Home Blog Page 1494

લાલબાગના રાજાના પંડાલ પહોંચ્યા અનંત અંબાણી, લીધા બાપ્પાના આશીર્વાદ

મુંબઈ: અંબાણી પરિવાર ખૂબ જ ધાર્મિક છે. બાળકોથી લઈને વડીલો સુધી દરેક જણ પૂજા કરવામાં ખુબ જ માને છે. અનંત અંબાણી પણ ગણપતિ બાપ્પાના પરમ ભક્ત છે. અનંત અંબાણી દર વર્ષે ગણપતિ ઉત્સવ ખૂબ જ ધામધૂમથી ઉજવે છે. લગ્ન પછી પહેલીવાર અનંતે તેની પત્ની રાધિકા મર્ચન્ટ સાથે મળીને બાપ્પાનું ઘરમાં સ્વાગત કર્યું હતું. બે દિવસની ઉજવણી બાદ અનંત અંબાણી તેમના ડાન્સિંગ ફેમિલી સાથે બાપ્પાને વિદાય આપવા પહોંચ્યા હતા. હવે ફરી એકવાર અનંત અંબાણીએ ગણપતિ બાપ્પા પ્રત્યે ભક્તિ દર્શાવી છે. અનંત અંબાણી મોટી સેના સાથે મુંબઈના પ્રખ્યાત લાલબાગચા રાજાના દર્શન કરવા આવ્યા હતા. તેનો વીડિયો પણ સામે આવ્યો છે.

અનંત અંબાણીએ બાપ્પાના દર્શન કર્યા
અનંત અંબાણી કડક સુરક્ષા વચ્ચે લાલબાગચા રાજાના દર્શન કરવા પહોંચ્યા હતા. તેમણે બાપ્પાના ચરણ સ્પર્શ કરી આશીર્વાદ લીધા હતા. આ પછી તેઓ તેમના કાફલા સાથે ત્યાંથી રવાના થયા હતા. આ સમયગાળા દરમિયાન અનંત અંબાણીએ વાદળી રંગનો સિલ્ક કુર્તો પહેર્યો હતો. હંમેશની જેમ તે એનિમલ પ્રિન્ટેડ આઉટફિટમાં અલગ દેખાતો હતો. આ વીડિયો જોયા પછી લોકો કહે છે કે અનંત અંબાણી બાપ્પાના સાચા ભક્ત છે. આટલું જ નહીં, અનંત અંબાણીના મૂલ્યોની પણ ખૂબ પ્રશંસા થઈ રહી છે.

અનંત અંબાણીએ બાપ્પાનો મુગટ બનાવ્યો છે
તમને જણાવી દઈએ કે, આ વર્ષે લાલબાગચા રાજાના મસ્તક પર શણગારવામાં આવેલો ભવ્ય 20 કિલોનો સોનાનો મુગટ દરેકનું ધ્યાન ખેંચી રહ્યો છે. તેની કિંમત અંદાજે 16 કરોડ રૂપિયા છે. આ તાજ અનંત અંબાણીએ ખાસ બાપ્પે માટે બનાવ્યો છે. આ તાજને બનાવવામાં બે મહિનાનો સમય લાગ્યો હતો અને તેને ખૂબ કાળજીથી બનાવવામાં આવ્યો હતો. અનંત અંબાણીએ મેડિકલ સુવિધાઓ પણ પૂરી પાડી છે. આ વર્ષે મહિલાઓ અને બાળકોની ખાસ કાળજી રાખવામાં આવી છે. અંબાણી પરિવાર દ્વારા મેડિકલ સેન્ટર અને સીસીટીવી કેમેરા પણ લગાવવામાં આવ્યા છે.

વિઘ્નહર્તાના મંડપમાં સંદેશ: નાગરિકોએ શું સાવધાની રાખવી..

