Home Blog Page 1007

ગુજરાતમાં તાપમાનનો પારો ઉચકાયો, 11 જિલ્લામાં તાપમાનનો પારો 40 ડિગ્રીને પાર

ગુજરાતમાં ઉનાળાની શરૂઆત સાથે જ તાપમાનનો પારો ઊંચકાઈ રહ્યો છે. રાજ્યના અનેક જિલ્લાઓમાં ગરમીનું પ્રમાણ એટલું વધી ગયું છે કે લોકોને બહાર નીકળવું મુશ્કેલ બની રહ્યું છે. હવામાન વિભાગના જણાવ્યા મુજબ, રાજ્યના 11થી વધુ જિલ્લાઓમાં તાપમાન 40 ડિગ્રી સેલ્સિયસને પાર કરી ગયું છે. થોડા દિવસોના નજીવા ઘટાડા બાદ આજે ફરીથી તાપમાનમાં 2 ડિગ્રીનો વધારો નોંધાયો છે, જેના કારણે ગરમીની અસર વધુ તીવ્ર બની છે.

હવામાન વિભાગના અહેવાલ પ્રમાણે, કંડલામાં રાજ્યનું સૌથી ઊંચું તાપમાન 43.6 ડિગ્રી નોંધાયું છે. આ ઉપરાંત, અમદાવાદમાં 42.9 ડિગ્રી, ગાંધીનગરમાં 42.5 ડિગ્રી, સુરેન્દ્રનગરમાં 42.7 ડિગ્રી અને રાજકોટમાં 42.2 ડિગ્રી તાપમાન રહ્યું. અન્ય શહેરો જેવા કે ડીસામાં 41.1 ડિગ્રી, વડોદરા અને ભુજમાં 40.8 ડિગ્રી, મહુવામાં 40.2 ડિગ્રી, વલ્લભ વિદ્યાનગરમાં 39.7 ડિગ્રી અને કેશોદમાં 39 ડિગ્રી તાપમાન નોંધાયું. હવામાન વિભાગે બનાસકાંઠા, સાબરકાંઠા, કચ્છ અને રાજકોટમાં ગરમીનું યલો એલર્ટ જાહેર કર્યું છે.

હવામાન વિભાગે ચેતવણી આપી છે કે આગામી દિવસોમાં ગરમીનું પ્રમાણ વધુ વધશે. ખાસ કરીને, દિવસ અને રાતના તાપમાનમાં વધારો થવાની શક્યતા છે. રાજ્યના મોટા શહેરોમાં તાપમાન 40 ડિગ્રીની આસપાસ રહેવાની શક્યતા છે. દરિયાકાંઠાના વિસ્તારોમાં પણ ગરમીની અસર વધુ જોવા મળશે. હવામાન વિભાગે 26 અને 27 ફેબ્રુઆરીએ ગરમીની અસર વધુ રહેવાની આગાહી કરી છે.

રાજ્યમાં વધતી ગરમીને ધ્યાનમાં રાખીને હવામાન વિભાગે કચ્છ અને રાજકોટ સહિતના વિસ્તારોમાં યલો એલર્ટ જાહેર કર્યું છે. ગઈકાલે પણ મહત્તમ તાપમાનમાં વધારો નોંધાયો હતો, જેમાં કંડલા, અમદાવાદ અને ગાંધીનગર સૌથી વધુ ગરમ રહ્યા. લોકોને ગરમીથી બચવા માટે પૂરતું પાણી પીવું, હળવા કપડાં પહેરવા અને બપોરના સમયે બહાર ન નીકળવાની સલાહ આપવામાં આવી છે.

ભૂતપૂર્વ મંત્રી પ્રતાપ સિંહના ઘરે EDના દરોડા

જયપુરઃ રાજસ્થાનના ભૂતપૂર્વ ગેહલોત સરકારમાં કેબિનેટ મંત્રી રહેલા પ્રતાપસિંહ ખાચરિયાવાસના જયપુરના સિવિલ લાઈન્સ સ્થિત નિવાસસ્થાને એન્ફોર્સમેન્ટ ડિરેક્ટરેટ (ED) દ્વારા દરોડા પાડવામાં આવ્યા છે. EDની ટીમ હાલમાં કોંગ્રેસ નેતાના ઘરમાં છે અને તપાસ ચલાવી રહી છે. આ દરોડાની પાછળનુમ ખરું કારણ હજુ સુધી બહાર નથી આવ્યું, પણ રાજસ્થાનની રાજધાનીમાં ચાલી રહેલી આ  કાર્યવાહીથી ખળભળાટ મચી ગયો છે. કોંગ્રેસના નેતાઓની અલગ-અલગ પ્રતિક્રિયાઓ પણ સામે આવી રહી છે.

