Home Blog Page 1419

માંગરોળ ગેંગરેપ કેસના આરોપીનું મોત

રાજ્યમાં નવરાત્રિનો પાવન તહેવાર ચાલી રહ્યો છે. ત્યારે ગુજરાતમાં દુષ્કર્મ અને ગેંગ રેપના કિસ્સામાં પણ વધારો થયો છે. થોડા દિવસો પહેલા સુરત જિલ્લામાં મોટા બોરસરા ગામની સીમમાં 9 ઓક્ટોબર,2024ના રોજ સગીરા પર સામુહિક દુષ્કર્મની ઘટનાથી ચકચાર મચી ગયો હતો. પોલીસને જાણ થતાં તાત્કાલિક હરકતમાં આવી ત્રણેય આરોપીની ઓળખ કરી લીધી હતી. આ 3 આરોપીઓ પૈકી 2 નરાધમ એવા મુન્ના કરબલી પાસવાન અને શિવ શંકર ઉર્ફે દયાશંકર ચૌરસિયાને પોલીસે ઝડપી પાડ્યા હતા. જ્યારે રાજુ નામનો આરોપી ફરાર થઈ ગયો હતો. આજે બપોર બાદ ત્રણમાના એક આરોપી એવા શિવ શંકર ચૌરસિયાની તબિયત લથડતા સુરત સિવિલમાં વેન્ટીલેટર પર રાખવામાં આવ્યો હતો. જ્યાં તેનું મોત થઈ ગયું છે.

માંગરોળના મોટા બોરસરા ગામે સગીરા પર દુષ્કર્મ ગુજરનારા સામાન્ય નહીં પરંતુ રીઢા ગુનેગાર હોવાનું પોલીસ તપાસમાં ખુલ્યું છે. સગીરા પર દુષ્કર્મ ગુજારનાર ત્રણ પૈકીના બે નરાધમો મુન્ના પાસવાન અને શિવશંકર ચૌરસિયા રીઢા ગુનેગાર છે. તેમાં પણ શિવશંકર ચૌરસિયા સામે હત્યાનો ગુનો નોંધાયેલો છે. આ ગેંગરેપ અંગે માહિતી આપતા સુરત રેન્જ આઈજી પ્રેમવીરસિંહે જણાવ્યું હતું કે, મોટા બોરસરા ગામ નજીક સગીર અને સગીરા રાત્રે ઊભા રહીને વાતચીત કરતા હતા. એ દરમિયાન બાઈક પર ત્રણ નરાધમો આવ્યા હતા. પહેલા તો એમણે આવીને અહીં કેમ ઊભા છો? એમ કહીને ધમકાવ્યા હતા અને બાદમાં માર મારવાનું શરૂ કર્યું હતું. બંનેના મોબાઈલ પણ નરાધમોએ લઈ લીધા હતા. તરૂણ અને તરૂણી બંનેના કપડાં ઉતરાવી તેમના ફોનમાં નગ્ન ફોટો પાડી લેવામાં આવ્યા હતા. આ ફોટો વાઇરલ કરવાની નરાધમોએ ધમકી આપી હતી અને તરૂણીને પોતાની સાથે શરીર સંબંધ બાંધવા દબાણ કર્યું હતું. જો કે, જે-તે સમયે તરૂણ અને તરૂણી બંને નરાધમોને વશ થયા નહોતા અને ત્યાંથી ભાગવાનો પ્રયત્ન કર્યો હતો. ત્યારે સગીરા પડી જતા આરોપીઓએ તેને પકડી લીધી હતી અને શેરડીના ખેતરમાં લઈ જઈ ગેંગરેપ કર્યો હતો. બાદમાં સગીરાનો મિત્ર બાજુમાં રહેલા માછીમારોને જાણ કરી હતી અને ગ્રામજનો દોડી આવી સગીરાને લઈ હોસ્પિટલ ખસેડી હતી.

કોણે-કોણ પહોંચ્યું રતન ટાટાના અંતિમ દર્શન કરવા?

મુંબઈ: દિગ્ગજ ઉદ્યોગપતિ રતન ટાટાના નિધન પર દેશભરની હસ્તીઓએ શોક વ્યક્ત કર્યો છે. મહારાષ્ટ્ર-ઝારખંડ જેવા રાજ્યોમાં એક દિવસનો રાજ્ય શોક મનાવવામાં આવ્યો હતો. પીએમ મોદીએ પણ તેમના નિધન પર શોક વ્યક્ત કર્યો હતો. રતન ટાટાના પાર્થિવ દેહને સવારે 10 વાગ્યાથી NCPA ખાતે દર્શન માટે રાખવામાં આવ્યો હતો. જ્યાં તેમને શ્રધ્ધાંજલિ આપવામાં આવી છે.

