Home Blog Page 1236

સાચા લીડરની પરખ

પાંડવો જ્યારે વનવાસમાં હતા ત્યારે એમને ખતમ કરી નાખવા ‘લાક્ષાગૃહ’નો કારસો યોજાયો હતો. ઝડપથી સળગી ઉઠે એવા મટીરીયલથી આ મકાન બનાવવામાં આવ્યું હતું. તેને મધરાતે આગ લગાડી દેવામાં આવી. સહદેવ ત્રિકાળજ્ઞાની હતો. અહીંયાથી બહાર નીકળવાનો રસ્તો એને ખબર હતો. એને અભિશાપ હતો કે, ‘કોઈ પૂછે તો જ એ આ વાત કહી શકે.’ આખાય પ્રસંગનું સરસ મજાનું વર્ણન કવિ મણિશંકર રત્નજી ભટ્ટ-‘કાન્ત’એ ‘અતિજ્ઞાન’ નામના ખંડકાવ્યમાં કર્યું છે.

આ શાપને કારણે એના પર લદાયેલ મૂંઝવણ સહદેવના મનમાં ઘૂઘવાટા મારે છે. અંદરથી એનું મન ફાટી જાય છે પણ એ બોલી નથી શકતો. છેવટે છેલ્લી ઘડીએ એને પૂછવામાં આવે છે અને એ લાક્ષાગૃહમાંથી ભાગી છૂટવાનો રસ્તો બતાવે છે, જે થકી પાંડવો બચી જાય છે.

કેટલીક પેઢી અથવા કોર્પોરેટ હાઉસમાં પોતાના મિથ્યાભિમાનથી પીડાતા કેટલાક અનુભવી અને સિનિયર એવા હોય છે કે એમને પૂછો તો જ જવાબ આપે. આવા નમૂનાઓ ઘણા બધા કુટુંબોમાં પણ હોય છે. પરિણામ? પાંડવો તો છેલ્લી ઘડીએ ભાગી છૂટ્યા. પણ કેટલાક કોર્પોરેટ હાઉસ, કુટુંબો અતિજ્ઞાનના અભિશાપમાં બધું ખોઈ બેસે છે. આ સહદેવનું જ્ઞાન ક્યારેક અજ્ઞાન કરતાં વધુ મોંઘું અને જોખમી પુરવાર થાય છે.

તમારી પાસે સિનિયોરિટી અને વિશેષ જ્ઞાન છે તો કોઈ પૂછે તો એની રાહ શું કરવા જુઓ છો? એ કામની જવાબદારી તમે ઉપાડી લો. સરવાળે ફાયદો જ ફાયદો છે.

(નિધિ દિવાસળીવાળા નવી પેઢીની તેજસ્વી લેખિકા છે. સુરતસ્થિત વીર નર્મદ યુનિવર્સિટીના સ્નાતક નિધિના બે પુસ્તકો કાવ્યસંગ્રહ ‘ઝરણી’ અને ચિંતનકણિકાના સંગ્રહ ‘નિજાનંદ’ ઉપરાંત ‘થોડામાં ઘણું’ મોટીવેશનલ સુવિચારોને પણ વાચકોએ વખાણ્યા છે. માનવ સંબંધો, સ્વભાવ અને સમાજ વ્યવસ્થા ઉપર આધારિત એક લેખમાળા એમના સોશિયલ મીડિયા ઉપર નિયમિત પ્રસિદ્ધ થાય છે. આ કોલમમાં એ મહાભારત અને ગીતા ઉપર આધારિત વહીવટ તેમજ મોટીવેશનને લગતી વાતો સરળ ભાષામાં સમજાવે છે.)

પંચાંગ 22/12/2024

મહારાષ્ટ્રમાં મંત્રીઓના વિભાગોની વહેંચણી

મહારાષ્ટ્રમાં મુખ્યમંત્રી દેવેન્દ્ર ફડણવીસે મંત્રીઓના વિભાગોની વહેંચણી કરી છે. CMએ ગૃહ વિભાગ પોતાની પાસે રાખ્યું છે. અજિત પવારને ફરી એકવાર નાણાં મંત્રાલયની જવાબદારી સોંપવામાં આવી છે. એકનાથ શિંદેને શહેરી વિકાસ અને આવાસ વિભાગની જવાબદારી સોંપવામાં આવી છે. ધનંજય મુંડેને ખાદ્ય અને નાગરિક પુરવઠા મંત્રાલયનો હવાલો આપવામાં આવ્યો છે, જ્યારે પંકજા મુંડેને પર્યાવરણ મંત્રાલય આપવામાં આવ્યું છે.

 

 

 

 

 

મહારાષ્ટ્ર વિધાનસભા ચૂંટણીમાં રાજ્યની જનતાએ મહાયુતિને સ્પષ્ટ બહુમતી આપી હતી. આ પછી નવી સરકારે 5 ડિસેમ્બરે શપથ લીધા. આ અવસરે દેવેન્દ્ર ફડણવીસે મુખ્યમંત્રી તરીકે શપથ લીધા જ્યારે એકનાથ શિંદે અને અજિત પવારે નાયબ મુખ્યમંત્રી તરીકે શપથ લીધા. જો કે શપથ ગ્રહણ બાદ પણ મંત્રીમંડળનું વિસ્તરણ અટકી ગયું હતું. આ પછી 15 ડિસેમ્બરે કેબિનેટનું વિસ્તરણ કરવામાં આવ્યું હતું. મહાગઠબંધનના 39 મંત્રીઓએ શપથ લીધા, જેમાં 33 કેબિનેટ અને 6 રાજ્ય મંત્રીઓનો સમાવેશ થાય છે.