પ્રાપ્ત માહિતી મુજબ પ્રતાપસિંહ ખાચરિયાવાસ આ મકાનમાં તેમના મોટા ભાઈ કરણસિંહ સાથે રહે છે. EDના દરોડાની જાણ થતાં જ કોંગ્રેસ નેતાના સમર્થકો તેમના ઘરે પહોંચવા માટે રવાના થયા છે.EDની આ કાર્યવાહી ચિટ ફંડ મામલે કરવામાં આવી છે. આ રૂ. 50,000 કરોડના રોકાણ સાથે સંકળાયેલો મામલો છે, જેમાં પ્રતાપસિંહની સંદિગ્ધ ભૂમિકા છે. આ સંબંધમાં પ્રતાપસિંહને અગાઉ પણ EDના સમન્સ મળી ચૂક્યા છે અને હવે તેમના ઘરે દરોડા ચાલી રહ્યા છે.

તેમના નિવાસસ્થાને EDના દરોડા પર કોંગ્રેસ નેતા ખાચરિયાવાસે કહ્યું હતું કે આજે તેઓ અહીં તપાસ અને દરોડા માટે આવ્યા છે, તેઓ એવું કરી શકે છે. હું તેમની સાથે સહયોગ કરી રહ્યો છું. ED પોતાનું કામ કરી રહી છે અને હું મારું કામ કરીશ. મારે એવું માનવું છે કે ભાજપે EDનો ઉપયોગ કરીને રાજકારણ ન કરવું જોઈએ. પ્રતાપસિંહ ખાચરિયાવાસ કોઈથી પણ ડરતો નથી. મને ED તરફથી કોઈ નોટિસ આપવામાં આવી નહોતી. ED સીધા નિવાસસ્થાને દરોડા પાડવા આવી હતી, એમ તેમણે કહ્યું હતું.

 

કહેવત: કજીયાનું મ્હોં કાળું

         કજીયાનું મ્હોં કાળું

 

કજિયામાંથી નઠારૂં પરિણામ જ આવે. કજિયો પતાવી દેવાનું વલણ રાખવું, ક્લેશથી વેગળા રહેવું. કલહ અથવા કલેશ હંમેશા વ્યથા કે બળતરા જ પેદા કરે છે.

એટલે એની સંગત ક્યારેય કરવી નહીં. એનું મો કાળું કરવું એટલે કે પોતે મોં ફેરવી લેવું અથવા દૂર જવું એ અર્થમાં આ કહેવત વપરાય છે.

(ડો. જયનારાયણ વ્યાસ ગુજરાતના જાહેરજીવનનું એક ટોચનું નામ છે. ગુજરાત સરકારમાં કેબિનેટ મંત્રી તરીકે અનેક મહત્વની જવાબદારી સંભાળી ચૂકેલા જયનારાયણભાઇ નિષ્ણાત અર્થશાસ્ત્રી, ટેકનોક્રેટ અને કુશળ વક્તા હોવાની સાથે લોકપ્રિય લેખક પણ છે. ટેલિવિઝન એન્કર તરીકે પણ અર્થપૂર્ણ ચર્ચા યોજે છે. અહીં એ બાળપણમાં મા ના મુખેથી સાંભળેલી જાણીતી કહેવતોનો આસ્વાદ કરાવે છે.)

 

રોબર્ટ વાડ્રા ED ઓફિસ પહોંચ્યા, કહ્યું- ‘સંસદમાં રાહુલનો, અહીં મારો અવાજ દબાવવામાં આવે છે’

નવી દિલ્હી: હરિયાણાના શિકોહાબાદ જમીન કૌભાંડ કેસમાં રોબર્ટ વાડ્રા ED ઓફિસ પહોંચ્યા છે. આ મામલે ED દ્વારા તેમને બીજી વખત સમન્સ પાઠવવામાં આવ્યું છે. અગાઉ, તેમને 8 એપ્રિલે સમન્સ પાઠવવામાં આવ્યું હતું પરંતુ તેઓ ED સમક્ષ હાજર થયા ન હતા. વાડ્રાએ હાજર થતાં કહ્યું કે મારી વિરુદ્ધ EDનો ઉપયોગ થઈ રહ્યો છે. મારે કંઈ છુપાવવાની જરૂર નથી. હું દરેક પ્રશ્નનો જવાબ આપતો રહ્યો છું અને આપતો રહીશ. હું લોકોનો અવાજ બુલંદ કરીશ. જે કંઈ પૂછવામાં આવશે તે હું કહીશ.

તેમણે કહ્યું કે જ્યારે હું લોકોના હિતમાં બોલું છું, ત્યારે મને દબાવી દેવામાં આવે છે. રાહુલ ગાંધીને સંસદમાં દબાવવામાં આવે છે, મને સંસદની બહાર દબાવવામાં આવે છે. મની લોન્ડરિંગના આરોપ પર તેમણે કહ્યું, તો પછી સાબિત કરો. મને વીસ વર્ષથી કંઈ મળ્યું નથી. જો મની લોન્ડરિંગ થયું હોય તો તે સાબિત કરો.

