Home Blog Page 17

Oceans Day: આવો, પાંચ મહાસાગરના પેટાળમાં ડૂબકી મારીએ…

Oceans Day: પૃથ્વી પર જીવનની શરૂઆત દરિયામાંથી થઈ છે અને આજે પણ આપણું અસ્તિત્વ મહાસાગરોને આભારી છે. પૃથ્વીનો 70 ટકાથી વધુ હિસ્સો પાણીથી ઘેરાયેલો છે, જે ઓક્સિજન, ખોરાક અને ક્લાઈમેટ કંટ્રોલ જેવી અદભુત સુવિધાઓ પૂરી પાડે છે.

આ વિશાળ જળરાશિ પ્રત્યે આદર વ્યક્ત કરવા અને એના સંરક્ષણ માટે દર વર્ષે 8 જૂને સમગ્ર વિશ્વમાં ‘વર્લ્ડ ઓસન્સ ડે’ એટલે કે વિશ્વ મહાસાગર દિવસ ઉજવવામાં આવે છે. પિચથી લઈને બોર્ડરૂમ સુધી જેમ મેનેજમેન્ટ જરૂરી છે, એમ જ પૃથ્વીના સંતુલન માટે આ મહાસાગરોનું મેનેજમેન્ટ પણ એટલું જ અનિવાર્ય છે.

ત્યારે જાણીએ વિશ્વના પાંચ મહાસાગર વિશેની રસપ્રદ વાતો…

ક્યારે અને કેમ ઉજવાય છે આ દિવસ (Oceans Day)

દર વર્ષે 8 જૂને વિશ્વભરમાં મહાસાગર દિવસની ઉજવણી કરવામાં આવે છે. આ દિવસની ઉજવણીની સત્તાવાર શરૂઆત સંયુક્ત રાષ્ટ્ર (UN) દ્વારા વર્ષ 2008માં કરવામાં આવી હતી, જોકે એનો પ્રસ્તાવ વર્ષ 1992માં કેનેડા સરકાર દ્વારા રિયો ડી જાનેરોમાં આયોજિત પૃથ્વી સંમેલનમાં મૂકવામાં આવ્યો હતો. આ દિવસ ઉજવવા પાછળનો મુખ્ય હેતુ માનવ જીવનમાં મહાસાગરોના મહત્વ વિશે લોકોને જાગૃત કરવાનો છે. આજે પ્લાસ્ટિક પ્રદૂષણ, ગ્લોબલ વોર્મિંગ અને ઓવર-ફિશિંગને કારણે દરિયાઈ જીવસૃષ્ટિ જોખમમાં મુકાઈ ગઈ છે. આ દિવસ યાદ અપાવે છે કે જો દરિયાને નહીં બચે તો પૃથ્વી પર માનવજાતનું અસ્તિત્વ પણ જોખમમાં આવી જશે.

પ્રશાંત મહાસાગર (Pacific Ocean)

આ પૃથ્વી પરનો સૌથી મોટો અને સૌથી ઊંડો મહાસાગર છે, જેનો કુલ વિસ્તાર અંદાજે 16.5 કરોડ ચોરસ કિલોમીટર (165 million sq km) છે. એ એટલો વિશાળ છે કે દુનિયાના તમામ ખંડોની જમીન ભેગી કરવામાં આવે, તો પણ એના કરતાં આ મહાસાગરનું કદ મોટું છે. પ્રશાંત મહાસાગરમાં જ દુનિયાનું સૌથી ઊંડું સ્થળ ‘મરિયાના ટ્રેન્ચ’ (Mariana Trench) આવેલું છે, જેની ઊંડાઈ અંદાજે 11 હજાર મીટર જેટલી છે. આ મહાસાગરની આસપાસ સૌથી વધુ સક્રિય જ્વાળામુખી હોવાથી એને ‘રિંગ ઓફ ફાયર’ પણ કહેવામાં આવે છે.

એટલાન્ટિક મહાસાગર (Atlantic Ocean)

આ વિશ્વનો બીજા નંબરનો સૌથી મોટો મહાસાગર છે, જેનો વિસ્તાર અંદાજે 10.6 કરોડ ચોરસ કિલોમીટર (106 million sq km)  છે. ઉપરથી જોતા આ મહાસાગરનો આકાર અંગ્રેજી અક્ષર ‘S’ જેવો દેખાય છે. વેપાર અને વાણિજ્યની દ્રષ્ટિએ આ દુનિયાનો સૌથી વ્યસ્ત દરિયાઈ માર્ગ ગણાય છે, જે અમેરિકા અને યુરોપ-આફ્રિકાને જોડે છે. ઉત્તરી એટલાન્ટિકનો બરમુડા ટ્રાયન્ગલ (Bermuda Triangle)નો રહસ્યમય વિસ્તાર પણ આ જ મહાસાગરનો એક ભાગ છે.

