ગત વર્ષે પોતાના કરિયરને અલવિદા કહેનાર આ ખેલાડી હાલમાં ચાલી રહેલી ચેમ્પિયન્સ ટ્રોફીના ચાર ‘ટુર્નામેન્ટ એમ્બેસેડર’ પૈકીના એક તરીકે અહીં હાજર છે. ભારતે રવિવારે પાકિસ્તાનને 6 વિકેટથી હરાવીને સેમિફાઇનલમાં એન્ટ્રી મારી લીધી છે. ધવન મેચ જોયા બાદ ઈન્ડિયન ડ્રેસિંગ રૂમમાં પણ ગયો હતો. મેચ દરમિયાન મીડિયા સાથે વાત કરતા તેને પૂછવામાં આવ્યું કે, શું BCCIએ ખેલાડીઓ માટે રણજી ટ્રોફીમાં ભાગ લેવું ફરજિયાત કરીને યોગ્ય કર્યું? BCCIનો આ નિર્દેશ ભારતના ઓસ્ટ્રેલિયાના નિરાશાજનક ટેસ્ટ પ્રવાસ બાદ આવ્યો છે, જેમાં ટીમ 1-3થી હારી ગઈ હતી અને એક દાયકામાં પહેલી વાર બોર્ડર-ગાવસ્કર ટ્રોફી ગુમાવી હતી. બોર્ડના નિર્દેશોનું પાલન કરીને રોહિત શર્મા, વિરાટ કોહલી અને યશસ્વી જયસ્વાલ જેવા ખેલાડીઓએ ચેમ્પિયન્સ ટ્રોફી પહેલા તેમની રાજ્ય ટીમો માટે ઓછામાં ઓછી એક મેચ રમી હતી.
ભારતના પૂર્વ ઓપરન બેટ્સમેન શિખર ધવને ડોમોસ્ટિક ક્રિકેટને ફરજિયાત તો જણાવ્યું પરંતુ આ સાથે જ એમ પણ કહ્યું કે, ખેલાડીઓને આરામ પણ મળવો જોઈએ. શિખર ધવને તમામ ખેલાડીઓ માટે ડોમેસ્ટિક ક્રિકેટને ફરજિયાત કરવાના BCCIના નિર્ણયને સપોર્ટ તો કર્યો પરંતુ તેણે સંતુલિત દ્રષ્ટિકોણ અપનાવવા માટે પણ વિનંતી કરી, જેથી ખેલાડીઓને થાક ન અનુભવાય. આના જવાબમાં 39 વર્ષના પૂર્વ ઓપનરે કહ્યું કે, ‘આ ખૂબ જ સારો નિર્ણય છે. હું માત્ર એટલું જ કહેવા માગુ છું કે, ખેલાડીઓ પર વધુ પડતો બોજ ન નાખવો જોઈએ. પરંતુ લોકો તેના પર નજર રાખશે. એ સારી વાત છે કે ખેલાડીઓ ડોમેસ્ટિક ક્રિકેટ રમ્યા, જેમ કે વિરાટ રમ્યો હતો અને સ્ટેડિયમ આખું ભરાઈ ગયુ હતું. પરંતુ આ સાથે તેમને આરામ પણ મળવો જોઈએ.’ ધવને રોહિતની પ્રશંસા કરી, જે અત્યાર સુધી સારા ફોર્મમાં છે. પાકિસ્તાન સામેની મેચમાં કેપ્ટન રોહિત શર્મા 20 રન બનાવીને આઉટ થઈ ગયો હતો, પરંતુ ધવને તેની સકારાત્મક બાજુ જોઈ. તેણે કહ્યું કે, ‘તે આઉટ થઈ ગયો પણ તેણે એટલો જોશ ઉત્પન્ન કર્યો કે બીજા ખેલાડીઓએ ફાયદો ઉઠાવ્યો.’
મુંબઈ: કર્ણાટકમાં મહારાષ્ટ્ર બસ પર થયેલા હુમલા બાદથી બંને રાજ્યો વચ્ચે તણાવનું વાતાવરણ છે. આ દરમિયાન મહારાષ્ટ્ર સરકારના પરિવહન મંત્રી પ્રતાપ સરનાઈકે એક મોટું નિવેદન બહાર પાડ્યું છે. સરનાઈકે જણાવ્યું હતું કે રાજ્ય પરિવહન કર્મચારીઓ પરના હુમલાને પગલે, મહારાષ્ટ્ર સરકાર કર્ણાટક જતી બસોમાં સુરક્ષા માર્શલ અથવા પોલીસ કર્મચારીઓને તૈનાત કરવાનું વિચારી રહી છે.
