Home Blog Page 1773

આ યુવતી બની છે ઝીરો-વેસ્ટ જીવનની પ્રેરણા

જાણ્યે-અજાણ્યે, આપણે આપણા રોજિંદા જીવનમાં એક કે બીજી રીતે એવાં કોઈ કાર્ય કરીએ છે જેનાથી પર્યાવરણને નુકસાન થાય છે. પરંતુ તમે ક્યારેય વિચાર્યું છે કે આપણે કેવી રીતે પર્યાવરણને બચાવી શકીએ? આપણે મોટાભાગે તો આપણાથી શું થાય એમ વિચારીને બેસી જઇએ છીએ, કેટલાંક લોકો એવા હોય છે જે બેસી રહેવાના બદલે બદલાવની શરૂઆત કરે છે અને બીજાને પણ બદલાવની પ્રેરણા આપે છે.

આજે એવી જ એક વ્યક્તિની વાત, જેના કામની નોંધ ખુદ વડાપ્રધાને પણ લીધી છે. આ છે પંક્તિ પાંડે. અમદાવાદમાં રહે છે અને ઝીરોવેસ્ટઅડ્ડાના ફાઉન્ડર છે. એલ.ડી. એન્જિનિયરિંગ કોલેજમાંથી ઈલેક્ટ્રોનિક્સ એન્ડ કમ્યુનિકેશનમાં એન્જિનિયરિંગ કર્યા પછી 2008માં ઈસરોમાં જોડાયા. ગગનયાન સહિત અનેક મહત્ત્વના પ્રોજેક્ટમાં કામ કર્યું.

પરંતુ તેમની સૌથી મોટી ઓળખ બની છે ઝીરો વેસ્ટ મેનેજમેન્ટ માટે લોકોને પ્રેરિત કરવાની. પંક્તિ ટકાઉ જીવન વિશે ખૂબ જ જાગૃત છે. પોતાના ક્લીનર્સ જાતે બનાવે છે, કચરામાંથી જાતે ખાતર તૈયાર કરે છે, જ્યારે પણ ખરીદી કરવા જાય છે ત્યારે પ્લાસ્ટિકની થેલીના બદલે કપડાની થેલીમાં જ વસ્તુઓ ખરીદવાનો આગ્રહ રાખે છે. ટકાઉ જીવન અને પર્યાવરણના બચાવ માટે એના સતત પ્રયાસોના કારણે વડાપ્રધાન નરેન્દ્ર મોદીએ પણ તેમને નેશનલ ક્રિએટર્સ એવોર્ડ (National Creators Award)  હેઠળ ‘ફેવરિટ ગ્રીન ચેમ્પિયન એવોર્ડ’ થી સન્માનિત કર્યા.

પંક્તિ પાંડે સાથે ચિત્રલેખા.કોમએ જ્યારે વાત કરી ત્યારે તેમણે કહ્યું કે ઉપલબ્ધ સંસાધનનું સમ્માન કરવું એ તેઓ તેમના પરિવાર પાસેથી શીખ્યા છે. પરંતુ આ મુદ્દે તેઓ ગંભીર ત્યારે થયા, જ્યારે તેમણે પ્રેગનેન્સી માટે બે વર્ષનો બ્રેક લીધો હતો. આ દરમિયાન તેઓ વેસ્ટ મેનેજમેન્ટ વિશે એક રિપોર્ટ વાંચી રહ્યા હતા ત્યારે તેમને લાગ્યું કે આપણે ઈન્ડસ્ટ્રિયલ પ્રદૂષણ વિશે તો ખૂબ જ વાતો કરીએ છીએ. પરંતુ દરેક ઘરમાંથી જે વેસ્ટ નીકળે છે તેના મેનેજમેન્ટ વિશે તો કોઈ વાત કરતાં જ નથી.

એ પછી ઝીરો વેસ્ટની શરૂઆત પોતાના ઘરમાંથી જ થાય તે પ્રમાણે એમણે પોતાની દિનચર્યા શરૂ કરી. શરૂઆતમાં ઘણા પડકારો પણ આવ્યા. પરંતુ ધીમે-ધીમે તેમણે બધાં જ વેસ્ટનું મેનેજમેન્ટ યોગ્ય રીતે કર્યું. આમ વેસ્ટ મેનેજમેન્ટની એમની સફર તો શરૂ થઈ ગઈ હતી.

પરંતુ આ તો વાત હતી ફક્ત ઘર પૂરતી. ટર્નિંગ પોઈન્ટ ત્યારે આવ્યો જ્યારે એ અમદાવાદના પીરાણા વિસ્તારમાંથી દીકરી સાથે પસાર થઈ રહ્યા હતા. પસાર થતી વખતે જ્યારે દીકરીએ પ્રશ્ન પૂછ્યો કે આ શું છે અને અહીં આટલી દુર્ગંધ કેમ છે? ત્યારે પંક્તિએ જવાબ આપ્યો કે આ ડમ્પિંગ સાઈટ છે સમગ્ર શહેરનો કચરો અહીં આવે છે. દીકરીનો સામે પ્રશ્ન એ હતો કે આપણે તો કચરો કરતાં નથી તો શું બીજા લોકો પણ આપણી જેમ કચરાનો યોગ્ય નિકાલ કરતાં નથી?

