એશિયન ગેમ્સ 2026માં ભારતીય બોક્સિંગ ટીમનું અભિયાન અત્યંત શાનદાર અને ગોલ્ડન અંદાજમાં પૂર્ણ થયું છે. શુક્રવારે (2 October) રમાયેલી પુરુષોની 80 kg વજન વર્ગની ફાઇનલ મેચમાં ભારતના ઉભરતા બોક્સર અંકુશ પંઘાલે દક્ષિણ કોરિયાના કિમ મિનસોંગને 4-0 થી માત આપીને ગોલ્ડ મેડલ પોતાના નામે કર્યો છે. અંકુશની આ ઐતિહાસિક જીત સાથે ભારતે બોક્સિંગમાં એક જ દિવસમાં ત્રીજો ગોલ્ડ મેડલ જીતીને નવો ઇતિહાસ રચી દીધો છે.
ફાઇનલ બાઉટમાં અંકુશનું આક્રમક પ્રદર્શન
ફાઇનલ મેચમાં અંકુશ પંઘાલે પોતાની ઉત્કૃષ્ટ સ્પીડ, રિંગ મૂવમેન્ટ અને સચોટ કાઉન્ટર-પંચિંગ ટેકનિકનો અદ્ભુત ઉપયોગ કર્યો હતો. દક્ષિણ કોરિયાના બોક્સર સામે સતત દબાણ બનાવી રાખતા જજોએ 4-0 ના સર્વસંમત નિર્ણયથી અંકુશને વિજેતા જાહેર કર્યો હતો. આ જીત સાથે એશિયન ગેમ્સ 2026 માં અંકુશની સ્વપ્નિલ સફર ગોલ્ડન મેડલ સાથે પૂર્ણ થઈ હતી.
કોમનવેલ્થ ગેમ્સમાં પણ જીત્યો હતો ગોલ્ડ
હરિયાણાના રોહતકમાં 13 August 2005 ના રોજ જન્મેલા અંકુશ પંઘાલે 80 kg વર્ગમાં ભારત માટે સતત શ્રેષ્ઠ પ્રદર્શન કર્યું છે. તેમણે 2026 ની સીનિયર નેશનલ બોક્સિંગ ચેમ્પિયનશિપમાં ગોલ્ડ જીતીને રાષ્ટ્રીય સ્તરે ઓળખ બનાવી હતી. આ અગાઉ તેમણે 2026 ની કોમનવેલ્થ ગેમ્સ (CWG) માં પણ 80 kg વર્ગમાં ગોલ્ડ મેડલ જીત્યો હતો. આ સિવાય 2026 ના બોક્સમ કપ અને 2025 ના વર્લ્ડ બોક્સિંગ કપ ફાઇનલમાં સિલ્વર મેડલ તથા 2025 ની U-22 એશિયન બોક્સિંગ ચેમ્પિયનશિપમાં બ્રોન્ઝ મેડલ પોતાના નામે કર્યો હતો.
અંકુશ પંઘાલની મુખ્ય ઉપલબ્ધિઓ:
- 2026 એશિયન ગેમ્સ: ગોલ્ડ મેડલ
- 2026 CWG: ગોલ્ડ મેડલ
- 2026 એલિટ નેશનલ બોક્સિંગ ચેમ્પિયનશિપ: ગોલ્ડ મેડલ
- 2026 બોક્સમ કપ: સિલ્વર મેડલ
- 2025 વર્લ્ડ બોક્સિંગ કપ ફાઇનલ: સિલ્વર મેડલ
- 2025 U-22 એશિયન બોક્સિંગ ચેમ્પિયનશિપ: બ્રોન્ઝ મેડલ
બોક્સિંગમાં ભારતનું અત્યાર સુધીનું સૌથી સફળ ગોલ્ડ અભિયાન
અંકુશના ગોલ્ડ મેડલ સાથે એશિયન ગેમ્સ 2026 માં ભારતે બોક્સિંગમાં કુલ 6 મેડલ પ્રાપ્ત કર્યા છે, જેમાં 3 ગોલ્ડ અને 3 બ્રોન્ઝ મેડલ સામેલ છે. ગોલ્ડ મેડલની સંખ્યાની દ્રષ્ટિએ એશિયન ગેમ્સના ઇતિહાસમાં ભારતનું આ અત્યાર સુધીનું સૌથી સફળ બોક્સિંગ અભિયાન સાબિત થયું છે. સરખામણી કરીએ તો, 2022 ના એશિયન ગેમ્સમાં ભારતે 1 સિલ્વર અને 3 બ્રોન્ઝ સહિત 4 મેડલ મેળવ્યા હતા, જ્યારે 2010 માં કુલ 9 મેડલ (2 ગોલ્ડ, 3 સિલ્વર, 4 બ્રોન્ઝ) આવ્યા હતા.
એશિયન ગેમ્સ 2026: ભારતના બોક્સિંગ મેડલ વિજેતાઓ
- લવલીના બોરગોહેન મહિલા 75 kg ગોલ્ડ
- પરવીન હુડ્ડા મહિલા 65 kg ગોલ્ડ
- અંકુશ પંઘાલ પુરુષ 80 kg ગોલ્ડ
- પ્રિયા ધંઘાસ મહિલા 60 kg બ્રોન્ઝ
- કપિલ પોખરિયા પુરુષ 90 kg બ્રોન્ઝ
- નરેન્દ્ર બેરવાલ પુરુષ 90+ kg બ્રોન્ઝ