અમદાવાદ: ‘સલામતીના અક્ષર ચાર સમજે તેનો બેડો પાર’… અગ્નિ સુરક્ષા માટે નાગરિકોએ શું કરવું અને શું ના કરવું એના સંદેશાનું હોર્ડિંગ…સમાજના સૌથી મદદગાર સુપર હીરો પોલીસ, સૈનિક, ફાયરમેન, ડોક્ટરને ગણેશ મહોત્સવના પ્રવેશ દ્વાર પર જ વેજલપુરના યુવક મંડળે મુક્યા છે. આ સાથે સમાજમાં કોઈ પણ મોટી દુર્ઘટના થાય એ માટે નાગરિકોને સાવચેતી અને જાગૃતિ માટેની એક થીમ ગણેશોત્સવમાં તૈયાર કરવામાં આવી છે.વેજલપુર યુવક મંડળના મયુર ઠક્કર ચિત્રલેખા.કોમને કહે છે, “અમે દર વર્ષે સાંપ્રત બાબતો સમાજમાં સરળતાથી પહોંચે, દેશ પ્રેમ જાગે એવી જુદી-જુદી થીમ નક્કી કરીએ છીએ. આ વર્ષની અમારી થીમ લોકોમાં જાગૃતિ આવે એના માટેની છે. વડોદરાની હોડી દુર્ઘટના, મોરબીમાં પુલની દુર્ઘટના કે રાજકોટના ગેમિંગ ઝોનમાં આગની દુર્ઘટનામાં લોકોએ જાતે શું સાવચેતી રાખવી? જેનાથી મોટી સંખ્યામાં લોકોના જીવ બચી શકે. ક્યા સ્થળોએ જવું? ક્યા વાહનોમાં બેસવું? તેમજ ભીડવાળા ઉત્સવ મહોત્સવમાં શું સાવધાની રાખવી? સરકારી તંત્ર તો ઝડપથી કામગીરી કરે જ છે, પરંતુ તંત્ર ખોરવાય નહીં એ માટે નાગરિકો જ અમુક બાબતો ટાળે તો દુર્ઘટનાથી બચી શકાય છે.” ગણેશજીની આસપાસ ફાયરબ્રિગેડ, હોસ્પિટલની કામગીરીને આબેહુબ તૈયાર કરવામાં આવી છે.

(પ્રજ્ઞેશ વ્યાસ – અમદાવાદ)

અમિત શાહે શેના માટે માન્યો અમિતાભ બચ્ચનનો આભાર?

ભારત સરકારે સાયબર ગુનાઓ સામે લડવા માટે I4C અભિયાન શરૂ કર્યું છે. હવે આ અભિયાનમાં બોલિવૂડના દિગ્ગજ અભિનેતા અમિતાભ બચ્ચન પણ જોડાયા છે. ગૃહમંત્રી અમિત શાહે સરકારી પહેલમાં સક્રિય ભાગ લેવા બદલ બોલીવુડ અભિનેતા અમિતાભ બચ્ચનનો આભાર વ્યક્ત કર્યો છે. અમિત શાહે કહ્યું છે કે અમિતાભની ભાગીદારી ભારતને સાયબર-સલામત રાષ્ટ્ર બનાવવાના મિશનને વધુ વેગ આપશે. ચાલો જાણીએ I4C અભિયાન વિશે કેટલીક ખાસ વાતો.

અમિતાભ બચ્ચને શું કહ્યું?
એક વીડિયો સંદેશમાં અભિનેતા અમિતાભ બચ્ચને કહ્યું છે કે સાયબર ક્રાઈમ સામે તકેદારી જરૂરી છે. તેમણે કહ્યું કે દેશમાં અને સમગ્ર વિશ્વમાં સાયબર ક્રાઈમના વધી રહેલા કેસ ચિંતાનો વિષય છે. ગૃહ મંત્રાલયનું ભારતીય સાયબર ક્રાઈમ કોઓર્ડિનેશન સેન્ટર તેને નિયંત્રિત કરવાનો પ્રયાસ કરી રહ્યું છે. અભિનેતાએ કહ્યું કે તે ગૃહમંત્રી અમિત શાહની વિનંતી પર આ અભિયાનમાં જોડાયો છે. અમિતાભે કહ્યું કે આપણે બધાએ આ સમસ્યા સામે એક થવું જોઈએ. થોડી સાવધાની આપણને સાયબર ગુનાઓથી બચાવી શકે છે.