અલ્લુ અર્જુને તેલંગાણાના CM અને અકબરુદ્દીન ઓવૈસી પર કર્યા પ્રહારો

અભિનેતા અલ્લુ અર્જુને શનિવારે સાંજે જ્યુબિલી હિલ્સ સ્થિત તેના નિવાસસ્થાને પ્રેસ કોન્ફરન્સ યોજી હતી. આ દરમિયાન, નામ લીધા વિના, તેમણે તેલંગાણાના મુખ્યમંત્રી રેવંત રેડ્ડી અને AIMIM ધારાસભ્ય અકબરુદ્દીન ઓવૈસી દ્વારા વિધાનસભામાં કરવામાં આવેલી ટિપ્પણીઓનો જવાબ આપ્યો. સૌ પ્રથમ, તેણે પ્રેસ કોન્ફરન્સમાં મોડા આવવા બદલ માફી માંગી અને કહ્યું કે તેને પોતાને એકત્રિત કરવામાં સમય લાગ્યો. સંધ્યા થિયેટરમાં થયેલી નાસભાગને એક દુર્ભાગ્યપૂર્ણ અકસ્માત ગણાવતા, અભિનેતાએ પીડિત પરિવારને સંબોધન કર્યું અને તેમની સંવેદના વ્યક્ત કરી. તેણે કહ્યું, મને દર કલાકે બાળક વિશે અપડેટ મળી રહી છે. તેની હાલતમાં સુધારો થઈ રહ્યો છે. એક જ સારી વાત એ છે કે બાળક સ્વસ્થ થઈ રહ્યો છે.

પછી તેણે કહ્યું, પ્રેસ મીટનું મુખ્ય કારણ એ છે કે ઘણી બધી ગેરસમજ, ખોટી માહિતી અને ખોટા આરોપો છે. ચારિત્ ખરાબ કરવામાં આવી રહ્યું છે. અત્યંત અપમાનિત અનુભવું છું. આ તે સમય છે જ્યારે મારે ઉજવણી કરવી જોઈએ, ખુશ થવું જોઈએ પરંતુ મેં એવું નથી કર્યું. છેલ્લા 15 દિવસથી ક્યાંય પણ જઈ શકું છું, કાયદેસર રીતે હું બંધાયેલો છું, હું જઈ શકતો નથી.

તેણે કહ્યું કે મેં આ ફિલ્મ દિલથી કરી છે. મેં આ ફિલ્મમાં જેટલી પણ મહેનત કરી છે, તે હું પડદા પર પૂરી રીતે જોઈ શકી નથી. મેં મારી ફિલ્મ થિયેટરમાં પણ જોઈ નથી. આ મારા માટે શિક્ષણનું સૌથી મોટું પ્લેટફોર્મ છે. મેં કેવી રીતે ફિલ્મ કરી છે તેમાંથી આ મારી સૌથી મોટી શીખ છે, હું કેવી રીતે વધુ સારું પ્રદર્શન કરી શકું તે મારા માટે શીખવાનો માર્ગ છે. મારી ફિલ્મો થિયેટરોમાં જોવી મારા માટે મહત્વપૂર્ણ છે જેથી હું તેમની પાસેથી શીખી શકું. હું સ્ક્રીન પર ફિલ્મો જોઈને શીખું છું.

આ અકસ્માતમાં મારી કોઈ સીધી સંડોવણી નથી

અભિનેતાએ કહ્યું કે હું ફિલ્મોમાંથી શીખું છું પરંતુ છેલ્લા 10-15 દિવસથી હું મારા ઘરમાં બેઠો છું કે શું થયું, મને લાગે છે કે આ અકસ્માતમાં મારી સીધી સંડોવણી નથી. હા, તે જગ્યા પર થયું, પરંતુ જે બન્યું તેના માટે હું ખૂબ જ દિલગીર છું. જ્યારે હું અહીં બેઠો છું અને પછી તમે ટિપ્પણી કરો છો કે મેં આ કહ્યું, તે કહ્યું અને મને શું થયું તેની મને પરવા નથી, તો પછી આ કહીને, શું તમે રાષ્ટ્રીય મીડિયાની સામે અને લોકોની સામે મારી ચારિત્ર્ય હત્યાને પ્રોત્સાહન નથી આપી રહ્યા?

તેણે કહ્યું કે મેં છેલ્લા 3 વર્ષમાં આટલી મહેનત કરી છે, મારા ઓડિયો ફંક્શન દરમિયાન પણ મેં મારા ચાહકોને મારી ફિલ્મો જોવા માટે શું કહ્યું હતું, શું મારે એવું ન કહેવું જોઈએ? મેં આ ફિલ્મ દુનિયાભરમાં તેલુગુનું ગૌરવ વધારવાના હેતુથી બનાવી છે. જ્યારે હું આવા શુદ્ધ ઈરાદા સાથે ફિલ્મ બનાવું અને તમે આવીને કહો કે મેં આ કર્યું કે મેં તે કર્યું, તો મને ઘણું દુઃખ થશે. હું અંગત રીતે કોઈને આનો અર્થ નથી. હું દરેકનું સન્માન કરું છું, આ કોઈ પણ પ્રકારનો અંગત હુમલો કે કંઈ નથી. હું શું કહું છું કે હું એવો નથી અને તેઓએ આ સમજવું જોઈએ.

