નવી દિલ્હીઃ શું રશિયા પાસેથી ઓઇલ ખરીદવું ભારત માટે ફરી મોંઘું પડી શકે છે? અમેરિકામાં રશિયા પાસેથી ઓઇલ અને ગેસ ખરીદતા દેશો પર નવા ટેરિફ લગાવવાની તૈયારીઓ તેજ થઈ છે. અમેરિકી સેનેટે રશિયા પાસેથી ઓઇલ ખરીદતા દેશો સામે કાર્યવાહી સાથે જોડાયેલા એક નવા બિલને ભારે બહુમતીથી પસાર કર્યું છે. આ બિલમાં રશિયા પાસેથી ક્રૂડ ઓઇલ ખરીદતા ટોચના દેશો પર વધુમાં વધુ 100 ટકા સુધીની આયાત ડ્યૂટી લગાવવાની જોગવાઈ છે. આવી સ્થિતિમાં ભારત અને ચીન જેવા દેશો પર પણ તેની અસર થવાની ચર્ચા છે.
અમેરિકી સેનેટે રશિયા સાથે જોડાયેલા નવા પ્રતિબંધોના બિલ (Russia Sanctions Bill)ને 86-11ના ભારે બહુમતીથી પસાર કર્યું છે. આ બિલ સેનેટર લિન્ડસે ગ્રેહામ સાથેની ચર્ચા બાદ તૈયાર કરવામાં આવ્યું હતું. તેનો હેતુ એવા દેશો પર આર્થિક દબાણ વધારવાનો છે, જે રશિયા પાસેથી તેલ, ગેસ અને અન્ય ઉત્પાદનો ખરીદે છે અને આ રીતે રશિયાના અર્થતંત્રને મદદ કરે છે.
ભારત પર 100 ટકા ટેરિફ લાગશે કે નહીં?
આ બિલમાં રશિયા પાસેથી ક્રૂડ ઓઇલ ખરીદતા ટોચના દેશો પર વધુમાં વધુ 100 ટકા સુધીનો ટેરિફ લગાવવાની જોગવાઈ કરવામાં આવી છે. આ જ કારણસર ભારત માટે પણ આ બિલને મહત્વપૂર્ણ માનવામાં આવી રહ્યું છે. જોકે બિલ પસાર થઈ જવાનો અર્થ એ નથી કે ભારત પર તરત જ 100 ટકા ટેરિફ લાગુ થઈ ગયો છે. આ એક એવી જોગવાઈ છે, જેના હેઠળ રશિયાના મોટા ખરીદદાર દેશો સામે આગળ કાર્યવાહી થઈ શકે છે.
અગાઉ 500 ટકા ટેરિફ લગાવવાની વાત હતી
રશિયા પાસેથી ઓઇલ ખરીદતા દેશો પર ટેરિફ લગાવવાનો આ પ્રસ્તાવ અગાઉ વધુ આકરો હતો. એપ્રિલ, 2025માં લિન્ડસે ગ્રેહામ અને ડેમોક્રેટિક સેનેટર રિચર્ડ બ્લુમેન્થલે રજૂ કરેલા બિલમાં રશિયા પાસેથી ઓઇલ ખરીદતા દેશો પર 500 ટકા સુધીનો ટેરિફ લગાવવાનો પ્રસ્તાવ હતો. બાદમાં બિલના અપડેટેડ વર્ઝનમાં આ જોગવાઈમાં ઘટાડો કરવામાં આવ્યો. હવે રશિયાના ક્રૂડ ઓઇલ અને ગેસના ટોચના પાંચ ખરીદદાર દેશો પર ટેરિફની મહત્તમ મર્યાદા 100 ટકા રાખવામાં આવી છે.
