આ વૈશ્વિક અસ્થિરતા વચ્ચે સુરક્ષિત રોકાણ ગણાતા સોના અને ચાંદીની કિંમતોમાં સતત તેજી જોવા મળી રહી છે અને બંને કિંમતી ધાતુઓ નવી ઊંચાઈઓ તરફ વધી રહી છે. ચાલુ મહિનામાં મલ્ટી કમોડિટી એક્સચેન્જ (MCX) પર સોનાની કિંમત આશરે 12,000 રૂપિયા વધી ચૂકી છે, જ્યારે ચાંદીના ભાવમાં 22,000 રૂપિયાનો મોટો ઉછાળો આવ્યો છે. આજે પણ સોના-ચાંદીમાં તેજીનો સિલસિલો જળવાઈ રહ્યો છે.
MCX પર સોના-ચાંદીના હાલના ભાવ
બુધવારે એમસીએક્સ (MCX) પર સોનાનો ભાવ 1,200 રૂપિયા વધીને 1,54,964 રૂપિયા પ્રતિ 10 ગ્રામ પર પહોંચી ગયો હતો. બીજી તરફ, ચાંદીની કિંમત 3,692 રૂપિયાના ઉછાળા સાથે 2,39,351 રૂપિયા પ્રતિ કિલોગ્રામ પર પહોંચી ગઈ હતી.
વર્ષ 2026 માટે Axis Direct એ પહેલા MCX ગોલ્ડ માટે 1.40 લાખ રૂપિયાથી 1.45 લાખ રૂપિયા પ્રતિ 10 ગ્રામનો ટાર્ગેટ આપ્યો હતો, જે હવે પાર થઈ ચૂક્યો છે. જોકે, ટેકનિકલ એનાલિસિસ મુજબ જો આવી જ મજબૂત તેજી ચાલુ રહેશે તો સોનું 1.60 લાખ રૂપિયાના સ્તરને પણ પાર કરી શકે છે. બીજી તરફ, મોતીલાલ ઓસવાલે ચાંદી માટે પોતાનો ટાર્ગેટ 3.20 લાખ રૂપિયા પ્રતિ કિલો રાખ્યો છે, જે વર્ષ 2026 ના અંત સુધીમાં પહોંચી શકે છે. રોયટર્સના અહેવાલ મુજબ, આંતરરાષ્ટ્રીય બજારમાં સોનું 4,509 ડોલર પ્રતિ ઔંસ સુધી જઈ શકે છે અને ચાંદી 72 ડોલર પ્રતિ ઔંસની સપાટી તોડી શકે છે.