બસ, દીકરીના આ પ્રશ્ન પછી પંક્તિને લાગ્યું કે ઝીરો વેસ્ટ મેનેજમેન્ટ લોકો સુધી પહોંચાડવું જોઈએ. એવામાં કોવિડના સમયે તેમને સોશિયલ મીડિયા પ્લેટફોર્મના પાવર વિશે સમજાયું. આથી તેમણે પણ પોતાના પ્રયત્નોના નાના-નાના વીડિયો બનાવીને અપલોડ કરવાનું શરૂ કર્યું. જેમાં તેમને ઘણો સારો પ્રતિસાદ મળ્યો. આજે ઈન્સ્ટાગ્રામ પર પંક્તિના 342K કરતાં પણ વધારે ફોલોઅર્સ છે અને તેમની વીડિયોની લોકો પર ઊંડી અસર પણ થઈ રહી છે. પંક્તિનો મુખ્ય ઉદ્દેશ્ય લોકોને પર્યાવરણ પ્રત્યે શિક્ષિત કરવાનો છે.

પંક્તિનું માનવું છે કે છેલ્લાં 20 વર્ષમાં કમ્યુનિકેશનથી લઈને ટેક્નોલોજીના ક્ષેત્રમાં ઘણાં બધાં પરિવર્તનો થયા છે, પરંતુ વેસ્ટ મેનેજમેન્ટના ક્ષેત્રમાં કોઈ ફેરફાર થયા નથી. જેનું પરિણામ છે કે આજે દરેક શહેરોમાં કચરાના ઢગલે-ઢગલા થઈ રહ્યા છે. તેના નિકાલ માટે જોઈએ એવી ઝડપી ટેક્નોલોજીનો ઉપયોગ થઈ રહ્યો નથી.

બીજું કે દરેક વ્યક્તિ આજે પોતાના બાળકના જન્મ પહેલાંથી જ તેની ફાયનાન્સિયલ સેફ્ટી કે મેડિકલ સેફ્ટી વિશે વિચારવા લાગે છે. પરંતુ કોઈપણ વ્યક્તિ પર્યાવરણીય સુરક્ષા વિશે વિચારતું જ નથી. આજે આ કચરાના ઢગલાં ગ્રીનહાઉસ ગેસ ઉત્પન્ન કરીને પર્યાવરણને નુક્સાન કરનારા ટૉપ-3 કારણોમાંથી એક છે, જેના કારણે ગ્લોબલ વોર્મિગની સમસ્યા સર્જાઇ છે.

પંક્તિ કહે છે, “લોકો એવું માને છે કે સમય મળતો નથી. કમ્પોઝ કરવા માટે તેમની પાસે જગ્યાનો અભાવ છે. મારા મતે આ બધાં બહાના છે. જો 8થી 9 કલાકની નોકરી કર્યા પછી પણ લોકોને સોશિયલ મીડિયા માટે સમય મળતો હોય તો તેઓ પર્યાવરણ માટે પણ સમય આપી જ શકે છે.

એમના મતે અમદાવાદ કરતાં બેંગ્લુરૂ, મુંબઈ કે દિલ્હી જેવાં મેટ્રો શહેરોમાં લોકોમાં પર્યાવરણને લઈને જાગૃતિ વધારે છે. મુંબઈમાં જ્યાં લોકો પાસે ખૂબ જ નાના ઘરો હોવા છતાં તેઓ નાની જગ્યામાં પણ ક્મ્પોઝ કરતાં હોય છે.પંક્તિ કહે છે કે સોશિયલ મીડિયા પર ફોલોઅર્સના પ્રેમ અને વડાપ્રધાનના હસ્તે સન્માન મળ્યા બાદ તેમની જવાબદારી વધુ વધી ગઈ છે. હવે તેઓ વધારે સભાન થઈને લોકોને એજ્યુકેટ કરવા માટે વધુ એજ્યુકેશનલ કન્ટેન્ટ ક્રિએટ કરતા થયા છે. હાલમાં તેઓ શાળાઓમાં જઈને આ મુદ્દે બાળકોને એજ્યુકેટ કરી રહ્યા છે. કેટલીક NGO સાથે મળીને પણ પર્યાવરણની સુરક્ષા મુદ્દે કામ કરી રહ્યા છે.

પંક્તિ સ્પષ્ટપણે માને છે કે આ કામમાં જેટલા વધારે લોકો જોડાશે અને પોતાનું યોગદાન આપશે એટલું જ આપણે ઝીરો-વેસ્ટની દિશામાં વધારે ઝડપથી આગળ વધી શકીશું.

(રાધિકા રાઓલ – અમદાવાદ)

World Bicycle Day: સાયકલ ફ્રેન્ડલી સિટી બનાવવાના હેતુસર થાણેમાં સાયક્લોથોનનું આયોજન

મુંબઈ: આજે વિશ્વ સાયકલ દિવસ છે. આ દિવસ ઉજવવા પાછળનો હેતુ સમગ્ર વિશ્વમાં સાયકલનું મહત્વ જણાવવાનું છે. તેમજ સાયકલ ચલાવવાથી સ્વાસ્થ્ય અને પર્યાવરણને થતા ફાયદાઓ વિશે જાગૃતિ લાવવાનો છે. વિશ્વ સાયકલ દિવસ નિમિત્તે થાણેમાં સાયક્લોથોનનું આયોજન કરવામાં આવ્યું હતું.