ગૃહમંત્રી અમિત શાહે આભાર વ્યક્ત કર્યો
ગૃહમંત્રી અમિત શાહે કહ્યું છે કે પીએમ મોદીના વિઝનને ધ્યાનમાં રાખીને ગૃહ મંત્રાલય દેશમાં એક સુરક્ષિત સાયબર સ્પેસ બનાવવા માટે પ્રતિબદ્ધ છે. I4C એ આ દિશામાં ઘણાં પગલાં લીધાં છે. અમિત શાહે સરકારી પહેલમાં સક્રિય ભાગીદારી માટે બોલિવૂડ અભિનેતા અમિતાભ બચ્ચનનો આભાર માન્યો અને કહ્યું કે તે સાયબર-સુરક્ષિત રાષ્ટ્ર બનાવવાના મિશનને વેગ આપશે.

I4C વિશે ખાસ વાતો
ભારતીય સાયબર ક્રાઈમ કોઓર્ડિનેશન સેન્ટર (I4C) એ દેશમાં સાયબર ક્રાઈમનો સામનો કરવા માટે ગૃહ મંત્રાલયની પહેલ છે. I4C અભિયાન વર્ષ 2018માં શરૂ કરવામાં આવ્યું હતું. આમાં વિવિધ કાયદા અમલીકરણ એજન્સીઓ અને હિતધારકો વચ્ચે સંકલન સુધારવા, સાયબર અપરાધનો સામનો કરવા માટે ભારતની એકંદર ક્ષમતામાં પરિવર્તન અને નાગરિકોના સંતોષના સ્તરમાં સુધારો કરવાનો સમાવેશ થાય છે. I4C 10 જાન્યુઆરી 2020 ના રોજ ગૃહમંત્રી દ્વારા રાષ્ટ્રને સમર્પિત કરવામાં આવ્યું હતું.

I4C અભિયાનના ઉદ્દેશ્યો
ભારતમાં સાયબર ક્રાઈમને કાબૂમાં લેવા માટે નોડલ પોઈન્ટ તરીકે કામ કરવું.
મહિલાઓ અને બાળકો સામેના સાયબર ગુનાઓ સામેની લડાઈને મજબૂત બનાવવી.
સાયબર ક્રાઈમ સંબંધિત ફરિયાદો સરળતાથી દાખલ કરવામાં અને સાયબર ક્રાઈમ પેટર્નની ઓળખની સુવિધા માટે.

ચિકનગુનિયાનો નવો સ્ટ્રેન શરીરના ઓર્ગનને પહોંચાડશે નુકસાન?

ગુજરાતને વરસાદ ધમરોળી રહ્યું છે. ત્યારે બીજી બાજું રોગચાળાએ પણ માથું ઉચક્યું છે. ગુજરાતમાં ડેન્ગ્યુ, મેલેરિયા, ચિકનગુનિયા જેવી મચ્છરજન્ય બીમારીના કેસમાં સતત વધારો થઇ રહ્યો છે. ખાસ કરીને ગત વર્ષની સરખામણીએ ચિકનગુનિયાના બમણા નોંધાયા છે. ચિકનગુનિયા સાથે એન્સેફેલાઇટિસ હોય તો કિડની, મગજ જેવા અંગોને નુકસાન થવાનું પણ જોખમ રહે છે.