કેન્દ્રિય ગૃહ પ્રધાન અમિત શાહથી લઈ મુકેશ અંબાણી સહિતના નામી લોકો તેમને શ્રધ્ધાંજલિ આપવા પહોંચ્યા હતાં.

ધનાઢ્ય બિઝનેસમેન મુકેશ અંબાણી પત્ની નીતા અંબાણી સાથે રતન ટાટાના અંતિમ દર્શન કરવા પહોંચ્યા હતાં.

(તમામ તસવીરો: દીપક ધૂરી)

સ્થાનિક નેતાઓએ વ્યક્તિગત હિતો સર્વોપરી રાખ્યાં, એટલે હાર્યાઃ ગાંધી

નવી દિલ્હીઃ હરિયાણા ચૂંટણીનાં પરિણામોમાં ભાજપની ત્રીજી વાર જીત થઈ છે, જ્યારે કોંગ્રેસની સજ્જડ હાર થઈ છે. આ હારને લઈને કોંગ્રેસ પાર્ટીની સમીક્ષા બેઠક થઈ હતી, જેમાં કોંગ્રેસ નેતા રાહુલ ગાંધીએ સ્થાનિક નેતાઓ પર ગુસ્સો વ્યક્ત કરતાં કહ્યું હતું કે તેમણે વ્યક્તિગત હિતોને વધુ મહત્ત્વ આપ્યું હતું.

આ બેઠક કોંગ્રેસઅધ્યક્ષ મલ્લિકાર્જુન ખડગેના નિવાસસ્થાને પર થઈ હતી, જેમાં પાર્ટીના વરિષ્ઠ નેતાઓ હાજર રહ્યા હતા. પ્રાપ્ત માહિતી અનુસાર આ બેઠકમાં પાર્ટી અધ્યક્ષ અને વિપક્ષના નેતા રાહુલ ગાંધી સિવાય મહા સચિવ કેસી વેણુગોપાલથી માંડીને હરિયામા પ્રદેશઅધ્યક્ષ દય ભાણ, ભૂપેન્દ્ર સિંહ હુડ્ડા, પ્રભારી દીપક બાબરિયા અને હરિયાણાના પ્રભારી અશોક ગહેલોત પણ હાજર રહ્યા હતા. કોંગ્રેસ પાર્ટીની આ બેઠક કોઈ પણ પરિણામ વગર ખતમ થઈ હતી. . હારના મંથન માટે કમિટી બનાવવામાં આવશે.

રાહુલ ગાંધી હરિયાણામાં મળેલી હાર મુદ્દે તીખી પ્રતિક્રિયા આપતાં કહ્યું હતું કે હરિયાણામાં નેતાઓનો વ્યક્તિગત રસ સૌથી પર રહ્યો, જેને કારણે પાર્ટી માટે કોઈ મહેનત ના કરી.આ બેઠકમાં તેઓ સ્થાનિક અને રાજ્યના નેતૃત્વ પર સૌથી વધુ નારાજગી વ્યક્ત કરી હતી. આ બેઠક અડધા કલાકમાં ખતમ થઈ હતી. ભૂતપૂર્વ CM હુડ્ડા અને કુમારી શૈલજાના મતભેદો પર માકને કહ્યું હતું કે હારનાં અનેક કારણો છે. જે ચૂંટણી પંચથી માંડીને નેતાઓના મતભેદ સુધી છે. આજની બેઠકમાં અમે આગળની વ્યૂહરચના પર વિચારવિમર્શ કર્યો હતો. આગળ પાર્ટી જે પણ નિર્ણય લેશે એની માહિતી કેસી વેણુગોપાલ આપશે, એમ તેમણે કહ્યું હતું.

