અમેરિકા : શિકાગો નજીક આવેલા એક પ્રખ્યાત હિન્દુ મંદિરમાં સામૂહિક ગોળીબાર (માસ શૂટિંગ) કરવાનું કાવતરું ઘડવાના આરોપી ૧૯ વર્ષીય યુવકે અદાલતમાં પોતાની સામેના તમામ આરોપોને નકારી કાઢતા પોતાને નિર્દોષ (Not Guilty) જાહેર કર્યો છે. સ્થાનિક મીડિયા અહેવાલો અનુસાર આ માહિતી આપવામાં આવી છે.
આરોપી એલેક્ઝાન્ડ્રોસ પાપોરાકિસ (Alexandros Paporakis) પર આરોપ છે કે તેણે ૧૧ ઓક્ટોબરના રોજ, એટલે કે નવરાત્રીના પ્રથમ દિવસે ઇલિનોઇસના ઓરોરા સ્થિત શ્રી વેંકટેશ્વર સ્વામી મંદિર પર હુમલો કરવાની યોજના બનાવી હતી. જોકે, અધિકારીઓના જણાવ્યા અનુસાર, હુમલા સમયે તેની પાસે રહેલી બંદૂક જામ થઈ જવાને કારણે તેમાંથી ગોળી ચાલી શકી ન હતી, જેના પરિણામે તેનું આ ભયાનક કાવતરું નિષ્ફળ ગયું હતું અને મોટી જાનહાનિ ટળી હતી.
સ્થાનિક અખબાર ‘ડેઇલી હેરાલ્ડ’ના અહેવાલ મુજબ, ગુરુવારે રોલિંગ મીડોઝ થર્ડ મ્યુનિસિપલ ડિસ્ટ્રિક્ટ કોર્ટહાઉસમાં કૂક કાઉન્ટીના જજ માર્ક માર્ટિન સમક્ષ પાપોરાકિસને રજૂ કરવામાં આવ્યો હતો. શરૂઆતમાં તેના પર આતંકવાદી ધમકી આપવા અને હથિયારના ગેરકાયદેસર ઉપયોગનો એક-એક ગુનો નોંધવામાં આવ્યો હતો. પરંતુ બુધવારે પોલીસે તેના પર આતંકવાદ, આતંકવાદનો પ્રયાસ, સશસ્ત્ર હિંસા અને ગેરકાયદેસર હથિયારો રાખવા સંબંધિત અનેક ગંભીર વધારાના આરોપો ઉમેર્યા છે. કૂક કાઉન્ટી ગ્રાન્ડ જ્યુરીએ તેના પર આતંકવાદની ૬ કલમો, આતંકવાદી ધમકીની ૧૦ કલમો, સશસ્ત્ર હિંસાની ૨ કલમો, આતંકવાદના પ્રયાસની ૨ કલમો, ૧૬ ઇંચથી ઓછી લંબાઈની બેરલ ધરાવતી રાઇફલ રાખવા, એસોલ્ટ વેપન રાખવા અને સીરીયલ નંબર વગરના હથિયાર રાખવા સહિતના ગંભીર આરોપો ઘડ્યા છે.
તપાસમાં બહાર આવ્યું છે કે આરોપી ટેકો બેલ (Taco Bell) રેસ્ટોરન્ટમાં કામ કરતો હતો, જ્યાં તેણે પોતાના સહકર્મીઓને કહ્યું હતું કે તે ભારતીય લોકોની હત્યા કરવાની યોજના બનાવી રહ્યો છે. તેના સહકર્મીઓએ તુરંત જ સતર્કતા દાખવીને પોલીસને જાણ કરી હતી, જેના પગલે તે જ બપોરે પોલીસે તેની ધરપકડ કરી લીધી હતી.
ફરિયાદી પક્ષના જણાવ્યા અનુસાર, ઇલિનોઇસના પેલેટાઇનનો રહેવાસી પાપોરાકિસ પોતાની જાતને શ્વેત સર્વોપરિતાવાદી (White Supremacist) અને નિયો-નાઝી (Neo-Nazi) ગણાવતો હતો. તેણે બિન-શ્વેત લોકોની હત્યા કરવાની પોતાની વિકૃત કલ્પનાઓ દર્શાવતો એક દસ્તાવેજ પણ લખ્યો હતો. પોલીસે તેના ઘરેથી એક રાઇફલ, દારૂગોળો, ટેક્ટિકલ વેસ્ટ અને શ્વેત સર્વોપરિતાવાદી ઉગ્રવાદ સાથે સંકળાયેલા પ્રતીકો ધરાવતો એક પેચ પણ જપ્ત કર્યો છે. કોર્ટે આરોપીને સમાજ માટે ખતરો ગણાવીને તેને જેલમાં જ રાખવાનો (ડિટેન્શનનો) આદેશ આપ્યો છે. દરમિયાન, જે દિવસે હુમલાનું કાવતરું ઘડાયું હતું તે દિવસે મંદિરમાં હાજર રહેલા ભારતીય-અમેરિકન સાંસદ રાજા કૃષ્ણમૂર્તિએ અધિકારીઓને આરોપી સામે ‘હેટ ક્રાઇમ’ (દ્વેષપૂર્ણ અપરાધ) હેઠળ પણ ગુનો નોંધવા અનુરોધ કર્યો છે.






