જાપાનના આઇચી-નાગોયા ખાતે આયોજિત એશિયન ગેમ્સ 2026માં ભારતીય રમતવીરોએ મેડલનું ખાતું ખોલી દીધું છે. ભારતીય શૂટિંગ ટીમે અપેક્ષા મુજબનું જ્વલંત પ્રદર્શન કરતા દેશ માટે પ્રથમ મેડલ નિશાનેબાજીમાં મેળવ્યો છે. મહિલાઓની 10m એર રાઇફલ ટીમ ઇવેન્ટમાં ભારતીય ત્રિપુટી ઇલાવેનિલ વાલરિવન, વિદરસા વિનોદ અને સોનમ મસ્કરે દેશને સિલ્વર મેડલ અપાવીને શૂટિંગ અભિયાનની શાનદાર શરૂઆત કરી છે.
ચીને બનાવ્યો વર્લ્ડ રેકોર્ડ, જાપાનને મળ્યો બ્રોન્ઝ
મેચમાં ભારતીય ટીમે કુલ 1898.0 પોઇન્ટ્સ મેળવીને બીજું સ્થાન હાસિલ કર્યું હતું. ચાઇનીઝ શૂટર્સે 1904.2 નો વર્લ્ડ રેકોર્ડ સ્કોર બનાવીને ગોલ્ડ મેડલ જીત્યો હતો. જ્યારે યજમાન જાપાનની ટીમે 1897.1 ના સ્કોર સાથે ત્રીજું સ્થાન મેળવીને બ્રોન્ઝ મેડલ પોતાના નામે કર્યો હતો.
ઇલાવેનિલ વાલરિવનનો ‘ડબલ ધમાકો’
ભારત માટે એશિયન ગેમ્સનો પ્રથમ દિવસ ડબલ ખુશીઓ લઈને આવ્યો હતો. 10m એર રાઇફલ ટીમ ઇવેન્ટમાં સિલ્વર મેડલ મેળવ્યાના થોડા જ સમય બાદ, ભારતની સ્ટાર શૂટર ઇલાવેનિલ વાલરિવને 10m એર રાઇફલની ઇન્ડિવિજ્યુઅલ (વ્યક્તિગત) ઇવેન્ટમાં પણ શાનદાર પ્રદર્શન કરીને વધુ એક સિલ્વર મેડલ પોતાના નામે કર્યો હતો. આ સાથે ઇલાવેનિલે એક જ દિવસે દેશ માટે 2 સિલ્વર મેડલ જીતીને નવો કીર્તિમાન સ્થાપિત કર્યો છે.
ભારતીય નિશાનેબાજો તરફથી મળેલી આ સફળતાએ એશિયન ગેમ્સમાં ભારતના મેડલ ટેલીમાં મોટો સ્કોર ઊભો કરવાની આશા જીવંત કરી દીધી છે.
