મુંબઈના પૃથ્વી થિયેટરમાં આગામી 11 અને 12 ઓગસ્ટે ગુજરાતી રંગભૂમિનો અનોખો સંગમ જોવા મળશે. પ્રિતેશ સોઢાના દિગ્દર્શનમાં ‘યુટોપિયા’ દ્વારા ત્રણ અલગ વિષય અને શૈલી ધરાવતા નાટ્યપ્રયોગો રજૂ કરવામાં આવશે. બે દિવસમાં નારી સંવેદનાથી લઈને ગુજરાતી સાહિત્ય અને રમેશ પારેખની કવિતાઓ સુધીના વિવિધ રંગો દર્શકો સમક્ષ રજૂ થશે.
પૃથ્વી થિયેટરમાં આ બે દિવસ દરમિયાન ગુજરાતી રંગભૂમિ, ટીવી અને ફિલ્મ જગતના નામી કલાકારો પોતાના નાટકો દર્શકો સમક્ષ રજૂ કરશે. 11 ઓગસ્ટે ‘સ્ત્રી એટલે….’ નાટ્યપ્રયોગ રજૂ થશે. વિવિધ નારી સંવેદનાઓને કેન્દ્રમાં રાખતા આ પ્રયોગમાં ડિમ્પલ આનંદપરા, અર્ચના શાહ, રિંકુ પટેલ, કલ્પના શાહ અને વિધિ ચિતલિયા પંડ્યા અભિનય કરશે. આ પ્રસ્તુતિમાં ગુજરાતી સર્જકોની વાર્તાઓને નાટ્યાત્મક સ્વરૂપ આપવામાં આવ્યું છે.રિંકુ પટેલ ભાગ્યેશ જહાં લિખિત ‘ગાંધારી’ની પણ પ્રસ્તુતિ કરશે.
જ્યારે 12 ઓગસ્ટે ‘દાસ્તાનગોઈ ગુજરાતી’નું મંચન થશે. ઝવેરચંદ મેઘાણી અને ધૂમકેતુના સર્જન પર આધારિત આ પ્રયોગમાં ભામિની ઓઝા ગાંધી, ભક્તિ રાઠોડ, અલ્પના બુચ અને પ્રતાપ સચદેવ પોતાની આગવી રજૂઆતની શૈલીમાં વાર્તાઓને જીવંત કરશે. આ ઉપરાંત ગીતા માણેક, ભાગ્યેશ જહાં, જ્હોની શાહ અને સુષ્મા શેઠની વાર્તાઓ પણ વિવિધ કલાકારો રજૂ કરશે. આ જ દિવસે સાંજે રમેશ પારેખની કવિતાઓ પરથી પ્રેરિત મંથન જોશી લિખિત ‘કોશેટો’ ભજવાશે. નાટકમાં દર્શન જરીવાલા સાથે સેજલ પોન્દા, પૂજા ગામી, હેમાક્ષ વૈષ્ણવ અને દીપ પારેખ સહિતના કલાકારો છે.
‘યુટોપિયા’ના આ ત્રિવેણીસંગમ સાથે કલાકારો માટે પૃથ્વી થિયેટરનું મંચ પણ ખાસ છે. યુટોપિયાના આ બે દિવસમાં ગુજરાતી રંગમંચના સાહિત્ય, કવિતા અને નારી સંવેદનાના વિવિધ રંગો એક જ મંચ પર જોવા મળશે.