સામાન્ય રીતે ડેન્ગ્યુના કેસ વધારે જોવા મળતા હોય છે. પરંતુ ગત વર્ષની સરખામણીએ આ વર્ષે ચિકનગુનિયાના 30 ટકાથી વઘુ કેસ નોંધાયા છે. મળતી માહિતી અનુસાર જે સત્તાવાર આંકડા સામે આવી રહ્યા છે. તેના કરતાં પણ ચિકનગુનિયાના કેસ અનેકગણા વધુ હોવાની શક્યતા છે. ડૉક્ટરોના મતે આ વખતે કેટલાક દર્દીઓમાં ચિકનગુનિયાની સાથે એન્સેફેલાઇટિસ પણ જોવા મળે છે. આ દર્દીઓમાં ચિકનગુનિયા જેવા જ તાવ, સાંધાના દુખાવા, ફોલ્લીઓ થવાના લક્ષણો હોય છે. આ પછી બીજા સપ્તાહમાં બળતરા મગજ સુધી પહોંચવા લાગે છે. જેના કારણે દર્દી અશક્તિ, વધુ ઉંઘ આવવી, ચાલવામાં સમસ્યા, અનિયમિત યુરિનરી જેવી ફરિયાદ કરે છે. આ પ્રકારના લક્ષણ સાથેના દર્દીના સેમ્પલ જોવા મળ્યા છે, જેને પુનાની નેશનલ ઈન્સ્ટિટ્યુટ ઑફ વિરોલોજીમાં પરિક્ષણ માટે મોકલાયા છે. જેથી વાયરસ મ્યુટેશન છે કે ચિકનગુનિયાનો કોઇ નવો સ્ટ્રેઇન તે સ્પષ્ટ થશે. આ પ્રકારના કેસનું પ્રમાણ હાલ દેશમાં ખૂબ જ ઓછું છે. પરંતુ આ ગંભીર પ્રકારની બીમારીને ‘ગુઇલિયન બેર સિન્ડ્રોમ’ તરીકે ઓળખાય છે.

આ બીમારીમાં ચેતાતંતુઓને અસર થવા ઉપરાંત ભારે અશક્તિ આવવી, પેરાલિસિસ થવાનું જોખમ પણ રહે છે. કેટલાક દર્દીઓ એવા પણ છે જેમને ભારે અશક્તિ આવવાથી ચાલતા-ચાલતા પડી જાય છે. ચિકનગુનિયા એન્સેફેલાઇટિસના કેસ આપણે ત્યાં હજુ વધારે જોવા મળ્યા નથી. આ વાયરસ શરીરના કોઇપણ ઓર્ગનને જોખમ પહોંચાડી શકે છે. રોગપ્રતિકારક શક્તિ ઓછી હોય કે દર્દીને તેનું નિદાન મોડું થાય તો તકેદારી જરૂરી છે. ચિકનગુનિયાથી મગજને અસર પડી હોય તેવા ગુજરાતમાં હજુ સુધી કેસ નોંધાયા નથી તેવો દાવો કરવામાં આવી રહ્યો છે. અમદાવાદમાં તાવના દર્દીઓમાં સતત વધારો થઇ રહ્યો છે. આ અંગે મળતી માહિતી અનુસાર તાવના અંદાજે 6 હજાર દર્દી પૈકી 1 હજાર ડેન્ગ્યુ-ચિકનગુનિયાના હોય છે. આ ઉપરાંત તાવના રોજના 10 ટકા દર્દીને હોસ્પિટલમાં દાખલ કરવા પડે છે.

સંજૌલી મસ્જિદ તરફ બેકાબૂ ભીડની કૂચઃ પોલીસે કર્યો લાઠીચાર્જ

શિમલાઃ હિમાચલ પ્રદેશની રાજધાની શિમલામાં બની રહેલી સંજૌલી મસ્જિદને લઈને ટેન્શન ઘણું વધી ગયું છે. પ્રદર્શન કરી રહેલા હિન્દુ સંગઠનોએ હવે પોલીસ બેરિકેડ તોડી નાખ્યા છે. તેઓ ઘણા આગળ વધી ચૂક્યા છે.

