ગાંધીનગર: નવી દિલ્હીમાં યોજાયેલા સફળ ‘કર્ટન રેઝર’ કાર્યક્રમ બાદ, વાઇબ્રન્ટ ગુજરાત ગ્લોબલ સમિટ (VGGS) 2027 અંતર્ગત ગુજરાત સરકાર દ્વારા 3 સપ્ટેમ્બર 2026ના રોજ મુંબઈના કોલાબા સ્થિત ‘ધ તાજ મહેલ પેલેસ’ ખાતે એક ભવ્ય રોડ-શોનું આયોજન કરવામાં આવ્યું છે.
આ રોડ-શોના સાંજના સત્રમાં ગુજરાતના મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવી વિવિધ દેશોના કોન્સ્યુલ જનરલ્સ તેમજ દેશ-વિદેશના અગ્રણી ઉદ્યોગપતિઓ સાથે સીધો સંવાદ કરશે. આ પ્રસંગે મુખ્યમંત્રી રાજ્યના ઔદ્યોગિક વિકાસના વિઝન અને નવી રોકાણ તકો વિશે માહિતી આપશે.
રોડ-શો પહેલા મુખ્યમંત્રી ભૂપેન્દ્ર પટેલ દેશના અગ્રણી ઔદ્યોગિક ગૃહોના વડાઓ સાથે વન-ઓન-વન (વ્યક્તિગત) બેઠકો પણ યોજશે. આ બેઠકોમાં રિલાયન્સ ઇન્ડસ્ટ્રીઝ, ટાટા ટ્રસ્ટ્સ, મહિન્દ્રા ગ્રુપ, AM/NS ઇન્ડિયા, ગોદરેજ, સન ફાર્મા, સિપ્લા, લાર્સન એન્ડ ટુબ્રો, આદિત્ય બિરલા ગ્રુપ અને RPG એન્ટરપ્રાઈઝિસ જેવી દિગ્ગજ કંપનીઓના પ્રતિનિધિઓ સામેલ થશે.
આ સંવાદ દરમિયાન એડવાન્સ્ડ મેન્યુફેક્ચરિંગ, ફાર્માસ્યુટિકલ્સ, ગ્રીન એનર્જી, IT, રિયલ એસ્ટેટ, ઓઇલ અને એનર્જી જેવા ક્ષેત્રોમાં રોકાણ અને વ્યાપારી ભાગીદારી અંગે વિસ્તૃત ચર્ચા હાથ ધરાશે. આ ઉપરાંત, યુવા ઉદ્યોગસાહસિકો સાથે રાઉન્ડટેબલ સંવાદનું પણ આયોજન કરવામાં આવ્યું છે.
આ કાર્યક્રમનો પ્રારંભ ‘CII’ ના રાષ્ટ્રીય અધ્યક્ષ આર. મુકુંદનના સ્વાગત પ્રવચનથી થશે. રોડ-શો દ્વારા ગુજરાતના મજબૂત ઔદ્યોગિક આધાર, આધુનિક ઇન્ફ્રાસ્ટ્રક્ચર અને રોકાણ-અનુકૂળ નીતિઓને વૈશ્વિક સ્તરે વધુ મજબૂતી મળશે.