એમઆરઆર ચિલ્ડ્રન્સ હોસ્પિટલ દ્વારા વ્હીલ્સ એન્ડ બેરલ્સ સાયકલિંગ ક્લબ થાણે અને BYCS થાણેના સહયોગથી સાયક્લોથોન યોજવામાં આવી હતી. આ આયોજન ગત રોજ એટલે કે 2 જૂનના રોજ કરવામાં આવ્યું હતું. જેમાં 2 કેટેગરી હતી, એક તો7 થી 14 વર્ષની ઉંમરના બાળકો માટે 2 Kms રાઈડ અને પુખ્ત 14 અને તેથી વધુની વયના લોકો માટે 10 કિમી રાઈડ.

આ સાયકલોથોનમાં 550થી વધુ સાયકલ સવારોએ ભાગ લીધો હતો. સાયકલોથોનમાં દરેક માટે પ્રવેશ નિ:શુલ્ક હતો. સાઇકલ સવાર માટે ટીશર્ટ, મેડલ, નાસ્તો, એમ્બ્યુલન્સ વોટર સ્ટેશન સહિતની સુવિધાઓની વ્યવસ્થા કરવામાં આવી હતી.

વ્હીલ્સ અને બેરલની મુખ્ય ટીમમાં સરબપ્રીત નારુ, શાલિની રાઠોડ, સિદ્ધાર્થ શાહ અને ચિરાગ શાહના સંયુક્ત સહયોગથી આ સાયક્લોથોન યોજાઈ હતી. સાયક્લોથોનનો સમય સવારે 6 થી 9 વાગ્યા સુધીનો હતો.

આ સાથે જ ઝુમ્બા સેશન પણ યોજાયું હતું. જે નીલમ પાટીલે હોસ્ટ કર્યું હતું. આ સાયક્લોથોનનું મિશન થાણેને સાયકલ ફ્રેન્ડલી સિટી અને ગ્રીન થાણે બનાવવાના હેતુ સાથે કરવામાં આવ્યું હતું.

થાણેના સાયકલ મેયર ચિરાગ શાહે જણાવ્યું હતું કે સાયકલ મેયર તરીકે ટીમ વ્હીલ્સ અને બેરલ્સ અને એમઆરઆર હોસ્પિટલ સાથે આ ઇવેન્ટનું આયોજન કરવું એ મારા માટે ગર્વની ક્ષણ છે. હું થાણેને સાયકલ ફ્રેન્ડલી શહેર જોવાનું સપનું જોઉં છું અને થાણેને પ્રદૂષણ મુક્ત શહેર બનાવવા માંગુ છું.

 

જ્યારે વ્હીલ્સ અને બેરલની ટીમના શાલિની રાઠેડે જણાવ્યું કે થાણેના સૌથી મોટા ગ્રૂપ વ્હીલ્સ અને બેરલ્સની લેડી એડમિન તરીકે મારું સપનું છે કે વધુને વધુ મહિલા રાઇડર્સ સાઇકલિંગ સમુદાયમાં જોડાય. હું થાણે શહેરના સાઇકલિંગ સમુદાયના ભલા માટે સેવા આપવાનું ચાલુ રાખીશ.

ગુજરાતમાં કડક સુરક્ષા વચ્ચે આવતીકાલે મતગણતરી

લોકસભા સામાન્ય ચૂંટણી-2024 તથા ગુજરાત વિધાનસભાની પેટાચૂંટણીઓ સંદર્ભે રાજ્યમાં 26 મતગણતરી કેન્દ્રો પર મંગળવારે સવારે 8 વાગ્યે મતગણતરી શરૂ કરવામાં આવશે. રાજ્યના 26 મતગણતરી કેન્દ્રો ખાતે તમામ આવશ્યક તૈયારીઓ પૂર્ણ કરી દેવામાં આવી છે. સમગ્ર કાઉન્ટિંગ પ્રોસેસ માટે 56 કાઉન્ટિંગ ઓબ્ઝર્વર્સ, 30 ચૂંટણી અધિકારી અને 175 મદદનીશ ચૂંટણી અધિકારી ફરજ બજાવશે. આ ઉપરાંત 615 વધારાના મદદનીશ ચૂંટણી અધિકારીઓને Postal Ballot અને ETPBS માટે જવાબદારી સોંપવામાં આવી છે. તમામ Observers પોતાની ફરજના સ્થળ પર હાજર થઈ ગયા છે.મતગણતરી સ્ટાફનું First અને Second Randomization પૂર્ણ કરી દેવામાં આવ્યું છે, જ્યારે Third Randomization મંગળવારે વહેલી સવારે 5 વાગ્યે Observersની હાજરીમાં કરવામાં આવશે.