હિંદ મહાસાગર (Indian Ocean)

દુનિયાનો ત્રીજો સૌથી મોટો મહાસાગર આપણા દેશ ભારતની દક્ષિણે આવેલો હિંદ મહાસાગર છે. એનો કુલ વિસ્તાર અંદાજે 7.05 કરોડ ચોરસ કિલોમીટર (70.5 million sq km)  છે. આ વિશ્વનો એકમાત્ર એવો મહાસાગર છે જેનું નામ કોઈ દેશ (હિંદુસ્તાન)ના નામ પરથી રાખવામાં આવ્યું હોય. આ મહાસાગર આંતરરાષ્ટ્રીય તેલ વેપાર માટે ખૂબ જ મહત્વપૂર્ણ વ્યૂહાત્મક સ્થાન ધરાવે છે અને એનું પાણી અન્ય મહાસાગરોની સરખામણીએ થોડું વધુ ગરમ હોય છે.

દક્ષિણ મહાસાગર (Southern Ocean)

પૃથ્વીના દક્ષિણ ધ્રુવ પર એન્ટાર્કટિકા ખંડને ચારેય બાજુથી ઘેરીને રાખતો આ મહાસાગર કદમાં ચોથા ક્રમે આવે છે, જેનો વિસ્તાર અંદાજે 2.03 કરોડ ચોરસ કિલોમીટર (20.3 million sq km) છે. વર્ષ 2000માં ઇન્ટરનેશનલ હાઇડ્રોગ્રાફિક ઓર્ગેનાઇઝેશન દ્વારા એને સત્તાવાર અલગ મહાસાગરનો દરજ્જો અપાયો હતો. આ વિસ્તાર અત્યંત ઠંડો છે અને અહીં વર્ષભર વિશાળ કદની હિમશીલાઓ (Icebergs) તરતી જોવા મળે છે, જે વ્હેલ અને પેન્ગ્વિન જેવા જીવોનું ઘર છે.

આર્કટિક મહાસાગર (Arctic Ocean)

પૃથ્વીના ઉત્તર ધ્રુવ (North Pole)ની આસપાસ આવેલો આર્કટિક મહાસાગર વિશ્વનો સૌથી નાનો અને સૌથી છીછરો મહાસાગર છે. એનો કુલ વિસ્તાર અંદાજે 1.4 કરોડ ચોરસ કિલોમીટર (14 million sq km) છે. આ મહાસાગર વર્ષના મોટાભાગના સમય દરમિયાન બરફની જાડી ચાદરથી ઢંકાયેલો રહે છે. ધ્રુવીય રીંછ (Polar Bears) અને સીલ જેવા વિશિષ્ટ પ્રાણીઓ માટે આ મહાસાગર એકમાત્ર કુદરતી આશ્રયસ્થાન છે.

હેતલ રાવ

૦૭ જૂન ૨૦૨૬

અંતઃપ્રેરણા અને આત્મદર્શન…

અંતઃપ્રેરણા અને આત્મદર્શન — આ બે શબ્દો આજના સમયમાં માત્ર આધ્યાત્મિક જીવન માટે જ નહીં, પરંતુ અસરકારક નેતૃત્વ માટે પણ અત્યંત જરૂરી બની ગયા છે.

यत्रोपरमते चित्तं निरुद्धं योगसेवया ।
यत्र चैवात्मनात्मानं पश्यन्नात्मनि तुष्यति ॥२०॥

सुखमात्यन्तिकं यत्तद् बुद्धिग्राह्यमतीन्द्रियम् ।
वेत्ति यत्र न चैवायं स्थितश्चलति तत्त्वतः ॥२१॥

यं लब्ध्वा चापरं लाभं मन्यते नाधिकं ततः ।
यस्मिन्स्थितो न दुःखेन गुरुणापि विचाल्यते ॥२२॥

तं विद्याद् दुःखसंयोगवियोगं योगसंज्ञितम् ।
स निश्चयेन योक्तव्यो योगोऽनिर्विण्णचेतसा ॥२३॥

ભગવદ્ ગીતાના અધ્યાય 6ના શ્લોક 20થી 23માં શ્રીકૃષ્ણ યોગીની એવી અવસ્થાનું વર્ણન કરે છે, જ્યાં મન સ્થિર બને છે, આત્મા સાથેનો સંબંધ ગાઢ બને છે અને વ્યક્તિ બહારની અસ્થિર પરિસ્થિતિઓથી પ્રભાવિત થયા વિના આંતરિક પ્રકાશથી જીવવા લાગે છે.

આજના કોર્પોરેટ યુગમાં આ વિચાર અત્યંત પ્રાસંગિક છે, કારણ કે આજે લોકો પાસે માહિતી (Information) ખૂબ છે, પરંતુ આત્મદર્શન ઓછું છે; લોકો પાસે ટેક્નોલોજી (Technology) છે, પરંતુ અંતઃપ્રેરણા ધીમે-ધીમે ખોવાઈ રહી છે.

આજના ઘણા લીડર્સ (Leaders) નિર્ણયો તો ઝડપથી લે છે, પરંતુ પોતાની અંદરના અવાજને સાંભળ્યા વિના. પરિણામે સંસ્થાઓમાં દિશા કરતાં દબાણ વધારે જોવા મળે છે. સાચું નેતૃત્વ માત્ર ટાર્ગેટ (Target) પૂર્ણ કરાવવામાં નથી, પરંતુ ટીમને એક અર્થપૂર્ણ દિશા આપવામાં છે — અને આ દિશા બહારના અવાજથી નહીં, અંદરની સ્થિરતાથી જન્મે છે.