 

 

હરિયાણામાં હાર બાદ કોંગ્રેસે યોજી મહત્વની બેઠક

હરિયાણા વિધાનસભા ચૂંટણીમાં હાર બાદ કોંગ્રેસમાં સમીક્ષાનો દોર ચાલી રહ્યો છે. હરિયાણામાં હાર બાદ આજે કોંગ્રેસ નેતૃત્વએ રાજ્યના નેતાઓ સાથે તેની પ્રથમ મહત્વની બેઠક યોજી હતી. આ બેઠક પાર્ટી અધ્યક્ષ મલ્લિકાર્જુન ખડગેના ઘરે યોજાઈ હતી જેમાં વિપક્ષના નેતા રાહુલ ગાંધીએ પણ હાજરી આપી હતી. સંગઠન મહાસચિવ કેસી વેણુગોપાલ, હરિયાણા પ્રદેશ પ્રમુખ ઉદય ભાન, ભૂપેન્દ્ર સિંહ હુડ્ડા, પ્રભારી દીપક બાબરિયા, હરિયાણા સુપરવાઈઝર અશોક ગેહલોત, અજય માકન, પ્રતાપ સિંહ બાજવાને પણ બેઠકમાં બોલાવવામાં આવ્યા હતા. સૂત્રોના જણાવ્યા અનુસાર, બેઠક દરમિયાન રાહુલ ગાંધીએ કહ્યું કે નેતાઓએ ચૂંટણીમાં અંગત હિતોને ઉપર રાખ્યા.

રાહુલ ગાંધીએ કહ્યું કે આખી ચૂંટણીમાં પાર્ટીનું હિત ગૌણ રહ્યું અને નેતાઓનું હિત પ્રબળ રહ્યું. સૂત્રોએ જણાવ્યું હતું કે ચૂંટણીના પરિણામોની તપાસ માટે ફેક્ટ ફાઈન્ડિંગ કમિટીની રચના કરવામાં આવશે, જેની જાહેરાત ટૂંક સમયમાં કરવામાં આવશે. બેઠક પૂરી થયા બાદ અજય માકને કહ્યું કે પરિણામો ચોંકાવનારા અને અણધાર્યા હતા. તેમણે કહ્યું, આજે અમે એક બેઠક કરી અને હરિયાણામાં હારના કારણો પર ચર્ચા કરી. અમે અમારું વિશ્લેષણ ચાલુ રાખીશું. જાણકારી માટે તમને જણાવી દઈએ કે મીટિંગમાં કુમારી શૈલજા, રણદીપ સુરજેવાલા, કેપ્ટન અજય યાદવને આમંત્રણ આપવામાં આવ્યું ન હતું.

રાહુલ ગાંધીએ પણ સવાલો ઉઠાવ્યા હતા

અગાઉ ટ્વિટર પરની એક પોસ્ટમાં, રાહુલ ગાંધીએ કથિત EVM ખરાબી સામે ફરિયાદ નોંધાવવાના પ્રયાસમાં ચૂંટણી પંચ સાથે સંભવિત બેઠકનો સંકેત આપ્યો હતો. તેણે X પર લખ્યું, અમે હરિયાણાના અણધાર્યા પરિણામનું વિશ્લેષણ કરી રહ્યા છીએ. અનેક વિધાનસભા મતવિસ્તારોમાંથી આવી રહેલી ફરિયાદો અંગે ચૂંટણી પંચને જાણ કરશે. હરિયાણાના તમામ લોકોનો તેમના સમર્થન માટે અને અમારા બબ્બર શેર કાર્યકરોનો તેમના અથાક કાર્ય માટે હૃદયપૂર્વક આભાર. અમે અધિકારો માટે, સામાજિક અને આર્થિક ન્યાય માટે, સત્ય માટે આ સંઘર્ષ ચાલુ રાખીશું અને તમારો અવાજ ઉઠાવતા રહીશું.

ભાજપે 48 બેઠકો જીતી હતી

તમને જણાવી દઈએ કે હરિયાણા વિધાનસભા ચૂંટણીમાં ભાજપે 90માંથી 48 સીટો પર જંગી બહુમતી મેળવી છે. દસ વર્ષથી સત્તામાં રહેલા ભાજપ સામે સત્તા વિરોધી લહેરનો લાભ લેવામાં નિષ્ફળ ગયેલી કોંગ્રેસ 37 બેઠકો જીતવામાં સફળ રહી છે. આ સિવાય INLDને 2 બેઠકો મળી છે. ઉપરાંત અપક્ષ ઉમેદવારોનો પણ વિજય થયો છે. જોકે તેમણે હાઈકમાન્ડને મળ્યા બાદ ભાજપને સમર્થન જાહેર કર્યું છે.

