તહેવારો પહેલાં જ મોંઘવારીનો આકરો પ્રહાર: દૂધના ભાવમાં સીધો રૂ. 9નો વધારો, 1 સપ્ટેમ્બરથી નવી કિંમતો લાગુ
દેશની આર્થિક રાજધાની મુંબઈમાં આગામી તહેવારોની મોસમ શરૂ થાય તે પહેલાં જ સામાન્ય જનતાના ખિસ્સા પર મોંઘવારીનો મોટો બોજ આવી પડ્યો છે. મુંબઈ મિલ્ક પ્રોડ્યુસર્સ એસોસિએશન (MMPA) એ દૂધના જથ્થાબંધ ભાવમાં પ્રતિ લિટરે રૂ. 9નો તોતિંગ વધારો ઝીંક્યો છે. ૧ સપ્ટેમ્બર ૨૦૨૬થી તાજા ભેંસના દૂધની જથ્થાબંધ કિંમત રૂ. 93 થી વધીને સીધી રૂ. 102 પ્રતિ લિટર થઈ જશે.
MMPA ના નિર્ણય અનુસાર, આ નવી કિંમતો ૧ સપ્ટેમ્બર ૨૦૨૬થી અમલમાં આવશે અને ૨૮ ફેબ્રુઆરી ૨૦૨૭ સુધી લાગુ રહેશે. એટલે કે મુંબઈવાસીઓએ આગામી છ મહિના સુધી દૂધ ખરીદવા માટે વધુ નાણાં ચૂકવવા પડશે. ઉલ્લેખનીય છે કે, એસોસિએશનના આશરે ૭૦ વર્ષના ઇતિહાસમાં એકસાથે કરવામાં આવેલો આ સૌથી મોટો ભાવવધારો માનવામાં આવી રહ્યો છે.
દૂધના ભાવમાં આટલા મોટા વધારા પાછળ પશુઆહાર અને ઘાસચારાની મોંઘવારી મુખ્ય કારણ છે. ઉત્પાદકોના જણાવ્યા મુજબ, ખાણ, ચણા ચુની અને તુવેર ચુની જેવા પશુપાલન માટેના મુખ્ય આહારના ભાવમાં ૨૫ ટકા સુધીનો વધારો થયો છે. આ ઉપરાંત દૂધાળા પશુઓની કિંમતો વધતાં ઉત્પાદન ખર્ચમાં પણ મજબૂત ઉછાળો આવ્યો છે.
મુંબઈમાં ૩,૦૦૦થી વધુ છૂટક વેપારીઓ દ્વારા આ દૂધનું વેચાણ કરવામાં આવે છે. જથ્થાબંધ ભાવ રૂ. 102 થતાં રિટેલ માર્કેટમાં ગ્રાહકો સુધી પહોંચતા દૂધનો ભાવ તેનાથી પણ વધુ હોઈ શકે છે. ગણેશોત્સવ અને આગામી તહેવારો દરમિયાન દૂધ, મીઠાઈ અને ડેરી પ્રોડક્ટ્સની માંગમાં નોંધપાત્ર વધારો થાય છે, ત્યારે આ ભાવવધારાથી ગૃહિણીઓનું બજેટ ખોરવાઈ જવાની પૂરેપૂરી શક્યતા છે.