મરાઠી આપણું ગૌરવ છે – પ્રતાપ સરનાઈક
મહારાષ્ટ્રના પરિવહન મંત્રી પ્રતાપ સરનાઈકે કહ્યું, “પરિવહન મંત્રી તરીકે મારે મારા મુસાફરોની સલામતી વિશે વિચારવું પડશે. જો કેટલાક અસામાજિક તત્વો હશે તો આપણે કર્ણાટક જતી આપણી સરકારી બસોમાં સુરક્ષા માર્શલ અથવા પોલીસ કર્મચારીઓને તૈનાત કરવા વિશે વિચારવું પડશે. મરાઠી આપણું ગૌરવ છે અને આપણે આપણા મુસાફરોની સુરક્ષાનું ધ્યાન રાખવું પડશે અને રાજ્ય મંત્રીમંડળની બેઠકમાં પણ આ મુદ્દા પર ચર્ચા કરવામાં આવશે. મહારાષ્ટ્રનું પોતાનું ગૌરવ છે અને જો પડોશી રાજ્યના લોકો મહારાષ્ટ્રના લોકોને ધમકી આપે છે, તો તે સહન કરવામાં આવશે નહીં.”
વિવાદ કેમ થયો?
હકીકતમાં, મહારાષ્ટ્રની સરહદે આવેલા બેલગામ જિલ્લામાં, કર્ણાટક રાજ્ય પરિવહન નિગમની બસના કંડક્ટર પર કથિત રીતે એક છોકરીને મરાઠીમાં જવાબ ન આપવા બદલ હુમલો કરવામાં આવ્યો હતો. બીજી તરફ, સગીર છોકરીએ પણ કંડક્ટર પર ‘અભદ્ર વર્તન’નો આરોપ લગાવ્યો છે. આ પછી, બંને રાજ્યોના સરહદી વિસ્તારોમાં તણાવ ફેલાઈ ગયો. આ પછી, ચિત્રદુર્ગમાં કથિત કન્નડ ભાષી કાર્યકરો દ્વારા મહારાષ્ટ્ર પરિવહન નિગમની બસ અને તેના ડ્રાઇવર પર હુમલો કરવામાં આવ્યો. ત્યાર બાદ મહારાષ્ટ્રે કર્ણાટક જતી રાજ્ય માર્ગ પરિવહન નિગમની બસો સ્થગિત કરી દીધી.
મહારાષ્ટ્રના ગૃહ રાજ્યમંત્રી યોગેશ કદમે પણ આ બાબતે નિવેદન બહાર પાડ્યું છે. તેમણે કહ્યું છે કે મુસાફરોને સુરક્ષા પૂરી પાડવાની જવાબદારી કર્ણાટક સરકારની પણ છે. જો તેઓ આમ નહીં કરે, તો મહારાષ્ટ્ર રાજ્ય સરકાર તે કરશે. તમને જણાવી દઈએ કે બેલગામને લઈને મહારાષ્ટ્ર અને કર્ણાટક વચ્ચે દાયકાઓથી વિવાદ ચાલી રહ્યો છે. બેલગામમાં મરાઠી ભાષી લોકોની વસ્તી નોંધપાત્ર છે. આ કારણોસર લોકોનો એક વર્ગ માંગ કરે છે કે તેને મહારાષ્ટ્રમાં ભેળવી દેવામાં આવે. કન્નડ તરફી કાર્યકરો આ માંગનો વિરોધ કરી રહ્યા છે.
અમદાવાદ: ગુજરાત રાજ્ય માધ્યમિક શિક્ષણ વિભાગ અને ઉચ્ચતર માધ્યમિક શિક્ષણ વિભાગ 2025ની પરીક્ષા 27 ફેબ્રુઆરીના રોજ શરૂ થશે. ધોરણ દશ અને બારની આ પરીક્ષા પહેલાં બોર્ડ તેમજ શાળાઓએ વિદ્યાર્થીઓની સગવડતા માટે તમામ તૈયારીઓ કરી દીધી છે.26મી ફેબ્રુઆરીએ શિવરાત્રિ હોવાના કારણે આજે વહેલી સવારથી જ પરીક્ષા કેન્દ્રો પર વિદ્યાર્થીઓના ફાળવેલા ક્લાસરૂમ તેમજ બેઠક વ્યવસ્થા જોવાનું આયોજન સંચાલકો દ્વારા કરવામાં આવ્યું હતું.અમદાવાદ શહેરના પશ્વિમ અને પૂર્વ વિભાગના પરીક્ષા કેન્દ્ર પર બેઠક વ્યવસ્થા જોવા વિદ્યાર્થીઓએ શાળાઓની મુલાકાત લીધી હતી.
દ્વારકા: મહાશિવરાત્રિના એક દિવસ બાકી છે, મહાદેવના મહા પૂર્વને લઈ શિવાલયોમાં ઘોડાપુર ઉમટ્વાનું શરૂ થઈ ચૂક્યું છે. આ વચ્ચે દેવભૂમી દ્વારકામાં શિવભક્તોની આસ્થા સાથે ચેડા કરવામાં આવ્યા છે. જિલ્લાના હર્ષદમાં દરિયાકિનારે આવેલા ભીડ ભંજન મહાદેવ મંદિરમાંથી શિવલિંગ ગુમ થઈ જતા ભક્તોમાં રોષ જોવા મળ્યો છે. ઉલ્લેખનીય છે કે હાલ પોલીસ અને SRD જવાનો મંદિરે તપાસ માટે પહોંચ્યા હતાં. આ તપાસ દરમિયાન દરિયાકાંઠેથી ખંડિત હાલતમાં શિવલિંગ મળી આવ્યું છે.