21મી સદી ભારત અને આસિયાન દેશોની સદી : PM મોદી

વડાપ્રધાન નરેન્દ્ર મોદી ASEAN-ભારત અને પૂર્વ એશિયા સમિટમાં ભાગ લેવા માટે લાઓસની રાજધાનીમાં છે. 21મી આસિયાન-ભારત સમિટમાં વડાપ્રધાન નરેન્દ્ર મોદીએ કહ્યું કે અમે શાંતિપ્રિય દેશ છીએ, એકબીજાની રાષ્ટ્રીય અખંડિતતા અને સાર્વભૌમત્વનું સન્માન કરીએ છીએ, અમે અમારા યુવાનોના ઉજ્જવળ ભવિષ્ય માટે પ્રતિબદ્ધ છીએ. હું માનું છું કે 21મી સદી ભારત અને આસિયાન દેશોની સદી છે. આજે જ્યારે વિશ્વના ઘણા ભાગોમાં સંઘર્ષ અને તણાવની સ્થિતિ છે, ત્યારે ભારત અને આસિયાન વચ્ચે મિત્રતા, સહયોગ, સંવાદ અને સહયોગ ખૂબ જ મહત્વપૂર્ણ છે.

પીએમ મોદીએ લાઓ રામાયણનું મંચન જોયું

આ પહેલા પીએમ મોદીએ લાઓ રામાયણનું મંચન જોયું હતું. તે ભારત અને લાઓસ વચ્ચેનો સહિયારો વારસો અને વર્ષો જૂના સભ્યતાના સંબંધોને પ્રતિબિંબિત કરે છે. લાઓસ પહોંચ્યા પછી તેમણે લુઆંગ પ્રબાંગના પ્રતિષ્ઠિત રોયલ થિયેટર દ્વારા પ્રસ્તુત ‘ફલા-ફલામ’ અથવા ‘ફ્રા લક ફ્રા રામા’ નામના લાઓ રામાયણનું પ્રદર્શન જોયું. લાઓ રામાયણ મૂળ ભારતીય રામાયણથી અલગ છે. તે લગભગ 16મી સદીમાં બૌદ્ધ મિશન દ્વારા લાઓસ પહોંચ્યું હતું.

લાઓસમાં ભારતીય સંસ્કૃતિને અનુસરવામાં આવી રહી છે

વિદેશ મંત્રાલય (MEA) એ એક નિવેદનમાં જણાવ્યું હતું કે લાઓસમાં રામાયણનું મંચન થવાનું ચાલુ છે અને મહાકાવ્ય બંને દેશો વચ્ચેના સહિયારા વારસા અને વર્ષો જૂના સભ્યતાના બંધનને પ્રતિબિંબિત કરે છે. લાઓસમાં સદીઓથી ભારતીય સંસ્કૃતિ અને પરંપરાના ઘણા પાસાઓને અનુસરવામાં આવે છે અને સાચવવામાં આવે છે. બંને દેશો તેમના સમાન વારસાને મજબૂત કરવા માટે સાથે મળીને કામ કરી રહ્યા છે.

લાઓ પીડીઆરમાં આદરણીય સાધુઓને મળો

પીએમ મોદીએ વિએન્ટિયનમાં સાકેત મંદિરના મઠાધિપતિ મહાવેથ મસેનાઈના નેતૃત્વમાં લાઓ પીડીઆરના સેન્ટ્રલ બૌદ્ધ ફેલોશિપ ઓર્ગેનાઈઝેશનના વરિષ્ઠ બૌદ્ધ સાધુઓ દ્વારા આયોજિત આશીર્વાદ સમારોહમાં ભાગ લીધો હતો. વડા પ્રધાન મોદીએ ટ્વિટર પર પોસ્ટ કર્યું હતું કે તેઓ લાઓ પીડીઆરમાં આદરણીય સાધુઓ અને આધ્યાત્મિક નેતાઓને મળ્યા હતા, જેઓ ભારતીય લોકો દ્વારા પાલીને આપવામાં આવતો આદર જોઈને ખુશ હતા. તેમના આશીર્વાદ માટે હું તેમનો આભારી છું.

રતન ટાટાના અવસાન પર ગુજરાતમાં એક દિવસનો શોક

ટાટા સન્સના ચેરમેન રતન નવલ ટાટાનું 86 વર્ષની વયે નિધન થયું છે. બુધવારે મોડી રાત્રે લગભગ 11 વાગે તેમણે અંતિમ શ્વાસ લીધા હતા. તેમને મુંબઈની બ્રીચ કેન્ડી હોસ્પિટલના ઇન્ટેન્સિવ કેર યુનિટ (ICU)માં દાખલ કરવામાં આવ્યા હતા અને તેઓ વય-સંબંધિત બિમારીઓથી પીડાતા હતા. તેમનો પાર્થિવ દેહને નરીમાન પોઈન્ટ ખાતેના નેશનલ સેન્ટર ફોર પરફોર્મિંગ આર્ટસ (NCPA)માં રાખવામાં આવ્યો છે. અહીં લોકો સાંજે 4 વાગ્યા સુધી અંતિમ દર્શન કરી શકશે. સાંજે રાજકીય સન્માન સાથે અંતિમ સંસ્કાર કરવામાં આવશે. ત્યારે આ રતન ટાટાના દુ:ખદ અવસાનને લઈ આજે ગુજરાતમાં રાજ્ય વ્યાપી શોક જાહેર કરવામાં આવ્યો છે.