EDએ મની લોન્ડરિંગની આશંકામાં પૂછપરછ માટે સમન્સ પાઠવ્યું છે. રોબર્ટ વાડ્રા પર આરોપ છે કે, તેમની કંપની સ્કાઈલાઇટ પ્રાઇવેટ લિમિટેડને ગુરૂગ્રામમાં 3.53 એકડ જમીન 7.50 કરોડની કિંમત પર કોલોની ડેવલપ કરવાના નામે પર આપવામાં આવી હતી, જે તેમણે બારોબાર વેચી દીધી હતી.શું હતો સમગ્ર કેસ? 

આ મામલો 2008નો છે. તે સમયે હરિયાણામાં ભૂપેન્દ્ર હુડ્ડા મુખ્યમંત્રી હતાં. હરિયાણા સરકારે આ જમીનમાંથી 2.70 એકડ જમીનને કોમર્શિયલ કોલોનીના રૂપે ડેવલપ કરવાની મંજૂરી આપતા વાડ્રાની કંપનીને લાઇસન્સ આપ્યું હતું. પરંતુ, કોલોની વિકસિત કરવાની બદલે તેમની કંપનીએ આ જમીનને 2012માં 58 કરોડ રૂપિયામાં DLF યુનિવર્સલ લિમિટેડને વેચી દીધી હતી.

રોબર્ટ વાડ્રા પર શું છે આરોપ? 

રોબર્ટ વાડ્રા પર આરોપ છે કે, હરિયાણા સરકાર પાસેથી ઓછી કિંમતે મળેલી જમીનને DLF યુનિવર્સલ લિમિટેડને વેચીને રોબર્ટ વાડ્રાની કંપની સ્કાઈલાઇટ હોસ્પિટેલિટી પ્રાઇવેટ લિમિટેડે કરોડોની કમાણી કરી હતી. તેમની કંપનીએ 18 સપ્ટેમ્બર, 2012ના દિવસે સેલ ડીલ દ્વારા આ જમીનને DLF યુનિવર્સલ લિમિટેડને વેચી દીધી હતી. પરંતુ, હરિયાણા સરકારે ટાઉન એન્ડ કન્ટ્રી પ્લાનિંગે લાઇસન્સને ટ્રાન્સફર કરવાની ફાઇનલ મંજૂરી નહતી આપી.

VIDEO: દક્ષિણ કેલિફોર્નિયામાં જોરદાર ભૂકંપ, પર્વત પરથી પથ્થરો નીચે પડ્યા

અમેરિકા: ભારતીય સમય મુજબ સોમવારે મોડી રાત્રે દક્ષિણ કેલિફોર્નિયામાં 5.2ની તીવ્રતાનો ભૂકંપ આવ્યો હતો. જેના કારણે સાન ડિએગોમાં પહાડ પરથી પથ્થરો નીચે રસ્તાઓ પર પડી ગયા. ઘરોના કબાટમાં રાખેલી વસ્તુઓ પડવા લાગી. જો કે ભૂકંપના કારણે જાનમાલના નુકસાનના કોઈ અહેવાલ નથી. યુએસ જીઓલોજિકલ સર્વે અનુસાર, ભૂકંપ સ્થાનિક સમય મુજબ સવારે 10:08 વાગ્યે આવ્યો હતો અને તેનું કેન્દ્રબિંદુ સાન ડિએગો કાઉન્ટીમાં હતું, જે જુલિયનથી માત્ર 4 કિલોમીટર દૂર છે. જુલિયન લગભગ 1,500 લોકોનું પર્વતીય શહેર છે, જે તેની સફરજન પાઇની દુકાનો માટે જાણીતું છે.

ભૂકંપની અસરો લગભગ 120 માઇલ દૂર લોસ એન્જલસ કાઉન્ટી સુધી અનુભવાઈ હતી. ભૂકંપ પછી અનેક નાના આંચકા અનુભવાયા હતા. “મને લાગ્યું હતું કે બારીઓ ખૂબ ધ્રુજતી હોવાથી તૂટી જશે, પણ તૂટી નહીં,” 1870ના દાયકાથી જુલિયનમાં કાર્યરત સોનાની ખાણના માલિક પોલ નેલ્સને જણાવ્યું. પરિવહન અધિકારીઓએ ચેતવણી જારી કરી છે કે પ્રવાસીઓએ ટેકરીઓ પરથી રસ્તાઓ અને હાઇવે પર પડતા પથ્થરોથી સાવધ રહેવું જોઈએ. જુલિયનના ઉત્તર-પશ્ચિમમાં સ્ટેટ રૂટ 76 પર પર્વતો પરથી પથ્થરો પણ નીચે આવી ગયા.