ઉદાહરણ તરીકે, એક સીઈઓ (CEO) જ્યારે સંકટની ઘડીએ ગભરાટમાં નિર્ણય લેવાની જગ્યાએ શાંતિથી પરિસ્થિતિનું અવલોકન કરે છે અને પોતાની અંતઃપ્રેરણાને અનુસરે છે, ત્યારે તે માત્ર કંપનીને બચાવતો નથી, પરંતુ પોતાની ટીમમાં વિશ્વાસ પણ જગાવે છે.

આજના માનવ વર્તનમાં પણ આપણે જોઈ શકીએ છીએ કે લોકો સતત સોશિયલ મીડિયા (Social Media), સરખામણી અને બાહ્ય માન્યતાના દબાણ હેઠળ જીવતા થયા છે. લોકો પોતાની અંદરની શાંતિ ગુમાવી રહ્યા છે અને તેથી નિર્ણયો પણ ઘણીવાર બીજાની અપેક્ષાઓના આધારે લેવાય છે.

અહીં આત્મદર્શન એક આંતરિક અરીસા તરીકે કાર્ય કરે છે, જે વ્યક્તિને પૂછે છે — “હું ખરેખર શું ઈચ્છું છું?” નવી દૃષ્ટિએ જોઈએ તો અંતઃપ્રેરણા હવે માત્ર આધ્યાત્મિક શબ્દ નથી, પરંતુ ઇન્ટ્યુટિવ લીડરશિપ (Intuitive Leadership)નું કેન્દ્ર છે. વિશ્વની ઘણી મોટી કંપનીઓ હવે માઇન્ડફુલનેસ (Mindfulness), સાયલન્સ રિટ્રીટ (Silence Retreat) અને સેલ્ફ-રિફ્લેક્શન સેશન્સ (Self-Reflection Sessions) ને લીડરશિપ ટ્રેનિંગ (Leadership Training)નો મહત્વપૂર્ણ ભાગ બનાવી રહી છે. કારણ કે તેઓ સમજી ગયા છે કે જે લીડર પોતાની અંદર સ્પષ્ટ હોય છે, તે જ બહાર સ્પષ્ટ દિશા આપી શકે છે.

અંતમાં, ગીતાનો સંદેશ એ છે કે જે વ્યક્તિ પોતાની અંદર સ્થિર બને છે, તે બહારના અંધકારમાં પણ પ્રકાશ ફેલાવી શકે છે. સાચો લીડર એ જ છે, જે પોતાના શબ્દોથી નહીં, પરંતુ પોતાની આંતરિક શાંતિ, આત્મદર્શન અને અંતઃપ્રેરણાથી લોકોને માર્ગ બતાવે છે.

(નિધિ દિવાસળીવાળા નવી પેઢીની તેજસ્વી લેખિકા છે. સુરતસ્થિત વીર નર્મદ યુનિવર્સિટીના સ્નાતક નિધિના બે પુસ્તકો કાવ્યસંગ્રહ ‘ઝરણી‘ અને ચિંતનકણિકાના સંગ્રહ ‘નિજાનંદ‘ ઉપરાંત ‘થોડામાં ઘણું’ મોટીવેશનલ સુવિચારોને પણ વાચકોએ વખાણ્યા છે. માનવ સંબંધો, સ્વભાવ અને સમાજ વ્યવસ્થા ઉપર આધારિત એક લેખમાળા એમના સોશિયલ મીડિયા ઉપર નિયમિત પ્રસિદ્ધ થાય છે. આ કોલમમાં એ મહાભારત અને ગીતા ઉપર આધારિત વહીવટ તેમજ મોટીવેશનને લગતી વાતો સરળ ભાષામાં સમજાવે છે.)

આજથી LPG સિલિન્ડરના ભાવમાં થયો રૂ. 29 નો વધારો

દેશમાં સતત વધી રહેલી મોંઘવારી વચ્ચે સામાન્ય જનતાની મુશ્કેલીઓમાં ફરી એકવાર મોટો વધારો થયો છે. આંતરરાષ્ટ્રીય સ્તરે ક્રૂડ ઓઇલ અને ઉર્જા બજારોમાં ચાલી રહેલી અસ્થિરતાની સીધી અસર હવે ભારતીય રસોડા સુધી પહોંચી ગઈ છે. દેશની સરકારી ઓઇલ સપ્લાય કંપનીઓએ ઘરેલું રાંધણ ગેસ (LPG) ની કિંમતોમાં મોટો વધારો ઝીંકી દીધો છે. સામાન્ય પરિવારો દ્વારા વપરાશમાં લેવાતા 14.2 કિલોગ્રામના ઘરેલું એલપીજી સિલિન્ડરના ભાવમાં પ્રતિ સિલિન્ડર 29 રૂપિયાનો વધારો જાહેર કરાયો છે. આ નવી કિંમતો આજથી એટલે કે 7 જૂનથી સવારથી જ સમગ્ર દેશમાં પ્રભાવી (લાગુ) થઈ ચૂકી છે.

દેશના ચાર મુખ્ય મહાનગરોમાં હવે શું છે નવો ભાવ?