કેન્દ્રીય ગૃહમંત્રી અમિત શાહ, મહારાષ્ટ્રના CM એકનાથ શિંદે, ગુજરાતના મુખ્યમંત્રી ભૂપેન્દ્ર પટેલ, મુકેશ અંબાણી અને કુમાર મંગલમ બિરલા સહિત રાજકારણ, રમતગમત અને વ્યવસાયની ઘણી હસ્તીઓએ ટાટાને શ્રદ્ધાંજલિ આપી. પદ્મ વિભૂષણ અને પદ્મ ભૂષણથી સન્માનિત રતન ટાટાને 2 દિવસ પહેલા 17 ઓક્ટોબરે ICUમાં દાખલ કરવાના સમાચાર આવ્યા હતા. જો કે, તેમણે પોતે આ વાતને નકારી કાઢી હતી અને કહ્યું હતું કે તે ઠીક છે અને રૂટીન ચેકઅપ માટે હોસ્પિટલ આવ્યા હતા. ગુજરાત સરકાર તરફથી એવું કહેવામાં આવ્યું છે કે રતન ટાટાના નિધનથી સરકારે ગુરુવાર (10 ઓક્ટોબર)ના રોજ એક દિવસનો રાજ્ય શોક જાહેર કર્યો છે. તમામ સરકારી ઈમારતોમાં રાષ્ટ્રધ્વજ અડધી કાઠીએ રહેશે અને આજે કોઈ સાંસ્કૃતિક-મનોરંજન કાર્યક્રમો થશે નહીં. રતન ટાટાના અંતિમ સંસ્કાર રાજકીય સન્માન સાથે કરવામાં આવશે.

રાફેલ નડાલે ટેનિસમાંથી નિવૃત્તિની જાહેરાત કરી

રાફેલ નડાલે ટેનિસમાંથી નિવૃત્તિ જાહેર કરી છે. 38 વર્ષની ઉંમરે તેણે પોતાની ફેવરિટ રમતને અલવિદા કહેવાનો નિર્ણય કર્યો છે. નડાલે પોતાની નિવૃત્તિની માહિતી સોશિયલ મીડિયા દ્વારા આપી છે. વીડિયો રિલીઝ કરતી વખતે તેણે તમામ ફેન્સનો આભાર માન્યો હતો. નડાલે કહ્યું કે હું પ્રોફેશનલ ટેનિસમાંથી નિવૃત્તિ લઈ રહ્યો છું. છેલ્લા કેટલાક વર્ષો ખૂબ જ મુશ્કેલ રહ્યા છે. ખાસ કરીને છેલ્લા બે વર્ષ પડકારજનક રહ્યા છે. આ ખૂબ જ મુશ્કેલ નિર્ણય છે. પરંતુ જીવનમાં દરેક વસ્તુનો આરંભ અને અંત હોય છે. આ ટુર્નામેન્ટના નોકઆઉટ રાઉન્ડ 19 થી 24 નવેમ્બર વચ્ચે રમાશે.

રાફેલ નડાલની કારકિર્દી ઈજાઓથી ભરેલી રહી છે. દર બીજા કે ત્રીજા વર્ષે તેને કોઈને કોઈ ઈજા થતી હતી. નડાલે તેની કારકિર્દીમાં 16 મોટી ઇજાઓનો સામનો કરવો પડ્યો હતો. આ પડકારો વચ્ચે, તેણે ટેનિસ રમવાનું અને ટાઇટલ જીતવાનું ચાલુ રાખ્યું. ઈજાના કારણે તેને 2023ની ફ્રેન્ચ ઓપનમાંથી બહાર રહેવું પડ્યું હતું. જ્યારે 2024માં તેઓ પ્રથમ રાઉન્ડમાં હારીને બહાર થઈ ગયા હતા. તેણે છેલ્લે 2 વર્ષ પહેલા 2022માં ફ્રેન્ચ ઓપન જીતી હતી.