‘પોલીસ જાતે જ ભીડને સાફ કરી રહી હતી’

તેમણે કહ્યું કે કોઈ બેજવાબદારી નથી. ખરેખર, હું છેલ્લા 25-30 વર્ષથી એક જ મૂવી થિયેટરમાં જઉં છું. અને એમ કહેવું કે હું બેજવાબદારીથી અને પરવાનગી વિના થિયેટરમાં ગયો તે તદ્દન ખોટું છે, એવું કંઈ થયું નથી. અમે જાણ્યું કે થિયેટર ઓથોરિટીએ પરિસ્થિતિને કાબૂમાં લીધી છે અને જ્યારે અમે અંદર ગયા ત્યારે પોલીસ પોતે ભીડને સાફ કરી રહી હતી. અમે સમજી ગયા કે બધું બરાબર છે અને અમે તેમની સૂચના મુજબ પહોંચ્યા. ઘણી વખત એવું બને છે કે તેઓ (પોલીસ) આવીને અમને કહે છે કે અમારી પાસે પરવાનગી નથી અને તેથી અમે તેમની વાત સાંભળીને પાછા ફરીએ છીએ. અને અહીં જ્યારે તેઓ અમારા માટે આગળ આવવાનો રસ્તો સાફ કરી રહ્યા હતા, ત્યારે અમે એવી છાપમાં હતા કે અમને થિયેટરમાં આવવાની પરવાનગી છે.

તેલંગાણાના સીએમએ આક્ષેપો કર્યા હતા

તમને જણાવી દઈએ કે વિધાનસભામાં તેલંગાણાના મુખ્યમંત્રી રેવન્ત રેડ્ડીએ આરોપ લગાવ્યો હતો કે અભિનેતા અલ્લુ અર્જુન પુષ્પા 2 ના સ્ક્રીનિંગમાં પોલીસ દ્વારા મંજૂરી ન હોવા છતાં હાજરી આપી હતી. ઈવેન્ટમાં થયેલી અરાજકતાને હાઈલાઈટ કરતા રેડ્ડીએ કહ્યું, “અભિનેતાઓ તેમની કારના સનરૂફ પર ઉભા હતા અને થિયેટરમાં પ્રવેશતા અને બહાર નીકળતા પહેલા ભીડને હાથ હલાવી રહ્યા હતા, જેના કારણે હજારો ચાહકો તેમની એક ઝલક મેળવવા માટે ધક્કા ખાઈ રહ્યા હતા.

AIMIM ધારાસભ્ય પર નિશાન સાધ્યું હતું

AIMIM ધારાસભ્ય અકબરુદ્દીન ઓવૈસીએ હૈદરાબાદમાં ફિલ્મના પ્રીમિયર દરમિયાન નાસભાગ બાદ અલ્લુ અર્જુનના કથિત અસંવેદનશીલ વર્તન અને જવાબદારીના અભાવની આકરી ટીકા કરી હતી. અભિનેતાનું સીધું નામ લીધા વિના, ઓવૈસીએ દાવો કર્યો, મારી જાણ મુજબ, જ્યારે તેમને નાસભાગ અને એક મહિલાના મૃત્યુ વિશે કહેવામાં આવ્યું ત્યારે તેમણે કહ્યું, ‘હવે ફિલ્મ હિટ થશે’.

તેણે આગળ કહ્યું, “નાસભાગની ઘટના પછી પણ, તેણે (અલ્લુ અર્જુન) ફિલ્મ જોઈ અને પાછા જતી વખતે તેની કારમાંથી ભીડને લહેરાવ્યો. તેણે તે લોકો અને પરિવારની સુખાકારી વિશે પૂછવાની પણ તસ્દી લીધી નહીં. હું પણ જાહેર સભાઓમાં જઉં છું જ્યાં હજારો લોકો આવે છે.

વડોદરાની IOCLમાં 40 દિવસમાં બીજી વખત આગનો બનાવ

વડોદરા: IOCLમાં ફરી એક વખત આગ લાગવાનો બનાવ સામે આવ્યો છે. સાંજના સમયે ગુજરાત રિફાઈનરીમાં આગ લાગતા ધુમાડાના ગોટેગોટા જોવા મળ્યા હતા. ઘટનાના પગલે પોલીસે અને ફાયરબ્રિગેડનો સ્ટાફ ઘટનાસ્થળે પહોંચ્યો છે. ઉલ્લેખનીય છે કે, ચાલીસ દિવસ પહેલા લાગેલી આગનો રિપોર્ટ પણ હજી નથી આવ્યો ત્યાં જ બીજી વાર આગ લાગી છે તેનું કારણ પણ હાલ અકબંધ છે.

થોડા દિવસ અગાઉ જ વડોદરા નજીક આવેલી કોયલી ગુજરાત રિફાઈનરીમાં ટેન્કમાં બ્લાસ્ટ થવાની ઘટના સામે આવી હતી. જેમાં ઘટનામાં બે કર્મચારીઓના કરૂણ મોત નીપજ્યા હતા. આ સમગ્ર મામલે જીલ્લા કલેકટરે તપાસના આદેશ આપ્યા હતાં. હજુ તો આ ઘટના ભુલાઈ નથી અને આ ઘટના કયા કારણોસર બની તે અંગેના રિપોર્ટ પણ એજન્સીઓ દ્વારા આપવામાં આવ્યો નથી. ત્યારે આજે ફરી એકવાર આગનો બનાવ સામે આવ્યો હોવાનું જાણવા મળ્યું છે. મહત્વની વાત છે કે, આ આગ લાગી હોવાની માહિતી સ્થાનિક પોલીસને અપાય છે અને સ્થાનિક પોલીસ તાત્કાલિક ઘટના સ્થળે પહોંચી છે. હાલમાં સ્થાનિક ફાયારની મદદથી આગને કાબુમાં લેવામાં આવી છે. આ આગ લાગવાનું પ્રથામિક કારણ કેબલમાં શોર્ટ સર્કિટ હોવાનું જાણવા મળી રહ્યું છે છતા આ અંગે અમે તપાસ કરીશું.

