જમ્મુ-કાશ્મીરના મુખ્યમંત્રી ઉમર અબ્દુલ્લાએ વરિષ્ઠ પત્રકાર નિધિ રાજદાન સાથે લગ્નગ્રંથિથી જોડાયા છે. શનિવારે સોશિયલ મીડિયાના માધ્યમથી તેમણે આ માહિતી જાહેર કરી હતી. ઉમર અબ્દુલ્લાએ ઇન્સ્ટાગ્રામ પર નિધિ રાજદાન સાથેની એક સુંદર તસવીર શેર કરતા લખ્યું હતું કે, ‘ગઈકાલે એક નવી યાત્રાનો પ્રારંભ થયો છે.’ આ પોસ્ટમાં તેમણે નિધિ રાજદાનને ટેગ પણ કર્યા છે.
ઉમર અબ્દુલ્લાએ પોતાના લગ્નના એક દિવસ બાદ આ જાહેરાત કરી છે. આ સાથે જ તેમના જીવનના એક નવા અધ્યાયનો પ્રારંભ થયો છે. ઉમર અબ્દુલ્લા અને નિધિ રાજદાનના લગ્ન એવા સમયે થયા છે, જ્યારે લગભગ 3 મહિના પહેલા સર્વોચ્ચ અદાલતે તેમની અલગ રહેતી પત્ની પાયલ અબ્દુલ્લા સાથેના છૂટાછેડાને મંજૂરી આપવા માટે સંમતિ દર્શાવી હતી. 31 જુલાઈ 2026ના રોજ સર્વોચ્ચ અદાલતે ઉમર અબ્દુલ્લા અને પાયલ અબ્દુલ્લાના છૂટાછેડાને મંજૂરી આપવાની વાત કહી હતી. તે સમયે બંને પક્ષોએ અદાલત સમક્ષ સ્પષ્ટ કર્યું હતું કે તેઓ પરસ્પર સંમતિથી અલગ થવા અને તમામ પડતર વિવાદોનો ઉકેલ લાવવા માટે તૈયાર છે. આ સાથે બંનેએ એકબીજા સામે નોંધાવેલા તમામ કેસો પાછા ખેંચવા પર પણ સંમતિ વ્યક્ત કરી હતી.
આ મામલો સર્વોચ્ચ અદાલતમાં ત્યારે પહોંચ્યો હતો જ્યારે ઉમર અબ્દુલ્લાએ દિલ્હી વડી અદાલતના એ ચુકાદાને પડકાર્યો હતો, જેમાં તેમને છૂટાછેડા આપવાનો ઇનકાર કરવામાં આવ્યો હતો. સુનાવણી દરમિયાન બંને પક્ષોએ બંધારણના અનુચ્છેદ 142 હેઠળ પરસ્પર સંમતિથી છૂટાછેડા મેળવવા માટે સંયુક્ત અરજી કરી હતી. વરિષ્ઠ વકીલ કપિલ સિબ્બલે બંને તરફથી અદાલતને જાણ કરી હતી કે તેઓ પોતાના મતભેદો ઉકેલવા માટે સહમત થઈ ગયા છે.
1994માં થયા હતા પાયલ સાથે લગ્ન
ઉમર અબ્દુલ્લા અને પાયલ અબ્દુલ્લાના લગ્ન 1994માં થયા હતા. આ બંનેની મુલાકાત દિલ્હીની ઓબેરોય હોટલમાં કામ કરવા દરમિયાન થઈ હતી. બંનેને બે પુત્રો ઝાહિર અને ઝામિર છે. બંને 2009થી અલગ રહેતા હતા. ઉમર અબ્દુલ્લાએ 2011માં જ પોતાના અલગ થવાની જાણકારી આપી હતી. સર્વોચ્ચ અદાલતે પણ નોંધ્યું હતું કે બંને ઘણા વર્ષોથી અલગ રહી રહ્યા હતા.