વડોદરાઃ સાયબર અપરાધને લઈને સરકારથી લઈને સામાજિક સંગઠનો સુધી તમામ લોકો જાગૃતિ અભિયાન ચલાવી રહ્યા છે, પરંતુ સાયબર છેતરપિંડી અને ‘ડિજિટલ અરેસ્ટ’ના કિસ્સા અટકવાનું નામ નથી લઈ રહ્યા. તાજો કિસ્સો ગુજરાતના વડોદરાનો છે, જ્યાં સાયબર ઠગોએ CBI અને રિઝર્વ બેંક (RBI)ના અધિકારી બનીને માતા-પુત્રને ‘ડિજિટલ અરેસ્ટ’ કર્યા અને ત્યાર બાદ 1 કરોડ 53 લાખ રૂપિયાથી વધુની છેતરપિંડી કરી હતી.
પીડિત પરિવારે આ મામલે હવે વડોદરા સાયબર પોલીસમાં ફરિયાદ નોંધાવી છે. પ્રાપ્ત માહિતી મુજબ 31 જુલાઈએ એક અજાણી વ્યક્તિએ એક વૃદ્ધ મહિલાને ફોન કર્યો હતો. ફોન કરનારે જણાવ્યું હતું કે તેમના દિવંગત પતિને નામે મુંબઈથી એક ક્રેડિટ કાર્ડ જારી કરવામાં આવ્યું છે અને તેના દ્વારા 1 લાખ રૂપિયાનું શંકાસ્પદ ટ્રાન્ઝેક્શન કરવામાં આવ્યું છે.ગભરાઈ ગયેલી વૃદ્ધ મહિલાએ આ અંગે પોતાના પુત્રને જાણ કરી હતી. ત્યાર બાદ તરત જ વોટ્સએપ પર વિડિયો કોલ આવ્યો, જેમાં એક વ્યક્તિ પોલીસની વર્દીમાં જોવા મળી હતી. 3થી 12 ઓગસ્ટ દરમિયાન આરોપીઓએ RBI અને અન્ય બેંકોના સત્તાવાર દેખાતા નકલી લેટરહેડ પર નકલી સહી અને મોહરવાળા પત્રો મોકલ્યા હતા. આરોપીઓએ તપાસ પૂર્ણ ન થાય ત્યાં સુધી તમામ રકમ એક સરકારી ખાતામાં જમા કરાવવાનું કહ્યું હતું. ત્યાર બાદ દબાણ બનાવીને ફિક્સ્ડ ડિપોઝિટ (FD) તોડાવી અને અન્ય ખાતાઓમાંથી કુલ 1 કરોડ 53 લાખ 4047 રૂપિયા એક જ ખાતામાં ટ્રાન્સફર કરાવી લીધા હતા.
ત્યાર બાદ પરિવારને ઓળખતી એક વ્યક્તિએ આ મામલે સાયબર છેતરપિંડીની આશંકા વ્યક્ત કરી હતી. પોતે છેતરપિંડીનો ભોગ બન્યા હોવાની જાણ થતાં પરિવારના પગ નીચેથી જમીન સરકી ગઈ હતી. પરિવારે સાયબર પોલીસ સ્ટેશન પહોંચીને ફરિયાદ નોંધાવી હતી. વડોદરા સાયબર પોલીસે કેસ નોંધીને સમગ્ર મામલાની તપાસ શરૂ કરી છે.