મતગણતરી મથકો પર માત્ર ભારતના ચૂંટણી પંચ દ્વારા માન્યતા પ્રાપ્ત અધિકારીઓ, નિરિક્ષકો, ફરજ પરના કર્મચારીઓ-અધિકારીઓ, ઉમેદવારો, તેમના ચૂંટણી એજન્ટો તથા કાઉન્ટિંગ એજન્ટ્સ પ્રવેશ કરી શકશે. આવતીકાલે સવારે RO કે ARO, ઉમેદવાર કે તેમના અધિકૃત પ્રતિનિધિઓ તથા ECI દ્વારા નિમણૂંક પામેલા Observers ની હાજરીમાં Strong Room ખોલવામાં આવશે. ત્યારબાદ EVM તથા પોસ્ટલ બેલેટ બહાર કાઢી કાઉન્ટીંગ હૉલમાં લાવી મતોની ગણતરી શરુ કરાશે. તમામ કાઉન્ટિંગ સેન્ટર પર ત્રિસ્તરીય સુરક્ષા વ્યવસ્થા સુનિશ્ચિત કરવામાં આવી છે. મતગણતરી કેન્દ્રના કેમ્પસની બહાર સ્થાનિક પોલીસ, મતગણતરી લોકેશન પર SRPF અને મતગણતરી કેન્દ્રના દરવાજા તથા સ્ટ્રોંગરૂમની બહાર CAPF નો ચુસ્ત બંદોબસ્ત ગોઠવવામાં આવ્યો છે. ફરજ પરના અધિકારીઓ, ઉમેદવાર, ઉમેદવારના ચૂંટણી એજન્ટ અને કાઉન્ટિંગ એજન્ટ સિવાય અન્ય વ્યક્તિઓને આ સંકુલમાં પ્રવેશવા દેવામાં આવશે નહીં.


કમિશનના Observers સિવાય મતગણતરી કેન્દ્રમાં Mobile, Tablet કે Laptop જેવા ઈલેક્ટ્રોનિક ઉપકરણો લઈ જઈ શકાશે નહીં. મતગણતરી પ્રક્રિયા માટે આવશ્યકતા મુજબ RO, ARO અથવા Counting Supervisors પૂર્વપરવાનગી સાથે મતગણતરી કેન્દ્રમાં મોબાઈલ લઈ જઈ શકશે. દરેક મતગણતરી કેન્દ્રમાં ઉભા કરવામાં આવેલા મિડિયા સેન્ટર અને પબ્લિક કમ્યુનિકેશન રૂમ સિવાય મતગણતરી કેન્દ્રના સંકુલમાં ક્યાંય પણ મોબાઈલ ફોનનો ઉપયોગ કરી શકાશે નહીં. મતગણતરીના દિવસે https://results.eci.gov.in/ તથા Voter Helpline App પર ચૂંટણીના પરિણામો જાણી શકાશે. રાજ્યકક્ષાએ મીડિયાકર્મીઓને પરિણામની વિગતો મળી રહે તે માટે નવા સચિવાલયના બ્લોક નં.1 ના ચોથા માળે સમિતિ ખંડમાં મીડિયા સેન્ટર ઉભું કરવામાં આવ્યું છે.

ગુજરાતમાં ૨૬ મતગણતરી કેન્દ્રોના સુરક્ષા પ્રબંધ માટે ગૃહ મંત્રાલય તરફથી ફાળવાયેલા પેરામિલિટરી ફોર્સની ૯ કંપનીઓનો બંદોબસ્ત તમામ સેન્ટર ખાતે લાગી ચૂક્યો છે. BSF તથા CISFના જવાનો પ્રત્યેક કાઉન્ટિંગ સેન્ટરના હોલમાં તથા ઈવીએમ-વીવીપેટના સ્ટ્રોંગ રૂમ બહાર ચોકી પહેરો કરશે. હોલની બહાર એસઆરપીની સુરક્ષાસાંકળ લાગશે. જેને માટે એસઆરપીની ૧૨ કંપનીઓ ફાળવાઈ છે, જ્યારે મતગણતરી કેન્દ્રના કેમ્પસની બાઉન્ડ્રીની અંદર અને બહાર ૧૨ હજાર સ્થાનિક પોલીસ જવાનો તથા ૩ હજાર હોમગાર્ડ્ઝ તૈનાત થશે. આમ, રાજ્યના પ્રત્યેક કેન્દ્ર ખાતે ત્રિસ્તરીય સલામતી વ્યવસ્થા ગોઠવાઈ હોવાનું જણાવાઈ રહ્યું છે.

 

મતગણતરી પહેલા ભાજપની હાઈ લેવલ બેઠક

લોકસભા ચૂંટણી પરિણામ 2024 લોકસભા ચૂંટણીના પરિણામો પહેલા બીજેપી ચીફ જેપી નડ્ડાના ઘરે એક ઉચ્ચ સ્તરીય બેઠક યોજાઈ હતી. ચૂંટણી પરિણામોને લઈને પાર્ટી નેતાઓની બેઠકમાં મહત્વની રણનીતિ બનાવવામાં આવી છે.

મતોની ગણતરી પર આધારિત વ્યૂહરચના

ભાજપના મહાસચિવ વિનોદ તાવડેએ કહ્યું કે બેઠકમાં નિર્ણય લેવામાં આવ્યો છે કે આવતીકાલે જ્યારે મતગણતરી થશે ત્યારે તમામ બૂથ પર કાઉન્ટિંગ એજન્ટો ચોક્કસપણે આવશે. જો મત ગણતરી અંગે કોઈ શંકા હોય તો પક્ષના અધિકારીઓએ ખાસ ધ્યાન આપવું જોઈએ.