આખી વાત એમ છે કે, દ્વારકાના હર્ષદ દરિયાકાંઠે ભીડભંજન મહાદેવ મંદિરમાંથી શિવલિંગ ગુમ થઈ ગયું હોવાના સમાચાર સામે આવ્યા હતા. મંદિરમાં પૂજા-અર્ચના કરનારા ભક્તો દ્વારા સમગ્ર મામલે પોલીસને જાણ કરવામાં આવી હતી. ત્યારબાદ પોલીસ અને SRDના જવાનોએ ઘટનાસ્થળે પહોંચી તપાસ હાથ ધરી હતી. તપાસ દરમિયાન દરિયાકાંઠેથી શિવલિંગ મળી આવ્યું છે. જોકે, શિવલિંગ મળ્યું ત્યારે તે ખંડિત હાલતમાં હતું, જેનાથી ભક્તોની લાગણીને ઠેસ પહોંચી છે. હાલ, મોટી સંખ્યામાં ભક્તો મંદિરે પહોંચી શિવલિંગને ખંડિત કરનાર અસામાજિક તત્ત્વો સામે વિરોધ પ્રદર્શન કરી રહ્યા છે. લોકોની આસ્થા આ મંદિર સાથે જોડાયેલી હોવાથી શિવલિંગ ખંડિત થતાં તેમની ધાર્મિક આસ્થાને ઠેસ પહોંચી છે. હાલ, પોલીસે સમગ્ર મામલે ગુનો નોંધી શિવલિંગ ખંડિત કરનારને ઝડપી પાડવા તપાસ હાથ ધરી છે. તેમજ આ કૃત્ય કરવા પાછળનું કારણ પણ શોધવાનો પ્રયાસ હાથ ધરવામાં આવ્યો છે.
મુંબઈ: વિક્કી કૌશલ આ દિવસોમાં સમાચારમાં છે. તેની નવી ફિલ્મ ‘છાવા’ ધમાલ મચાવી રહી છે. છત્રપતિ સંભાજી મહારાજની ભૂમિકા ભજવવા બદલ વિક્કીને ખૂબ પ્રશંસા મળી રહી છે, પરંતુ છાવા ફિલ્મ કમાણીની બાબતમાં પણ બે ડગલા આગળ છે. બસ, આ તો ફક્ત શરૂઆત છે. ‘છાવા’ પછી વિકી તેની આગામી બ્લોકબસ્ટર ફિલ્મ માટે તૈયારી કરી રહ્યા છે.
લક્ષ્મણ ઉતેકરની ફિલ્મ ‘છાવા’માં શાનદાર અભિનય આપ્યા બાદ વિકી કૌશલ તેની આગામી ફિલ્મ ધૂમ મચાવવા માટે તૈયાર છે. તે સંજય લીલા ભણસાલીની ફિલ્મ લવ એન્ડ વોરના શૂટિંગમાં વ્યસ્ત છે. તાજેતરમાં તેમણે સંજય લીલા ભણસાલીના જન્મદિવસની ઉજવણી માટે તેમના ફિલ્મ સેટ પરથી વિરામ લીધો હતો.
સંજય લીલા ભણસાલીએ 24 ફેબ્રુઆરી 2025 ના રોજ તેમનો 62મો જન્મદિવસ ઉજવ્યો. આલિયા ભટ્ટે તેના ઇન્સ્ટાગ્રામ એકાઉન્ટ પર દિગ્દર્શકના જન્મદિવસની ઝલક શેર કરી છે. ફોટામાં, આલિયા ભટ્ટ, રણબીર કપૂર અને વિકી કૌશલ દિગ્દર્શક સંજય લીલા ભણસાલીના જન્મદિવસની ઉજવણી કરતા જોવા મળે છે. ભણસાલી સાથે, વિકીએ પણ ‘છાવા’ની સફળતાની ઉજવણી કરી હતી.
આલિયા ભટ્ટે યાદગાર તસવીરો સાથે કેપ્શન આપ્યું, “અમારા દિગ્દર્શકની ઉજવણી કરવા માટે રાત્રિના શૂટિંગમાંથી થોડો બ્રેક લીધો. જાદુગર સાહેબ, તમને જન્મદિવસની શુભકામનાઓ (અને અમારી ગંગુએ 3 વર્ષ પૂર્ણ કર્યા છે). છેલ્લે, ‘છાવા’ ફિલ્મથી બોક્સ ઓફિસ પર ધમાલ મચાવનાર વિકી કૌશલને ખૂબ ખૂબ અભિનંદન અને અભિવાદન. ચાલો, પાર્ટી પૂરી થઈ ગઈ. શૂટિંગ પર પાછા ફરો.”