આ તાજા ભાવવધારા બાદ દેશના અલગ-અલગ શહેરોમાં રાંધણ ગેસના ભાવ આ મુજબ વધી ગયા છે:

દિલ્હી: દેશની રાજધાની દિલ્હીમાં અત્યાર સુધી રસોઈ ગેસ સિલિન્ડરની કિંમત રૂ. 913 હતી, જે હવે 29 રૂપિયા વધીને રૂ. 942 પર પહોંચી ગઈ છે.

કોલકાતા: પશ્ચિમ બંગાળની રાજધાની કોલકાતામાં અગાઉ સિલિન્ડર રૂ. 939 માં મળતો હતો, જેના માટે હવે ગ્રાહકોએ રૂ. 968 ચૂકવવા પડશે.

મુંબઈ: દેશની આર્થિક રાજધાની મુંબઈમાં પહેલા એલપીજી સિલિન્ડરનો ભાવ રૂ. 912.50 હતો, જે આજથી વધીને રૂ. 941.50 થઈ ગયો છે.

ચેન્નઈ: દક્ષિણ ભારતના આ મુખ્ય શહેરમાં અત્યાર સુધી લોકોને રૂ. 928.50 માં સિલિન્ડર મળતો હતો, પરંતુ હવે નવી કિંમત લાગુ થતાં તેના માટે રૂ. 957.50 આપવા પડશે.

આ ઉદ્યોગ જગત સાથે જોડાયેલા સત્તાવાર સૂત્રો અને નિષ્ણાતોના જણાવ્યા અનુસાર, સરકારી ઓઇલ માર્કેટિંગ કંપનીઓ (OMCs) સબસિડીવાળા ઘરેલું એલપીજી સિલિન્ડરના વેચાણ પર લાંબા સમયથી ભારે નાણાકીય નુકસાન (Financial Loss) વેઠી રહી હતી. પરિણામે, કંપનીઓની આર્થિક સ્થિતિ જાળવી રાખવા માટે કિંમતો વધારવી અનિવાર્ય બની ગઈ હતી.

એક ચોંકાવનારો આંકડો સામે આવ્યો છે કે, આ નવીનતમ વધારા પહેલાં સુધી સરકારી તેલ કંપનીઓને દેશમાં વેચાતા દરેક સિંગલ ઘરેલું એલપીજી સિલિન્ડર પર આશરે રૂ. 703 નું મસમોટું આર્થિક નુકસાન થઈ રહ્યું હતું. આ ખોટને સરભર કરવા માટે જ જનતા પર આ બોજ નાખવામાં આવ્યો છે. છેલ્લા કેટલાક મહિનાઓથી આંતરરાષ્ટ્રીય સ્તરે ભૌગોલિક-રાજકીય તણાવ (Geopolitical Tensions) ચરમસીમાએ છે. પશ્ચિમ એશિયા (મિડલ ઈસ્ટ) માં ચાલી રહેલા સંઘર્ષો અને યુદ્ધ જેવી સ્થિતિને કારણે વૈશ્વિક ઉર્જા પુરવઠો (Global Energy Supply) સખત રીતે પ્રભાવિત થયો છે. આ વૈશ્વિક કટોકટીના કારણે આંતરરાષ્ટ્રીય બજારમાં કાચા તેલ (Crude Oil) અને ઇંધણની કિંમતો સતત ઉચ્ચ સ્તરે ટકેલી છે.

અત્રે ઉલ્લેખનીય છે કે, આ પહેલા ચાલુ વર્ષે 7 માર્ચે પણ એલપીજી સિલિન્ડરના ભાવમાં પ્રતિ સિલિન્ડર રૂ. 60 નો મોટો વધારો ઝીંકવામાં આવ્યો હતો. ઓઇલ કંપનીઓનું કહેવું છે કે, આજથી અમલી બનેલા રૂ. 29 ના વધારા પછી પણ તેલ કંપનીઓ હજુ પણ ગ્રાહકોને તેમની વાસ્તવિક પડતર કિંમત (લાગત) કરતાં ઓછી કિંમતે જ ગેસ વેચી રહી છે. પરંતુ આ આકરા નિર્ણયથી સામાન્ય અને મધ્યમ વર્ગના પરિવારોના ઘરના બજેટના સમીકરણો સંપૂર્ણપણે ખોરવાઈ ગયા છે.

પંચાંગ 07/06/2026

નેશનલ એવોર્ડ વિનર અને કોમેડી કિંગ સલીમ કુમારનું 56 વર્ષની ઉંમરે નિધન

દક્ષિણ ભારતીય સિનેમા અને ખાસ કરીને મલયાલમ ફિલ્મ ઇન્ડસ્ટ્રીમાંથી એક અત્યંત દુઃખદ સમાચાર સામે આવ્યા છે. પોતાની અદભુત કોમેડી ટાઈમિંગ અને ગંભીર અભિનયના જોરે કરોડો દર્શકોના દિલ જીતનાર પીઢ અભિનેતા સલીમ કુમારનું શનિવારે નિધન થયું છે. તેઓ માત્ર 56 વર્ષના હતા. સલીમ કુમારના અકાળ અવસાનથી સમગ્ર સાઉથ ફિલ્મ ઇન્ડસ્ટ્રી અને તેમના ચાહકોમાં શોકની કાલીમા છવાઈ ગઈ છે.