શું પ્રિયંકા ગાંધીનું લોકસભાનું સભ્યપદ જશે?: હાઇકોર્ટ પહોંચ્યો કેસ

નવી દિલ્હીઃ કેરળની વાયનાડ લોકસભા સીટ પર ચૂંટાયેલા કોંગ્રેસના પ્રિયંકા ગાંધીની મુશ્કેલીઓમાં વધારો થવાની શક્યતા છે. ભાજપના નેતા નવ્યા હરિદાસે કેરળ હાઇકોર્ટમાં વાયનાડ લોકસભા સીટ પર પ્રિયંકાની જીતને પડકારી છે.

તેમણે દાવો કર્યો છે કે પેટા ચૂંટણીમાં પ્રિયંકા ગાંધીએ નામાંકન પત્રમાં પોતાની અને પરિવારની સંપત્તિની યોગ્ય માહિતીનો ઉલ્લેખ નથી કર્યો. જોકે તેઓ પ્રિયંકા ગાંધી સામે 5,12,399 મતોથી હારી ગયા હતા. તેમણે તેમની અરજીમાં દલીલ કરી છે કે પ્રિયંકા ગાંધીએ તેમનું ઉમેદવારી પત્ર ભરતી વખતે તેમની અને તેમના પરિવારની માલિકીની વિવિધ મિલકતો વિશે મહત્વપૂર્ણ માહિતી છુપાવી હતી.તેમની અરજીમાં દાવો કરવામાં આવ્યો છે કે પ્રિયંકા ગાંધીએ મતદારોને ગેરમાર્ગે દોર્યા છે, ખોટી માહિતી આપી છે અને મતદારોને અંધારામાં રાખ્યા. અરજીમાં એવો પણ આક્ષેપ કરવામાં આવ્યો હતો કે તેમણે અનેક પ્રસંગોએ મતદારોને અયોગ્ય રીતે પ્રભાવિત કરવા આચારસંહિતાનું ઉલ્લંઘન કર્યું હતું.

આ મામલે સુનાવણી જાન્યુઆરી, 2025માં થાય એવી શક્યતા છે. ભાજપના નેતાનું કહેવું છે કે હાઈકોર્ટમાં 23 ડિસેમ્બરથી 5 જાન્યુઆરી સુધી રજા હોવાને કારણે આ કેસની સુનાવણીમાં મોડું થવાની શક્યતા છે.પ્રિયંકા ગાંધીએ ચૂંટણી એફિડેવિટમાં કુલ રૂ. 4.24 કરોડની સંપત્તિ જણાવી છે, પણ તેમની પાસે કુલ અચલ સંપત્તિ રૂ. 13.89 કરોડની છે. પ્રિયંકાએ જણાવ્યું હતું કે તેમના પતિ રોબર્ટ વાડરા પાસે કુલ 37.91 કરોડની ચલ સંપત્તિ છે.

 

ભારતનું ફોરેક્સ રિઝર્વમાં નોંધાયો ઘટાડો, છ મહિનાના તળીયે પહોંચ્યું

ભારતીય રિઝર્વ બેન્ક (RBI) દ્વારા શુક્રવારે જાહેર કરવામાં આવેલી માહિતી પ્રમાણે 22મી નવેમ્બરના રોજ પૂરા થયેલા સપ્તાહ દરમિયાન વિદેશી હૂંડિયાણની અનામતો 1.31 અબજ ડોલરનો ઘટીને 656.58 અબજ ડોલર થઈ છે. વિદેશી સંસ્થાકીય રોકાણકારો, ફોરેન પોર્ટફોલિયો ઈન્વેસ્ટરોની ભારતીય શેર બજારોમાંથી અવિરત ધૂમ વેચવાલીના પરિણામે અને અમેરિકી ડોલર સામે રૂપિયાના સતત થઈ રહેલા પતને રિઝર્વ બેંક ઓફ ઈન્ડિયા રૂપિયાને સપોર્ટ આપવા મોટા પ્રમાણમાં અમેરિકી ડોલર વેચવા લાગતાં ભારતના ફોરેક્સ રિઝર્વમાં પણ સતત ઘટાડો નોંધાયો છે.

સપ્તાહમાં ફોરેક્સ રિઝર્વ બે અબજ ડોલર જેટલો ઘટીને 652.87 અબજ ડોલરની છ મહિનાની નીચી સપાટી નજીક આવી ગયું હોવાનું રિઝર્વ બેંક ઓફ ઈન્ડિયાના આંકડા દર્શાવે છે. અત્રે નોંધનીય છે કે, ફોરેક્સ રિઝર્વમાં 6 ડિસેમ્બરના પૂરા થયેલા સપ્તાહમાં 3.2 અબજ ડોલરનો ઘટાડો નોંધાયો છે. ભારતનું ફોરેન એક્સચેન્જ રિઝર્વ જે 27 સપ્ટેમ્બરના 2024ના રેકોર્ડ પ્રમાણે 704.89 અબજ ડોલરની ઊંચી સપાટીએ હતું. જે અત્યાર સુધીમાં બાવન અબજ ડોલર ઘટી ગયું છે. રિઝર્વ બેંક ઓફ ઈન્ડિયા દ્વારા પાછલા દિવસોમાં અવાર નવાર ફોરેક્સ માર્કેટમાં દરમિયાનગીરી કરી રિઝર્વમાંથી ડોલર વેચી રહ્યાના અને એના કારણે પણ રિઝર્વમાં ઘટાડો થયો છે. પાછલા સપ્તાહમાં યુઆન નબળો પડવાના દબાણમાં અને ફોરવર્ડ માર્કેટમાં ડોલરની મજબૂતી સાથે અમેરિકી ડોલર સામે ભારતીય રૂપિયો તૂટતો રહી 84.88ની ઓલ ટાઈમ નીચી સપાટીએ ગયો હતો. ડોલર સામે રૂપિયો આ સપ્તાહમાં આજે શુક્રવારે 20 ડિસેમ્બરના 85.11ના નવા  તળીયે આવી ગયા બાદ રિઝર્વ બેંક ઓફ ઈન્ડિયાએ દરમિયાનગીરી કરી ડોલર માર્કેટમાં વેચ્યા હોવાના અહેવાલ હતા.

