ગાંધીનગર: ગુજરાતના મુખ્યમંત્રી ભૂપેન્દ્ર પટેલ સાથે આગા ખાન ડેવલપમેન્ટ નેટવર્ક (AKDN)ના ચેરમેન પ્રિન્સ રહીમ આગા ખાન Vએ સૌજન્ય મુલાકાત કરી. આ મુલાકાત દરમિયાન ગુજરાત સરકાર અને AKDN વચ્ચે રાજ્યના સર્વાંગી અને સસ્ટેનેબલ (ટકાઉ) વિકાસ માટે ગ્રાસરૂટ લેવલ પર પરસ્પર સહયોગની નવી તકો અંગે વિસ્તૃત ચર્ચા થઈ હતી.
મહામહિમ પ્રિન્સ રહીમ આગા ખાન V શિયા ઇસ્માઈલી મુસ્લિમોના 50મા વંશપરંપરાગત ઇમામ તથા આગા ખાન ડેવલપમેન્ટ નેટવર્કના અધ્યક્ષ તરીકે સેવા આપી રહ્યા છે. ક્લાઈમેટ ચેન્જ, પર્યાવરણ સંરક્ષણ, શિક્ષણ, કૌશલ્ય વિકાસ, ઉદ્યોગસાહસિકતા અને સંવેદનશીલ સમુદાયોના જીવનધોરણમાં સુધારણા ક્ષેત્રે તેમનું મહત્વપૂર્ણ યોગદાન રહ્યું છે.
મુખ્યમંત્રીએ પ્રિન્સ રહીમ આગા ખાન Vનું સ્વાગત કરતા જણાવ્યું હતું કે, “AKDNની પ્રાથમિકતાઓ ગુજરાતની વિકાસ ફિલોસોફી સાથે સુસંગત છે.”
બેઠક દરમિયાન મુખ્યમંત્રીએ રાજ્યમાં જળ સંરક્ષણ, રેઇનવોટર હાર્વેસ્ટિંગ, ગ્રાઉન્ડવોટર રિચાર્જ, મિલેટ્સ અને પ્રાકૃતિક ખેતી, સોલાર એનર્જી, સહકાર ક્ષેત્ર તેમજ મહિલા સશક્તિકરણની સફળતા અને યોજનાઓ અંગે વિગતો પૂરી પાડી હતી. તેમણે ઉમેર્યું હતું કે રાજ્યની સોલાર ઇન્સ્ટોલ્ડ કેપેસિટી ૩૪,૮૮૦ મેગાવોટ સુધી પહોંચી છે. ‘પી.એમ. સૂર્ય ઘરઃ મુફ્ત બીજલી યોજના’ હેઠળ લાખો ઘરોમાં રૂફટોપ સોલાર સિસ્ટમ સ્થાપિત કરવામાં આવી છે.
પ્રિન્સ રહીમ આગા ખાન Vએ જળ સંરક્ષણ, પ્રાકૃતિક ખેતી, મિલેટ્સ, સોલાર એગ્રીકલ્ચર અને મહિલા સ્વસહાય જૂથોના વિકાસ જેવા ક્ષેત્રોમાં ગુજરાત સરકાર સાથે મજબૂત ભાગીદારી દર્શાવી હતી. બંને પક્ષોએ માનવકેન્દ્રી અને ટકાઉ વિકાસ માટે સાથે મળીને કાર્ય કરવા તરફ સકારાત્મક અભિગમ વ્યક્ત કર્યો હતો.
આ પ્રસંગે ઉદ્યોગ વિભાગના અધિક મુખ્ય સચિવ મમતા વર્મા અને મુખ્યમંત્રીના અગ્ર સચિવ સંજીવ કુમાર પણ ઉપસ્થિત રહ્યા હતા.