પાકિસ્તાનમાં ચીનના પ્રોજેક્ટને ફરી એકવાર નિશાન બનાવવામાં આવ્યું છે. બલૂચ બળવાખોરોએ બલૂચિસ્તાનના કલાત જિલ્લામાં સૈંડક ખનન પ્રોજેક્ટ સાથે જોડાયેલા સામાન લઈ જતા 29 વાહનોના કાફલા પર હુમલો કર્યો. આ હુમલામાં બળવાખોરોએ IED વિસ્ફોટથી 20 વાહનોને નિશાન બનાવ્યા અને ત્યારબાદ ભારે ગોળીબાર કર્યો. આ હુમલામાં શરૂઆતમાં 8 સુરક્ષાકર્મીઓ ઘાયલ થયા હોવાનું સામે આવ્યું, જો કે બાદમાં અધિકારીઓએ પુષ્ટિ કરી કે આ કાફલામાં કોઈ ચીની નાગરિક હાજર ન હતો.
બલૂચિસ્તાન પાકિસ્તાનનો સૌથી મોટો ખનિજ સમૃદ્ધ પ્રદેશ છે, જ્યાં ચીનની કંપનીઓ વર્ષોથી ખનન કરી રહી છે. આરોપ છે કે ચીન બલૂચિસ્તાનના સંસાધનોનું શોષણ કરી રહ્યો છે, અને મળતા નફાનો મોટો હિસ્સો પોતાના માટે રાખી લે છે. સ્થાનિક લોકોને ફક્ત 2% ફાયદો મળે છે, જેને કારણે અહીંના લોકોમાં અસંતોષ વધતો જાય છે.
પાકિસ્તાનમાં ચાઈનીઝ પ્રોજેક્ટ અને નાગરિકો પર છેલ્લા કેટલાક વર્ષોથી સતત હુમલાઓ થઈ રહ્યા છે. ગત વર્ષે 6 ઓક્ટોબરે બલૂચ લિબરેશન આર્મી (BLA) ના બળવાખોરોએ કરેલાં બોમ્બ વિસ્ફોટમાં બે ચાઈનીઝ નાગરિકોના મોત થયા હતાં. જેનાથી પાકિસ્તાનમાં ચીનના નાગરિકોની સુરક્ષાને લઈને ચિંતા વધી હતી. ચીનની સુરક્ષાને લઈને ચિંતા વધતા, પાકિસ્તાને પોતાના રક્ષા બજેટમાં વધારો કર્યો છે. તેમ છતાં, આ હુમલાઓ રોકવા પાકિસ્તાની સરકાર માટે મોટી પડકારરૂપ બાબત બની ગઈ છે. ગત વર્ષે ઓગસ્ટમાં પાકિસ્તાને પોતાના 2.1 ટ્રિલિયનના રક્ષા બજેટ હેઠળ ‘ઓપરેશન આઝમ-એ-ઇસ્તેખામ’ માટે 60 અરબ રૂપિયાની ફાળવણી કરી હતી.
ભારતનો પહેલો હાઇપરલૂપ ટેસ્ટ ટ્રેક તૈયાર છે. નવી ટેકનોલોજી સાથેની આ જાહેર પરિવહન વ્યવસ્થા એક મોટી ક્રાંતિ લાવવા જઈ રહી છે. IIT મદ્રાસ અને ભારતીય રેલ્વેએ સંયુક્ત રીતે આ ટેસ્ટ ટ્રેક તૈયાર કર્યો છે, જે 422 મીટર લાંબો છે. તેના સફળ પરીક્ષણ પછી, દેશના મહાનગરો આ નવી પરિવહન વ્યવસ્થા સાથે જોડાયેલા રહેશે. ભારતીય રેલ્વેના આ પ્રોજેક્ટમાં, વિશ્વની સૌથી ઝડપી બુલેટ ટ્રેન કરતા બમણી ગતિએ એક જગ્યાએથી બીજી જગ્યાએ પહોંચી શકાય છે.
કેન્દ્રીય રેલ્વે મંત્રી અશ્વિની વૈષ્ણવે આ 422 મીટર લાંબા હાઇપરલૂપ ટેસ્ટ ટ્રેકનો એક વીડિયો શેર કર્યો છે, જેમાં કહેવામાં આવ્યું છે કે IIT મદ્રાસના સહયોગથી વિકસાવવામાં આવેલ આ નવીનતા ભવિષ્યના પરિવહનને એક નવા સ્તરે લઈ જશે. એવું કહેવામાં આવી રહ્યું છે કે તેના પર દોડતી ટ્રેનની ગતિ 1100 કિલોમીટર પ્રતિ કલાક સુધી હોઈ શકે છે. આના દ્વારા તમે દિલ્હીથી જયપુર માત્ર 30 મિનિટમાં મુસાફરી કરી શકો છો.
The hyperloop project at @iitmadras; Government-academia collaboration is driving innovation in futuristic transportation. pic.twitter.com/S1r1wirK5o
આ એક નવી પરિવહન વ્યવસ્થા છે, જેમાં ટ્રેનને ખાસ પ્રકારની ટ્યુબમાં બુલેટ કરતા બમણી ગતિએ ચલાવી શકાય છે. આ ટેકનોલોજી દ્વારા ખૂબ જ ઝડપી અને સલામત મુસાફરી પૂરી પાડી શકાય છે. ટેસ્ટ ટ્રેક પર ટૂંક સમયમાં ટ્રાયલ શરૂ થશે. ટ્રાયલ પૂર્ણ થયા પછી આ જાહેર પરિવહન વ્યવસ્થાને જમીન પર લાગુ કરી શકાય છે.