ડિજિટલ અભણતાના કારણે લોકો ઘરે બેઠા લૂંટાય છે!

સરકાર અને સમાચાર એજન્સીઓ દ્વારા વારંવાર જાહેરાતો કરવા છતાં, અતિશય પ્રચાર કરવા છતાં આજકાલ ડિજિટલ અરેસ્ટ સ્કેમ હજુ પણ ચાલી જ રહ્યા છે. એક સમય એવો હતો કે જ્યારે વ્યક્તિ ઘરની બહાર નીકળે અથવા તો ક્યાંક બહારગામ જાય તો તેને ઘરમાં ચોરી થવાનો ભય રહેતો હતો. જો કે હવે ચોરો હાઈટેક થઈ ગયા છે. તેમણે વધારે શારીરિક મહેનત કરવાની જરૂરિયાત પડતી નથી. તેઓ ઘરે બેઠાં-બેઠાં ડિજિટલ કરન્સી અને ડિજિટલ એરેસ્ટ દ્વારા આપણા ફોનમાંથી નાણા ઉપાડી લે છે. ચાલુ વર્ષે જ ભારતમાં ડિજિટલ એરેસ્ટના ગુનાઓ દ્વારા છેતરપિંડીની 6,000થી વધુ ફરિયાદો નોંધાઈ ચૂકી છે. સામાજિક ભયના કારણે ફરિયાદ ન નોંધાવાઈ હોય તેવા કિસ્સા ગણીએ તો દર મહિને સરેરાશ 1000 લોકો ડિજિટલ સ્કેમનો ભોગ બને છે.

આ પ્રકારના સાયબર સ્કેમથી કેવી રીતે બચી શકાય તે વિશે જાણવા માટે ચિત્રલેખા.કોમએ ‘છોટી સી મુલાકાત’ માં સાયબર એક્સપર્ટ, એથિકલ હેકર્સ અને Cyber Octet નામની સાયબર સિક્યોરિટી કંપનીના ફાઉન્ડર ફાલ્ગુનભાઈ રાઠોડ સાથે વાત કરી.

ચિત્રલેખા: ડિજિટલ એરેસ્ટ સ્કેમમાં શું હોય છે?

ફાલ્ગુન રાઠોડ: આ જે સાયબર ગઠિયાઓ હોય છે તે પોતાની મોડસ ઓપરેન્ડી ચેન્જ કરતા રહેતા હોય છે. શરૂઆતમાં કોઈના પણ સોશિયલ મીડિયા પર ફેક એકાઉન્ટ બનાવીને એ વ્યક્તિના જેટલાં પણ કોન્ટેક્ટ પર્સન હોય તેમની પાસે ઈમરજન્સી આવી ગઈ છે તેમ કહીને નાણા માગતા હતા. આ સિવાય આજના સમયમાં ભારતમાંથી મોટા પ્રમાણમાં યુવાનો વિદેશ અભ્યાસ માટે જતાં હોય છે. તો આવા યુવાઓના એકલા રહેતા માતા-પિતાને ટાર્ગેટ કરવામાં આવે છે. તેમને ફોન કરીને કહેવામાં આવે છે કે તમારા છોકરાને કે છોકરીને વિદેશમાં અરેસ્ટ કરવામાં આવ્યા છે.

જો તમે તાત્કાલિક પેનલ્ટી નહીં ચૂકવો તો તેમને જેલમાં મોકલવામાં આવશે. સ્કેમર્સ એવો સમય પસંદ કરે છે જ્યારે વિદેશમાં રહેતા લોકો ફોન ઉઠાવી શકે નહીં. આ પ્રકારના કોલમાં દરેક વ્યક્તિ સાથે ફ્રોડ થતું નથી. જે લોકો જાગૃત હોય છે તે બચી જાય છે. પણ મોટાભાગે લોકો સ્કેમનો શિકાર બની જતા હોય છે. લોકોને ફોન કરીને કહેવામાં આવે છે કે તમારા નામના પાર્સલમાં ડ્રગ્સ નીકળ્યું છે, અથવા તો તમારા ફોન નંબરનો કે આધાર કાર્ડનો ઉપયોગ કોઈ ગુનાહિત પ્રવૃત્તિમાં કરવામાં આવ્યો છે. અથવા તો તમારી સિસ્ટમને સ્કેન કરવામાં આવી હતી અને તમે પોર્ન જુઓ છો તેવી જાણ થતાં તમારા નામનું વોરંટ કાઢવામાં આવ્યું છે. કસ્ટમ વિભાગમાંથી અધિકારી બોલું છું તમારું પાર્સલ આવ્યું છે તેમાં અનવોન્ટેડ વસ્તુઓ નીકળી છે વગેરે-વગેરે. આ પ્રકારે પહેલાં ફોન કરવામાં આવે છે અને જો વ્યક્તિ તેમની વાતોમાં ફસાય જાય પછી તેને વિડીયો કોલ કરીને કલાકો અથવા તો દિવસો સુધી કોલ ચાલુ રાખીને એક જગ્યાથી ખસવા દેવામાં આવતો નથી. આ દરમિયાન ફ્રોડનો ભોગ બનનાર વ્યક્તિ બીજી કોઈ વ્યક્તિને ફોન પણ કરી શક્તી નથી. વિડીયો કોલમાં જ આ ધૂતારાઓ આખો સરકારી ઓફિસનો માહોલ ઉભો કરે છે. પોતે પણ પોલીસનો યુનિફોર્મ પહેરીને બેસે છે. જેથી ભોગ બનનાર વ્યક્તિને સામેવાળી વ્યક્તિ પર વિશ્વાસ બેસી જાય છે. ડિઝિટલી અરેસ્ટ વ્યક્તિના ખાતામાંથી ધીમે-ધીમે કરીને રૂપિયા પણ કાઢી લેવામાં આવે છે.

