દિલ્હીમાં વિરોધ પ્રદર્શન દરમિયાન મમતા બેનર્જી, કેજરીવાલની અટકાયત

નવી દિલ્હી: દેશના મુખ્ય ચૂંટણી કમિશનર (CEC) જ્ઞાનેશ કુમારને પદ પરથી હટાવવાની માંગ સાથે થઈ રહેલા ઉગ્ર વિરોધ પ્રદર્શનો વચ્ચે દિલ્હી પોલીસે તૃણમૂલ કોંગ્રેસ (TMC)ના સુપ્રીમો અને પશ્ચિમ બંગાળના પૂર્વ મુખ્યમંત્રી મમતા બેનર્જીની અટકાયત કરી છે. સાથે જ તૃણમૂલ કોંગ્રેસ જૂથના રાજ્યસભાના સાંસદ ડેરેક ઓ’બ્રાયન અને ડોલા સેન સહિત અન્ય પાંચ નેતાની પણ અટકાયત કરવામાં આવી હતી.

આ જ સમયે, આપ (AAP) ના સુપ્રીમો અને દિલ્હીના પૂર્વ મુખ્યમંત્રી અરવિંદ કેજરીવાલની પણ દિલ્હી પોલીસ દ્વારા લોધી એસ્ટેટ બહારથી અટકાયત કરવામાં આવી હતી.

દેશની રાજધાનીમાં મુખ્ય ચૂંટણી કમિશનર જ્ઞાનેશ કુમાર સામે કોકરોચ જનતા પાર્ટી (CJP) દ્વારા બોલાવવામાં આવેલા ‘જંતર-મંતર ૨.૦’ આંદોલન પહેલાં પોલીસે કડક કાર્યવાહી કરીને વિપક્ષી નેતાઓની અટકાયત કરી હતી.

‘લોકશાહી માટે કાળો દિવસ’

એક્સ (X) પર એક પોસ્ટમાં, મમતા ઓલ ઈન્ડિયા તૃણમૂલ કોંગ્રેસે તેમના નેતાની અટકાયતને “ધરપકડ” ગણાવતા સવાલ કર્યો હતો કે, “શાંતિપૂર્ણ રીતે વિરોધ પ્રદર્શન કરનારાઓની ધરપકડ કરવી ક્યારથી આપણી લોકશાહીમાં સામાન્ય બાબત બની ગઈ છે?”

પક્ષે વધુમાં ઉમેર્યું હતું કે, “જ્યારે શાંતિપૂર્ણ અસંતોષનો સામનો સંવાદના બદલે ધરપકડો દ્વારા કરવામાં આવે છે, ત્યારે તે આપણા લોકશાહી મૂલ્યોની સ્થિતિ સામે ગંભીર સવાલો ઊભા કરે છે.”

પક્ષે આગળ લખ્યું કે, “લોકશાહી માટે આ એક કાળો દિવસ છે. આ એક યાદ અપાવે છે કે તેનું રક્ષણ કરવાની લડાઈ ક્યારેય રોકાવી જોઈએ નહીં.”

અટકાયત બાદ મમતા બેનર્જીએ જણાવ્યું હતું કે, તેમની અને પાંચ સાંસદોની અટકાયત કર્યા પછી જ્યાં તેમને લઈ જવામાં આવ્યા હતા તે દ્વારકા નોર્થ પોલીસ સ્ટેશનમાં તેમણે ધરણા શરૂ કર્યા હતા. તેમણે દાવો કર્યો હતો કે તેમનું “અપહરણ” કરવામાં આવ્યું હતું અને તેમને જેલની વાનમાં બે કલાક સુધી રસ્તાઓ પર ફેરવવામાં આવ્યા હતા. તેમણે જણાવ્યું કે તેઓ દિલ્હીમાં જ રહેશે અને વિરોધમાં સોમવારે ઈન્ડિયા (INDIA) ગઠબંધનની માર્ચમાં જોડાશે.

અટકાયત બાદ કેજરીવાલે પણ કહ્યું હતું કે, રાજધાનીમાં CJPના પ્રસ્તાવિત વિરોધ પ્રદર્શનને લઈને ચાલી રહેલી ઉત્તેજના વચ્ચે તેમની પાર્ટી વડાપ્રધાન નરેન્દ્ર મોદીની “સરમુખત્યારશાહી”થી ડરતી નથી. અટકાયત બાદ અન્ય આપ નેતાઓ સાથે જોવા મળેલા અરવિંદ કેજરીવાલે કહ્યું હતું કે દેશનો યુવા “જાગી ગયો છે.” દિલ્હીમાં ચાલી રહેલી ઉત્તેજના વચ્ચે આપ નેતાઓ સંજય સિંહ, સૌરભ ભારદ્વાજ અને દુર્ગેશ પાઠકની પણ અટકાયત કરવામાં આવી હતી.

બીજી તરફ, કેરળ ભવન બહાર વિરોધ પ્રદર્શન બાદ કેરળના પૂર્વ મુખ્યમંત્રી પિનારાઈ વિજયન, સીપીઆઈ(એમ) ના સાંસદ જોન બ્રિટાસ અને પાર્ટીના વરિષ્ઠ નેતા કે.એન. બાલગોપાલની પણ દિલ્હી પોલીસ દ્વારા અટકાયત કરવામાં આવી હતી. નેતાઓને પોલીસ જીપમાં છત્રસાલ સ્ટેડિયમ લઈ જવામાં આવ્યા હતા અને બાદમાં ત્યાંથી બીજી જગ્યાએ ખસેડવામાં આવ્યા હતા. તેમણે દિલ્હી પોલીસ અને કેન્દ્રીય દળો પર નાગરિક સ્વતંત્રતાઓ પર અંકુશ લગાવવાનો આરોપ મૂક્યો હતો અને કહ્યું હતું કે, “દિલ્હી ઘેરાબંધી હેઠળ છે.”

દિલ્હી હાઈ એલર્ટ પર

મુખ્ય ચૂંટણી કમિશનર જ્ઞાનેશ કુમાર વિરુદ્ધ CJPના પ્રસ્તાવિત વિરોધ પ્રદર્શન પહેલાં બેરિકેડ્સ, લાઉડસ્પીકર્સ અને મોટી સંખ્યામાં પોલીસ બંદોબસ્ત સાથે દિલ્હીમાં કડક સુરક્ષા ગોઠવવામાં આવી હતી. મુખ્ય નેતાઓની દિલ્હી પહોંચતા જ અટકાયત કરવામાં આવી હતી. યુટ્યુબર ધ્રુવ રાઠી સહિત ૨,૦૦૦ થી વધુ લોકોની જંતર-મંતર પર અટકાયત કરવામાં આવી હતી, જેથી વિરોધ પ્રદર્શન થતું રોકી શકાય.

RELATED ARTICLESMORE FROM AUTHOR