જો ભારતમાં હાઇપરલૂપ ટ્રેન શરૂ કરવામાં આવે છે, તો તે હાલની ટ્રેન અને રોડ મુસાફરીની સાથે એક નવો જાહેર પરિવહન મોડ બનાવશે. હાઇપરલૂપનો ટેસ્ટ ટ્રેક બિછાવીને ભારત એવા દેશોના પસંદગીના જૂથમાં જોડાયું છે જે આ ટેકનોલોજીને પરિવહનના ભવિષ્યના માધ્યમ તરીકે જોઈ રહ્યા છે. ભલે ભારત બુલેટ ટ્રેનની દોડમાં ચીન, જાપાન જેવા દેશોથી પાછળ રહી ગયું હોય, પરંતુ પરિવહનના આ નવા માધ્યમમાં, ભારત ઘણા વિકસિત દેશો સાથે ખભે ખભો મિલાવીને ચાલી રહ્યું છે.
કોમ્પ્ટ્રોલર અને ઓડિટર જનરલ (CAG)ના તાજેતરના અહેવાલમાં દિલ્હીની આબકારી નીતિ અને દારૂના પુરવઠા સંબંધિત નિયમોના અમલીકરણમાં ગંભીર ખામીઓ બહાર આવી છે. રિપોર્ટમાં કહેવામાં આવ્યું છે કે આબકારી વિભાગની નીતિઓ અને તેના અમલીકરણમાં પારદર્શિતાનો અભાવ હતો, જેના કારણે સરકારને લગભગ રૂપિયા 2,026.91 કરોડનું નુકસાન થયું હતું.
દિલ્હી સરકારના કુલ કરવેરા આવકના લગભગ 14% આબકારી વિભાગમાંથી આવે છે. આ વિભાગ દારૂ અને માદક દ્રવ્યોના વેપારનું નિયંત્રણ અને નિયમન કરે છે, અને દારૂની ગુણવત્તા સુનિશ્ચિત કરવા માટે પણ જવાબદાર છે. ૧ જુલાઈ ૨૦૧૭થી GST લાગુ થયા પછી, માનવ વપરાશ માટેનો દારૂ એકમાત્ર એવું ઉત્પાદન હતું જેના પર એક્સાઇઝ ડ્યુટી લાગુ પડતી રહી. તેથી, આબકારી વિભાગની મુખ્ય આવક દારૂના વેચાણમાંથી આવે છે.
નુકસાન કેવી રીતે થયું?
CAG રિપોર્ટમાં જણાવાયું છે કે દારૂ નીતિમાં ઘણી અનિયમિતતાઓ અને બેદરકારીભર્યા નિર્ણયો લેવામાં આવ્યા હતા, જેના કારણે દિલ્હી સરકારને મોટું નુકસાન થયું હતું.
૮૯૦ કરોડ રૂપિયાનું નુકસાન – સરકાર દ્વારા સોંપાયેલા લાઇસન્સનું ફરીથી હરાજી કરવામાં નિષ્ફળ ગઈ.
કોવિડ-૧૯ ના બહાના હેઠળ દારૂના વેપારીઓને ૧૪૪ કરોડ રૂપિયાની છૂટ આપવામાં આવી.
૨૭ કરોડ રૂપિયાનું નુકસાન – દારૂના વેપારીઓ પાસેથી પૂરતી સિક્યોરિટી ડિપોઝિટ લેવામાં આવી નથી.
આ માર્ગો દ્વારા ગ્રાહક સુધી દારૂ પહોંચે છે
દારૂ પુરવઠા પ્રણાલીમાં ઘણા પક્ષો સામેલ છે. દારૂ ઉત્પાદકો, દિલ્હી સ્થિત ગોદામો, સરકારી અને ખાનગી દારૂની દુકાનો, હોટલ, ક્લબ અને રેસ્ટોરાંમાંથી મુસાફરી કરે છે અને અંતે ગ્રાહકો સુધી પહોંચે છે. આબકારી વિભાગ એક્સાઇઝ ડ્યુટી, લાઇસન્સ ફી, પરમિટ ફી, આયાત/નિકાસ ડ્યુટી વગેરે જેવા વિવિધ વિભાગોમાંથી મહેસૂલ એકત્રિત કરે છે.
લાઇસન્સ આપવામાં નિયમોનું ઉલ્લંઘન
CAG રિપોર્ટમાં જાણવા મળ્યું છે કે આબકારી વિભાગે લાઇસન્સ આપતી વખતે નિયમોનું યોગ્ય રીતે પાલન કર્યું નથી. દિલ્હી એક્સાઇઝ રૂલ્સ, 2010 ના નિયમ 35 મુજબ, એક જ વ્યક્તિ કે કંપનીને વિવિધ પ્રકારના લાઇસન્સ (જથ્થાબંધ, છૂટક, હોટેલ-રેસ્ટોરન્ટ) આપી શકાતા નથી. પરંતુ તપાસમાં જાણવા મળ્યું કે કેટલીક કંપનીઓને એકસાથે અનેક પ્રકારના લાઇસન્સ આપવામાં આવ્યા હતા.
