કોરિયોગ્રાફર તરીકે શરૂઆત કરનાર પ્રભુ દેવાને હિન્દી ફિલ્મોમાં અનેક પ્રકારના અનુભવ થયા છે. એક ગીત માટે એને 50 દિવસ આપવામાં આવ્યા હતા પણ ગણતરીના દિવસોમાં શુટિંગ કર્યું હતું. તો એક ગીત માત્ર એક કલાકમાં તૈયાર કરી દીધું હતું. નિર્માતા બોની કપૂર ફિલ્મ ‘રૂપ કી રાની ચોરોં કા રાજા’ (1993) બનાવી રહ્યા હતા ત્યારે શ્રીદેવીએ કોરિયોગ્રાફર તરીકે પ્રભુનું નામ સૂચવ્યું હતું. કેમકે પ્રભુ સાથે દક્ષિણમાં ‘શનમ શનમ’ અને ‘ગોવિંદા ગોવિંદા’ કરી હતી. બોનીએ પ્રભુને કહ્યું કે ગીતના નૃત્ય નિર્દેશન માટે પાંચ નહીં પચાસ દિવસ લઈ શકે છે.

પ્રભુને નવાઈ લાગી કેમકે એ બે-ત્રણ દિવસમાં ગીત પૂરું કરી દેતો હતો. પ્રભુએ એમને કહ્યું હતું કે તે ચાર દિવસમાં ગીત પૂરું કરી દેશે. પણ સેટ પર કલાકારો મોડા આવતા હોવાથી પ્રભુએ ચાર દિવસ પછી રજા માંગી હતી. તે ઘરથી વધારે દૂર રહી શકતો ન હતો. તેણે ગીત માટે ભાઈ અને પિતાને મોકલ્યા હતા.

બીજો કિસ્સો બોની કપૂરની જ ફિલ્મનો છે. ‘પુકાર’ (2000) માટે એક ગીત તૈયાર કરવામાં આવ્યું હતું. તેનાથી નિર્દેશક રાજકુમાર સંતોષી સહિતનાને સંતોષ ન હતો. એમણે એ. આર. રહેમાનનું બીજું એક તમિલ ગીત પસંદ કર્યું હતું. એના પરથી ‘કે સેરા સેરા’ બનાવ્યું હતું. ગીતમાં પ્રભુ દેવા સાથે માધુરી દીક્ષિતને નાચવાનું હતું.

પ્રભુએ માધુરીને કહ્યું કે તમે સુપર સ્ટાર છો અને હું તમારા માટે પહેલી વખત ગીતનું નૃત્ય નિર્દેશન કરી રહ્યો છું. હું ગીતમાં તમારી નૃત્ય પ્રતિભાને બતાવીશ. માધુરીએ કહ્યું કે કોઈ વાંધો નથી. કેટલા રિહર્સલ કરવા છે? 20? 40? 100 રિહર્સલ? હું હાજર રહીશ. પ્રભુએ જે સ્ટેપ આપ્યા એ બધા જ માધુરીએ કર્યા અને એમાં કોઈ ફેરફાર ના કરાવ્યો. પ્રભુ માટે આ ગીત પડકારરૂપ હતું. કેમકે એ. આર. રહેમાનના સંગીતમાં ત્રણ સ્તર હતા. પ્રભુએ કલાકાર, ડાન્સર અને બેકગ્રાઉન્ડ ડાન્સર એમ ત્રણ સ્તર બનાવ્યા હતા. એ સ્તર બતાવવા માટે અલગ સેટની જરૂર પડી હતી.

પ્રભુએ એક જ લાલ રંગનો સેટ તૈયાર કરાવ્યો હતો. જેથી દર્શકોની નજર માત્ર કલાકારો ઉપર જ રહે. એનું શુટિંગ 5 દિવસમાં થયું હતું. ‘કે સેરા સેરા’ અસલમાં 6 મિનિટનું ગીત હતું પણ ફિલ્મમાં સાડા ચાર મિનિટનું રાખવામાં આવ્યું હતું. ફિલ્મ ‘લક્ષ્ય’ (2004) માટે નિર્દેશક ફરહાન અખ્તર પ્રભુના ઘરે ગયા હતા અને ગીત માટે તારીખો આપી હતી. પ્રભુને નવાઈ લાગી હતી. કેમકે એક વર્ષ પછી એ ગીતનું શુટિંગ કરવાના હતા. સામાન્ય રીતે એક- બે મહિના પહેલાંની તારીખ નક્કી થતી હોય છે. અને ફરહાને કહ્યા મુજબ બરાબર એક વર્ષ પછી 1 જૂને જ ગીતનું શુટિંગ ગોઠવ્યું હતું. ફરહાને ‘મૈં ઐસા ક્યૂં હૂં’ ગીત માટે ત્રણ-ચાર સેટ નક્કી કર્યા હતા અને એમાં ગીત વચ્ચે વાર્તા ચાલતી હોવાનું બતાવવાનું હતું.

પ્રભુએ કહ્યું કે ફક્ત ડાન્સ માટે જ મને બોલાવવાનો હતો. અને આટલા બધા સેટની જરૂર ન હતી. પછી પ્રભુએ બેકડ્રોપમાં માત્ર એક જ કાળો રંગ રાખીને ગીત તૈયાર કર્યું હતું. રિતિકે ડાન્સમાં કમાલ કર્યો હતો. રિતિક સાથે 3-4 દિવસ રિહર્સલ કર્યું હતું. પણ માત્ર એક જ કલાકમાં આ ગીતનું શુટિંગ થઈ ગયું હતું. પ્રભુ માટે પહેલી વખત આમ બન્યું હતું. પ્રભુએ ‘લક્ષ્ય’ ની કોરિયોગ્રાફી માટે કારકિર્દીનો બીજો રાષ્ટ્રીય એવોર્ડ મેળવ્યો હતો.