સાન ડિએગો કાઉન્ટીમાં કેલિફોર્નિયા ડિપાર્ટમેન્ટ ઓફ ટ્રાન્સપોર્ટેશને જણાવ્યું હતું કે ટીમો રસ્તાઓનું નિરીક્ષણ કરી રહી છે જેથી કોઈ નુકસાન થયું છે કે નહીં તે નક્કી કરી શકાય. સાન ડિએગો ઝૂ સફારી પાર્કમાં આફ્રિકન હાથીઓના ટોળાને ભૂકંપ દરમિયાન તેમના બાળકોને ઘેરી લેતા અને તેમનું રક્ષણ કરતા વિડીયોમાં કેદ કરવામાં આવ્યો હતો. હાથીઓમાં તેમના પગ દ્વારા અવાજ અથવા કંપન અનુભવવાની ક્ષમતા હોય છે, અને તેઓ રક્ષણ માટે વર્તુળમાં ઉભા રહે છે. નોર્થ કાઉન્ટી ટ્રાન્ઝિટ ડિસ્ટ્રિક્ટના પ્રવક્તા મેરી ડોવરે એસોસિએટેડ પ્રેસને મોકલેલા ઇમેઇલમાં જણાવ્યું હતું કે ભૂકંપથી કોઈ નુકસાન થયું છે કે કેમ તે નક્કી કરવા માટે કામદારો ટ્રેકનું નિરીક્ષણ કરી શકે તે માટે ટ્રેન સેવા થોડા સમય માટે બંધ કરવામાં આવી હતી.

સાન ડિએગો કાઉન્ટીમાં કેલિફોર્નિયા ડિપાર્ટમેન્ટ ઓફ ફોરેસ્ટ્રી એન્ડ ફાયર પ્રોટેક્શનના કેપ્ટન થોમસ શૂટ્સે જણાવ્યું હતું કે જ્યારે જમીન ધ્રુજવા લાગી ત્યારે સાવચેતી તરીકે શાળાના બાળકોને ઇમારતોમાંથી બહાર કાઢવામાં આવ્યા હતા. તેને કંપનનો સંકેત મળ્યો અને પછી તેને વસ્તુઓ ગબડતી અને અથડાતી અનુભવાઈ. તેમણે કહ્યું, ‘ચારે બાજુ ખૂબ જ હંગામો અને અરાજકતા હતી.’ પરંતુ સદનસીબે વસ્તુઓ ટૂંક સમયમાં સામાન્ય થઈ ગઈ. સાન ડિએગો કાઉન્ટી પોલીસ વિભાગે જણાવ્યું હતું કે ભૂકંપને કારણે તેમને જાનહાનિ કે સંપત્તિને નુકસાનના કોઈ અહેવાલ મળ્યા નથી.

દક્ષિણ કેલિફોર્નિયાના અનુભવી ભૂકંપશાસ્ત્રી લ્યુસી જોન્સના જણાવ્યા અનુસાર, ભૂકંપ એલ્સિનોર ફોલ્ટ ઝોન નજીક 8.3 માઇલની ઊંડાઈએ આવ્યો હતો. એલ્સિનોર ફોલ્ટ ઝોન કેલિફોર્નિયાના સૌથી વ્યસ્ત ભૂકંપ ઝોનમાંનો એક છે અને તે પ્રખ્યાત સાન એન્ડ્રેસ ફોલ્ટ સિસ્ટમનો એક ભાગ છે, જ્યાં દર વર્ષે ઓછામાં ઓછો એક 4.0 ની તીવ્રતાનો ભૂકંપ આવે છે. જોન્સે જણાવ્યું હતું કે રવિવારે જુલિયનમાં અનુભવાયેલો ભૂકંપ 3.5 ની તીવ્રતાનો હતો. સાન ડિએગો કાઉન્ટીના કેટલાક રહેવાસીઓ કે જેઓ USGS ની શેકએલર્ટ પ્રારંભિક ચેતવણી પ્રણાલીના સબ્સ્ક્રાઇબર્સ છે, તેમને સોમવારના ભૂકંપની જાણ એક કે બે સેકન્ડ પહેલા જ કરવામાં આવી હતી.

લખનઉની લોકબંધુ હોસ્પિટલમાં આગ, દર્દીઓને સુરક્ષિત રીતે બચાવ્યા

લખનઉ: સોમવારે મોડી રાતે લોકબંધુ હોસ્પિટલમાં અચાનક ભીષણ આગ લાગી હતી. જેના કારણે હોસ્પિટલમાં અફરાતફરીનો માહોલ સર્જાયો હતો. હોસ્પિટલમાં હજારો દર્દીઓ દાખલ હતા. જેમને બચાવી લેવામાં આવ્યા છે અને નજીકની હોસ્પિટલોમાં ખસેડવામાં આવ્યા છે. હાલમાં આગ પર કાબૂ મેળવી લેવામાં આવ્યો છે અને આગ લાગવાનું કારણ તપાસવામાં આવી રહ્યું છે.

લખનઉના ડી.એમ. વિશાખ જી. ઐયરે જણાવ્યું હતું કે, ‘લોકબંધુ હોસ્પિટલમાં આગ લાગવાની માહિતી મળતા જ અમે ફાયર અને રેસ્ક્યુ વિભાગની એક ટીમને ઘટનાસ્થળે મોકલી હતી.’ તેમણે બચાવ કામગીરી શરૂ કરી. આગથી ICU, મહિલા વોર્ડ અને બીજો એક વોર્ડ પ્રભાવિત થયો હતો. આ વોર્ડમાંથી બધા દર્દીઓને બચાવી લેવામાં આવ્યા છે. તેમને 3 હોસ્પિટલોમાં રિફર કરવામાં આવ્યા છે. પરિસ્થિતિ નિયંત્રણમાં છે.