મતગણતરી માટે પાર્ટીની તૈયારીઓ અંગે પણ ચર્ચા કરવામાં આવી હતી

તાવડેએ કહ્યું કે આગામી મત ગણતરી માટે પાર્ટીની તૈયારીઓ અંગે પણ ચર્ચા કરવામાં આવી હતી. ઉજવણી અંગે હજુ કંઈ નક્કી કરવામાં આવ્યું નથી. તેમણે કહ્યું કે જ્યારે વાસ્તવિક પરિણામો આવવાનું શરૂ થશે ત્યારે અમે આ વિશે વિચારીશું.

અમૂલ પછી મધર ડેરીએ પણ દૂધના ભાવ વધાર્યા

આજે સવારે જ અમૂલને દૂધના દરમાં વધારો અને ટોલ પ્લાઝા ટેક્સમાં વધારો કરવાનો આંચકો લાગ્યો હતો, હવે મધર ડેરીએ પણ દૂધના ભાવમાં વધારો કર્યો છે. મધર ડેરીએ દૂધના ભાવમાં પ્રતિ લીટર 2 રૂપિયાનો વધારો કર્યો છે. આ પહેલા અમૂલે પણ તેના દૂધના ભાવમાં પ્રતિ લિટર 2 રૂપિયાનો વધારો કર્યો છે. દૂધના આ નવા દરો આજથી એટલે કે 3 જૂનથી અમલમાં આવી ગયા છે.

મધર ડેરીએ પણ દર વધાર્યા

જ્યારે અમૂલે તેના દૂધના ભાવમાં વધારો કર્યો હતો ત્યારે એવી આશંકા હતી કે મધર ડેરી પણ ભાવ વધારાની જાહેરાત કરી શકે છે. અગાઉ ડિસેમ્બર 2022માં મધર ડેરીએ દૂધના ભાવમાં પ્રતિ લિટર 2 રૂપિયાનો વધારો કર્યો હતો. જોકે, ગયા વર્ષે કંપનીઓએ હાલ પૂરતો ભાવ વધારવાનો ઇનકાર કર્યો હતો. કંપનીએ સોમવારે આની જાહેરાત કરી હતી. કંપનીએ છેલ્લા 15 મહિનામાં ઇનપુટ ખર્ચમાં વધારો થવાને કારણે કિંમતોમાં વધારો કર્યો છે. મધર ડેરીએ તમામ પ્રકારના દૂધના ભાવમાં વધારો કર્યો છે. નવી કિંમતો આજથી એટલે કે સોમવાર, 3 જૂનથી લાગુ થઈ ગઈ છે. આ પહેલા રવિવારે અમૂલે દૂધના ભાવમાં વધારો કર્યો હતો. આ બંને મોટી ડેરી કંપનીઓએ જૂન મહિનામાં લોકસભાની ચૂંટણી પૂરી થયા બાદ દૂધના ભાવમાં વધારો કર્યો છે.

મોદી લહેરમાં BSE સેન્સેક્સ, નિફ્ટી50 ઓલટાઇમ ઊંચી સપાટીએ

અમદાવાદઃ લોકસભા ચૂંટણીના મોટા ભાગના એક્ઝિટ પોલમાં ફરી એક વાર મોદી સરકાર બનવાના સંકેતો બજાર માટે મોટો બુસ્ટર ડોઝ સાબિત થયો હતો. આજે 40 મહિનાથી સૌથી મોટી ઇન્ટ્રા-ડે તેજી જોવા મળી હતી. PSE અને PSU બેન્ક ઇન્ડેક્સ સૌથી વધુ વધ્યા હતા. જેથી સેન્સેક્સ અને નિફ્ટી નવા શિખરે પહોંચ્યા હતા. આજની તેજીમાં બધા 13 સેક્ટર્સમાં તેજી થઈ હતી. બેન્ક નિફ્ટી, BSE મિડકેપ અને સ્મોલકેપ ઇન્ડેક્સોએ નવી ઓલટાઇમ ઊંચી સપાટી સર કરી હતી. નિફ્ટી બેન્કે 51,000ની સપાટી વટાવી હતી. રોકાણકારોની સંપત્તિમાં રૂ. 12 લાખ કરોડ વધારો થયો હતો.  

ઘરેલુ બજારમાં ઇન્ટ્રા-ડેમાં સેન્સેક્સ 76,738 અને નિફ્ટી 23,338ના રેકોર્ડ સ્તરે પહોંચ્યા હતા. ઇન્ટ્રા-ડેની તેજી પછી સેન્સેક્સ 2507 પોઇન્ટની તેજીની સાથે 76,469ના સ્તરે અને નિફ્ટી 733 પોઇન્ટની તેજી સાથે 23,264ના સ્તરે બંધ થયો હતો. લોકસભા ચૂંટણીના બધા એક્ઝિટ પોલમાં PM મોદીની આગેવાની હેઠળ NDA સરકાર સતત ત્રીજી વાર પૂર્ણ બહુમતની સાથે સત્તામાં વાપસીનો અંદાજ દર્શાવવામાં આવ્યો છે. એમાં ભાજપને 305થી 315 સીટો મળવાનો અંદાજ વ્યક્ત કરવામાં આવ્યો છે. શેરબજારને એક્ઝિટ પોલનાં પરિણામો પસંદ આવ્યાં હતાં.

