.co/bz3oJVJ81Q
— All India Radio News (@airnewsalerts) October 8, 2026
કોણ છે એન કાર્સન?
એન કાર્સન કેનેડાનાં જાણીતા નિબંધકાર, અનુવાદક, પ્રાચીન સાહિત્યનાં વિદ્વાન અને કવયિત્રી છે. તેમણે પ્રાચીન ગ્રીક સાહિત્ય અને દર્શનશાસ્ત્રને આધુનિક કવિતા તથા લેખન સાથે જોડ્યાં છે. તેમની લેખનશૈલી પરંપરાગત કવિતાથી ઘણી અલગ માનવામાં આવે છે. એન કાર્સનને પ્રાચીન ગ્રીક ભાષા અને સાહિત્યમાં બાળપણથી જ રસ હતો. એન કાર્સનનો જન્મ 21 જૂન, 1950એ કેનેડાના ટોરોન્ટો શહેરમાં થયો હતો. તેમના પિતા બેંકમાં કામ કરતા હતા. હાઈસ્કૂલમાં અભ્યાસ દરમિયાન તેમના લેટિન ભાષાના એક શિક્ષકે તેમને પ્રાચીન ગ્રીસની દુનિયા અને ત્યાંની ભાષાથી પરિચિત કરાવ્યાં હતાં. ત્યાર બાદ ગ્રીક ભાષા અને સાહિત્ય પ્રત્યે તેમનો રસ સતત વધતો ગયો હતો.