મસ્જિદથી થોડેક જ દૂર હવે વિરોધ પ્રદર્શન થઈ રહ્યું છે. મોટી સંખ્યામાં પોલીસ ફોર્સ તહેનાત છે, જે પ્રદર્શનકારીઓને અટકાવવાના પ્રયાસ કરી રહ્યું છે. બેરિકેડ તોડ્યા પછી આગળ વધી રહેલી ભીડ પર પોલીસે લાઠીચાર્જ પણ કર્યો છે. જોકે હાલના સમયે ભીડ પોલીસ પર ભારે પડી રહી છે. જે વિડિયો સામે આવી રહ્યા છે, એમાં ભીડે કેટલાય પોલીસ બેરિકેડ તોડી નાખ્યા છે. ભીડ પોલીસને પાછળ ધકેલી રહી છે. બેકાબૂ ભીડને કાબૂમાં કરવા પોલીસે બળપ્રયોગ કરવો પડી રહ્યો છે. પોલીસ વોટર કેનન દ્વારા પણ ભીડને વિખેરવાની કવાયત કરી રહી છે.

છેલ્લા કેટલાય દિવસોથી પ્રદર્શન કરી રહેલા લોકોનું કહેવું છે કે તેઓ વહીવટી તંત્રને અનેક વાર ગેરકાયદે મસ્જિદના બાંધકામની ફરિયાદ કરી ચૂક્યા છે, પણ હજી સુધી કોઈ પગલાં નથી લેવામાં આવ્યાં. લોકોનો આરોપ છે કે આ કેસ કોઈ ધાર્મિક સ્થળનો નથી, પણ કાયદેસર અને ગેરકાયદે બાંધકામનો છે.

મસ્જિદમાં થયેલા ગેરકાયદે બાંધકામને લઈને સાત સપ્ટેમ્બરે મ્યુનિસિપલ કમિશનરને ત્યાં સુનાવણી થઈ હતી. મસ્જિદમાં થયેલા ગેરકાદે બાંધકામને લઈને 2010થી અત્યાર સુધી 45 વાર સુનાવણી થઈ ચૂકી છે, પણ હજી સુધી નિર્ણય નથી લઈ શકાયો. એ દરમ્યાન મસ્જિદ બે માળથી વધતાં-વધતાં પાંચ માળની જરૂર બની ગઈ છે.

મલાઈકા અરોરાના પિતાએ ઘરના છઠ્ઠા માળેથી કૂદકો મારી કરી આત્મહત્યા

મુંબઈ: મલાઈકા અરોરાને લઈને દુ:ખદ સમાચાર આવ્યા છે. અભિનેત્રીના પિતાનું નિધન થયું છે. બૉલિવૂડની સુંદરી મલાઈકા અરોરાના પિતા અનિલ અરોરાએ બાંદ્રામાં પોતાના ઘરના છઠ્ઠા માળેથી કૂદીને આત્મહત્યા કરી છે, આ ઘટના સવારે 9 વાગ્યાની આસપાસ બની હોવાનું કહેવાય છે. આ સમાચાર પછી મલાઈકા અરોરાનો પરિવાર અને પરિચિતો આઘાતમાં છે. પિતાના નિધનના સમાચાર મળતા જ અભિનેત્રી પુણેથી મુંબઈ જવા રવાના થઈ ગઈ હતી.

હાલ મલાઈકાના પિતાના મૃતદેહને બાબા હોસ્પિટલમાં રાખવામાં આવ્યો છે. અનિલ અરોરાએ કયા કારણોસર આત્મહત્યા કરી તે હજુ સુધી જાણી શકાયું નથી.