બજારના નિષ્ણાતોનું કહેવું છે કે ભાજપની જીતથી કેન્દ્રમાં રાજકીય સ્થિરતા અને આર્થિક નીતિઓને વેગ મળવાની ધારણાનો અંદાજ છે. વળી, છેલ્લાં 10 વર્ષોમાં વૈશ્વિક સ્તરે આવેલા તમામ ઉતારચઢાવ છતાં ભારતીય અર્થતંત્ર સ્થિર રહ્યું છે, જે મોદી સરકારની એક મોટી સફળતા છે, એમ બ્રોકરેજ કંપનીએ કહ્યું હતું.

બજારના નિષ્ણાતોનું કહેવું છે કે આજની તેજી પાછળ વર્ષ 2024 માટે GDP ગ્રોથનો સારો અંદાજ, નાણાકીય ખાધમાં ઘટાડો, દેશમાં સારા વરસાદનું અનુમાન અને GST કલેક્શન રૂ. 1.73 લાખ કરોડે પહોંચતાં બજારમાં આગઝરતી તેજી થઈ હતી. BSE પર લિસ્ટેડ બધા કંપનીના કુલ માર્કેટ કેપમાં આજે રૂ. 14 લાખ કરોડનો વધારો જોવા મળ્યો હતો.

 

 

 

 

 

 

 

 

 

વિરાટ કોહલીને અમેરિકા પહોંચતા જ મળ્યો મોટો એવોર્ડ

ભારતીય ટીમ T20 વર્લ્ડ કપ 2024માં ભાગ લેવા અમેરિકા પહોંચી છે, જેમાં ટૂર્નામેન્ટમાં પોતાનું અભિયાન શરૂ કરતા પહેલા ટીમે 1 જૂને બાંગ્લાદેશ સામે પ્રેક્ટિસ મેચ પણ રમી હતી જેમાં વિરાટ કોહલીએ ભાગ લીધો ન હતો. વાસ્તવમાં, કોહલી 31 મેના રોજ અમેરિકામાં ટીમ સાથે જોડાયો હતો, જેના કારણે તે આ વોર્મ-અપ મેચમાં નહોતો રમ્યો. યુએસ પહોંચ્યા પછી કોહલીને ICC દ્વારા ODI પ્લેયર ઓફ ધ યર 2023 નો એવોર્ડ આપવામાં આવ્યો હતો, જેમાં વિરાટને કેપ સાથે ટ્રોફી આપવામાં આવી હતી.

ICC દ્વારા શેર કરવામાં આવેલ વીડિયો
વર્ષ 2023માં વિરાટ કોહલીએ ODI ફોર્મેટમાં બેટિગમાં શાનદાર પ્રદર્શન કર્યું હતું, જેમાં તેણે 27 મેચ રમી હતી અને 72.47ની એવરેજથી 1377 રન બનાવ્યા હતા, જેમાં 6 સદી અને 8 અડધી સદી સામેલ હતી. આ સમયગાળા દરમિયાન કોહલીએ વનડેમાં તેની 50મી સદી ફટકારીને સચિન તેંડુલકરનો 49 સદીનો રેકોર્ડ તોડ્યો હતો. કોહલીએ તેની આંતરરાષ્ટ્રીય કારકિર્દીમાં ત્રીજી વખત ICC ODI પ્લેયર ઓફ ધ યરનો એવોર્ડ જીત્યો છે, જેની સાથે તેણે એબી ડી વિલિયર્સને પાછળ છોડી દીધો છે, જેણે આ પહેલા બે વખત આ એવોર્ડ જીત્યો હતો. કોહલીને ન્યૂયોર્કમાં ICC દ્વારા આ એવોર્ડ આપવામાં આવ્યો હતો, જેનો વીડિયો પણ તેણે શેર કર્યો છે.

 

View this post on Instagram

 

A post shared by ICC (@icc)

T20 વર્લ્ડમાં કોહલીના પ્રદર્શન પર તમામની નજર છે
બેટિંગમાં વિરાટ કોહલીનું હાલનું ફોર્મ ઘણું સારું છે, પરંતુ તે જાન્યુઆરી 2024 પછી આંતરરાષ્ટ્રીય ક્રિકેટમાં કોઈ મેચ રમશે નહીં. IPL 2024માં કોહલીનું બેટિંગ ઘણું સારું હતું જેમાં તેણે કુલ 741 રન બનાવ્યા હતા. કોહલી હાલમાં T20 વર્લ્ડ કપના ઈતિહાસમાં સૌથી વધુ રન બનાવનાર બેટ્સમેન છે, તેણે 27 મેચમાં 81.50ની એવરેજથી 1141 રન બનાવ્યા છે.

કેદાર જાધવે ક્રિકેટના તમામ ફોર્મેટમાંથી નિવૃત્તિની જાહેરાત કરી

પોતાની વિસ્ફોટક બેટિંગ માટે પ્રખ્યાત ટીમ ઈન્ડિયાના બેટ્સમેન કેદાર જાધવે સંન્યાસ લઈ લીધો છે. કેદાર જાધવે ક્રિકેટના તમામ ફોર્મેટમાંથી નિવૃત્તિની જાહેરાત કરી છે. રસપ્રદ વાત એ છે કે તેણે પૂર્વ કેપ્ટન એમએસ ધોનીની શૈલીમાં નિવૃત્તિની જાહેરાત કરી હતી. કેદાર જાધવે સોશિયલ મીડિયા પર તેની તસવીરો પોસ્ટ કરી અને કેપ્શનમાં લખ્યું – મારી કારકિર્દી દરમિયાન તમારા બધાના પ્રેમ અને સમર્થન માટે ખૂબ ખૂબ આભાર. બપોરે 3 વાગ્યાથી મને ક્રિકેટના તમામ ફોર્મેટમાંથી નિવૃત્ત ગણવામાં આવશે.

