મિડલ ઈસ્ટમાં તણાવ સતત વધી રહ્યો છે અને સાઉદી અરેબિયાએ હૂતી વિદ્રોહીઓ વિરુદ્ધ પોતાના યુદ્ધની રણનીતિ (War Game) બદલી નાખી છે. યમનમાં હૂતીઓએ સરકારી સેનાને નિશાન બનાવીને તાઈઝ શહેર પર હુમલો કર્યો હતો, જેમાં 5 વર્ષના એક બાળક સહિત 5 લોકોના મોત થયા છે અને અનેક લોકો ઘાયલ થયા છે. આ સ્થિતિ વચ્ચે સાઉદી સમર્થિત યમનની સરકારી સેનાએ હૂતીઓ વિરુદ્ધ આક્રમક અભિયાન તેજ કર્યું છે.
950 હૂતી લડાકો માર્યા ગયા હોવાનો દાવો
યમનની સરકારી સેનાના જણાવ્યા અનુસાર, હૂતીઓ સામે ચલાવવામાં આવી રહેલા ‘ઓપરેશન ડૉન ઓફ યમન’ (Operation Dawn of Yemen) અંતર્ગત અત્યાર સુધીમાં 1,879 ઓપરેશન કરવામાં આવ્યા છે. સૈન્ય પ્રવક્તાએ દાવો કર્યો છે કે આ ભીષણ કાર્યવાહીમાં 950 ઈરાન સમર્થિત હૂતી લડાકો માર્યા ગયા છે અને તેમના 380 જેટલા સૈન્ય વાહનો નષ્ટ કરવામાં આવ્યા છે. આ ઓપરેશનની શરૂઆત 5 October ના રોજ યમનની પ્રેસિડેન્શિયલ લીडरશિપ કાઉન્સિલના વડા રશાદ અલ-અલીમી દ્વારા કરવામાં આવી હતી, જેનો મુખ્ય હેતુ હૂતીઓના કબજામાંથી વિસ્તારોને મુક્ત કરાવવાનો છે.
સના પર હુમલાની તૈયારી અને નાગરિકોને ચેતવણી
સાઉદી અરેબિયાની આગેવાની હેઠળના ગઠબંધનના પ્રવક્તા બ્રિગેડિયર જનરલ તુર્કી અલ-માલિકીએ જણાવ્યું છે કે યમનની રાજધાની સના (Sanaa) માં, જ્યાં હૂતીઓનું નિયંત્રણ છે, ત્યાં નાગરિકોની સુરક્ષા માટે ખાસ ઓપરેશન ચલાવવામાં આવશે. ગઠબંધને પશ્ચિમી સનામાં સરકારી તેલ કંપનીની સુવિધા અને આસપાસના સ્ટોરેજ વિસ્તારોને ખાલી કરવા માટે ચેતવણી જારી કરી છે. આ અગાઉ સનાના પશ્ચિમમાં ઓઈલ ફેસિલિટી પર હવાઈ હુમલા થયા હોવાના અહેવાલ પણ સામે આવ્યા હતા.
હૂતીઓની ગંભીર ધમકી અને રિયાધમાં ડ્રોન ઈન્ટરસેપ્ટ
સાઉદી ગઠબંધનની આ ચેતવણી સામે હૂતી વિદ્રોહીઓએ આક્રમક પ્રતિક્રિયા આપી છે. હૂતી લશ્કરી પ્રવક્તા જનરલ યાહ્યા સરીએ ચેતવણી આપી છે કે જો સના કે યમનના અન્ય વિસ્તારોને નિશાન બનાવવામાં આવશે, તો સાઉદીની રાજધાની રિયાધમાં ખૂબ જ કાળઝાળ અને પીડાદાયક જવાબ આપવામાં આવશે. હૂતીઓએ અરામકો (Aramco) ની તેલ સુવિધાઓને પણ તેમના નિશાન પર હોવાનું જણાવ્યું છે.
દરમિયાન, સાઉદી ગઠબંધને દાવો કર્યો છે કે તેમણે રાજધાની રિયાધના ઉત્તર ભાગમાં આકાશમાં જ 3 શંકાસ્પદ ડ્રોનને સફળતાપૂર્વક અટકાવીને (Intercept) નષ્ટ કરી દીધા છે, જેના કારણે કોઈ મોટું નુકસાન થયું નથી. વર્ષ 2014 માં હૂતીઓએ સના પર કબજો કર્યો ત્યારથી શરૂ થયેલું આ સંઘર્ષ હવે વધુ ભયાનક તબક્કામાં પ્રવેશી ચૂક્યું છે.