એક્સ પતિ અરબાઝ ખાન મલાઈકાના ઘરે પહોંચ્યા

આ મુશ્કેલ સમયમાં મલાઈકા અરોરાનો એક્સ પતિ અરબાઝ ખાન તરત જ અભિનેત્રીના ઘરે પહોંચી ગયા હતા. અભિનેતા મલાઈકાના ઘરની બહાર પોલીસ સાથે વાત કરતો જોવા મળ્યા હતા.

પોલીસે જણાવ્યું કે મૃતદેહને પોસ્ટમોર્ટમ માટે મોકલી દેવામાં આવ્યો છે અને તપાસ ચાલુ છે. પોલીસના જણાવ્યા અનુસાર, મલાઈકા અરોરાના પિતાએ છઠ્ઠા માળની ગેલેરી પરથી કૂદીને આત્મહત્યા કરી છે. બાંદ્રા પોલીસ અને ક્રાઈમ બ્રાન્ચની ટીમ ઘટનાસ્થળે પહોંચી ગઈ છે, હાલ પોલીસને ઘટનાસ્થળેથી કોઈ સુસાઈડ નોટ મળી નથી. કહેવામાં આવી રહ્યું છે કે મલાઈકાના પિતા કેટલાક દિવસોથી બીમાર હતા.

મલાઈકા અરોરા ઘરે નહોતી
અનિલ અરોરાએ આત્મહત્યા કરી ત્યારે મલાઈકા અરોરા ઘરે ન હતી. આજે સવારે તે પુણેમાં હતી. આ ઘટનાની જાણકારી મળતા જ મલાઈકા તરત જ મુંબઈથી પુણે જવા રવાના થઈ ગઈ હતી. આ સમાચાર પછી ઘણા સેલેબ્સ પણ અભિનેત્રીના ઘરે પહોંચી રહ્યા છે.

Monsoon Update: રાજ્યમાં વરસાદનું જોર વધ્યું, 114 તાલુકામાં મેઘ મહેર

ગુજરાતમાં ફરી એક વખત મેઘરાજાની બેટિંગ શરૂ થઈ ચુકી છે. ત્યારે રાજ્યમાં છેલ્લા 24 કલાકમાં ગુજરાતમાં 114 તાલુકામાં વરસાદ નોંધાયો છે. જેમાં સૌથી વધુ સુરતના ઉમરપાડામાં 11.81 ઈંચ વરસાદ નોંધાયો છે. ભારે વરસાદે દક્ષિણ ગુજરાતને ઘમરોળ્યું છે. ભારે વરસાદના કારણે જનજીવન અસ્તવ્યસ્ત થઈ ગયું હતું. ઉમરપાડાના કેટલાક વિસ્તારોમાં વરાસદી પાણી ભરાયા છે. તો બીજી બાજુ ભરૂચના વાલિયામાં 5 ઈંચ વરસાદ પડ્યો હતો. નર્મદાના સાગબારામાં 3 ઈંચ અને નવસારીના ખેરગામમાં 2.75 ઈંચ વરસાદ નોંધાયો છે.