ઘણા કિસ્સાઓમાં, આબકારી વિભાગે જરૂરી તપાસ કર્યા વિના લાઇસન્સ જારી કર્યા. આમાં નાણાકીય સ્થિરતા, વેચાણ અને કિંમતો સંબંધિત દસ્તાવેજો, અન્ય રાજ્યોમાં જાહેર કરાયેલ કિંમતો અને અરજદારોના ગુનાહિત રેકોર્ડની તપાસ જેવા મહત્વપૂર્ણ મુદ્દાઓનો સમાવેશ થતો હતો. કેટલીક કંપનીઓએ દારૂના વેપારમાં કાર્ટેલ બનાવવા અને બ્રાન્ડ પ્રમોશન માટે પોતાનો હિસ્સો છુપાવવા માટે પ્રોક્સી માલિકીનો આશરો લીધો.
મનસ્વી રીતે નક્કી કરેલી કિંમત
રિપોર્ટમાં એ પણ જાણવા મળ્યું છે કે જથ્થાબંધ વેપારીઓને ફેક્ટરીમાંથી દારૂની કિંમત નક્કી કરવાની સ્વતંત્રતા આપવામાં આવી હતી, જેના કારણે ભાવમાં હેરાફેરી થઈ હતી. તપાસમાં જાણવા મળ્યું કે એક જ કંપની દ્વારા અલગ અલગ રાજ્યોમાં વેચાતા દારૂના ભાવ અલગ અલગ હતા. મનસ્વી રીતે નક્કી કરાયેલા ભાવોને કારણે કેટલીક બ્રાન્ડના વેચાણમાં ઘટાડો થયો અને સરકારને એક્સાઇઝ ડ્યુટીના રૂપમાં નુકસાન થયું. સરકારે કંપનીઓ પાસેથી પડતર કિંમત તપાસી ન હતી, જેના કારણે નફાખોરી અને કરચોરીની શક્યતાઓ રહી ગઈ.
ટેસ્ટ રિપોર્ટ ઉપલબ્ધ નહોતો
દિલ્હીમાં વેચાતા દારૂની ગુણવત્તા સુનિશ્ચિત કરવાની જવાબદારી એક્સાઇઝ વિભાગની છે. નિયમો મુજબ, દરેક જથ્થાબંધ વેપારીએ ભારતીય માનક બ્યુરો મુજબ પરીક્ષણ અહેવાલ સબમિટ કરવાનો રહેશે. પરંતુ તપાસમાં જાણવા મળ્યું કે ઘણા લાઇસન્સ ધારકોએ જરૂરી ગુણવત્તા ચકાસણી અહેવાલો સબમિટ કર્યા ન હતા. ૫૧% કેસોમાં, વિદેશી દારૂનો ટેસ્ટ રિપોર્ટ કાં તો એક વર્ષથી વધુ જૂનો હતો અથવા ઉપલબ્ધ નહોતો. નેશનલ એક્રેડિટેશન બોર્ડ ફોર ટેસ્ટિંગ એન્ડ કેલિબ્રેશન લેબોરેટરીઝ દ્વારા માન્યતા પ્રાપ્ત ન હોય તેવી પ્રયોગશાળાઓમાંથી ઘણા અહેવાલો જારી કરવામાં આવ્યા હતા.
એક્સાઇઝ ઇન્ટેલિજન્સ બ્યુરોની ભૂમિકા નબળી રહી. જપ્ત કરાયેલા દારૂમાંથી 65% દેશી દારૂ હતો, જે દર્શાવે છે કે આ દારૂનો ગેરકાયદેસર પુરવઠો મોટા પાયે થઈ રહ્યો હતો. દારૂની દાણચોરી રોકવા માટે ડેટા એનાલિટિક્સ અને આર્ટિફિશિયલ ઇન્ટેલિજન્સ જેવી આધુનિક ટેકનોલોજીનો ઉપયોગ કરવામાં આવ્યો ન હતો.
કેબિનેટની મંજૂરી વિના મોટો ફેરફાર
નવી આબકારી નીતિ 2021-22માં પણ ઘણી ખામીઓ જોવા મળી હતી. સરકારે ખાનગી કંપનીઓને જથ્થાબંધ વેપાર લાઇસન્સ આપવાનો નિર્ણય લીધો, જેનાથી સરકારી કંપનીઓને બાકાત રાખવામાં આવી. મંત્રીમંડળની મંજૂરી વિના નીતિમાં નોંધપાત્ર ફેરફારો કરવામાં આવ્યા હતા, જેના કારણે સરકારી તિજોરીને નુકસાન થયું હતું. આ નીતિને કારણે સરકારને રૂપિયા 2,002 કરોડનું નુકસાન થયું.