આ લોકો ટાર્ગેટ કઈ રીતે પસંદ કરતા હોય છે?

ટાર્ગેટ રેન્ડમ હોય છે. રેન્ડમલી ફોન કરવામાં આવે છે. તાત્કાલિક આખી ઘટના એ લોકો ઉભી કરતા હોય છે. જો કોઈ રિસ્પોન્સ મળે તો પછી આ ફ્રોડ કરનારા લોકો પ્રોસેસમાં આગળ વધે છે. અમારી ભાષામાં તેને સોશિયલ એન્જિનિયરિંગ કહે છે, એટલે કે મેનીપ્યુલેટ હ્યુમન માઈન્ડ. અત્યારે લોકો વધારે સ્ટ્રેસમાં જીવતા હોય છે. ભણેલા-ગણેલા લોકોને પણ આ સ્કેમર્સ એવી રીતે પોતાની વાતમાં લાવી દે છે કે ફ્રોડનો ભોગ બનનાર વ્યક્તિને એવું જ લાગે છે કે ખરેખર તેણે કોઈ ગુનો કર્યો છે. જેમ-જેમ ડિઝિટલ પેમેન્ટ સિસ્ટમમાં વધારો થયો છે તેમ-તેમ આ પ્રકારના સ્કેમ પણ વધી રહ્યા છે.

જો કોઈ વ્યક્તિ ડિઝિટલ અરેસ્ટનું ભોગ બને છે તો તેણે તાત્કાલિક શું કરવું જોઈએ?             

તાત્કાલિક 1930 સાયબર ક્રાઈમ હેલ્પલાઈન નંબર પર કોલ કરવો જોઈએ. જે નંબર પરથી ફોન આવ્યો હોય તેની વિગતો આપો, તમારા બેંક ખાતાની વિગતો આપો. જેથી કરીને સાયબર સિક્યોરિટી સેલ તાત્કાલિક તમારું બેંક એકાઉન્ટ ફ્રીઝ કરે છે. જો તમે તાત્કાલિક એક્શન લેશો તો તમારા નાણાં બચવાની શક્યતાઓ રહેલી છે. જો એક વખત તમારા ખાતામાંથી નાણા ઉપાડી લેવામાં આવે છે, તો પછી તેને પાછા લાવવાનું કામ અઘરું હોય છે.

સરકાર દ્વારા સતત અવેરનેસ ફેલાવવામાં આવે છે, રોજબરોજ સમાચારો પણ સામે આવતા હોય છે. તો પછી લોકોમાં જાગૃતિ કેમ આવતી નથી?

અત્યારે લોકો લિટરેટ છે પણ ડિજિટલી લિટરેટ નથી. ખરેખર લોકોમાં જોઈએ તેટલી જાગૃતિ હજુ પણ આવી નથી. જો કે સરકાર લોકોને જાગૃત કરવા માટે સતત પગલાં લઈ રહી છે. જેમ કે 1930 નંબર સરકાર દ્વારા જાહેર કરવામાં આવ્યો છે. જેને સાયબર ક્રાઈમ હેલ્પલાઈન નંબર કહેવામાં આવે છે. જો તમારી સાથે કોઈપણ પ્રકારનું સાયબર ક્રાઈમ થાય છે તો તમે આ નંબર પર ફોન કરીને તાત્કાલિક જાણ કરીને પગલા લેવા માટે કહી શકો છો. તમારા પૈસા જો સામેવાળી વ્યક્તિના બેંકના એકાઉન્ટની અંદર જ હશે તો સાયબર સિક્યોરિટી ટીમ સામેવાળાના ખાતાને ફ્રીઝ કરીને તમારા રૂપિયા પાછા અપાવશે. મોટાભાગે ક્રાઈમ બન્યાના એક કલાકની અંદર જો ફરિયાદ કરવામાં આવે તો રૂપિયા પાછા આવવાના ચાન્સિસ રહેતા હોય છે. આથી જો તમે 1930 પર ફરિયાદ કરશો તો જ તમારા બેંક ખાતા ફ્રિઝ કરવામાં આવે છે. જો બેંક દ્વારા તાત્કાલિક પગલાં લઈને બેંક એકાઉન્ટ ફ્રીઝ ન કરવામાં આવે તો પછી બેંક સામે પોલીસ કાર્યવાહી થઈ શકે છે.

ડિઝિટલ ફ્રોડથી બચવા માટે આપણા ફોન કે ગેઝેટને કેવી રીતે સેફ રાખી શકાય?