મળતી માહિતી મુજબ, અભિનેતા છેલ્લા કેટલાક સમયથી સ્વાસ્થ્ય સંબંધી ગંભીર સમસ્યાઓનો સામનો કરી રહ્યા હતા. શનિવારે અચાનક તેમની તબિયત વધુ લથડતા તેમને તાત્કાલિક કોચ્ચિની એક પ્રાઈવેટ હોસ્પિટલમાં આઈસીયુ (ICU) માં દાખલ કરવામાં આવ્યા હતા, જ્યાં તેમને વેટિલેટર સપોર્ટ પર રાખવામાં આવ્યા હોવા છતાં ડોક્ટરો તેમનો જીવ બચાવી શક્યા ન હતા. પિતાના વારસાને આગળ ધપાવતા તેમનો પુત્ર ચંદુ સલીમ કુમાર પણ હાલ મલયાલમ ફિલ્મ ઇન્ડસ્ટ્રીમાં એક સક્રિય અભિનેતા તરીકે કામ કરી રહ્યો છે.

અંડર-18 હોકી એશિયા કપમાં ભારત બન્યું ચેમ્પિયન

ભારતીય હોકીના સુવર્ણ યુગ તરફ આગળ વધી રહેલા દેશના યુવા ખેલાડીઓએ આંતરરાષ્ટ્રીય મંચ પર ફરી એકવાર ભારતનું નામ રોશન કર્યું છે. જાપાનમાં રમાયેલા અંડર-18 હોકી એશિયા કપ ટૂર્નામેન્ટની ફાઇનલ મેચમાં ભારતીય ટીમે યજમાન જાપાન સામે એકતરફી અને પ્રચંડ વિજય મેળવીને એશિયા કપના પ્રખ્યાત ખિતાબ પર કબજો મેળવી લીધો છે. જાપાનના કાકામીગાહારા (Kakamigahara) સ્ટેડિયમ ખાતે રમાયેલી આ મહા-ફાઇનલમાં ભારતે જાપાનને હોકીના મેદાન પર સ્તબ્ધ કરી દીધું હતું અને આખી મેચમાં પોતાની પકડ મજબૂત રાખીને ફાઇનલ મેચ 4-1 થી જીતી લીધી હતી. આ મેગા જીત બાદ ભારતીય ખેમામાં ભારે ઉત્સાહનો માહોલ છે અને ખેલાડીઓ પર ઇનામોનો વરસાદ થઈ રહ્યો છે.

આશિષ તાનીની સુપર હેટ્રિક અને ભારતનું આક્રમણ

જાપાન સામેની આ હાઈ-વોલ્ટેજ ફાઇનલ મેચમાં ભારતીય ટીમે શરૂઆતની પ્રથમ મિનિટથી જ યજમાન ટીમ પર માનસિક અને ટેકનિકલ દબાણ બનાવી રાખ્યું હતું. રમતની શરૂઆત થતાં જ ભારતીય ફોરવર્ડ લાઇન આક્રમક મૂડમાં જોવા મળી હતી. પહેલા ક્વાર્ટરની બીજી જ મિનિટે ભારતના સ્ટાર ખેલાડી આશિષ તાનીએ ફિલ્ડ ગોલ દાગીને ભારતને 1-0 ની પ્રારંભિક લીડ અપાવી દીધી હતી. આ પ્રારંભિક ગોલ બાદ આશિષ તાની અટક્યો ન હતો. તેણે જાપાનના ડિફેન્સને વેરવિખેર કરતા મેચની 28મી મિનિટે અને ત્યારબાદ 34મી મિનિટે વધુ બે શાનદાર ગોલ દાગ્યા હતા. આ સાથે જ આશિષે ફાઇનલ મેચમાં પોતાની અદભુત હેટ્રિક પૂરી કરીને જાપાનની ટીમને બેકફૂટ પર ધકેલી દીધી હતી. આશિષ ઉપરાંત ભારતીય ટીમના કેપ્ટન કેતન કુશવાહાએ પણ શાનદાર રમત બતાવી હતી. કેપ્ટન કેતને મેચની 30મી મિનિટે શાનદાર ગોલ કરીને સ્કોરબોર્ડ પર ભારતની સ્થિતિ અત્યંત મજબૂત કરી દીધી હતી. સામે પક્ષે જાપાનની ટીમ ભારતના અભેદ્ય ડિફેન્સ સામે માત્ર 1 જ ગોલ કરવામાં સફળ રહી હતી, જેના કારણે આખી મેચમાં ભારતનો દબદબો સ્પષ્ટપણે જોવા મળ્યો હતો.