બીજા માળે આગ
હોસ્પિટલના બીજા માળે આગ લાગી હતી. દર્દીઓને સુરક્ષિત રીતે બહાર કાઢવામાં આવ્યા છે. પાંચ ફાયર એન્જિન ઘટનાસ્થળે પહોંચી ગયા હતા અને આગ પર કાબૂ મેળવ્યો હતો. હજુ સુધી કોઈ જાનહાનિના સમાચાર નથી. આગની જ્વાળાઓ વિશાળ અને ભીષણ હતી, જેના કારણે પરિસ્થિતિ ગંભીર બની હતી.

સીએમ યોગીએ નોંધ લીધી
આગને કારણે હોસ્પિટલ ધુમાડાથી ભરાઈ ગઈ હતી અને દર્દીઓ અને તેમના સંબંધીઓને ઉતાવળમાં બહાર કાઢવામાં આવ્યા હતા. ડી.સી.પી. સહિત ભારે પોલીસ દળ ઘટનાસ્થળે હાજર રહ્યા હતા. મુખ્યમંત્રી યોગી આદિત્યનાથે ઘટનાની નોંધ લીધી અને અધિકારીઓ પાસેથી ફોન પર ઘટનાની સંપૂર્ણ માહિતી લીધી. આગની માહિતી મળતા જ ડેપ્યુટી સીએમ બ્રજેશ પાઠક લોકબંધુ હોસ્પિટલ પહોંચ્યા હતા.

આગ કાબૂમાં આવી ગઈ

ડી.સી.પી. સાઉથ નિપુણ અગ્રવાલે જણાવ્યું હતું કે આગ પર સંપૂર્ણ કાબૂ મેળવી લેવામાં આવ્યો છે. લોકબંધુ હોસ્પિટલમાં દાખલ દર્દીઓને બચાવી લેવામાં આવ્યા છે અને નજીકની હોસ્પિટલોમાં દાખલ કરવામાં આવ્યા છે. આગ લાગવાના કારણની તપાસ કરવામાં આવી રહી છે.

ટ્રમ્પ સરકારે કેમ હાર્વર્ડ યુનિવર્સિટીનું 2.2 અરબ ડોલરનું ફંડિંગ રોક્યું?

અમેરિકા: રાષ્ટ્રપતિ ડોનાલ્ડ ટ્રમ્પે વિશ્વની પ્રતિષ્ઠિત હાર્વર્ડ યુનિવર્સિટીને તાત્કાલિક અસરથી $2.2 બિલિયનનું ભંડોળ બંધ કરી દીધું છે. ટ્રમ્પે યુનિવર્સિટી પર યહૂદીઓ વિરુદ્ધ વધતી નફરત અને પેલેસ્ટાઇનના સમર્થનમાં પ્રદર્શનોને રોકવામાં નિષ્ફળ જવાનો આરોપ લગાવીને આ નિર્ણય લીધો છે. ટ્રમ્પે તેને ફેડરલ કાયદાનું ઉલ્લંઘન ગણાવ્યું અને કહ્યું કે આવી યુનિવર્સિટીને સરકારી ભંડોળનો કોઈ અધિકાર નથી. ટ્રમ્પ વહીવટીતંત્રનું કહેવું છે કે હાર્વર્ડ યુનિવર્સિટી યહૂદી વિદ્યાર્થીઓ અને પ્રોફેસરો સાથે ભેદભાવ કરી રહી છે. રાષ્ટ્રપતિ બન્યા પછી, ટ્રમ્પે હાર્વર્ડ યુનિવર્સિટીને આપવામાં આવેલા 9 બિલિયન ડોલરના ભંડોળની સમીક્ષા કરવાનું શરૂ કર્યું. 

આ સાથે, ટ્રમ્પ વહીવટીતંત્રે હાર્વર્ડને કેટલાક નીતિગત ફેરફારો કરવા કહ્યું હતું અને જો તેનું પાલન નહીં કરે તો ભંડોળ બંધ કરવાની ધમકી આપી હતી. આ મામલો ત્યારે વધુ ગરમાયો જ્યારે હાર્વર્ડના પ્રોફેસરોએ ટ્રમ્પ વિરુદ્ધ કેસ દાખલ કર્યો, તેને ગેરબંધારણીય અને યુનિવર્સિટીની સ્વાયત્તતા પર હુમલો ગણાવ્યો.

હાર્વર્ડ પર યહૂદી વિરોધી હોવાનો આરોપ કેમ છે?

હાર્વર્ડને લોકશાહી મૂલ્યોનો ગઢ માનવામાં આવે છે. પરંતુ તાજેતરના વર્ષોમાં ત્યાં અમુક વિચારધારાઓને સમર્થન અને અન્યનો વિરોધ જોવા મળી રહ્યો છે. ખાસ કરીને 7 ઓક્ટોબરે હમાસ દ્વારા ઇઝરાયલ પર કરવામાં આવેલા હુમલા પછી, ઇઝરાયલ હમાસના ગઢ એટલે કે ગાઝા પટ્ટી પર પણ હુમલો કરી રહ્યું છે. આ અંગે અમેરિકાની ઘણી કોલેજોમાં વિરોધ પ્રદર્શનો શરૂ થયા.

