ગાંધીનગર: ગુજરાતમાં ‘નવરાત્રિ શક્તિપર્વ–2026’ ની ભવ્ય ઉજવણી માટે રાજ્ય સરકારે વિશેષ આયોજન કર્યું છે. મુખ્યમંત્રી ભૂપેન્દ્રભાઈ પટેલના માર્ગદર્શન અને નાયબ મુખ્યમંત્રી હર્ષ સંઘવીના નિર્ણય હેઠળ રાજ્યના 9 પ્રખ્યાત દેવસ્થાનો અને શક્તિપીઠો ખાતે ભવ્ય સાંસ્કૃતિક કાર્યક્રમો યોજાશે. આ વિશેષ ઉજવણી માટે સરકારે ₹2.90 કરોડના ખર્ચને મંજૂરી આપી છે.
આ આયોજન હેઠળ 11 ઓક્ટોબરથી 19 ઓક્ટોબર દરમિયાન રાજ્યના મુખ્ય 9 દેવસ્થાનો પર વિવિધ તારીખે સાંસ્કૃતિક કાર્યક્રમો યોજાશે, જેમાં ગુજરાતના પ્રસિદ્ધ લોકકલાકારો માતાજીની આરાધના અને ગરબાની રમઝટ બોલાવશે:
-
11 ઓક્ટોબર: શ્રી અંબાજી શક્તિપીઠ, બનાસકાંઠા
-
12 ઓક્ટોબર: શ્રી બહુચરાજી શક્તિપીઠ, મહેસાણા
-
13 ઓક્ટોબર: શ્રી ઉમિયા માતા મંદિર, ઊંઝા
-
14 ઓક્ટોબર: શ્રી આશાપુરા માતાજીનું મંદિર, મઢ-કચ્છ
-
15 ઓક્ટોબર: શ્રી ચામુંડા માતા મંદિર, ચોટીલા
-
16 ઓક્ટોબર: શ્રી મહાકાળી મંદિર, પાવાગઢ
-
17 ઓક્ટોબર: શ્રી ભદ્રકાળી મંદિર, અમદાવાદ
-
18 ઓક્ટોબર: શ્રી હરસિદ્ધિ માતા મંદિર, દેવભૂમિ દ્વારકા
-
19 ઓક્ટોબર: શ્રી મોઢેશ્વરી માતા મંદિર, મોઢેરા
માઈભક્તો શ્રદ્ધા, શક્તિ અને સંસ્કૃતિના આ સંગમમાં ભક્તિમય વાતાવરણ વચ્ચે ગરબાનો આનંદ માણી શકે તે માટે તંત્ર દ્વારા તમામ તૈયારીઓ પૂર્ણ કરી દેવામાં આવી છે.
