ગાંધીનગર: વડાપ્રધાન નરેન્દ્ર મોદી આજે (૧૩ નવેમ્બર, ૨૦૨૬) સાંજે પોતાના ગૃહ રાજ્ય ગુજરાતના પ્રવાસે આવી રહ્યા છે. કર્ણાટકના બેંગલુરુ અને મૈસૂરુમાં વિવિધ વિકાસકાર્યોના લોકાર્પણ બાદ વડાપ્રધાન મોદી રાત્રે લગભગ ૯ વાગ્યે અમદાવાદ એરપોર્ટ પર ઉતરાણ કરશે અને ત્યાંથી સીધા ગાંધીનગર જવા રવાના થશે. 
ગાંધીનગરમાં મંત્રીઓ સાથે ડિનર બેઠક અને રાત્રિ રોકાણ
અમદાવાદ એરપોર્ટ પર આગમન બાદ વડાપ્રધાન મોદી ગાંધીનગર સ્થિત ‘લોક ભવન’ (રાજભવન) પહોંચશે, જ્યાં તેઓ રાત્રિ રોકાણ કરશે. મળતી માહિતી મુજબ, આજે રાત્રે વડાપ્રધાન મોદી લોક ભવન ખાતે ગુજરાત સરકારના મંત્રીમંડળના સભ્યો સાથે વિશેષ ડિનર બેઠક (Dinner Meeting) યોજશે. નવા વર્ષના સ્નેહમિલન ઉપરાંત આ બેઠકમાં રાજ્યના વિકાસ પ્રોજેક્ટ્સ, સરકાર અને સંગઠન વચ્ચેના સંકલન તેમજ આગામી ચૂંટણીલક્ષી રણનીતિ અંગે મહત્વપૂર્ણ ચર્ચા-વિચારણા થાય તેવી શક્યતા છે.
લાભ પાંચમ નિમિત્તે અંબાજી પ્રવાસ મોકૂફ રખાયો
અગાઉના નિર્ધારિત કાર્યક્રમ મુજબ, વડાપ્રધાન નરેન્દ્ર મોદી આવતીકાલે ૧૪ નવેમ્બરના રોજ લાભ પાંચમના પવિત્ર અવસરે બનાસકાંઠા સ્થિત સુપ્રસિદ્ધ યાત્રાધામ અંબાજી મંદિરમાં મા અંબાના દર્શન અને પૂજા-અર્ચના કરવા જવાના હતા. જોકે, લાભ પાંચમના તહેવારને કારણે અંબાજી ખાતે શ્રદ્ધાળુઓની ભારે ભીડ ઉમટવાની શક્યતા હોવાથી VIP સુરક્ષા વ્યવસ્થાને કારણે સામાન્ય ભક્તોને દર્શનમાં કોઈ અગવડ ન પડે તે માટે વડાપ્રધાનનો અંબાજી પ્રવાસ મોકૂફ રાખવાનો નિર્ણય લેવામાં આવ્યો છે. અંબાજીનો કાર્યક્રમ મોકૂફ રહ્યા બાદ હવે વડાપ્રધાન મોદી ગાંધીનગરમાં રાત્રિ રોકાણ કર્યા પછી આવતીકાલે (૧૪ નવેમ્બર) સવારે/બપોરે અમદાવાદ એરપોર્ટ પરથી દિલ્હી જવા રવાના થશે.