હવામાન વિભાગે આગામી દિવસો માટે ભારે થી અતિભારે વરસાદની આગાહી પણ વ્યક્ત કરી છે. જે પ્રમાણે આજે એટલે કે 11મી સપ્ટેમ્બરના રોજ અરવલ્લી, મહીસાગર, પંચમહાલ, છોટા ઉદેપુર, દાહોદ, નર્મદા, ભરૂચ, સુરત, તાપી, નવસારી, ડાંગ, વલસાડમાં ભારે વરસાદ થઇ શકે છે. જ્યારે કચ્છ, મોરબી, સુરેન્દ્રનગર, રાજકોટ, જામનગર, દેવભૂમિ દ્વારકા, પોરબંદર, જૂનાગઢ, ગીર સોમનાથ, અમરેલી, ભાવનગર, બોટાદ, અમદાવાદ, ગાંધીનગર, મહેસાણા, પાટણ, બનાસકાંઠા, સાબરકાંઠા, ખેડા, આણંદ, વડોદરામાં હળવોથી મધ્યમ વરસાદ થઇ શકે છે. આ ઉપરાંત 12મીથી 14મી સપ્ટેમ્બર દરમિયાન અમદાવાદ, ગાંધીનગર, મહેસાણા, પાટણ, બનાસકાંઠા, સાબરકાંઠા, અરવલ્લી, મહીસાગર, ખેડા, આણંદ, વડોદરા, પંચમહાલ, દાહોદ, છોટા ઉદેપુર, નર્મદા, ભરૂચ, સુરત, તાપી, ડાંગ, નવસારી અને વલસાડ જિલ્લામાં અમુક ભાગોમાં ગાજવીજ સાથે વરસાદ થઈ શકે છે. જ્યારે કચ્છ, મોરબી, સુરેન્દ્રનગર, રાજકોટ, જામનગર, દેવભૂમિ દ્વારકા, પોરબંદર, જૂનાગઢ, ગીર સોમનાથ, અમરેલી, ભાવનગર, બોટાદ જિલ્લામાં છૂટો છવાયો હળવોથી મધ્યમ વરસાદ થવાની શક્યતા છે.

ઉલ્લેખનીય છે કે રાજ્ય પર વરસાદની ત્રણ સિસ્ટમ સક્રિય હોવાથી ગુજરાત પર વારસાદનું જોર વધવાની શક્યતા હવામાન વિભાગે વ્યક્ત કરી છે. જેમાં દક્ષિણ ગુજરાતથી ઉત્તર કેરળ સુધી ઑફ શોર ટ્રેક, દક્ષિણ ગુજરાતના ભાગો ઉપર સાયકલોનિક સર્ક્યુલેશન તથા બંગાળની ખાડીમાંથી જે સાયકલોનિક સર્ક્યુલેશન આગળ વધીને ડિપ્રેશન બન્યું છે તે હાલમાં ઉત્તર છત્તીસગઢના આસપાસ સક્રિય છે, જે પશ્ચિમ અને ઉત્તરપશ્ચિમ દિશા તરફ ગતિ કરી રહ્યું છે. જેને કારણે ગુજરાત ઉપર વરસાદની અસર રહેશે. ખાસ કરીને દક્ષિણ અને મધ્ય ગુજરાતના જિલ્લામાં વરસાદની સંભાવના છે.

ભારતવિરોધી ઇલ્હાન ઉમર સાથે રાહુલ ગાંધીની મુલાકાત પર વિવાદ

નવી દિલ્હીઃ કોંગ્રેસના વરિષ્ઠ નેતા રાહુલ ગાંધી અમેરિકાના પ્રવાસે છે. તેમણે ત્યાં અમેરિકી સાંસદોના એક પ્રતિનિધિમંડળ સાથે મુલાકાત કરી હતી. એ મુલાકાતના કેટલાક ફોટા સોશિયલ મિડિયા પર વાઇરલ થઈ રહ્યા છે, જેના પર વિવાદ થયો છે.

રાહુલ ગાંધીની સાથે આ ફોટાઓમાં ભારતવિરોધી ઇલ્હાન ઉમર પણ છે. હવે ભાજપે એ માટે રાહુલ ગાંધી પર નિશાન સાધ્યું છે. ભાજપનાં રાષ્ટ્રીય પ્રવકતા સંજુ વર્માનું કહેવું છે કે રાહુલ ગાંધી સત્તામાં આવવા માટે ઉતાવળા છે. એને લીધે જ તેમણે કટ્ટરપંથી ઇસ્લામિક ઇલ્હાન ઉમર સાથે મુલાકાત કરી  છે. ભાજપના એક અન્ય નેતા નિશિકાંત દુબેએ કહ્યું હતું કે લાલ ઘેરામાં એ અમેરિકામાં ડેમોક્રેટિક પાર્ટીના નેતા ઇલ્હાન ઉમર છે, જે ખાલિસ્તાન અને કાશ્મીરને અલગ દેશ બનાવવા માટે સતત ટેકો આપી રહ્યાં છે.

