ઈરાન અને અમેરિકા વચ્ચે વધતા ભૌગોલિક તણાવ વચ્ચે ઈરાને અમેરિકી સૈન્ય પર હુમલો કરવાનો ગંભીર આક્ષેપ કર્યો છે. હોર્મોઝગાન પ્રાંતના એક ઉચ્ચ અધિકારીના જણાવ્યા અનુસાર શનિવારે અમેરિકાએ કેશ્મ દ્વીપ નજીક માછલી પકડતી બે નૌકાઓને નિશાન બનાવી હતી. આ બનાવમાં બે માછીમારો ગુમ થયા છે, જ્યારે એક વ્યક્તિ ગંભીર રીતે ઈજાગ્રસ્ત થયો છે. જોકે અમેરિકા તરફથી આ સૈન્ય કાર્યવાહી અંગે તાત્કાલિક કોઈ સત્તાવાર પુષ્ટિ કરવામાં આવી નથી. આ ઘટના વચ્ચે ઈરાનના સર્વોચ્ચ નેતા મોજતબા ખામેનેઈએ કોઈપણ દુશ્મન દેશ તરફથી ઊભા થતા જોખમ સામે તત્કાળ અને અસરકારક વળતો પ્રહાર કરવાનો આદેશ આપ્યો છે. તેમના લેખિત સંદેશ મુજબ, ઈરાનની જવાબી કાર્યવાહીની કોઈ ભૌગોલિક સીમા રહેશે નહીં. તેમણે સ્પષ્ટ શબ્દોમાં જણાવ્યું છે કે જો દુશ્મન દેશો ફરીથી સૈન્ય કે આતંકવાદી હુમલો કરશે, તો આ નવા સંઘર્ષને સમાપ્ત કરવાનો સમય અને શરતો ઈરાન પોતે નક્કી કરશે.
મોજતબા ખામેનેઈએ પોતાના સશસ્ત્ર દળોને તમામ અમેરિકી અને ઈઝરાયેલી લશ્કરી મથકો તેમજ સંસાધનોને પ્રહારની સીમામાં લાવવા માટે પોતાની લક્ષ્ય સૂચિ (ટાર્ગેટ લિસ્ટ) અદ્યતન કરવા માટે આદેશ આપ્યો છે. આ સાથે જ તેમણે દારૂગોળો અને શસ્ત્રોનું ઉત્પાદન ઝડપી બનાવવાનો, સૈન્ય ગુપ્તચર ક્ષમતાઓને વધુ મજબૂત કરવાનો અને સ્થાનિક સ્તરે સંરક્ષણ ક્ષમતાનો વિકાસ કરવાનો નિર્દેશ આપ્યો છે.
અમેરિકા આપી રહ્યું છે સૈન્ય કાર્યવાહીની ધમકી
આ ઘટનાક્રમ એવા સમયે સામે આવ્યો છે જ્યારે અમેરિકા અને ઈરાન વચ્ચે તણાવ ચરમસીમા પર છે. અમેરિકી પ્રમુખ ડોનાલ્ડ ટ્રમ્પ તરફથી ઈરાન વિરુદ્ધ ફરીથી સૈન્ય કાર્યવાહી કરવાની સંભાવના અંગે સતત સંકેતો આપવામાં આવી રહ્યા છે. મધ્યસત્ર ચૂંટણીઓ બાદ ઈરાન પર નવા હુમલાની સંભાવના અંગે ચર્ચાઓ તીવ્ર બની છે. અમેરિકાના ઉચ્ચ સૈન્ય અધિકારીઓએ પ્રમુખ સામે ઈરાન વિરુદ્ધ સંભવિત સૈન્ય વિકલ્પો રજૂ કર્યા છે. આ દરમિયાન ઈઝરાયેલમાં પણ ઈરાનને લઈને સૈન્ય તૈયારીઓ અને અમેરિકા સાથે સંયુક્ત કાર્યવાહીની શક્યતાઓને લઈને અટકળો તેજ થઈ ગઈ છે.