રાફેલ નડાલે તેની ટેનિસ કારકિર્દીમાં 36 માસ્ટર ટાઇટલ સહિત 92 ATP સિંગલ્સ ટાઇટલ જીત્યા છે. તેના નામે ઓલિમ્પિક ગોલ્ડ મેડલ પણ છે. જો કે, તે પેરિસ ઓલિમ્પિકમાં મેડલ જીતવામાં સફળ રહ્યો ન હતો. ક્લે કોર્ટ પર નડાલની કોઈ સ્પર્ધા નહોતી. તેથી જ તેને માટીના રાજા તરીકે પણ ઓળખવામાં આવે છે. નડાલે કુલ 14 વખત ક્લે કોર્ટ પર રમાયેલી ફ્રેન્ચ ઓપનનું સિંગલ ટાઇટલ જીત્યું છે. આ સમયગાળા દરમિયાન તેણે 116 મેચમાંથી 112 મેચમાં રેકોર્ડ જીત મેળવી છે.

સૌથી વધુ વખત ફ્રેન્ચ ઓપન જીતવા ઉપરાંત નડાલે બે વખત ઓસ્ટ્રેલિયન ઓપન, બે વખત વિમ્બલ્ડન અને 4 વખત યુએસ ઓપન પણ જીત્યા છે. નડાલે 2008માં બેઇજિંગ ઓલિમ્પિક્સમાં ગોલ્ડ મેડલ જીત્યો હતો. આ પછી, 2016 માં, તેણે રિયો ઓલિમ્પિકમાં મેન્સ ડબલ્સમાં ગોલ્ડ મેડલ જીત્યો. આ સિવાય આ ટેનિસ સ્ટારે 4 વખત સ્પેનમાં આયોજિત ડેવિસ કપનો ખિતાબ જીત્યો હતો.

આ અભિનેત્રીને ડેટ કરતા હતા રતન ટાટા

મુંબઈ: બિઝનેસ ટાયકૂન અને અબજોપતિ રતન ટાટાના આકસ્મિક અવસાનથી દરેક દેશવાસીના હૃદયને હચમચાવી દીધું છે. દરેક જગ્યાએથી લોકો તેમને શ્રદ્ધાંજલિ આપી રહ્યા છે. તેમના જવાથી દરેક દેશવાસી દુખી છે. રતન ટાટાનું જવું દેશ માટે મોટી ખોટ છે. તેની જગ્યા ભરવી ખૂબ મુશ્કેલ છે. રતન ટાટાએ પોતાનું સમગ્ર જીવન દેશને સમર્પિત કર્યું હતું. સાદું જીવન જીવતા રતન ટાટા ખૂબ જ ઉદાર હતા અને કરોડો લોકો માટે પ્રેરણારૂપ હતા, પરંતુ તેમણે પોતાનું આખું જીવન એકલા જીવ્યું. રતન ટાટાએ લગ્ન કર્યાં નહોતા અને તેમને કોઈ સંતાન નથી. જો કે, તેઓ પ્રેમમાં પડ્યા હતા. તેણે એકવાર અભિનેત્રી સિમી ગરેવાલ સાથે તેના ટોક શોમાં લગ્ન, બાળકો અને જીવનના ખાલીપો વિશે વાત કરી હતી.

રતન ટાટા અને સિમી ગ્રેવાલ વચ્ચેના સંબંધો

રતન ટાટા એક સમયે પીઢ અભિનેત્રી અને હોસ્ટ સિમી ગ્રેવાલને ડેટ કરતા હતા. બંને રિલેશનશિપમાં હતા અને સિમીએ પોતે 2011માં ETimesને આપેલા એક ઈન્ટરવ્યુમાં આ વાતનો ખુલાસો કર્યો હતો, પરંતુ થોડા સમય પછી તેમના સંબંધો તૂટી ગયા. જોકે, બ્રેકઅપ પછી પણ રતન ટાટા અને સિમી ગ્રેવાલ સારા મિત્રો રહ્યા. રતન ટાટા જ્યારે સિમી ગ્રેવાલ સાથે સિમી ગ્રેવાલના શો રેન્ડેઝવસમાં આવ્યા ત્યારે તેમણે ઘણા ખુલાસા કર્યા. સિમી ગ્રેવાલે રતન ટાટાને તેના ટોક શોમાં પૂછ્યું હતું કે તેણે લગ્ન કેમ નથી કર્યા. આના જવાબમાં રતન ટાટાએ કહ્યું, ‘ઘણી એવી વસ્તુઓ થઈ જેના કારણે હું લગ્ન કરી શક્યો નહીં. સમય બરાબર ન હતો અને પછી હું કામમાં એટલો વ્યસ્ત થઈ ગયો કે મારી પાસે સમય જ ન રહ્યો. મેં ઘણી વાર લગ્ન કરવાનું પણ વિચાર્યું હતું, પરંતુ એવું થયું નહીં.

