નવી દિલ્હી: દીવાળીના પાવન અવસર પર કોંગ્રેસ સંસદીય દળ (CPP) ના અધ્યક્ષ સોનિયા ગાંધી અને તેમની પુત્રી તથા કોંગ્રેસ નેતા પ્રિયંકા ગાંધી વાડ્રાએ ભૂતપૂર્વ વડાપ્રધાન સ્વ. રાજીવ ગાંધી સાથે જોડાયેલી દીવાળીની જૂની અને મધુર યાદો તાજી કરી છે. સોશિયલ મીડિયા પર શેર કરવામાં આવેલા એક વિશેષ વીડિયો સંવાદમાં બંનેએ પરિવાર સાથેની દીવાળીની ઉજવણી, પારંપરિક રીતિ-રિવાજો અને પુરાણા સંસ્મરણો વાગોળ્યા હતા.
View this post on Instagram
આ ચર્ચા દરમિયાન સોનિયા ગાંધીએ જણાવ્યું હતું કે તે જમાનામાં ઘરના દરેક ખૂણાને માટીના દીવાઓથી સજાવવામાં આવતો હતો. ઘરના તળાવ કિનારે, વરંડામાં અને ચાલવાના રસ્તાઓ પર દીવાઓની હારમાળા રચવામાં આવતી હતી. મુખ્ય પ્રવેશદ્વાર પર ભગવાન ગણેશની મૂર્તિ પાસે પરિવાર દ્વારા પ્રથમ દીવો પ્રજ્વલિત કરવામાં આવતો હતો. તે સમયે આધુનિક રંગબેરંગી લાઈટોનો ઉપયોગ ઓછો થતો હતો અને માત્ર દીવાઓના પ્રકાશથી આખું નિવાસસ્થાન ઝગમગી ઉઠતું હતું.
પ્રિયંકા ગાંધી વાડ્રાએ પણ બાળપણના દિવસોને યાદ કરતા જૂની વાતો શેર કરી હતી કે કેવી રીતે દીવાળીના તહેવાર પર જુદા-જુદા ક્ષેત્રોમાંથી લોકો અને મિત્રો પરિવારને મળવા આવતા હતા અને બગીચામાં મેળાવડો જામતો હતો. આ વાતોમાં જૂની દિલ્હીના પ્રખ્યાત ચાંદની ચોક બજારમાંથી ફટાકડા ખરીદવાની મજેદાર યાદો પણ સામેલ હતી. આ ભાવનાત્મક વિડિયોમાં પ્રિયંકાની પુત્રી મિરાયા વાડ્રા પણ જોવા મળી હતી, જેણે પેઢી દર પેઢી ચાલતી પરિવારની પરંપરાઓ અને તહેવારની હૂંફને ઉજાગર કરી હતી.
