ક્વાડ સંમેલનમાં વડાપ્રધાન મોદીએ જીત્યા સૌના દિલ

વડાપ્રધાન નરેન્દ્ર મોદીનો રાષ્ટ્રધ્વજ પ્રત્યેનો અનન્ય આદર ફરી એકવાર વૈશ્વિક મંચ પર જોવા મળ્યો છે. ફિલિપાઈન્સની રાજધાની મનીલામાં આયોજિત ક્વાડ શિખર સંમેલન દરમિયાન વડાપ્રધાન નરેન્દ્ર મોદીએ સમૂહ છબી પડાવવા માટે ઊભા રહેવાની જગ્યા નક્કી કરવા જમીન પર મૂકવામાં આવેલો ભારતીય તિરંગો ઉઠાવીને પોતાના ખિસ્સામાં સુરક્ષિત મૂકી દીધો હતો. આ ઘટનાના દ્રશ્યો હાલ ખૂબ જ ઝડપથી ફેલાઈ રહ્યા છે અને લોકો વડાપ્રધાન મોદીની રાષ્ટ્રધ્વજ પ્રત્યેની આ સંવેદના અને સન્માનની ભરપૂર પ્રશંસા કરી રહ્યા છે. દ્રશ્યોમાં વડાપ્રધાનને ગાલીચા પર મૂકવામાં આવેલા નાના તિરંગાના ચિહ્નને નીચે નમીને ઉઠાવતા અને પોતાના ખિસ્સામાં મૂકતા જોઈ શકાય છે.

દરેક ભારતીયનું હૃદય સ્પર્શી જાય તેવી આ ક્ષણ ત્યારે સર્જાઈ જ્યારે ક્વાડ શિખર સંમેલન દરમિયાન વડાપ્રધાન મોદી, અમેરિકાના રાષ્ટ્રપતિ ડોનાલ્ડ ટ્રમ્પ, ઓસ્ટ્રેલિયાના વડાપ્રધાન એન્થની અલ્બાનીઝ અને જાપાનના વડાપ્રધાન સાને તાકાઈચી સાથે સમૂહ છબી માટે પોતાનું સ્થાન લઈ રહ્યા હતા. દ્રશ્યોમાં સ્પષ્ટ જોઈ શકાય છે કે વડાપ્રધાન મોદી જેવા મંચ પર આવે છે કે તરત જ તેમની નજર જમીન પર પડેલા તિરંગાના ચિહ્ન પર પડે છે. ત્યારબાદ તેઓ તરત જ નીચે નમીને તે તિરંગો ઉઠાવી લે છે અને પોતાના ખિસ્સામાં મૂકી દે છે. આ દરમિયાન તેઓ એવું કહેતા પણ નજરે પડે છે કે તેઓ રાષ્ટ્રધ્વજને જમીન પર છોડી શકે નહીં.

જોહાનિસબર્ગમાં પણ જોવા મળ્યું હતું તિરંગા પ્રત્યેનું સન્માન

જોકે, આ કોઈ પહેલી ઘટના નથી જ્યારે વડાપ્રધાન મોદીએ વિદેશની ધરતી પર તિરંગા પ્રત્યે આવો આદર દર્શાવ્યો હોય. આ અગાઉ પણ વડાપ્રધાન મોદીનો રાષ્ટ્રધ્વજ પ્રત્યેનો આ જ પ્રકારનો પ્રેમ દક્ષિણ આફ્રિકાના જોહાનિસબર્ગમાં જોવા મળ્યો હતો. જોહાનિસબર્ગમાં વર્ષ 2023ના બ્રિક્સ શિખર સંમેલન દરમિયાન પણ વડાપ્રધાન મોદીએ મંચ પર જમીન પરથી ભારતીય ધ્વજ ઉઠાવીને પોતાની પાસે રાખી લીધો હતો.

‘ભારત માટે ક્વાડ એક રચનાત્મક અને વિશ્વસનીય ભાગીદારી’

વડાપ્રધાન મોદીએ ક્વાડની બેઠકમાં સંબોધન કરતા જણાવ્યું હતું કે ચારેય દેશોના વિદેશ મંત્રીઓ ગયા વર્ષે જાન્યુઆરીથી અત્યાર સુધીમાં 5 વખત મુલાકાત કરી ચૂક્યા છે, જે આ ભાગીદારી પ્રત્યે તેમની ‘રાજકીય ઇચ્છાશક્તિ અને સહિયારી પ્રતિબદ્ધતા’ નો મજબૂત પુરાવો છે. તેમણે વધુમાં કહ્યું કે ભારત માટે ક્વાડ એક રચનાત્મક અને વિશ્વસનીય ભાગીદારી છે. વડાપ્રધાને ઉમેર્યું હતું કે, “દરિયાઈ સુરક્ષાથી લઈને વિશ્વસનીય પુરવઠા શૃંખલા, નવી તકનીકથી લઈને આપત્તિ વ્યવસ્થાપન સુધી અમારો સતત પ્રયાસ રહ્યો છે કે ક્વાડ વિશ્વસનીય ઉકેલો પૂરા પાડે.” તેમણે વિશ્વાસ વ્યક્ત કર્યો હતો કે આ બેઠકથી સહયોગના આગામી તબક્કા માટે નક્કર લક્ષ્યો નક્કી કરવામાં મદદ મળશે અને તેમણે અન્ય નેતાઓનો તેમના સતત સમર્થન બદલ આભાર માન્યો હતો.