ચેમ્પિયન ખેલાડીઓ અને સપોર્ટ સ્ટાફ પર પૈસાનો વરસાદ

ભારતીય જુનિયર ટીમે વિદેશી ધરતી પર ઇતિહાસ રચીને ગોલ્ડ મેડલ જીત્યા બાદ, દેશમાં હોકીની સર્વોચ્ચ સંસ્થા હોકી ઇન્ડિયા (Hockey India) એ વિજેતા ટીમના ખેલાડીઓ માટે તિજોરી ખોલી દીધી છે. હોકી ઇન્ડિયાએ સત્તાવાર જાહેરાત કરી છે. એશિયા કપ જીતનારી ભારતીય અંડર-18 હોકી ટીમના પ્રત્યેક ખેલાડીને 3-3 લાખ રૂપિયાનું રોકડ ઇનામ આપવામાં આવશે. ટીમની આ ઐતિહાસિક સફરમાં પડદા પાછળ રહીને મહેનત કરનારા સપોર્ટ સ્ટાફના દરેક સભ્યને પણ પ્રોત્સાહન સ્વરૂપે 1.5 લાખ રૂપિયાનું રોકડ પુરસ્કાર એનાયત કરવામાં આવશે.

પીએમ નરેન્દ્ર મોદીએ પાઠવ્યા હાર્દિક અભિનંદન

ભારતીય ટીમની આ શાનદાર અને ગૌરવપૂર્ણ જીત બાદ દેશના વડાપ્રધાન નરેન્દ્ર મોદીએ પણ સોશિયલ મીડિયા પ્લેટફોર્મ પર યુવા ખેલાડીઓની પીઠ થાબડી હતી. પીએમ મોદીએ પોતાના અભિનંદન સંદેશામાં લખ્યું કે, “આપણા યુવા હોકી ખેલાડીઓની અસાધારણ અને શાનદાર ઉપલબ્ધિ! 2026 ના અંડર-18 એશિયા કપમાં વિજય મેળવવા બદલ ભારતીય અંડર-18 હોકી ટીમને મારા તરફથી હાર્દિક અભિનંદન. આખી ટૂર્નામેન્ટ દરમિયાન ભારતીય ટીમે અદ્ભુત કૌશલ્ય અને અદભુત ટીમ વર્કનું પ્રદર્શન કર્યું છે, જેનું પરિણામ ફાઇનલમાં મળેલી આ યાદગાર જીત તરીકે આપણી સામે આવ્યું છે. આ જીત એ વાતની સાબિતી છે કે દેશના યુવાનોમાં હોકીની લોકપ્રિયતા સતત વધી રહી છે. ભવિષ્યના તમામ પ્રયાસો અને મેચો માટે આખી ટીમને મારી ખૂબ ખૂબ શુભેચ્છાઓ.”

વૈશ્વિક સંકટ વચ્ચે વિકાસને વેગ આપવા PM મોદીએ આપ્યો મંત્ર

નવી દિલ્હીઃ વડા પ્રધાન નરેન્દ્ર મોદીએ શનિવારે વડા પ્રધાન આર્થિક સલાહકાર પરિષદ (PM-EAC)ના સભ્યો સાથે એક મહત્વપૂર્ણ બેઠક યોજી હતી. આ બેઠક દરમિયાન વૈશ્વિક અસ્થિરતા અને પડકારો વચ્ચે ભારતના આર્થિક વિકાસને વધુ ગતિ આપવા માટે વિવિધ વિચારો અને ઉપાયો પર વિચારવિમર્શ કરવામાં આવ્યો હતો.

આ બેઠકમાં ‘ઇઝ ઓફ લિવિંગ’ અને ‘ઇઝ ઓફ ડુઇંગ બિઝનેસ’ને વધુ સુધારવા માટે જરૂરી સુધારાઓ અંગે પણ વિચારવિમર્શ કરવામાં આવ્યો હતો. આ ઉપરાંત સભ્યોએ પશ્ચિમ એશિયાના સંકટની ભારત તેમ જ વૈશ્વિક અર્થતંત્ર પર થતી અસરનું પણ મૂલ્યાંકન કર્યું હતું. આ બેઠક એવા સમયે યોજવામાં આવી છે જ્યારે વિશ્વનાં અર્થતંત્રો ભૂ-રાજકીય તણાવ, વેપાર ક્ષેત્રની અનિશ્ચિતતાઓ અને અસમાન વિકાસદર જેવા પડકારોનો સામનો કરી રહી છે.

આર્થિક મજબૂતી માટે નાગરિકોને અપીલ

ગયા મહિને પશ્ચિમ એશિયાના સંકટની પૃષ્ઠભૂમિમાં વડા પ્રધાન મોદીએ દેશની આર્થિક મજબૂતી જાળવવા અને આયાતી ઇંધણ પરની નિર્ભરતા ઘટાડવા માટે નાગરિકોને સાત મહત્વપૂર્ણ અપીલો કરી હતી. તેમણે પર્યાવરણમિત્ર વિકલ્પોને અપનાવવા પર ભાર મૂક્યો હતો.

વર્ક ફ્રોમ હોમને પ્રાથમિકતા આપવાનો આગ્રહ

વડા પ્રધાને નાગરિકોને શક્ય હોય ત્યાં સુધી ‘વર્ક ફ્રોમ હોમ’ અપનાવવા, ઇંધણનો વપરાશ ઘટાડવા, એક વર્ષ સુધી વિદેશ પ્રવાસ ટાળવા, સ્વદેશી ઉત્પાદનોનો ઉપયોગ વધારવા, રસોઈના તેલનો ઓછો ઉપયોગ કરવા, કુદરતી ખેતી અપનાવવા અને સોનાની ખરીદીથી દૂર રહેવાની અપીલ કરી હતી.

