ઉત્તર પ્રદેશમાં આગામી વર્ષે યોજાનારી વિધાનસભા ચૂંટણીને ધ્યાનમાં રાખીને રાજકીય ગતિવિધિઓ તેજ બની છે. મથુરામાં યોજાયેલા ચિંતન શિબિર બાદ મુખ્યમંત્રી યોગી આદિત્યનાથ મંગળવારે સાંજે દિલ્હી પહોંચ્યા હતા. અહીં તેમણે ભાજપના રાષ્ટ્રીય અધ્યક્ષ નિતિન નવીન અને કેન્દ્રીય ગૃહમંત્રી અમિત શાહ સાથે મુલાકાત કરી હતી. આ બેઠકોમાં ચૂંટણીની રણનીતિ, સાથી પક્ષો સાથે સીટની વહેંચણી અને ટિકિટ વિતરણ સહિતના મુદ્દાઓ પર ચર્ચા થઈ હોવાનું સૂત્રોએ જણાવ્યું છે.

દિલ્હી પહોંચ્યા બાદ CM યોગી સૌથી પહેલાં ભાજપ અધ્યક્ષ નિતિન નવીનના નિવાસસ્થાને પહોંચ્યા હતા. બંને નેતાઓ વચ્ચે લગભગ એક કલાક સુધી બેઠક ચાલી હતી. આ બેઠકમાં ભાજપના રાષ્ટ્રીય મહાસચિવ (સંગઠન) બીએલ સંતોષ પણ હાજર રહ્યા હતા.
સૂત્રોના જણાવ્યા અનુસાર, બેઠકમાં NDAના સહયોગી પક્ષો રાષ્ટ્રીય લોકદળ (RLD), સુહેલદેવ ભારતીય સમાજ પાર્ટી (SBSP), નિષાદ પાર્ટી અને અપના દળ (સોનેલાલ) સાથે ચૂંટણીલક્ષી તાલમેલ, ટિકિટ વિતરણમાં જાતિગત સમીકરણો અને સોશિયલ મીડિયા પર પ્રચારને વધુ આક્રમક બનાવવાની રણનીતિ અંગે ચર્ચા થઈ હતી. આ ઉપરાંત સમાજવાદી પાર્ટીના PDA નેરેટિવનો સામનો કરવા અંગે પણ વિચારવિમર્શ કરવામાં આવ્યો હતો.
અમિત શાહ સાથે SIR સહિતના મુદ્દાઓ પર ચર્ચા
નિતિન નવીન સાથેની બેઠક બાદ CM યોગી, બીએલ સંતોષ અને નિતિન નવીન અમિત શાહના નિવાસસ્થાને પહોંચ્યા હતા. અહીં એક કલાકથી વધુ સમય સુધી બેઠક ચાલી હતી. સૂત્રોના જણાવ્યા અનુસાર, બેઠકમાં મથુરા ચિંતન શિબિરમાં થયેલી ચર્ચાઓ અને આગામી ચૂંટણીની તૈયારીઓ અંગે વાતચીત થઈ હતી.
આ ઉપરાંત SIR પ્રક્રિયા દરમિયાન મતદાર યાદીમાંથી નામ કપાવાને કારણે થઈ શકે તેવા સંભવિત નુકસાનને ઓછું કરવાના મુદ્દે પણ ચર્ચા થઈ હતી. ભાજપની રણનીતિ અખિલેશ યાદવની ચૂંટણીલક્ષી ઝુંબેશનો સામનો કરવાની છે. સાથે જ કેન્દ્ર અને રાજ્ય સરકારનાં કામકાજને વધુ અસરકારક રીતે લોકો સુધી પહોંચાડવા માટે નવા પ્રચાર અભિયાન શરૂ કરવાની પણ તૈયારી ચાલી રહી છે.