આજના સમયમાં એવું થઈ ગયું છે કે લોકો ખૂબ જ સરળતાથી પોતાનો ફોન નંબર કે પછી ઈ-મેલ આઈડી કોઈપણ વ્યક્તિને આપી દેતા હોય છે. મોલમાં કોઈ ખરીદી કરવા જાય તો પણ જો ડિસ્કાઉન્ટ વાઉચર કે પછી લકી ડ્રો માટે પણ લોકો પોતાની વિગતો આપીને આવતા રહેતા હોય છે. સોશિયલ મીડિયામાં આવતી જાહેરાતો માટે પણ પોતાની અંગત વિગતો તરત જ આપી દેતા હોય છે. આજના સમયમાં આપણે જાણીએ જ છીએ કે દરેક પ્રકારની કંપની ઈન્ટરનેટ પર ડેટાનું વેચાણ કરતી જ હોય છે. જો તમારી પાસે સ્માર્ટ ફોન છે અને તમે અનેક પ્રકારની એપ્સ વાપરી રહ્યા છો, તો તમારો અંગત ડેટા સુરક્ષિત રહેતો નથી. આથી તમારો અંગત ડેટા કોઈને પણ આપતા પહેલાં વિચાર ચોક્કસથી કરો.

બીજું કે આપણે આજે ફોનમાં અઢળક કામની અને વગર કામની એપ્સ ડાઉનલોડ કરતા હોઈએ છીએ. સોશિયલ મીડિયામાં કોઈ નવી ગેમની જાહેરાત આવી કે તરત જ આપણે તે નવી ગેમને ડાઉનલોડ કરી લઈએ છીએ. અથવા તો કોઈ કંપની દ્વારા તેની પ્રોડક્ટ પર મોટું ડિસ્કાઉન્ટ આપવામાં આવે છે તેવી જાહેરાત જોઈ કે તરત જ આપણે તે કંપનીની એપ ડાઉનલોડ કરી લઈએ છીએ. આ પ્રકારની એપ ડાઉનલોડ કરતા સમયે આપણી ગેલેરી, કોન્ટેક્ટ ડેટા, આપણા લોકેશન વગેરેની એક્સેસ એપ માગતી હોય છે. તો એક્સેસ આપતા પહેલાં વિચારો કે આ એપને આપણી ફોટો ગેલેરીનું કે આપણા લોકેશનથી શું લેવા-દેવા? કોઈપણ એપ ડાઉલોડ કરતા પહેલાં તેનો રિવ્યૂ વાંચો, કંપની વિશે જાણો અને જરૂર હોય તો જ ડાઉનલોડ કરો. સોશિયલ મીડિયા પર લોભામણી જાહેરાતો કરતી લિંક મોકલવામાં આવે છે. સાથે એમાં એવું પણ કહેવામાં આવે છે કે તમારા 5 કે 10 મિત્રોને ફોરવર્ડ કરો તો તમને વધારે ડિસ્કાઉન્ટ મળશે. આ પ્રકારની લિંક ખોલતાની સાથે જ ઘણી વખત તમારો બધો જ બેંક ડેટા ફ્રોડ લોકો પાસે પહોંચી જાય છે. તો સૌથી પહેલાં તો ડિજિટલી જાગૃત બનવાની જરૂરિયાત છે. લોકો આજકાલ દેખાડો કરવામાં વધારે માને છે. તેમના સોશિયલ મીડિયા એકાઉન્ટ પર ઘરની વિગતો, પરિવારની વિગતો, ક્યાં ફરવા ગયા એની વિગતો, પાસપોર્ટની વિગતો સુધી મૂકી દેતા હોય છે. જે રીતે આપણે આપણા રોકડાં નાણા, જ્વેલરી, કામના ડોક્યુમેન્ટ્સની ફિઝિકલ કોપી બધું જ સાચવીને રાખીએ છીએ. તેવી જ રીતે આપણા ડિઝિટલ ડેટાને પણ એટલું જ સાચવીને રાખવાની જરૂરિયાત છે.

આજના સમયમાં ડિજિટલ લિટરસી પણ એટલી જ જરૂરી છે. સ્માર્ટ ફોનના કારણે હવે બધું જ આંગળીના ટેરવે ઉપલ્બધ બન્યું છે. લોકો હવે તો દૂધ અને ગ્રોસરી પણ ઓનલાઈન મંગાવતા થઈ ગયા છે. ત્યારે તેમણે ડિજિટલી જાગૃત રહેવાની ખાસ જરૂરિયાત છે. જેમ કે પાસવર્ડ તમારા હંમેશા સ્ટ્રોંગ હોવા જોઈએ. જેટલી કામની હોય તેટલી જ એપ્લિકેશન તમારા ફોનમાં રાખો. કોઈપણ એપને જરૂરિયાત પૂરતી જ એક્સેસ આપો. જો આ પ્રકારની નાની-નાની સાવધાની રાખવામાં આવશે તો માટાં નુક્સાનથી બચી શકાશે.

(રાધિકા રાઓલ – અમદાવાદ)

સંગીતની દુનિયમાં મોહમ્મદ રફી મારા પિતા હતા:સોનુ નિગમ

મુંબઈ: સંગીતની દુનિયામાં દિવંગત ગાયક મોહમ્મદ રફીનું યોગદાન બધા જાણે છે. તેમના દ્વારા ગાયેલા ગીતો આજે પણ લોકોના પ્રિય છે. રફી સાહેબની 100મી જન્મજયંતિ 24મી ડિસેમ્બર 2024ના રોજ છે. આ પહેલા ફેમસ સિંગર સોનુ નિગમ તેમના વિશે વાત કરતા જોવા મળ્યા હતા. લોકો ઘણીવાર સોનુ નિગમની સરખામણી રફી સાહબ સાથે કરે છે, તેના પર સોનુ નિગમ કહે છે કે સંગીતની દુનિયામાં તે તેના માટે પિતા સમાન છે. તેમની સાથે સરખામણી કરવા પર તેમણે કહ્યું કે પિતા અને પુત્રની સરખામણી ન થઈ શકે.