ભાજપના પ્રવક્તા અમિત માલવીયએ ક્હ્યું હતું કે રાહુલ ગાંધીએ જેમની સાથે મુલાકાત કરી એ ઇલ્હાન ભારતવિરોધી કટ્ટરપંથી ઇસ્લામિક  અને આઝાદ કાશ્મીરની તરફેણ કરનારા છે. એ મુલાકાતને લઈને પાકિસ્તાનના નેતાઓનાં પણ ભવાં તંગ થયાં હતાં. કોંગ્રેસ હવે ખૂલીને ભારત વિરોધનું કામ કરી રહી છે. એ મુલાકાત વોશિંગ્ટન ડીસીમાં રેબર્ન હાઉસ ઓફિસ બિલ્ડિંગમાં થઈ હતી.

આ બેઠકની યજમાની કોંગ્રેસમેન જેમ્સ શર્મને કરી હતી. એ પ્રતિનિધિમંડળમાં ઇલ્હાન ઉમર સિવાય સેનેટર જોનાથન જેક્સન, સેનેટર રોખન્ના, સેનેટર રાજા કૃષ્ણમૂર્તિ, સેનેટર બારબરા લી, સેનેટર થાનેદાર જીસસ જી, ગાર્સિયા, સેનેટર હેંક જોન્સન અને જૈન સ્કાકોવસ્કી સામેલ છે.

 

 

‘દેવરા’ ફિલ્મ ટ્રેલર ઈવેન્ટમાં જોવા મળ્યો સૈફ અને એનટીઆરનો બોન્ડ

મુંબઈ: સૈફ અલી ખાન, જુનિયર એનટીઆર અને જ્હાનવી કપૂરની ફિલ્મ ‘દેવરા’નું ધમાકેદાર ટ્રેલર રિલીઝ થઈ ગયું છે. જેમાં વિલન બનેલા સૈફે ફરી એકવાર લોકોના દિલ જીતી લીધા છે. જ્હાન્વી કપૂર, સૈફ અલી ખાન અને જુનિયર એનટીઆર આ દિવસોમાં તેમની આગામી ફિલ્મ ‘દેવરા’ માટે ચર્ચામાં છે. આ ફિલ્મનું ટ્રેલર આજે રિલીઝ કરવામાં આવ્યું છે. જે હાલ સોશિયલ મીડિયા પર ધૂમ મચાવી રહ્યો છે. આ દરમિયાન ફિલ્મના ટ્રેલર લોન્ચ ઇવેન્ટમાંથી સૈફ અલી ખાન અને જુનિયર એનટીઆરની કેટલીક સુંદર તસવીરો સામે આવી છે.

 

મુંબઈમાં એક ભવ્ય કાર્યક્રમમાં ‘દેવરા’ ફિલ્મનું ટ્રેલર લોન્ચ કરવામાં આવ્યું હતું. જેમાં ફિલ્મની આખી સ્ટાર કાસ્ટ આવી પહોંચી હતી. જેમણે એકસાથે પાપારાઝી માટે પોઝ પણ આપ્યા હતા.સૈફ અલી ખાન અને જુનિયર એનટીઆર ઉપરાંત, પ્રખ્યાત ફિલ્મ નિર્માતા કરણ જોહર અને અભિનેત્રી રવિના ટંડનના પતિ અનિલ થડાનીએ પણ આ ઇવેન્ટમાં હાજરી આપી હતી. આ ફિલ્મ 27 સપ્ટેમ્બરના રોજ રિલીઝ થશે.

 

(તમામ તસવીર: માનસ સોમપુરા)

૧૧ સપ્ટેમ્બર, ૨૦૨૪

1...1,4931,4941,495...5,103Page 1,494 of 5,103