નવી દિલ્હીઃ સેનામાં નોકરી કરી રહેલા લાખો અગ્નિવીરોને મોટી રાહત આપવામાં આવી છે. જે અગ્નિવીરોની કાયમી નોકરી માટે પસંદગી કરવામાં નહીં આવે, તેમને બે વર્ષનું સેવા વિસ્તરણ આપવામાં આવશે. એટલે કે 25 ટકા અગ્નિવીરોની નોકરી સેનામાં કાયમી કરવામાં આવશે, જ્યારે બાકીના 75 ટકા અગ્નિવીરોને વધુ બે વર્ષ સુધી નોકરી કરવાની તક મળશે. કેન્દ્રીય કેબિનેટ દ્વારા આ નિર્ણયને મંજૂરી આપવામાં આવી છે. ખુદ ચીફ ઓફ ડિફેન્સ સ્ટાફ (CDS) દ્વારા આ જાહેરાત કરવામાં આવી છે. આ સાથે યોજનામાં કરવામાં આવેલા ફેરફારો વિશે પણ માહિતી આપવામાં આવી છે.
કયા અગ્નિવીરોને મળશે બે વર્ષનું એક્સટેન્શન?
જે અગ્નિવીરોની સેનામાં સૈનિક તરીકે કાયમી ભરતી માટે પસંદગી કરવામાં નહીં આવે, તેમને અગ્નિપથ યોજના હેઠળ ચાર વર્ષ બાદ ઘરે પરત મોકલવાની જોગવાઈ હતી. હવે આ સમયગાળો વધારીને છ વર્ષ કરવામાં આવ્યો છે. એટલે કે જો 100 અગ્નિવીરોની ભરતી કરવામાં આવી હોય, તો ચાર વર્ષ બાદ તેમાંથી 25 અગ્નિવીરોને કાયમી કરવામાં આવશે અને બાકીના 75 અગ્નિવીરોને વધુ બે વર્ષ સેવા કરવાની તક આપવામાં આવશે.
#IssWaqt | How significant is the decision to retain 25% of Agniveers as regular soldiers and extend the service of the remaining Agniveers by two years?
Correspondent, @vishal_baristo, reports.
@NikhilSinghDD #IssWaqtOnDD #AgnipathScheme #Agniveer #IndianArmy #IndianArmedForces
— DD News (@DDNewslive) November 4, 2026
બે વર્ષના એક્સટેન્શન બાદ શું થશે?
બે વર્ષનું સેવા વિસ્તરણ પૂર્ણ થયા બાદ 75 ટકા અગ્નિવીરોને ફરી એક તક આપવાની વાત કરવામાં આવી છે. એટલે કે તેમની પાસે સેનામાં કાયમી થવાની વધુ એક તક હશે. તમામ અગ્નિવીરોને સેનામાંથી બહાર કરવામાં નહીં આવે. જોકે આ 75 ટકામાંથી કેટલા અગ્નિવીરોને કાયમી થવાની તક મળશે તે અંગે હજુ સ્પષ્ટતા કરવામાં આવી નથી. CDSએ જણાવ્યું છે કે આ તક અગ્નિવીરોના પ્રદર્શન અને તેના મૂલ્યાંકન પર આધારિત રહેશે.
શું પગારમાં વધારો થશે?
ચીફ ઓફ ડિફેન્સ સ્ટાફે જણાવ્યું છે કે સેવા વિસ્તરણ મેળવનારા અગ્નિવીરોને વધારેલો પગાર અને ભથ્થાં પણ આપવામાં આવશે. સેનાએ આ નિર્ણય એવા સમયે લીધો છે, જ્યારે અગ્નિવીરોની પ્રથમ બેચનો ચાર વર્ષનો કાર્યકાળ પૂર્ણ થવા જઈ રહ્યો હતો. અંદાજે 18,000 અગ્નિવીરોને આગામી કેટલાક અઠવાડિયામાં સેનામાંથી બહાર થવાનું હતું. જોકે, હવે તેમને વધુ બે વર્ષનું સેવા વિસ્તરણ મળશે. આ ઉપરાંત, વિવિધ માપદંડોને આધારે તેમને કાયમી કરવાની જોગવાઈ પણ સામેલ કરવામાં આવી છે. આવી સ્થિતિમાં માનવામાં આવી રહ્યું છે કે હવે વધુ અગ્નિવીરોને સેનામાં જ નોકરી કાયમી કરવાની તક મળી શકે છે. જ્યારે અન્ય અગ્નિવીરો માટે વિવિધ સુરક્ષા દળોમાં અનામત જગ્યાઓની જોગવાઈ પણ રહેશે.
