કર્ણાટકમાં કોંગ્રેસ સરકારના મંત્રીના નિવેદનથી વિવાદ

બેંગલુરુઃ કર્ણાટક સરકારના ઉચ્ચ શિક્ષણ મંત્રી બસવરાજપ રાયારેડ્ડીના એક નિવેદનને લઈને રાજ્યમાં રાજકીય વિવાદ ઊભો થયો છે. બસવરાજપ રાયારેડ્ડીએ ઇસ્લામને “અન્ય ધર્મો કરતાં શ્રેષ્ઠ” ગણાવ્યો હતો. ભાજપે કહ્યું છે કે મંત્રીએ આ નિવેદન બદલ હિંદુ સમુદાયની માફી માગવી જોઈએ અથવા પછી મંત્રી પદ પરથી રાજીનામું આપી દેવું જોઈએ.

રાયારેડ્ડી ભૂતપૂર્વ મુખ્ય મંત્રી સિદ્ધારમૈયાના નાણાકીય સલાહકાર રહી ચૂક્યા છે. આ મહિનાની શરૂઆતમાં થયેલા કેબિનેટ વિસ્તરણમાં તેમને ડી.કે. શિવકુમારની કેબિનેટમાં મંત્રી બનાવવામાં આવ્યા હતા. રાયારેડ્ડીના નિવેદનથી કર્ણાટક સરકારની મુશ્કેલી વધી છે, કારણ કે માત્ર બે દિવસ પહેલાં જ મંત્રી બી. નાગેન્દ્રને રાજીનામું આપવું પડ્યું હતું. ભાજપે નાગેન્દ્ર પર ભ્રષ્ટાચારમાં સામેલ હોવાના આરોપ લગાવ્યા હતા.

મક્કા જવાની ઇચ્છા વ્યક્ત કરી

મંત્રીએ કહ્યું હતું કે મારી ખૂબ ઇચ્છા છે કે હું મક્કા જાઉં, પરંતુ બિન-મુસ્લિમ હોવાને કારણે હું ત્યાં જઈ શકતો નથી. તેના માટે ઇસ્લામ સ્વીકારવો પડે છે, જે તે ધર્મની પોતાની પરંપરા છે. તેમણે લોકોને અપીલ કરી કે માત્ર મસ્જિદમાં જવા અથવા નામ પૂરતું ધર્મનું પાલન કરવાને બદલે કુરાનની સારી શીખને પોતાના જીવનમાં ઉતારવી જોઈએ અને કટ્ટરતા તથા જાતિવાદથી દૂર રહેવું જોઈએ.

રાયારેડ્ડીએ શું કહ્યું હતું?

કોપ્પલ જિલ્લાના કુકનૂર શહેરમાં એક કાર્યક્રમ દરમિયાન રાયારેડ્ડીએ ઇસ્લામને મહાન અને ખૂબ જ માનવીય ધર્મ ગણાવ્યો હતો. તેમણે કહ્યું હતું કે આ ધર્મ વિજ્ઞાન પર આધારિત છે અને લોકોને જીવન જીવવાની રીત શીખવે છે. મંત્રીએ કહ્યું હતું કે જે લોકો ઇસ્લામ વિશે કંઈ જાણતા નથી, તેઓ ખોટી ધારણાઓ બનાવી લે છે અને તેના વિશે ખોટો અભિપ્રાય ધરાવે છે. હું કહેવા માગું છું કે ઇસ્લામ અન્ય તમામ ધર્મોથી શ્રેષ્ઠ છે, કારણ કે તેની શરૂઆત માનવતાથી થાય છે.

સનાતન હિંદુ ધર્મ અને મંદિરોનું અપમાન કરવાનો ભાજપનો આરોપ

રાયારેડ્ડીનું નિવેદન સામે આવ્યા બાદ કર્ણાટક વિધાનસભામાં ભાજપના નેતા આર. અશોકે મુખ્યમંત્રી ડી.કે. શિવકુમાર પર નિશાન સાધ્યું. તેમણે આરોપ લગાવ્યો કે રાયારેડ્ડીએ સનાતન હિંદુ ધર્મ અને મંદિરોનું અપમાન કર્યું છે.

RELATED ARTICLESMORE FROM AUTHOR