ધોનીની જેમ કેદારની નિવૃત્તિ

કેદાર જાધવનો આઇડોલ એમએસ ધોની હતો. તેની જેમ તેને પણ મેચ ફિનિશર માનવામાં આવતો હતો અને તેથી જ તેની જેમ તેણે પોતાની કારકિર્દીનો અંત જાહેર કર્યો હતો. ધોનીએ 15 ઓગસ્ટ 2022ના રોજ આંતરરાષ્ટ્રીય ક્રિકેટને અલવિદા કહ્યું. ધોનીએ પોતાનો વીડિયો પોસ્ટ કરતાં લખ્યું હતું કે, ‘તમારા પ્રેમ અને સમર્થન માટે ખૂબ ખૂબ આભાર. 19:29 થી મને નિવૃત્ત ગણવામાં આવવો જોઈએ.

કેદાર જાધવની કારકિર્દી

કેદાર જાધવે 2014માં શ્રીલંકા સામે તેની ODI ડેબ્યૂ કરી હતી અને 2015માં તેણે ઝિમ્બાબ્વે સામે તેની પ્રથમ T20 ઈન્ટરનેશનલ રમી હતી. જાધવે 73 ODI મેચોમાં 40 થી વધુની એવરેજથી 1389 રન બનાવ્યા છે. T20માં તે 6 ઇનિંગ્સમાં 122 રન બનાવી શક્યો હતો. કેદાર જાધવ મહારાષ્ટ્ર ક્રિકેટનું મોટું નામ માનવામાં આવે છે. તેણે આ ટીમ માટે 87 ફર્સ્ટ ક્લાસ મેચોમાં 17 સદીની મદદથી 6100 રન બનાવ્યા છે. જ્યારે લિસ્ટ Aમાં તેણે 10 સદીના આધારે 5520 રન બનાવ્યા છે. T20માં તેણે 163 મેચમાં 2592 રન બનાવ્યા છે. જેમાં 14 અડધી સદી સામેલ છે.

કેદાર જાધવની આઈપીએલ કારકિર્દી

કેદાર જાધવે પણ આઈપીએલમાં ઘણું ક્રિકેટ રમ્યું છે. તે સનરાઈઝર્સ હૈદરાબાદ, ચેન્નાઈ સુપર કિંગ્સ, આરસીબી, દિલ્હી ડેરડેવિલ્સ, કોચી ટસ્કર્સ કેરળ માટે રમ્યો છે. કેદારે IPLમાં 95 મેચમાં 22.37ની એવરેજથી 1208 રન બનાવ્યા છે.

રવીના ટંડન મારપીટ મામલો: મુંબઈ પોલીસે કહ્યું અભિનેત્રી નશામાં….

મુંબઈ: રવિવારે રવીના ટંડનનું નામ એક વિવાદને કારણે ચર્ચામાં આવ્યું હતું. અભિનેત્રી પર તેના ડ્રાઈવર સાથે એક વૃદ્ધ મહિલા અને તેના પરિવાર પર મારપીટ કરવાનો આરોપ હતો, જેના પછી કેટલાક ગુસ્સે થયેલા લોકોએ તેમને ઘેરી લીધા હતા.

કહેવામાં આવી રહ્યું છે કે આ ઘટના બાંદ્રાના રિઝવી લો કોલેજ પાસે બની હતી. પીડિતા મોહમ્મદે આરોપ લગાવ્યો હતો કે રવીના ટંડને નશાની હાલતમાં તેની માતા પર હુમલો કર્યો હતો. તેણે તેમની કાર પણ તેમના પર ચડાવી દીધી હતી. જ્યારે તેણે વિરોધ કર્યો તો તેને માર મારવામાં આવ્યો. બાદમાં પીડિતાના પરિવારે ખાર પોલીસ સ્ટેશનમાં તેની (રવીના ટંડન) વિરુદ્ધ FIR નોંધાવી હતી. હવે આ અંગે મુંબઈ પોલીસનું નિવેદન સામે આવ્યું છે.

મુંબઈ પોલીસે પુષ્ટિ કરી છે કે કેટલાક લોકોએ રવીના ટંડન અને તેના ડ્રાઈવર વિરુદ્ધ મારપીટનો કેસ દાખલ કર્યો હતો. CCTV જોયા પછી સત્ય સામે આવ્યું છે. મુંબઈ પોલીસે કહ્યું હતું કે આ ઘટનામાં કોઈને ઈજા થઈ નથી અને ન તો રવીના ટંડન નશામાં હતી.

