સાઓ પાઉલો : ભારત અને બ્રાઝિલે અંતરિક્ષ ક્ષેત્રે પોતાના સહયોગને વધુ મજબૂત બનાવતા સેટેલાઇટ લૉન્ચ વ્હીકલ (Satellite Launch Vehicle)ના સંયુક્ત વિકાસ માટે હાથ મિલાવ્યા છે. બંને દેશોની કંપનીઓ વચ્ચે થયેલા આ કરાર હેઠળ ઓછામાં ઓછા 100 કિલોગ્રામ વજનના પેલોડને લોઅર અર્થ ઓર્બિટ (LEO) માં સ્થાપિત કરી શકે તેવું શક્તિશાળી લૉન્ચ વ્હીકલ વિકસાવવામાં આવશે.
ઓક્ટોબર મહિનામાં તુર્કીના એન્ટાલ્યા ખાતે યોજાયેલા ઇન્ટરનેશનલ એસ્ટ્રોનોટિકલ કોંગ્રેસ 2026 દરમિયાન આ ઐતિહાસિક સમજૂતી કરાર (MoU) પર હસ્તાક્ષર કરવામાં આવ્યા હતા. આ કરાર બ્રાઝિલના માઇક્રો લૉન્ચર પ્રોગ્રામના કન્સોર્ટિયમ સભ્ય ‘કન્સર્ટ ટેક્નોલોજીસ’ (Concert Technologies) અને ભારતીય સ્પેસ સ્ટાર્ટઅપ ‘સ્કાયરૂટ એરોસ્પેસ’ (Skyroot Aerospace) વચ્ચે થયો છે. આ ભાગીદારીથી બંને દેશોને વૈશ્વિક અંતરિક્ષ બજારમાં સસ્તી અને સુલભ અવકાશ સેવાઓ પૂરી પાડવામાં નવી તકો ઉપલબ્ધ થશે.
ભારત અને બ્રાઝિલ વચ્ચે બે દાયકાથી વધુ સમયથી અંતરિક્ષ સહયોગ રહેલો છે. અગાઉ ભારતના સ્પેસ ઇન્ફ્રાસ્ટ્રક્ચરની મદદથી બ્રાઝિલના ‘એમેઝોનિયા-1’ (Amazonia-1) ઉપગ્રહનું સફળ પ્રક્ષેપણ પણ કરવામાં આવ્યું હતું. આ નવો કરાર બંને દેશોની ટેકનોલોજી અને એરોસ્પેસ ઉદ્યોગને નવી ઊંચાઈઓ પર લઈ જશે.