કંપનીઓએ તેમના લાઇસન્સ પરત કર્યા હતા
ઘણી કંપનીઓએ તેમના લાઇસન્સ અધવચ્ચે જ છોડી દીધા, જેના કારણે વેચાણ પર અસર પડી અને સરકારને રૂપિયા 890 કરોડનું નુકસાન થયું. સરકારે ઝોનલ લાઇસન્સ ધારકોને રૂપિયા 941 કરોડનું રિબેટ આપ્યું, જેના કારણે મહેસૂલનું નુકસાન થયું. કોવિડ-૧૯ રોગચાળા દરમિયાન, સરકારે લાઇસન્સ ફીમાં રૂપિયા ૧૪૪ કરોડનો માફી આપ્યો હતો, જે આબકારી વિભાગના અગાઉના નિર્દેશોની વિરુદ્ધ હતો.
CAG એ આ સૂચન આપ્યું છે
CAG એ સૂચન કર્યું છે કે લાઇસન્સિંગ પ્રક્રિયા પારદર્શક બનાવવી જોઈએ અને નિયમોનું કડક પાલન કરવું જોઈએ. દારૂના ભાવ નક્કી કરવાની પ્રક્રિયામાં પારદર્શિતા હોવી જોઈએ અને સરકારે નફાખોરીને રોકવા માટે કિંમતોનું વિશ્લેષણ કરવું જોઈએ. નકલી અને ભેળસેળયુક્ત દારૂનું વેચાણ બંધ થાય તે માટે ગુણવત્તા નિયંત્રણ કડક બનાવવું જોઈએ. દારૂની દાણચોરી રોકવા માટે આધુનિક ટેકનોલોજી અને ડેટા એનાલિટિક્સનો ઉપયોગ થવો જોઈએ. નવી નીતિમાં સુધારા કરવા જોઈએ અને સરકારને થયેલા નાણાકીય નુકસાનની જવાબદારી નક્કી કરવી જોઈએ.
રિપોર્ટમાં સૂચવવામાં આવ્યું છે કે આબકારી વિભાગે દારૂના ભાવ, ગુણવત્તા નિયંત્રણ અને નિયમનકારી તંત્રને મજબૂત બનાવવા માટે નક્કર પગલાં લેવા જોઈએ. આ રિપોર્ટ જાહેર થયા પછી, દિલ્હી સરકાર આ અંગે શું પગલાં લે છે અને આ ભલામણોનો અમલ કેવી રીતે થાય છે તે જોવાનું બાકી છે. તેનો ઉપયોગ થાય છે.
રણવીર અલ્હાબાદિયા, જેને ‘બેરબાઈસેપ્સ’ તરીકે પણ ઓળખવામાં આવે છે. આ દિવસોમાં તે સમય રૈનાના શો ‘ઇન્ડિયાઝ ગોટ લેટેન્ટ’ને લઈને વિવાદમાં છે. શોમાં એક સ્પર્ધકના માતા-પિતા વિશે ખરાબ ટિપ્પણી કર્યા બાદ તે મુશ્કેલીમાં મુકાઈ ગયો છે. હવે ‘ઈન્ડિયાઝ ગોટ લેટેન્ટ’ કેસમાં તેણે તપાસ અધિકારી સમક્ષ પોતાના નિવેદનમાં ભૂલ સ્વીકારી છે અને આ શોમાં જવા પાછળનું કારણ પણ જણાવ્યું છે. રણવીરે કહ્યું કે તેણે ભૂલ કરી છે.
સમય રૈનાના શોમાં જવાનું આ હતું કારણ
‘ઈન્ડિયાઝ ગોટ લેટેન્ટ’ કેસ મામલે રણવીર અલ્હાબાદિયાએ ગઈકાલે તપાસ અધિકારી સમક્ષ પોતાના નિવેદનમાં ભૂલ સ્વીકારી છે. રણવીરે પોલીસને જણાવ્યું કે સમય રૈના તેનો મિત્ર છે. એટલા માટે તે શોમાં ગયો. રણવીરે એવો પણ દાવો કર્યો હતો કે તેણે શોમાં આવવા માટે કોઈ પૈસા લીધા નથી. રણવીરે પોલીસને જણાવ્યું કે અમે યુટ્યુબર્સ છીએ અને તેથી જ મિત્રતાને કારણે અમે એકબીજાના શોમાં જતા રહીએ છીએ.
શું રણવીરે શો માટે પૈસા લીધા હતા?
રણવીર અલ્હાબાદિયાએ પોતાના નિવેદનમાં વધુમાં કહ્યું કે આટલો મોટો વિવાદ સર્જનાર વાક્ય બોલવું તેમની ભૂલ હતી. રણવીરે પોલીસ સમક્ષ પોતાનો ગુનો કબૂલ કર્યો અને કહ્યું કે તેણે ભૂલ કરી છે. તેણે એમ પણ કહ્યું કે મારે તેને આવું ન કહેવું જોઈતું હતું. મને આ બધું કહેવાનો કોઈ પગાર મળતો નથી. ‘ઈન્ડિયાઝ ગોટ લેટેન્ટ’ કેસમાં મહારાષ્ટ્ર સાયબર દ્વારા યુટ્યુબરની પાંચ કલાક પૂછપરછ કરવામાં આવી હતી. આ સમય દરમિયાન આ ખુલાસો થયો છે.