(Photo:IANS)

સોનુ નિગમે કહ્યું કે રફી સાહેબ અને તેમની વચ્ચેની સરખામણી સંપૂર્ણપણે કાલ્પનિક છે. વાસ્તવિકતા એ છે કે પિતા અને પુત્ર વચ્ચે કોઈ સરખામણી ન થઈ શકે. સોનુ નિગમે કહ્યું કે તે ગમે તે રીતે ગાય અને ગમે તે ગાય, તે ક્યારેય તેના માસ્ટર જેવા નથી બની શકે. સોનુ નિગમે ન્યૂઝ એજન્સી પીટીઆઈ સાથે વાત કરતા કહ્યું, ‘રફી સાહેબ મારા માટે ખૂબ જ મહત્વપૂર્ણ હતા. મારા માટે તે ‘તેમના જેવા બનો’ જેવું હતું. તે કવ્વાલી, ભજન, ઉદાસી ગીતો ગાઈ શકતા હતા. ઊંચા અવાજવાળા ગીતો અને અર્ધ-શાસ્ત્રીય ગીતો પણ ખૂબ સારી રીતે ગાઈ શકતા હતા. ગાયક આવો હોવો જોઈએ. તેઓ મારા પ્રેરણા સ્ત્રોત હતા.

સોનુ નિગમે કહ્યું કે તેમનાથી પ્રેરણા મેળવવાની પ્રક્રિયા બાળપણથી જ શરૂ થઈ ગઈ હતી. તેમના માતા-પિતા – અગમ કુમાર નિગમ અને શોભા નિગમ નિગમ – પણ તેમને રફી સાહબ પાસેથી પ્રેરણા લેવા પ્રોત્સાહિત કરતા હતા. સોનુ નિગમે કહ્યું, ‘હું આજે જે કંઈ પણ છું, રફી સાહેબે આમાં મને મદદ કરી છે અને હું આજે પણ તેમની પાસેથી શીખતો રહ્યો છું. સંગીતની દુનિયામાં તેઓ મારા પિતા જેવા છે. સોનુ નિગમે તેની કારકિર્દીનું પહેલું પર્ફોર્મન્સ આપ્યું જ્યારે તે માત્ર ચાર વર્ષના હતા અને ગીત હતું 1977ની ફિલ્મ ‘હમ કિસી સે કમ નહીં’નું ‘ક્યા હુઆ તેરા વાદા’.

રફી સાહબની 100મી જન્મજયંતિ પર સોનુ નિગમ 24 ડિસેમ્બર મંગળવારના રોજ મુંબઈમાં એક ખાસ કોન્સર્ટ સાથે તેમના ગુરુને શ્રદ્ધાંજલિ આપશે. સોનુ નિગમે આગળ કહ્યું, ‘હું શું ગાઉં તેનાથી કોઈ ફરક પડતો નથી, હું ક્યારેય તેના જેવો બની શકીશ નહીં’. સોનુ નિગમે કહ્યું, ‘મેં તેમના ગીતો પર પ્રેક્ટિસ કરી હતી. તેમના પર ઊંડો અભ્યાસ કર્યો. હું તેમના ગીતોમાંથી નોંધો બનાવતો અને કેટલાક નિર્દેશો ઉમેરતો, કોઈ અન્યએ આવું કર્યું ન હોત. તેણે કહ્યું કે તે ક્યારેય તેના આદર્શ ગાયકને મળ્યો નથી, પરંતુ તેનાથી કોઈ ફરક પડતો નથી. સોનુ નિગમ કહે છે, ‘તેઓ મારી અંદર છે. મને એ કમી મહેસુસ નથી થતી કે હું તેમને નથી મળ્યો.

આંધ્રપ્રદેશમાં ભૂકંપના આંચકા અનુભવાયા

આંધ્રપ્રદેશમાં ભૂકંપના આંચકા અનુભવાયા છે. આ પછી પ્રકાશમ જિલ્લાના મુંડાલામુરુ અને તલ્લુર મંડલના ઘણા ગામોમાં ભૂકંપના આ આંચકા અનુભવાયા હતા. ભૂકંપના આંચકા બાદ અરાજકતા ફેલાઈ ગઈ હતી.

ભૂકંપના આંચકા બાદ ભયભીત લોકો ઘરની બહાર નીકળી ગયા હતા. આ સિવાય મુંડાલામુરુ સ્થિત શાળાના વિદ્યાર્થીઓ પણ ભૂકંપના આંચકા બાદ ખુલ્લા મેદાનમાં ગયા હતા. ડરના કારણે સરકારી કચેરીના કર્મચારીઓ પોતાનું તમામ કામ છોડીને બહાર આવી ગયા હતા. તમને જણાવી દઈએ કે આ મહિનાની 4 તારીખે પણ તેલંગાણા સહિત આંધ્રપ્રદેશના અનેક સ્થળોએ ભૂકંપના આંચકા અનુભવાયા હતા. આ ભૂકંપનું કેન્દ્ર મુલુગુ જિલ્લામાં મેદારમ નજીક હતું. રિક્ટર સ્કેલ પર તેની તીવ્રતા 5.0 નોંધાઈ હતી. આ ભૂકંપની અસર વારંગલ સહિત અનેક જિલ્લાઓ સુધી ફેલાયેલી છે.

1...1,2351,2361,237...5,145Page 1,236 of 5,145