પરિવારની ઈચ્છાઓ અધૂરી રહી

રતન ટાટાએ એમ પણ કહ્યું હતું કે તેઓ ચાર વખત પ્રેમમાં પડ્યા હતા અને વાત લગ્ન સુધી આવી હતી, પરંતુ કેટલાક કારણોસર એવું બન્યું નહીં. દિવંગત બિઝનેસ ટાયકૂને કહ્યું,’ઘણી વખત એવું બને છે કે પત્ની કે પરિવાર ન હોવાને કારણે હું એકલો અનુભવું છું. ક્યારેક હું તેના માટે ઝંખું છું. જો કે, કેટલીકવાર હું બીજાની લાગણીઓ અથવા અન્ય કોઈની ચિંતાઓ વિશે ચિંતા ન કરવાની સ્વતંત્રતાનો આનંદ માણું છું.’

રતન ટાટાનો પહેલો પ્રેમ

રતન ટાટાએ એકવાર ‘હ્યુમન્સ ઓફ બોમ્બે’ સાથેના ઇન્ટરવ્યુમાં તેમના પ્રથમ પ્રેમ વિશે વાત કરી હતી. તેમણે કહ્યું, હું લોસ એન્જલસમાં હતો. હું પ્રેમમાં પડ્યો અને લગભગ લગ્ન કરવા જઈ રહ્યો હતો. પરંતુ તે સમયે મેં પાછા જવાનું નક્કી કર્યું, કારણ કે હું લગભગ સાત વર્ષથી મારી દાદીથી દૂર હતો. રતન ટાટાએ વધુમાં કહ્યું,મારી દાદીની તબિયત સારી નહોતી. તેથી હું તેને મળવા પાછો આવ્યો અને વિચાર્યું કે હું જેની સાથે લગ્ન કરવા માંગુ છું તે મારી સાથે ભારત આવશે. પરંતુ 1962ના ભારત-ચીન યુદ્ધને કારણે તેના માતા-પિતા આ પગલા માટે સહમત ન થયા અને સંબંધોનો અંત આવ્યો.

અલવિદા રતન ટાટાઃ સોલ્ટ ટુ સોફ્ટવેર બિઝનેસમાં જમાવી ધાક

મુંબઈઃ કરોડો ભારતીયો માટે પ્રેરણાના સ્રોત રહેલા રતન ટાટા હવે નથી રહ્યા. અલવિદા રતન ટાટા. ટાટા ગ્રુપને એક નવા શિખરે પહોંચાડનાર રતન ટાટાએ મીઠાથી માંડીને કાર સુધી સોફ્ટવેરથી માંડીને જહાજનો બિઝનેસ કર્યો છે.

રતન ટાટાનો જન્મ 28 ડિસેમ્બર, 1937 થયો હતો. તેમના પિતાનું નામ નવલ ટાટા અને માતાનું નામ સૂની રતન ટાટા હતું. ટાટા ગ્રુપના સ્થાપક જમશેદજી ટાટા એ રતન ટાટાના પરદાદા હતા. તેમનું પાલનપોષણ તેમનાં દાદી રતનજી ટાટાનાં પત્ની નવાજબાઈ ટાટાએ કર્યું હતું.

રતન ટાટાએ વર્ષ 1991માં ટાટા ગ્રુપનું સુકાન સંભાળ્યું હતું. વર્ષ 1996માં તેમણે ટાટા ટેલિની સ્થાપના કરી હતી અને 2004માં TCSને શેરબજારો પર લિસ્ટ કરાવી હતી. ટાટા ગ્રુપ મીઠા અને ચાથી માંડીને IT અને ઓટો બિઝનેસમાં છે.

રતન ટાટાએ દેશમાં સૌપ્રથમ વાર કાર ઇન્ડિકાનું ઉત્પાદન શરૂ કર્યું હતું. દેશમાં 100 ટકા બનેલી આ કારને પહેલી વાર 1998માં એટો એક્સપોમાં અને જેનેવા ઇન્ટરનેશનલ મોટર શોમાં પ્રદર્શિત કરી હતી. તેમના નામે વિશ્વની સૌથી સસ્તી કાર ટાટા નેનો બનાવવાની ઉપલબ્ધિ પણ છે.