આ દેખાવો પેલેસ્ટાઇનના સમર્થનમાં અને તેલ અવીવ વિરુદ્ધ હતા. ઘણી જગ્યાએ, ‘ગેસ ધ યહૂદીઓ’ એટલે કે યહૂદીઓને ગેસ ચેમ્બરમાં નાખવા જેવા નફરતભર્યા ભાષણો સાંભળવા મળ્યા. ઘણા યહૂદી વિદ્યાર્થીઓએ ફરિયાદ કરી કે તેમને ડરાવવામાં આવી રહ્યા છે. ટ્રમ્પ વહીવટીતંત્ર એ હકીકત પર ગુસ્સે થયું કે આટલી મોટી સંસ્થાઓ પણ યહૂદીઓની સુરક્ષા સુનિશ્ચિત કરવામાં અસમર્થ હતી.

હાર્વર્ડના પ્રોફેસરોએ ટ્રમ્પ સરકાર વિરુદ્ધ કેસ દાખલ કર્યો

અમેરિકાની હાર્વર્ડ યુનિવર્સિટીના પ્રોફેસરોએ ટ્રમ્પ સરકાર વિરુદ્ધ મેસેચ્યુસેટ્સની ફેડરલ ડિસ્ટ્રિક્ટ કોર્ટમાં કેસ દાખલ કર્યો છે. યુનિવર્સિટીના ભંડોળ રોકવાની ધમકી સામે પ્રોફેસરોના બે જૂથોએ આ કેસ દાખલ કર્યો છે. હાર્ડ કહે છે કે ટ્રમ્પનો નિર્ણય યુએસ બંધારણના પ્રથમ સુધારાનું ઉલ્લંઘન કરે છે. આરોપ છે કે યુનિવર્સિટીના ભંડોળમાં કાપ મૂકવો એ અભિવ્યક્તિની સ્વતંત્રતાનું ઉલ્લંઘન છે. હાર્વર્ડે આ ધમકીને તેની શૈક્ષણિક સ્વતંત્રતા અને સ્વાયત્તતા પર હુમલો ગણાવ્યો છે. યુનિવર્સિટી કહે છે કે તે તમામ વિદ્યાર્થીઓની સલામતી અને સમાનતા માટે પ્રતિબદ્ધ છે.

ટ્રમ્પને હાર્વર્ડમાં શું ખોટું છે?

રાષ્ટ્રપતિ ટ્રમ્પ લાંબા સમયથી અમેરિકન યુનિવર્સિટીઓ અને વિવિધતા, સમાનતા અને સમાવેશ (DEI) કાર્યક્રમોમાં પ્રચલિત ‘જાગૃત’ સંસ્કૃતિની વિરુદ્ધ છે. તેઓ માને છે કે આ કાર્યક્રમો ભેદભાવ વધારે છે અને યોગ્યતા આધારિત પ્રણાલીને નબળી પાડે છે.

ખાસ કરીને હાર્વર્ડ પર તેના DEI પ્રોગ્રામનો આરોપ છે જે “વિપરીત ભેદભાવ” ને મજબૂત બનાવે છે, ખાસ કરીને બિન-યહૂદી અને બિન-લઘુમતી જૂથો સામે. ટ્રમ્પ વહીવટીતંત્રે હાર્વર્ડને આ કાર્યક્રમો બંધ કરવા હાકલ કરી છે. ટ્રમ્પ વહીવટીતંત્રે હાર્વર્ડને ભરતી અને પ્રવેશમાં સંપૂર્ણપણે મેરિટ-આધારિત સિસ્ટમ અપનાવવા જણાવ્યું છે.

ટ્રમ્પ દલીલ કરે છે કે હાર્વર્ડ જેવી મોટી યુનિવર્સિટીઓ માટે જવાબદારી સુનિશ્ચિત કરવી જોઈએ જેમને અબજો ડોલરનું ભંડોળ મળે છે. તેમનું કહેવું છે કે જો હાર્વર્ડ તેમની નીતિઓનું પાલન ન કરે તો તેને સરકારી સહાય શા માટે મળવી જોઈએ? તમને જણાવી દઈએ કે આ પગલું ટ્રમ્પની નીતિનો એક ભાગ છે, જેમાં તેઓ સરકારી ખર્ચ ઘટાડવા માંગે છે અને તે સંસ્થાઓને નિશાન બનાવવા માંગે છે જેને તેઓ ઉદાર માને છે. યુનિવર્સિટીને મળેલું નવ અબજ ડોલરનું ભંડોળ સંશોધન, વિદ્યાર્થી શિષ્યવૃત્તિ અને ઘણા સાયન્ટિફિક પ્રોજેક્ટ્સ માટે ખૂબ જ મહત્વપૂર્ણ છે.

