રાજ્યના રાજકીય અને વિકાસકીય વર્તુળોમાંથી બે મહત્ત્વપૂર્ણ અપડેટ્સ સામે આવ્યા છે. કેન્દ્રીય ગૃહ અને સહકારિતા મંત્રી અમિત શાહનો 3 થી 5 સપ્ટેમ્બર દરમિયાન નક્કી કરાયેલો ગુજરાત પ્રવાસ અમુક અનિવાર્ય કારણોસર હાલ પૂરતો રદ કરવામાં આવ્યો છે. જોકે, બીજી તરફ વડાપ્રધાન નરેન્દ્ર મોદીના આગામી ગુજરાત પ્રવાસની તૈયારીઓ પુરજોશમાં શરૂ કરી દેવામાં આવી છે.
ગૃહમંત્રીના ગાંધીનગર-અમદાવાદના કાર્યક્રમો સ્થગિત
કેન્દ્રીય ગૃહમંત્રી અમિત શાહ પોતાના ત્રણ દિવસીય પ્રવાસ દરમિયાન ગાંધીનગર મહાનગરપાલિકા હેઠળના ઇન્દ્રોડા વિસ્તાર અને ગાંધીનગર સિવિલ હોસ્પિટલ ખાતે અનેક નાગરિક સુવિધાજનક પ્રકલ્પોના લોકાર્પણ તથા ખાતમુહૂર્ત કરવાના હતા. આ ઉપરાંત અમદાવાદના સાબરમતી રેલવે સ્ટેશન આસપાસના પણ વિવિધ કાર્યક્રમો રદ્દ થતાં તમામ નિર્ધારિત આયોજનો હાલ પૂરતા મોકૂફ રાખવામાં આવ્યા છે.
8 સપ્ટેમ્બરે PM મોદી વડોદરાના મહેમાન બનશે
આગામી 8 સપ્ટેમ્બરે દેશના વડાપ્રધાન નરેન્દ્ર મોદી સંસ્કારી નગરી વડોદરાની મુલાકાતે આવી રહ્યા છે. તેઓ પ્રખ્યાત એમ. એસ. યુનિવર્સિટીના પેવેલિયન ગ્રાઉન્ડ ખાતે આયોજિત એક ભવ્ય કાર્યક્રમમાં હાજરી આપશે. વિશેષરૂપે ‘જેન ઝી’ (Gen Z) એટલે કે દેશની નવી પેઢીના યુવાનો, કોર્પોરેટ્સ, શિક્ષણવિદો અને વિદ્યાર્થીઓને લક્ષ્યમાં રાખીને આ સ્થળની પસંદગી કરવામાં આવી છે.
રૂ. 35,000 કરોડના વિકાસ કાર્યોનું લોકાર્પણ-ખાતમુહૂર્ત
પોતાના આ પ્રવાસ દરમિયાન વડાપ્રધાન મોદી વડોદરા અને આસપાસના વિસ્તારો માટે રેલવે, રાષ્ટ્રીય રાજમાર્ગો, વડોદરા મહાનગરપાલિકા અને જિલ્લા વહીવટી તંત્રના મળીને કુલ રૂ. 35,000 કરોડથી વધુના જંગી વિકાસ કાર્યોની ભેટ આપશે. સુરક્ષા ચાંપતી રાખવા અને સુવ્યવસ્થિત સંચાલન માટે માત્ર પૂર્વ-નોંધણી કરાવનાર 10,000 જેટલા લોકોને જ સભા સ્થળે પ્રવેશ અપાશે. સામાન્ય નાગરિકો ઘરઆંગણે કે જાહેર સ્થળોએથી પ્રધાનમંત્રીનું સંબોધન સરળતાથી જોઈ શકે તે માટે વડોદરા ભાજપ પ્રમુખ ડૉ. જયપ્રકાશ સોનીના જણાવ્યા અનુસાર સમગ્ર શહેરમાં વિવિધ સ્થળોએ વિશાળ લાઈવ સ્ક્રીન્સ ગોઠવવામાં આવશે.