મુંબઈ પોલીસે જણાવ્યું હતું કે,”અમે સોસાયટીના સમગ્ર સીસીટીવી ફૂટેજ તપાસ્યા છે અને જાણવા મળ્યું છે કે અભિનેત્રી (રવીના ટંડન)નો ડ્રાઈવર રોડ પરથી કારને સોસાયટીમાં રિવર્સ કરી પાર્ક કરી રહ્યો હતો જ્યારે પરિવાર એ જ લેન ક્રોસ કરી રહ્યો હતો. પરિવારને લાગ્યું કે ગાડી તેઓની સાથે અથડાશે.આ કારણે બંને પક્ષ વચ્ચે ઝઘડો થયો.”

પોલીસ અધિકારીએ વધુમાં કહ્યું કે,ઝઘડો મોટી દલીલમાં બદલાયો અને મોટુ સ્વરૂપ લીધું એટલે રવીના આ મામલાની તપાસ કરવા વચ્ચે પડી. જ્યારે તેણે ડ્રાઈવરને ટોળાથી બચાવવાનો પ્રયાસ કર્યો તો ટોળાએ તેની સાથે દુર્વ્યવહાર શરૂ કર્યો. ઘટના બાદ તરત જ રવીના અને તેના પરિવારજનો ખાર પોલીસ સ્ટેશન ગયા અને લેખિત ફરિયાદ કરી. જોકે,અભિનેત્રીએ બાદમાં એફઆઈઆર નોંધાવી ન હતી. અધિકારીએ કહ્યું કે રવીના નશામાં ન હતી કે તેની કારે કોઈને ટક્કર મારી ન હતી. આ ઘટનામાં કોઈને પણ ઈજા થઈ નથી.

આ મામલે અભિનેત્રીથી રાજકારણી બનેલી કંગના રનૌત રવીના ટંડનના સપોર્ટમાં આવી છે. 37 વર્ષીય કંગનાએ ઈન્સ્ટાગ્રામ સ્ટોરી પર લખ્યું કે,’રવીના ટંડન જી સાથે જે પણ થયું તે ખૂબ જ ચિંતાજનક છે. જો તે જૂથમાં 5-6 વધુ લોકો હોત તો માર મારીને તેણીની હત્યા કરી નાખત. અમે આવી રોડ રેજની ઘટનાઓને વખોડીએ છીએ. એવા લોકોને ઠપકો આપવો જોઈએ. તેઓએ આવી હિંસા અને દુર્વ્યવહાર સહન ન કરવો જોઈએ.’

સિક્કિમમાં કોંગ્રેસને નોટાથી ત્રણ ગણા ઓછા મત મળ્યા

નવી દિલ્હીઃ સિક્કિમ વિધાનસભા ચૂંટણીનાં પરિણામ જારી રવિવારે જારી કરી દેવામાં આવ્યાં હતાં. લોકસભા ચૂંટણી 2024નાં પરિણામો પહેલાં સિક્કિમ વિધાનસભા ચૂંટણીમાં કોંગ્રેસ પાર્ટીને મોટો આંચકો લાગ્યો છે. પાર્ટીને નોટાથી પણ ઓછા મત મળ્યા છે. જોકે ભાજપને પણ હાર ખમવી પડી છે. રાજ્યની સંસદમાં ભાજપના 12 સભ્યો હતા.

સિક્કિમ વિધાનસભા ચૂંટણીમાં રાજ્યના cm પ્રેમ સિંહ તમાંગની પાર્ટીને મોટી જીત મળી છે. સત્તારૂઢ સિક્કિમ ક્રાંતિકારી મોરચા (SKM)એ 32માંથી 31 સીટો પર રેકોર્ડ જીત હાંસલ કરી છે. એક સીટ SDFને મળી છે. સિક્કિમની 32 વિધાનસભા સીટો પર લોકસભા સીટોના પહેલા તબક્કામાં 19 એપ્રિલે મતદાન થયું હતું. મોટા ભાગના ભાજપના ઉમેદવારોની જમાનત જપ્ત થઈ હતી.સિક્કિમમાં કોંગ્રેસને નોટાથી પણ ઓછા મતો મળ્યા છે. સિક્કિમમાં નોટાને 0.99 ટકા મતો મળ્યા છે, જ્યારે કોંગ્રેસને 0.32 ટકા મતો મળ્યા છે અને ભાજપને રાજ્યમાં 5.18 ટકા મતો મળ્યા છા. આ સાથે SKMને 58.38 ટકા, SDFને 27.37 ટકા અને અન્યોને 7.7 ટકા મતો મળ્યા છે. સિક્કિમના CM હાલમાં પ્રેમ સિંહ તમાંગ છે. તેઓ 2019માં રાજ્યના છઠ્ઠા મુખ્ય મંત્રી ચૂંટાઈ આવ્યા હતા. તેઓ પશ્ચિમ સિક્કિમથી આવે છે અને 1990માં તેઓ રાજકારણમાં સક્રિય થયા છે. 1993માં તેઓ સિક્કિમ ડેમોક્રેટિક ફ્રન્ટ (SDF) સામેલ થયા હતા અને 1994માં ચાકુંગ વિધાનસભા સીટથી ચૂંટણી લડીને વિધાનસભામાં પહોંચ્યા હતા. તેઓ 2009 સુધી કેબિનેટ મંત્રી બન્યા હતા.

 

 

 

 

 

 

 

 

1...1,7721,7731,774...5,079Page 1,773 of 5,079