રાહુલ ગાંધી 15 એપ્રિલથી 2 દિવસની ગુજરાત મુલાકાતે

અમદાવાદ: કોંગ્રેસ નેતા રાહુલ ગાંધી 15 એપ્રિલથી બે દિવસના ગુજરાત પ્રવાસ પર આવી રહ્યા છે. સંગઠનને મજબૂત કરવા તથા કોંગ્રેસના માળખામાં પુનઃપ્રાણ ફૂંકવા માટે એક પાયલોટ પ્રોજેક્ટની શરૂઆત કરે તેવી શક્યતા છે. ગુજરાતમાં કોંગ્રેસ ત્રણ દાયકાથી સત્તાથી બહાર છે, તેવામાં ફરી જનાધાર મજબૂત કરવા માટે રાહુલ ગાંધીએ કમર કસી છે. રાહુલ ગાંધીનું માનવું છે કે જિલ્લા અને બ્લોક સ્તરથી કોંગ્રેસના સંગઠનને મજબૂત કરવાની જરૂરિયાત છે. 

મહત્ત્વપૂર્ણ બેઠક

રાહુલ ગાંધી સૌથી પહેલા અમદાવાદમાં એક બેઠકમાં સામેલ થશે. જેમાં AICCના 42 તથા PCCના 183 ઑબ્ઝર્વર હાજર રહેશે. 12મી એપ્રિલે જ આ તમામ ઑબ્ઝર્વરની નિયુક્તિ કરવામાં આવી છે. કોંગ્રેસ ગુજરાતનાં તમામ જિલ્લામાં નવા જિલ્લા પ્રમુખની નિયુક્તિ કરશે. આ જિલ્લા પ્રમુખની નિયુક્તિની પ્રક્રિયા પર ઑબ્ઝર્વર નજર રાખશે. કોંગ્રેસના પ્રદેશ પ્રમુખ શક્તિસિંહ ગોહિલે જણાવ્યું હતું કે, ‘આ તમામ ઑબ્ઝર્વર સ્થાનિક લેવલે પ્રમુખની નિયુક્તિની પ્રક્રિયામાં મહત્ત્વની ભૂમિકા ભજવશે.’ 

અરવલ્લી જિલ્લાથી પાયલોટ પ્રોજેક્ટની શરૂઆત!

16મી એપ્રિલે રાહુલ ગાંધી અરવલ્લી જિલ્લામાં જશે. જ્યાં કાર્યકર્તાઓને સંબોધિત કરશે અને પાયલોટ પ્રોજેક્ટની સત્તાવાર શરૂઆત કરાવશે. જો ગુજરાતમાં આ પ્રોજેક્ટ સફળ જાય તો આગામી સમયમાં અન્ય રાજ્યોમાં પણ આ જ પ્રોજેક્ટ શરૂ કરવામાં આવશે. સૂત્રો અનુસાર રાહુલ ગાંધી કોંગ્રેસ સંગઠનમાં જિલ્લા પ્રમુખોને મહત્ત્વપૂર્ણ સત્તા આપવા માગે છે. જે અનુસાર પહેલા જે રાજ્યોમાં કોંગ્રેસનું સંગઠન મજબૂત નથી ત્યાં સ્થાનિક લેવલ પર બ્લોક પ્રમુખ અને જિલ્લા પ્રમુખની નિયુક્તિ કરીને કાર્યકર્તાઓને ઉત્સાહમાં લાવવાનો પ્રયાસ કરાશે. બાદમાં જ્યારે પણ ચૂંટણી થાય ત્યારે ટિકિટ નક્કી કરવામાં આ જ જિલ્લા પ્રમુખની સલાહ લેવામાં આવશે.

ગત 8 અને 9 એપ્રિલના રોજ અમદાવાદમાં જ કોંગ્રેસનું મહાઅધિવેશન યોજાયું હતું. જેમાં કોંગ્રેસના તમામ દિગ્ગજ નેતાઓ ઉપસ્થિત રહ્યા હતા. વર્ષો બાદ કોંગ્રેસ ગુજરાતમાં સંગઠન મજબૂત કરવા પ્રયાસ કરી રહ્યું છે. માર્ચ મહિનામાં પણ રાહુલ ગાંધીએ ગુજરાતની મુલાકાત લીધી હતી. અગાઉ લોકસભામાં સંબોધન દરમિયાન રાહુલ ગાંધીએ વડાપ્રધાન નરેન્દ્ર મોદી અને ભારતીય જનતા પાર્ટીને પડકાર ફેંક્યો હતો કે ગુજરાતમાં આગામી ચૂંટણીમાં કોંગ્રેસની જીત થશે.