ઇંધણના ભાવમાં થતા ઉતાર-ચઢાવનો સામનો કરવા માટે તેમણે પરિવહનના વિકલ્પોમાં ફેરફાર કરવાની પણ સલાહ આપી હતી. તેમણે લોકોને શક્ય હોય ત્યાં સુધી મેટ્રો અને જાહેર પરિવહનનો ઉપયોગ કરવા, ખાનગી વાહન જરૂરી હોય ત્યારે કારપૂલિંગ અપનાવવા, માલ પરિવહન માટે રેલવેને પ્રાથમિકતા આપવા અને ઇલેક્ટ્રિક વાહનોનો વધુ ઉપયોગ કરવા અનુરોધ કર્યો હતો.


ભારતીય અર્થતંત્રે પકડી ગતિ

આ દરમિયાન પાંચ જૂને જાહેર થયેલા સત્તાવાર આંકડાઓ અનુસાર નાણાકીય વર્ષ 2025-26ની ચોથા ત્રિમાસિક (Q4)માં ભારતના અર્થતંત્રએ બજારની અપેક્ષાઓ કરતાં વધુ સારું પ્રદર્શન કર્યું છે. આ સમયગાળા દરમિયાન વાસ્તવિક કુલ ઘરેલુ ઉત્પાદન (GDP) વૃદ્ધિ દર 7.8 ટકા રહેવાનો અંદાજ છે, જ્યારે સમગ્ર નાણાકીય વર્ષ માટે આર્થિક વિકાસ દર 7.7 ટકા નોંધાયો છે.

સિંધુ જળ સંધિ સ્થગિત થતાં કરાચી સહિત પાકિસ્તાનનાં શહેરોમાં જળસંકટ

નવી દિલ્હીઃ ઉનાળામાં પાકિસ્તાનનાં અનેક શહેરોની સ્થિતિ ખરાબ છે. દેશની આર્થિક રાજધાની કરાચી ગંભીર જળસંકટમાંથી પસાર થઈ રહી છે. આ સંકટ માટે પાકિસ્તાનની જળ વ્યવસ્થાપન પ્રણાલીને મોટા ભાગે જવાબદાર માનવામાં આવે છે, પરંતુ લોકોનું કહેવું છે કે આ સમસ્યાને વધુ ગંભીર બનાવવામાં સિંધુ જળ સંધિની સ્થિતિએ પણ મહત્વની ભૂમિકા ભજવી છે.ઉલ્લેખનીય છે કે 22 એપ્રિલ 2025એ પહેલગામની બૈસરન ઘાટીમાં થયેલા આતંકી હુમલા બાદ ભારત સરકારે સિંધુ જળ સંધિને સ્થગિત કરી હતી અને પોતાના વિસ્તારમાંથી પાણી છોડવાનું બંધ કર્યું હતું. હવે તેની અસર પાકિસ્તાનમાં જળસંકટના રૂપમાં અનુભવાઈ રહી હોવાનું કહેવામાં આવી રહ્યું છે. કરાચીમાં પાણીની અછતને લઈને રાજકારણ પણ ગરમાયું છે. પાણીનું યોગ્ય અને પૂરતું સંચાલન ન કરવા બદલ વિરોધ પક્ષો વડા પ્રધાન શહબાઝ શરીફની સરકારને ઘેરી રહ્યા છે.

જળસંકટનો સામનો કરવામાં પીપીપી સરકાર નિષ્ફળ?

અહેવાલો અનુસાર જમાત-એ-ઇસ્લામીના (JI) પ્રમુખ હાફિઝ નઈમ ઉર રહમાને પાકિસ્તાન પીપલ્સ પાર્ટી (PPP) પર તીખો પ્રહાર કર્યો છે. તેમણે વધતા જળસંકટ અને તેના કથિત ગેરવહીવટ માટે પીપીપીને જવાબદાર ઠેરવી છે. તેમનું કહેવું છે કે પીપીપી વર્ષોથી કરાચીની સત્તામાં છે, છતાં આજ સુધી શહેરની પાણીની સમસ્યાનો ઉકેલ લાવી શકી નથી. હાલ જળસંકટ વિકરાળ સ્વરૂપ ધારણ કરી ચૂક્યું છે. ખાસ કરીને ઈદ-ઉલ-અઝહા (બકરી ઈદ) દરમિયાન કરાચીમાં પાણીની સમસ્યા વધુ ગંભીર બની હતી.

સરકાર પર મૂળભૂત સુવિધાઓ ન આપી શકવાનો આરોપ

હાફિઝ નઈમે જણાવ્યું હતું કે પાણી જેવી મૂળભૂત જરૂરિયાતોની અછત અને નાગરિક સુવિધાઓની કમી વચ્ચે લોકો પોતાની ધાર્મિક પરંપરાઓનું પાલન કરતા રહ્યા. તેમણે કહ્યું હતું કે ઈદની રજાઓ દરમિયાન લોકો પોતાની મૂળભૂત જરૂરિયાતો પૂરી કરવા માટે ભારે મુશ્કેલીઓનો સામનો કરતા જોવા મળ્યા. JI પ્રમુખે આરોપ લગાવ્યો કે પીપીપીની આગેવાની હેઠળની સિંધ સરકાર લોકોને જરૂરી મૂળભૂત સુવિધાઓ પૂરી પાડવામાં નિષ્ફળ રહી છે.