ઇન્ડિયા’ઝ ગોટ લેટેન્ટ વિવાદ શું છે?
તમને જણાવી દઈએ કે સમય રૈના યુટ્યુબ પર ‘ઈન્ડિયાઝ ગોટ લેટેન્ટ’ નામનો શો ચલાવે છે જે એક ડાર્ક કોમેડી શો છે. પ્રખ્યાત યુટ્યુબર અને પોડકાસ્ટર રણવીર અલ્હાબાદિયાએ તેમાં ભાગ લીધો હતો અને તે દરમિયાન તેમની ટિપ્પણીઓને કારણે શો વિવાદમાં ફસાઈ ગયો હતો. હવે આ શો સાથે સંકળાયેલા દરેક વ્યક્તિ કાનૂની મુશ્કેલીઓમાં ફસાઈ ગયા છે. આ અંગે રણવીર અને સમય વિરુદ્ધ ફરિયાદ દાખલ કરવામાં આવી હતી.
અરવલ્લી જિલ્લાના મોડાસામાં ભાજપના મંત્રીના પુત્રોની ધોળેદહાડે ખુલ્લેઆમ દાદાગીરીનો વીડિયો વાયરલ થયો હતો. અંગત અદાવતમાં એક યુવકને માર માર્યો હોવાનું પણ સામે આવ્યું હતું, આ ઘટનાના સીસીટીવી ફૂટેજ પણ સામે આવ્યા હતા. હવે ગાંધીનગરમાં ભાજપના મંત્રી ભીખુસિંહ પરમારનું પુત્ર અને પૌત્રની મારામારી મામલે ભેદી મૌન જોવા મળ્યું. મીડિયાને જવાબ ન આપવો પડે તે માટે તેમણે પ્રવેશદ્વાર બદલી નાખો હતો. ઉલ્લેખનીય છે કે મારામારીની ઘટનામાં હજુ સુધી કોઇ ફરિયાદ નોંધાઈ નથી. મંત્રી ભીખુસિંહ પરમાર મીડિયાથી બચવા મંત્રી MLA પ્રવેશદ્વાર પહોંચ્યા અને જય શ્રી રામ કહી રવાના થયા. અગાઉ મંત્રીના પૌત્રનું BZ કૌભાંડમાં નામ આવ્યું હતું.
મંત્રી ભીખુસિંહ પરમારના પુત્રની દાદાગીરી મુદ્દે કોંગ્રેસ પ્રવક્તા મનીષ દોશીએ ભાજપ પર આકરા પ્રહાર કરતાં કહ્યું હતું કે ‘એક તરફ સરકાર કહે છે કે કાયદામાં રહેશો તો ફાયદામાં રહેશો… ત્યારે આ કિસ્સામાં મંત્રીના પુત્રએ જ કાયદાનો ભંગ કર્યો છે. આ મામલે હજુ સુધી કોઇ પોલીસ ફરિયાદ પણ નોંધાઇ નથી. આ મામલે તો ભાજપનો ખેસ પહેરો અને કાયદાનો ભંગ કરો એવી સ્થિતિનું નિર્માણ થયું છે.
વાત આખી એમ છે કે, થોડા દિવસો પહેલાં અરવલ્લી જિલ્લામાં રાજ્ય સરકારના મંત્રી ભીખુસિંહ પરમારના પૌત્રને કેટલાક લોકોએ માર માર્યો હતો. આ ઘટનાનાં CCTV ફૂટેજ પણ સામે આવ્યા હતા. ત્યારબાદ આ ઘટાનાની અંગત અદાવત રાખીને રોષે ભરાયેલા ભીખુસિંહ પરમારના પુત્રોએ રૌફ જમાવવાનાં ચક્કરમાં કાયદો વ્યવસ્થાનો ભંગ કરી પૌત્રને માર મારનાર યુવકને જાહેરમાં ફટકાર્યો હતો. આ ઘટનાનો વીડિયો પણ સામે આવ્યો છે. યુવકને મોડાસાથી શોધી કાઢીને માર માર્યો હતો. સીસીટીવીમાં સ્પષ્ટ દેખાય છે કે એક્ટિવા પર સવાર યુવકને પકડીને માર મારવામાં આવતો હોવાનું દેખાઇ રહ્યું છે. આ યુવક ચાલી ચલાવીને ગુજરાન ચલાવે છે.
26મી ફેબ્રુઆરીએ શિવરાત્રિ હોવાના કારણે આજે વહેલી સવારથી જ પરીક્ષા કેન્દ્રો પર વિદ્યાર્થીઓના ફાળવેલા ક્લાસરૂમ તેમજ બેઠક વ્યવસ્થા જોવાનું આયોજન સંચાલકો દ્વારા કરવામાં આવ્યું હતું.
અમદાવાદ શહેરના પશ્વિમ અને પૂર્વ વિભાગના પરીક્ષા કેન્દ્ર પર બેઠક વ્યવસ્થા જોવા વિદ્યાર્થીઓએ શાળાઓની મુલાકાત લીધી હતી.