‘લવેરિયા’ ગીતમાં ફેરફારથી લોકોનો પ્રેમ વધારે મળ્યો

સંગીતકાર જતીન- લલિતના સંગીતમાં અનેક ગીતો લોકપ્રિય રહ્યા છે અને એની પાછળ કેટલીક રસપ્રદ વાતો જોડાયેલી છે. સંગીતકાર જતીને અનેક વખત પોતાના ગીતો વિશે રસપ્રદ વાતો કહી છે. એના કેટલાક મજેદાર કિસ્સા જાણીએ. ફિલ્મ ‘રાજુ બન ગયા જેન્ટલમેન’ (1992) નું જે ગીત ‘શરદી ખાંસી ના મલેરિયા હુઆ, યે ગયા યારોં ઇસકો લવેરિયા હુઆ’ જ્યારે લખાયું ત્યારે એમાં ‘લવ લવ લવ’ શબ્દો ન હતા.

ગીતને શાયર વિનુ મહેન્દ્રએ લખ્યું હતું. એ બહુ ગરીબ હતા અને એક ઝૂંપડીમાં રહેતા હતા. જતીન અગાઉ મોટાભાઇ સાથે ‘મંધીર જતીન’ નામે સંગીત આપતા હતા ત્યારથી પરિચય હતો. પરંતુ શરાબની આદત હતી અને ટૂંકા આયુષ્યમાં મૃત્યુ પામ્યા હતા.

વિનુએ જતીન-લલિત માટે ‘રાજુ બન ગયા જેન્ટલમેન’ માં પહેલી વખત ‘લવેરિયા હુઆ’ ગીત લખ્યું હતું. નિર્દેશક અઝીઝ મિર્ઝાને એ પસંદ આવ્યું હતું. કેમકે પ્રેમને એક બીમારી તરીકે રાખીને આખું ગીત લખ્યું હતું. જ્યારે એ ગીત નિર્માતા જી.પી. સિપ્પીને સંભળાવવામાં આવ્યું ત્યારે એના શબ્દોમાં એમણે નાનકડો ફેરફાર કરાવ્યો હતો. ફક્ત ‘લવેરિયા’ શબ્દથી એનો અર્થ તરત સ્પષ્ટ થતો ન હતો કે કઈ બાબત માટે કહેવામાં આવી રહ્યું છે. એમણે કહ્યું કે ‘લવ લવ લવ લવેરિયા હુઆ’ રાખવાથી એ વાતનો ખ્યાલ આવશે કે એ ‘લવ’ ને ‘લવેરિયા’ કહી રહ્યો છે. એમનું આ સૂચન બધાને ગમ્યું અને એ કારણે જ ગીતને લોકોનો વધુ પ્રેમ મળ્યો હતો.

જતીને વિનુ મહેન્દ્રએ લખેલા ફિલ્મ ‘પ્યાર તો હોના હી થા’ (1998) ના ગીત ‘જબ કિસી કી તરફ દિલ ઝુકને લગે’ નો કિસ્સો પણ કહ્યો છે. ‘શેતાન’ ફિલ્મમાં જે ફાર્મ હાઉસ બતાવવામાં આવ્યું છે એ અજય દેવગનનું છે અને ત્યાં બહાર વૃક્ષોના વાતાવરણમાં બેસીને જતીને આ ગીતની ધૂન બનાવી હતી. જેના પર વિનુએ શબ્દો લખ્યા હતા. ગીત ગાવા માટે જ્યારે સ્ટુડિયોમાં કુમાર સાનૂ આવ્યા ત્યારે સોનાના ઘરેણાં પહેરીને તૈયાર થઈને આવ્યા હતા. એમને હોટલ તાજમાં એક કાર્યક્રમમાં જવાની ઉતાવળ હતી અને ઝડપથી ગીત ગાઈને નીકળી જવાના હતા. પરંતુ મુખડું ગાવાનું શરૂ કર્યું ત્યારે ખ્યાલ આવ્યો કે આ ગીત એવું નથી કે ફટાફટ ગાઈને નીકળી જવાય. સાનૂ અનુભવી હતા અને લાગતું હતું કે જલદી ગાઈ લેશે પણ રિહર્સલ વખતે મુખડું ગાવામાં જ ઘણો સમય નીકળી ગયો.

સાનૂને લાગ્યું કે મુશ્કેલ ગીત છે અને મહેનત કરવી પડશે. પ્રયત્ન કર્યો છતાં જે પરિણામ જોઈતું હતું એ આવતું ન હતું. ગીત સમય લે એવું હતું અને પોતે ફટાફટ ગાઈને નીકળી જશે એવું ન હતું એનો ખ્યાલ આવી ગયો. સાનૂને સમજણ હતી કે આ ગીત તેની કારકિર્દીના શ્રેષ્ઠ ગીતોમાં એક બની શકે એવું છે. સાનૂએ પોતાના શરીર પરના ઘરેણાં ઉતારી લીધા અને હોટલના કાર્યક્રમમાં એ પહોંચી નહીં શકે એવો સંદેશો આપી દીધો. પછી સાનૂએ ‘જબ કિસી કી તરફ દિલ ઝુકને લગે’ ગીત માટે સમય આપ્યો અને વારંવાર રિહર્સલ કરીને એવું ગાયું કે ખરેખર શ્રેષ્ઠ ગીત બની રહ્યું.

અખિલ બ્રહ્માંડની અજાયબ વાતો

1...1,0061,0071,008...5,175Page 1,007 of 5,175