ઇસ્લામાબાદઃ એક તરફ અમેરિકા અને ઈરાન વચ્ચે શાંતિ વાટાઘાટ કરાવી દુનિયામાં વખાણ મેળવવાનો પ્રયાસ પાકિસ્તાન કરી રહ્યું છે, ત્યારે બીજી તરફ ત્યાંની સરકારે ફરી એક વાર જનતા પર મોંઘવારીનો ‘બોમ્બ’ ફોડ્યો છે. શહબાઝ સરકારે પહેલેથી જ મોંઘવારીથી પરેશાન જનતા પર વધુ એક મોટો બોજ મૂકી પેટ્રોલ અને હાઈ-સ્પીડ ડીઝલના ભાવોમાં ભારે વધારો કર્યો છે. પેટ્રોલિયમ મંત્રાલય દ્વારા જાહેર કરાયેલી તાજી સૂચના મુજબ પેટ્રોલ અને ડીઝલ બંનેના ભાવમાં પ્રતિ લિટર 26.77 રૂપિયાનો સમાન વધારો કરવામાં આવ્યો છે.
આ વધારા બાદ પેટ્રોલનો નવો ભાવ પ્રતિ લિટર 393.35 રૂપિયા અને હાઈ-સ્પીડ ડીઝલનો ભાવ 380.19 રૂપિયા પ્રતિ લિટર સુધી પહોંચી ગયો છે. આ નવી કિંમતો 25 એપ્રિલ (શનિવાર) મધરાતથી અમલમાં આવી ગઈ છે.
આંતરરાષ્ટ્રીય બજારમાં ક્રૂડ ઓઇલના ભાવમાં વધારો
આ મોટા ફેરફારનું મુખ્ય કારણ આંતરરાષ્ટ્રીય બજારમાં કાચા તેલના ભાવમાં ઊથલપાથલ અને સરકાર દ્વારા પેટ્રોલિયમ લેવીમાં કરાયેલ વધારો માનવામાં આવે છે. ખાસ કરીને ડીઝલના ભાવમાં વધારાની સીધો અસર માલવહન અને કૃષિ ક્ષેત્ર પર પડશે, જેને કારણે આવનારા દિવસોમાં ખાદ્યવસ્તુઓ અને અન્ય આવશ્યક સેવાઓના ભાવમાં વધુ વધારો થવાની આશંકા છે.
સ્ટ્રેટ ઓફ હોર્મુઝને લઈને તણાવ યથાવત
મિડલ ઈસ્ટમાં અમેરિકા, ઈઝરાયેલ અને ઈરાન વચ્ચે વધતા સૈન્ય અને રાજદ્વારી તણાવને કારણે કાચા તેલના ભાવમાં ભારે અસ્થિરતા સર્જાઈ છે. હાલની પરિસ્થિતિમાં સૌથી મોટી ચિંતા સ્ટ્રેટ ઓફ હોર્મુઝને લઈને છે.
પાકિસ્તાન ફરી ગેસ સપ્લાય ચેન અસ્તવ્યસ્ત
પડોશી દેશ પાકિસ્તાન ફરી એક વાર મોટા ઊર્જા સંકટના મુખે ઊભો છે. પશ્ચિમ એશિયામાં ઈરાન અને ઈઝરાયેલ વચ્ચે વધતા તણાવ અને યુદ્ધ જેવી પરિસ્થિતિએ પાકિસ્તાનની ગેસ સપ્લાય ચેનને સંપૂર્ણ રીતે અસ્તવ્યસ્ત કરી દીધી છે. આ ભૂરાજકીય અસ્થિરતાને કારણે પાકિસ્તાનમાં એલપીજી અને કુદરતી ગેસની ભારે અછત ઊભી થઈ છે. ઘરેલુ સ્તરે ગેસ સપ્લાય લગભગ બંધ થવાની કગાર પર છે, જેને કારણે સામાન્ય જનતાના ચૂલા ઠંડા પડી રહ્યા છે, એ સાથે જ વીજ ઉત્પાદન અને ઉદ્યોગો પર પણ ગંભીર અસર પડી રહી છે.
