જવાહરલાલ નેહરુ યુનિવર્સિટી (JNU) માં સોમવારે એક કાર્યક્રમ દરમિયાન જોરદાર હંગામો થયો હતો. જેએનયુ વિદ્યાર્થી સંઘ (JNUSU) દ્વારા ઉમર ખાલિદના પુસ્તક ‘Fractured Communities’ પર એક ચર્ચા સભાનું આયોજન કરવામાં આવ્યું હતું. આ કાર્યક્રમ દરમિયાન JNUSU ના નેતાઓ અને સમર્થકોએ SSS-2 બિલ્ડિંગની બહાર ‘ઉમર ખાલિદ કો રિહા કરો’ અને ‘જેલ કે તાલે તૂટેંગે, સારે સાથી છૂટેંગે’ જેવા સૂત્રોચ્ચાર કર્યા હતા.
ઓડિટોરિયમની મંજૂરી રદ અને સામસામે નારેબાજી
JNUSU ના જણાવ્યા અનુસારસ, યુનિવર્સિટી વહીવટીતંત્રે છેલ્લી ઘડીએ કાર્યક્રમ માટે ઓડિટોરિયમનું બુકિંગ રદ કરી દીધું હતું. બુકિંગ રદ થયા છતાં JNUSU એ કાર્યક્રમ યોજવાનો નિર્ણય લીધો અને તેને SSS-2 બિલ્ડિંગની બહાર યોજ્યો હતો. ચર્ચા દરમિયાન JNUSU ના સૂત્રોચ્ચારના જવાબમાં વિરોધ કરવા પહોંચેલા ABVP ના સમર્થકોએ ‘ખાલિદ પાકિસ્તાની હૈ’ ના નારા લગાવ્યા હતા. બંને પક્ષો વચ્ચે સામસામે નારેબાજી થતાં કેમ્પસમાં ભારે તણાવ સર્જાયો હતો.
JNUSU ના વહીવટીતંત્ર અને ABVP પર આક્ષેપો
ઘટના બાદ JNUSU એ એક નિવેદન જાહેર કરીને યુનિવર્સિટી વહીવટીતંત્ર પર આકરા પ્રહારો કર્યા હતા.
વહીવટીતંત્ર પર આરોપ: JNUSU એ વહીવટીતંત્રને ‘સંઘી પ્રશાસન’ ગણાવીને આરોપ લગાવ્યો કે આ પગલું યુનિવર્સિટીમાં ચર્ચા, સંવાદ અને અસંમતિની સંસ્કૃતિને સીમિત કરવાનો પ્રયાસ છે. જોકે, તમામ વિરોધ છતાં સેંકડો વિદ્યાર્થીઓ કાર્યક્રમમાં હાજર રહ્યા હતા.
ABVP પર આરોપ: વિદ્યાર્થી સંઘે આરોપ લગાવ્યો કે ABVP ના સમર્થકોએ સ્પીકર પાસેથી માઇક્રોફોન આંચકી લેવાનો પ્રયાસ કર્યો હતો અને પેનલિસ્ટો સાથે ગેરવર્તણૂક કરી હતી.
રાજકીય કેદીઓનો મુદ્દો: JNUSU એ જણાવ્યું કે તે જેએનયુમાં મુક્ત વૈચારિક ચર્ચાની પરંપરા જાળવી રાખવા માટે કટિબદ્ધ છે અને ઉમર ખાલિદ સહિતના અન્ય ‘રાજકીય કેદીઓ’ના સમર્થનમાં અવાજ ઉઠાવવાનું ચાલુ રાખશે.
તથ્ય એ પણ છે કે JNUSU દ્વારા મૂકવામાં આવેલા આ આક્ષેપો પર ABVP કે JNU વહીવટીતંત્ર તરફથી તાત્કાલિક કોઈ અધિકૃત પ્રતિક્રિયા કે સ્પષ્ટતા સામે આવી નથી.
