ઉત્તરાખંડના એક કાર્યક્રમમાં જાણીતા ગાયક દલેર મહેંદીની જાહેરમાં ટીકા કરીને ચર્ચામાં આવેલા મંત્રી સુબોધ ઉનિયાલે ફરી એકવાર આ મામલે નિવેદન આપ્યું છે. તેમણે સ્પષ્ટ શબ્દોમાં કહ્યું છે કે, ‘હું રાજીનામું આપી દેવાનું પસંદ કરીશ, પરંતુ માફી નહીં માગું.’ તેમના આ નિવેદન બાદ દલેર મહેંદી સાથે જોડાયેલો વિવાદ ફરી ચર્ચામાં આવ્યો છે.
શું કહ્યું સુબોધ ઉનિયાલે?
દેહરાદૂનમાં યોજાયેલા એક કાર્યક્રમમાં સંબોધન દરમિયાન સુબોધ ઉનિયાલે કહ્યું હતું કે, ‘કોઈએ મને પૂછ્યું કે જો હાઈકમાન્ડ તમને માફી માગવાનું કહે તો તમે શું કરશો? તેના જવાબમાં મેં કહ્યું કે હું માફી માગવા કરતાં રાજીનામું આપવાનું પસંદ કરીશ. જીવનમાં સૌથી મહત્ત્વનું આત્મસન્માન છે.’
તેમનો આ વીડિયો સોશિયલ મીડિયા પર વાયરલ થઈ રહ્યો છે.
શું છે સમગ્ર વિવાદ?
જાણીતા ગાયક દલેર મહેંદી ઉત્તરાખંડના એક કાર્યક્રમમાં સ્ટેજ પર પર્ફોર્મ કરી રહ્યા હતા. આ દરમિયાન ઉત્તરાખંડ સરકારના મંત્રી સુબોધ ઉનિયાલ સ્ટેજ પર પહોંચ્યા હતા અને તેમણે દલેર મહેંદીની જાહેરમાં ટીકા કરી હતી. આ ઘટનાનો વીડિયો સોશિયલ મીડિયા પર વાયરલ થયા બાદ બોલિવૂડના અનેક કલાકારો દલેર મહેંદીના સમર્થનમાં આવ્યા હતા. કલાકારોએ કહ્યું હતું કે દલેર મહેંદીની તબિયત સારી ન હોવા છતાં તેઓ કાર્યક્રમમાં પર્ફોર્મ કરવા પહોંચ્યા હતા.
આ મામલે દલેર મહેંદીના ભાઈ અને ગાયક મીકા સિંહે પણ નારાજગી વ્યક્ત કરી હતી અને મંત્રી પાસે માફીની માગ કરી હતી.
મીકા સિંહની ટીમે કર્યો હતો માફી માગ્યાનો દાવો
થોડા દિવસ પહેલાં મીકા સિંહની ટીમે દાવો કર્યો હતો કે મંત્રી સુબોધ ઉનિયાલે ફોન પર દલેર મહેંદીની માફી માગી લીધી છે. આ સમાચાર સામે આવ્યા બાદ મીકા સિંહે ખુશી વ્યક્ત કરી હતી. જોકે, હવે સુબોધ ઉનિયાલના તાજેતરના નિવેદનથી આ મામલે ફરી સવાલો ઊભા થયા છે. તેમણે માફી માગવાનો ઇનકાર કરતાં રાજીનામું આપવાની વાત કરી છે. હવે આ વિવાદ આગળ શું વળાંક લે છે તે જોવું રહ્યું.
