નેપાળ: ઓગસ્ટ મહિનાની કુદરતી હોનારત બાદ ફરી એકવાર મુશળધાર વરસાદે અહીં ભારે તબાહી મચાવી છે. છેલ્લા ત્રણ દિવસથી પડી રહેલા વરસાદને કારણે ગંડકી અને લુમ્બિની પ્રાંતના અનેક વિસ્તારોમાં પૂર અને ભૂસ્ખલન (લેન્ડસ્લાઇડ)ની ગંભીર ઘટનાઓ સામે આવી છે. આ કુદરતી આફતમાં અત્યાર સુધીમાં ઓછામાં ઓછા 24 લોકોના મોત થયા છે, જ્યારે 14 લોકો હજુ પણ લાપતા છે.
પહાડ ધસી પડવાનો ભયાનક વીડિયો વાયરલ
સોશિયલ મીડિયા પર વાયરલ થયેલા એક ખૌફનાક વીડિયોમાં જોઈ શકાય છે કે એક પહાડનો વિશાળ હિસ્સો આંખના પલકારામાં જમીનદોસ્ત થઈ જાય છે. સ્થાનિક લોકો ડરના માર્યા બૂમો પાડી રહ્યા છે અને જોતજોતામાં જ પહાડનો મોટો ભાગ નીચે કાળીગંડકી નદીમાં ધસી પડે છે. આ વીડિયો પહાડી વિસ્તારોમાં રહેતા લોકો માટે સર્જાયેલા ગંભીર જોખમની સાક્ષી પૂરે છે.
An insane landslide has struck Nepal, praying for everyone effected by this 🙏 pic.twitter.com/4Y4H1j6YSZ
— Daily Loud (@DailyLoud) September 28, 2026
સૌથી વધુ પ્રભાવિત વિસ્તારો અને મૃત્યુઆંક
નેપાળના અધિકારીઓના જણાવ્યા અનુસાર, મનાંગ, મ્યાગ્દી, બાંગલુગ, પર્વત અને પાલપા જિલ્લા સૌથી વધુ અસરગ્રસ્ત થયા છે.
-
બાંગલુગ (ગંડકી પ્રાંત): ભૂસ્ખલનના કારણે 10 લોકોના મોત થયા છે.
-
મ્યાગ્દી: 6 લોકોના મોત થયા છે અને 3 લોકો ગુમ છે.
-
મનાંગ: 2 લોકોના મોત અને 10 લોકો લાપતા છે.
-
પાલપા (લુમ્બિની પ્રાંત): 5 લોકોના મોત નોંધાયા છે.
-
ધનુષા: 1 વ્યક્તિનું ભૂસ્ખલનમાં ચપેટમાં આવવાથી મોત થયું છે.
મનાંગમાં હિમસ્ખલન (એવલાંચ)થી 2 પર્વતારોહકના મોત
મનાંગ જિલ્લાના નારફૂ સ્થિત હિમલુંગ હિમાલ પર સતત વરસાદ બાદ થયેલા ભારે હિમસ્ખલનમાં 2 પર્વતારોહકના મોત થયા છે. આ જૂથમાં કુલ 22 લોકો (9 પર્વતારોહકો અને 13 સપોર્ટ સ્ટાફ) સામેલ હતા. ફુ ગામમાંથી 10 લોકોનો સંપર્ક થઈ શક્યો છે, જ્યારે બાકીના 10 લોકો હજી પણ ગુમ છે. ખરાબ હવામાનના કારણે કાઠમંડુથી મોકલાયેલું રેસ્ક્યૂ હેલિકોપ્ટર સમયસર પહોંચી શક્યું નહોતું.
નદીઓમાં પૂર, પુલો તણાયા અને વીજ પુરવઠો ખોરવાયો
નેપાળના નેશનલ ડિઝાસ્ટર રિસ્ક રિડક્શન એન્ડ મેનેજમેન્ટ ઓથોરિટીના જણાવ્યા મુજબ, કાળીગંડકી નદીમાં આવેલા પૂરે ભારે વિનાશ વેર્યો છે.
-
પુલ ધ્વસ્ત: કાળીગંડકી નદીના પૂરના કારણે સ્યાંગજા અને ગુલમીને જોડતો સિમેન્ટનો મોટો પુલ સંપૂર્ણપણે તણાઈ ગયો છે, જેનાથી બંને જિલ્લાઓ વચ્ચેનો માર્ગ સંપર્ક તૂટી ગયો છે.
-
હાઇડ્રોપાવર પ્રોજેક્ટ બંધ: પાણીનું સ્તર ભયજનક રીતે વધતાં 144 મેગાવોટના કાળીગંડકી ‘એ’ હાઇડ્રોપાવર પ્રોજેક્ટના તમામ ગેટ ખોલી દેવાયા છે અને વીજ ઉત્પાદન અટકાવી દેવાયું છે. આ સિવાય નિલગિરી અને રહુઘાટ જેવા પ્રોજેક્ટ્સને પણ અસર પહોંચી છે.
747થી વધુ પરિવારો પ્રભાવિત, 1500 લોકો બેઘર
આ કુદરતી આફતથી 747 પરિવારો સીધા પ્રભાવિત થયા છે. 195 ઘરો સંપૂર્ણપણે નષ્ટ થઈ ગયા છે અને સેંકડો ઘરોને નુકસાન પહોંચ્યું છે. પર્વત જિલ્લામાં 162 પરિવારોના 540 લોકોને સુરક્ષિત સ્થળે સ્થળાંતર કરવાની ફરજ પડી છે. આ ઉપરાંત સરકારી કચેરીઓ, પશુધનના શેડ અને વાહનોને પણ મોટું આર્થિક નુકસાન થયું છે.
