અમદાવાદઃ એશિયાનાં બજારોમાંથી મળેલા સકારાત્મક સંકેતો વચ્ચે ભારતીય શેરબજાર નવા નાણાકીય વર્ષ 2026-27ના પ્રથમ દિવસે તેજી સાથે ખૂલ્યું હતું. રાષ્ટ્રપતિ ડોનાલ્ડ ટ્રમ્પે જણાવ્યું હતું કે અમેરિકા-ઇરાન યુદ્ધ બે કે ત્રણ સપ્તાહમાંમાં ખતમ થવાની શક્યતા છે. જેને કારણે બજારના સેન્ટિમેન્ટ્સ પર સકારાત્મક અસર પડી. તાજેતરની ઘટાડા બાદ નીચલા સ્તરે થયેલી ખરીદીથી પણ બજારમાં રિકવરી જોવા મળી હતી. ઈન્ડેક્સ હેવી વેઇટ HDFC બેંક, રિલાયન્સ ઇન્ડસ્ટ્રીઝ અને L&Tના શેરોમાં તેજીથી ઈન્ડેક્સને ઉછાળો આવ્યો હતો. જોકે ટ્રેડિંગના અંતમાં પસંદગીના શેરોમાં નફારૂપી વેચવાલી આવતાં દિવસનો મોટો સુધારો થોડો ઘટ્યો હતો.
BSE સેન્સેક્સ 73,762 અંક પર ખૂલ્યો હતો, ટ્રેડિંગ સેશન દરમિયાન તે 73,964 અંક સુધી પહોંચ્યો હતો અને અંતે 1186.77 પોઇન્ટ ઊછળી 73,134.32 પર બંધ થયો હતો એ જ રીતે નિફ્ટી-50 348 પોઇન્ટના ઉછાળાએ 22,679 પર બંધ થયો હતો.
સ્મોલકેપ અને મિડકૅપ શેરોમાં પણ જોરદાર તેજી રહી. સ્મોલકેપ ઇન્ડેક્સ લગભગ 3.5 ટકા અને મિડકેપ ઇન્ડેક્સ 3.2 ટકા સુધી વધ્યા હતા.. તમામ 16 સેક્ટોરલ ઇન્ડેક્સમાં વધારો નોંધાયો હતો, જે દર્શાવે છે કે આ રેલી માત્ર થોડા શેરોમાં મર્યાદિત નહોતી પરંતુ સમગ્ર બજારમાં હતી.
બજાર વિશ્લેષકે જણાવ્યું હતું કે ભારતીય શેરબજારે નાણાકીય વર્ષ 2026-27ની મજબૂત શરૂઆત કરી છે. પશ્ચિમ એશિયાના સંઘર્ષના સંભવિત ઉકેલ અંગે અમેરિકાના રાષ્ટ્રપતિના નિવેદન બાદ રોકાણકારોમાં જોખમ લેવાની ક્ષમતા વધી છે.
રોકાણકારોની સંપત્તિ રૂ. 12.80 લાખ કરોડ વધી
બુધવારે બજારમાં આવેલી તેજીથી રોકાણકારોની સંપત્તિમાં મોટો વધારો થયો. BSEમાં લિસ્ટેડ કંપનીઓનું માર્કેટ કેપ રૂ. 4,24,34,466 કરોડ હતું, જ્યારે સોમવારે તે રૂ. 4,11,55,003 કરોડ હતું. આ રીતે રોકાણકારોની સંપત્તિમાં રૂ. 12,79,463 કરોડનો વધારો નોંધાયો.
India VIXમાં મોટો ઘટાડોરોકાણકારોના ભયનું સૂચક માનવામાં આવતો India VIX ઇન્ડેક્સ લગભગ 10 ટકા ઘટીને 25ના સ્તરે આવી ગયો. VIXમાં ઘટાડો રોકાણકારોમાં ભય ઘટવા અને જોખમ લેવાની ક્ષમતા વધવાનું સંકેત આપે છે. ભૂ-રાજકીય તણાવ ઓછો થવાની આશાએ બજારમાં સ્થિરતા પાછી ફરતી દેખાઈ, જેને કારણે તેજીને વધુ મજબૂતી મળી.
BSE પર કુલ 4437 શેરોમાં કામકાજ થયાં હતાં. એમાં 3828 શેરો તેજી સાથે બંધ થયા હતા અને 508 શેરોમાં ઘટાડો થયો હતો. આ સાથે 101 શેરો સપાટ બંધ થયા હતા. આ સિવાય 62 શેરોએ નવી 52 સપ્તાહની ઊંચી સપાટી સર કરી હતી, જ્યારે 220 શેરોએ 52 સપ્તાહના નવા નીચલા સ્તરે સ્પર્શ્યા હતા. આ સાથે સાત શેરોમાં અપર સરકિટ લાગી હતી, જ્યારે 14 શેરોમાં લોઅર સરકિટ લાગી હતી.
