નવી દિલ્હીઃ રાષ્ટ્રપતિ ડોનાલ્ડ ટ્રમ્પે ઈરાન સાથેનું સીઝફાયર વધારવાનો નિર્ણય કર્યો છે. તેમણે કહ્યું હતું કે જ્યાં સુધી વાતચીત ચાલુ રહેશે, ત્યાં સુધી સીઝફાયર વધારવામાં આવી રહ્યું છે. જોકે ઈરાને ટ્રમ્પના આ નિર્ણયને સ્વીકાર્યો નથી અને તેને એકતરફી નિર્ણય ગણાવ્યો છે. બીજી તરફ, ટ્રમ્પે કહ્યું હતું કે ઇસ્લામાબાદમાં ચાલી રહેલી વાતચીત અધૂરી હોવા છતાં હોર્મુઝ સ્ટ્રેટની નાકાબંધી યથાવત્ રહેશે. એટલે કે સીઝફાયર હોવા છતાં અમેરિકી સેના ઈરાની બંદરોની નાકાબંધી ચાલુ રાખશે.
ટ્રમ્પે જણાવ્યું હતું કે પાકિસ્તાનની અપીલ બાદ ઈરાન સાથેનું સીઝફાયર વધારવામાં આવી રહ્યું છે. તેમણે લખ્યું હતું કે હાલમાં ઈરાનની સરકાર સંપૂર્ણ રીતે વીખેરાઈ ગઈ છે, તેથી પાકિસ્તાનના ફીલ્ડ માર્શલ આસિમ મુનીર અને વડા પ્રધાન શહબાઝ શરીફની વિનંતી પર ઈરાન પર તાત્કાલિક હુમલો નહીં કરવામાં આવે, જ્યાં સુધી તેઓ સર્વસંમતિથી કોઈ પ્રસ્તાવ રજૂ ન કરે. ટ્રમ્પે વધુમાં જણાવ્યું હતું કે સેનાને નાકાબંધી ચાલુ રાખવા સૂચના આપવામાં આવી છે.
ઈરાને રાષ્ટ્રપતિ ડોનાલ્ડ ટ્રમ્પના આ સીઝફાયર વધારવાના એલાનને સ્વીકાર્યો નથી. ઈરાની સંસદના સ્પીકરના સલાહકાર મહદી મોહમ્મદીએ ટ્રમ્પના આ પ્રસ્તાવને નકારી કાઢ્યો છે. તેમણે ભારપૂર્વક કહ્યું હતું કે હાલની પરિસ્થિતિમાં ટ્રમ્પના સીઝફાયર એક્સ્ટેન્શન કોઈ મહત્વ રાખતું નથી. તેમણે એ પણ કહ્યું કે જે હારી રહ્યા હોય, તેમને શરતો લાદવાનો અધિકાર નથી.
એક તરફ ઈરાન આ સીઝફાયર સ્વીકારતું નથી, ત્યારે બીજી તરફ પાકિસ્તાન સરકારે રાષ્ટ્રપતિ ટ્રમ્પનો આભાર માન્યો છે. જાહેર નિવેદનમાં વડા પ્રધાન શહબાઝ શરીફે કહ્યું હતું કે અમારી અપીલ સ્વીકારી સીઝફાયર વધારવા અને કૂટનીતિક માર્ગ પર આગળ વધવા માટે હું રાષ્ટ્રપતિ ટ્રમ્પનો આભાર વ્યક્ત કરું છું. શહબાઝે આગળ કહ્યું હતું કે પાકિસ્તાન પર વિશ્વાસ દર્શાવવામાં આવ્યો છે અને અમે સંપૂર્ણ નિષ્ઠાથી વાતચીત આગળ વધારી મજબૂત શાંતિ કરાર લાવવા પ્રયત્ન કરીશું.
રાષ્ટ્રપતિ ટ્રમ્પે સીઝફાયર જાહેર કર્યા પછી ઉપ રાષ્ટ્રપતિ જેડી વેન્સે પોતાનો ઇસ્લામાબાદ પ્રવાસ રદ કરી દીધો છે. હવે પ્રશ્ન ઊભો થયો છે કે પાકિસ્તાનમાં થનારી પ્રસ્તાવિત ચર્ચાનું ભવિષ્ય શું રહેશે.