ટાટા ગ્રુપે મુખ્ય હસ્તાંતરણ – વર્ષ 2000માં ટાટા ટી દ્વારા 45 કરોડ ડોલરમાં ટેટલીનું હસ્તાતંરણ કર્યું હતું. ત્યાર બાદ 2007માં ટાટા સ્ટીલ દ્વારા 6.2 અબજ પાઉન્ડમાં કોરસનું હસ્તાંતરણ છે. 2008માં ટાટા મોટર્સ દ્વારા 2.3 અબજ ડોલરમાં જેગુઆર લેન્ડ રોવરનું હસ્તાંતરણ છે.

ટાટા ગ્રુપની કુલ 26 કંપનીઓ સ્ટોક માર્કેટમાં લિસ્ટ છે, જેમાંથી આઠ કંપનીઓ એવી છે, જેનું માર્કેટ કેપ રૂ. એક લાખ કરોડથી વધુ છે. ટાટા ગ્રુપને સોલ્ટ ટુ સોફ્ટવેર કહેવામાં આવે છે.

 

મુખ્યમંત્રી ભૂપેન્દ્ર પટેલે મુંબઇ પહોંચીને રતન ટાટાને શ્રધ્ધાંજલિ આપી

આજે દેશમાં શોકનો માહોલ છે, કેમ કે ભારતના અનમોત રત્ન એવા રતન ટાટાની નિધન થયુ છે. ત્યારે દેશ વિદેશના મહાનુંભાવે રતન ટાટાને શ્રદ્ધાંજલિ આપવા માટે મુંબઈ ખાતે પહોંચી રહ્યા છે. ગુજરાતના મુખ્યમંત્રી ભૂપેન્દ્ર પટેલ પણ દેશના પ્રતિષ્ઠિત ઉદ્યોગપતિ અને દેશના ઔદ્યોગિક નક્શે આગવું સ્થાન પામેલા ટાટા ગ્રુપના સ્વ. રતન ટાટાને શ્રદ્ધાંજલિ પાઠવવા મુંબઈ પહોચ્યા હતા. રતન ટાટાનું ગઈ મોડી રાત્રે અવસાન થયું છે. મુખ્યમંત્રી પાર્થિવ દેહના દર્શન કરી શ્રદ્ધાસુમન પાઠવી બપોર બાદ ગાંધીનગર પરત આવશે.

રતન ટાટાના નશ્વર દેહને વરલીના પારસી સ્મશાનભૂમિમાં લાવવામાં આવશે. સૌ પ્રથમ મૃતદેહને પ્રાર્થના મંડપમાં રાખવામાં આવશે. હોલમાં લગભગ 200 લોકો હાજર રહી શકે છે. પ્રાર્થના લગભગ 45 મિનિટ સુધી ચાલશે. પ્રાર્થનાસભામાં પારસી પરંપરામાં ‘ગેહ-સારનુ’ વાંચવામાં આવશે. નશ્વરદેહના મોં પર કપડાનો ટુકડો મૂકીને ‘અહનવેતિ’નો આખો પહેલો પ્રકરણ વાંચવામાં આવશે. આ એક શાંતિ પ્રાર્થનાની પ્રક્રિયા છે. પ્રાર્થના પ્રક્રિયા પૂર્ણ થયા પછી નશ્વરદેહને ઇલેક્ટ્રિક અગ્નિદાહમાં મૂકવામાં આવશે. આ રીતે અંતિમ સંસ્કારની પ્રક્રિયા પૂર્ણ થશે. રતન ટાટાના નશ્વર દેહને તિરંગાથી લપેટવામાં આવ્યો છે. નશ્વરદેહને નરીમાન પોઈન્ટ ખાતેના નેશનલ સેન્ટર ફોર પરફોર્મિંગ આર્ટસ (NCPA)માં રાખવામાં આવ્યો છે. તેમના અંતિમ દર્શન માટે મોટી સંખ્યામાં લોકો પહોંચી રહ્યા છે. બપોરે 3.30 વાગ્યા સુધી લોકો અંતિમ દર્શન કરી શકશે. અંતિમ સંસ્કાર મુંબઈના વર્લી વિસ્તારમાં સાંજે 4 વાગ્યે કરવામાં આવશે.

1...1,4181,4191,420...5,118Page 1,419 of 5,118