સિંધુ નદી પર ટેલિમેટ્રી સિસ્ટમ અને નાણાકીય સંકટ

પાકિસ્તાનના જળ સંસાધન મંત્રાલયે ચાલુ અને પ્રસ્તાવિત વિકાસ યોજનાઓ માટે અંદાજે 969 અબજ પાકિસ્તાની રૂપિયાની જરૂરિયાત દર્શાવી છે. આગામી વિકાસ બજેટમાં 41 ચાલુ પ્રોજેક્ટોનો સમાવેશ થાય છે, જેમાં એક નવી યોજના પણ ઉમેરવામાં આવી છે. જોકે સરકારે માત્ર 179 અબજ રૂપિયા ફાળવવાનો પ્રસ્તાવ મૂક્યો છે, જેને કારણે સમગ્ર યોજના અમલમાં મૂકવામાં મુશ્કેલીઓ ઊભી થઈ શકે છે.

આસારામના સાધકોનાં ગેરકાયદે મકાનો પર બુલડોઝર કાર્યવાહી

અમદાવાદઃ આસારામના આશ્રમ નજીક બુલડોઝર કાર્યવાહી ચાલી રહી છે. 45,000 ચોરસ મીટરથી વધુ જમીન ખાલી કરાવવામાં આવી રહી છે. આ જમીનની કિંમત 500 કરોડ રૂપિયાથી વધુ હોવાનું કહેવાય છે. આસારામના મોટેરા આશ્રમ ટ્રસ્ટ દ્વારા ગુજરાત હાઈકોર્ટમાં અરજી દાખલ કરવામાં આવી હતી, પરંતુ તે નામંજૂર થયા બાદ અમદાવાદ વિકાસ પ્રાધિકરણ (AUDA) દ્વારા આ કાર્યવાહી હાથ ધરવામાં આવી છે. સ્થળ પર ભારે પોલીસ બંદોબસ્ત ગોઠવવામાં આવ્યો છે. આ કાર્યવાહી દરમિયાન આશ્રમમાં રહેતા લોકોએ વિરોધ પણ કર્યો હતો. ઘણા લોકોને આશ્રમ છોડવો પડ્યો હોવાથી લોકોમાં રોષ જોવા મળ્યો હતો. હાલ પોલીસ પરિસ્થિતિને કાબૂમાં રાખવાનો પ્રયાસ કરી રહી છે.

આજે 37 મકાનો તોડવામાં આવશે

ઝોન-2ના ડીસીપી ભરત રાઠોડે જણાવ્યું હતું કે આજે ચાંદખેડા વિસ્તારમાં મોટેરા ગામ હેઠળ આવતાં 37 મકાનો તોડવાની કાર્યવાહી હાથ ધરવામાં આવી છે. તેના માટે ચાર ટીમો તહેનાત કરવામાં આવી છે અને દરેક ટીમ સાથે પોલીસ દળ જોડવામાં આવ્યું છે.

દરેક ટીમમાં એક પોલીસ ઇન્સ્પેક્ટર (PI), બે પોલીસ સબ-ઇન્સ્પેક્ટર (PSI) અને 25 પોલીસ જવાનો સામેલ છે. એ ઉપરાંત રિઝર્વમાં પણ એક PI, બે PSI અને 25 અધિકારીઓ તહેનાત રાખવામાં આવ્યા છે. સમગ્ર કાર્યવાહીનું સંચાલન એસપી ડિવિઝન દ્વારા કરવામાં આવી રહ્યું છે. નગરપાલિકાએ તમામ કાયદાકીય પ્રક્રિયાઓ પૂર્ણ કરી છે, જરૂરી મંજૂરીઓ મેળવી છે અને રહેવાસીઓ સાથે બેઠક પણ યોજી હતી.

હાઈકોર્ટે આપ્યો હતો આદેશ

ગુજરાત હાઈકોર્ટની બે ન્યાયાધીશોની ખંડપીઠે 16 એપ્રિલ, 2026એ આસારામ આશ્રમની અપીલ ફગાવી દીધી હતી. આ નિર્ણય બાદ અમદાવાદના મોટેરા વિસ્તારમાં આવેલી 45,000 ચોરસ મીટરથી વધુ જમીન રાજ્ય સરકારને પરત મેળવવાનો માર્ગ મોકળો થયો હતો. આશ્રમે અમદાવાદ જિલ્લા કલેક્ટરના જમીન પરત લેવાના આદેશ સામે કાનૂની લડત શરૂ કરી હતી. આ જમીન અમદાવાદમાં આવેલા નરેન્દ્ર મોદી સ્ટેડિયમ અને સરદાર પટેલ સ્પોર્ટ્સ કોમ્પ્લેક્સની બાજુમાં આવેલી છે. એવી માન્યતા છે કે આ જમીન 2030ના કોમનવેલ્થ ગેમ્સ અથવા ભવિષ્યના ઓલિમ્પિક આયોજન માટે ઉપયોગી બની શકે છે.

1...161718...5,070Page 17 of 5,070