નવી દિલ્હીઃ હરિયાણાની આર્થિક રાજધાની ગુરુગ્રામના ઘણા વિસ્તારોમાં અંધારપટ છવાયો છે. વીજ કર્મચારીઓ દ્વારા બોલાવવામાં આવેલી અચોક્કસ મુદતની હડતાળની સીધી અસર હવે શહેરમાં સ્પષ્ટપણે જોવા મળી રહી છે. ઘણા રહેણાંક સેક્ટરોમાં કલાકોથી વીજળી ગૂલ છે, જ્યારે દૌલતાબાદ, કાદીપુર અને સેક્ટર 37 જેવા ઔદ્યોગિક વિસ્તારોની ફેક્ટરીઓમાં કામકાજ ઠપ થયાં છે.
વીજળી ક્યારે પાછી આવશે તેનો કોઈ ચોક્કસ જવાબ ન તો અધિકારીઓ પાસે છે કે ન તો સિસ્ટમ પાસે. શહેર અંધારા અને દહેશતના સાયા હેઠળ રાત વિતાવવા મજબૂર બન્યું છે. આવી સ્થિતિમાં વીજળી ન આવવાથી પરેશાન લોકો રસ્તા પર ઊતરી આવ્યા છે અને ચારેય તરફ અફરા-તફરીનો માહોલ સર્જાયો છે.
કોઈ પણ પ્રકારના મોટા ઉપદ્રવ, તોડફોડ કે ગ્રીડને નુકસાન પહોંચાડવાની આશંકાને ધ્યાનમાં રાખીને જિલ્લાનાં તમામ વીજ સબ-સ્ટેશનો અને પાવર હાઉસ પર ભારે પોલીસ કાફલો તૈનાત કરીને તેમને છાવણીમાં ફેરવી દેવામાં આવ્યાં છે.
વીજ સંકટથી પીવાના પાણી પુરવઠો પણ ઠપ
વીજ કર્મચારીઓની હડતાળ વચ્ચે ઝજ્જર છાવણીની વાલ્મીકિ બસ્તીમાં પણ વીજળી ગૂલ થઈ ગઈ છે. કોલોનીના રહેવાસીઓએ જણાવ્યું કે બે દિવસથી લાઈટ નથી આવી રહી અને તેમનાં બાળકો મોબાઈલ ટોર્ચના સહારાથી શાળાનું હોમવર્ક કરવા મજબૂર બન્યાં છે. વીજળી ન આવવાને કારણે રોજિંદા કામકાજ અને પીવાના પાણીનો પુરવઠો પણ ઠપ થઈ ગયો છે. કેટલાક લોકો જનરેટર તો કેટલાક ઇન્વર્ટરના સહારે કામ ચલાવી રહ્યા છે. ઘણા લોકોના તો ઇન્વર્ટર પણ બંધ થઈ ગયાં છે અને લોકો અંધારામાં રહેવા મજબૂર બન્યા છે.
VIDEO | Haryana: Residents blocked the Daulatabad flyover in Gurugram on Thursday evening alleging power outages in several parts of the city.
This comes amid strikes by the All India Power Corporation and various employee unions over demands for the restoration of power supply.
(Full video available on PTI Videos – https://t.co/bIyFWTfmBd)
— Press Trust of India (@PTI_News) October 22, 2026
ખાનગીકરણના નિર્ણય સામે રસ્તા પર કર્મચારીઓ
હરિયાણા પાવર કર્મચારી અને એન્જિનિયર્સ સંયુક્ત સંઘર્ષ મોરચાના બેનર હેઠળ કર્મચારીઓ 22 થી 24 ઓક્ટોબર સુધી ત્રણ દિવસની હડતાળ પર છે. વાસ્તવમાં, હરિયાણા વીજ નિયામક આયોગ (HERC) એ તાજેતરમાં ગુરુગ્રામ અને નૂહમાં વીજ વિતરણ માટે ‘ઇલેવન પાવર પ્રાઇવેટ લિમિટેડ’ને 25 વર્ષ માટે સમાંતર લાયસન્સ આપ્યું છે. કર્મચારીઓનો આરોપ છે કે આ પગલું ચોર દરવાજેથી કરવામાં આવી રહેલું ખાનગીકરણ છે, જેનાથી વધુ મહેસૂલ આપતા ઔદ્યોગિક અને વાણિજ્યિક ક્ષેત્રો ખાનગી હાથોમાં ચાલ્યા જશે. આનાથી રાજ્યની માલિકીની દક્ષિણ હરિયાણા વીજ વિતરણ નિગમ (DHBVN) ને ભારે નુકસાન થશે.
