Home Blog Page 192

દૂધીના ઈન્સ્ટન્ટ ક્રિસ્પી ઢોસા

દૂધીના ઈન્સ્ટન્ટ ઢોસા, ઘરે તૈયાર કરેલી ટામેટાંની ચટણી સાથે વધુ સ્વાદિષ્ટ લાગે છે!

સામગ્રીઃ દૂધી 500 ગ્રામ, ચોખાનો લોટ 1½ કપ, રવો ½ કપ, ચિલી ફ્લેક્સ 2 ટી.સ્પૂન, કાળા મરી પાઉડર 1 ટી.સ્પૂન, સ્વાદ મુજબ મીઠું, કાંદો 1, ખમણેલું આદુ 1 ટી.સ્પૂન, લીલા મરચાં 2, ધોઈને સમારેલી કોથમીર ½ કપ, તેલ અથવા ઘી ઢોસો શેકવા માટે

ચટણીઃ આદુના ટુકડા 2 ટે.સ્પૂન, લસણની કળી 10-12, ટામેટાં 2, સૂકા લાલ મરચાં 3-4, હીંગ 2-3 ચપટી, તેલ 1 ટી.સ્પૂન

રીતઃ દૂધીને છોલીને ધોઈને સમારી લો. દૂધીનો બીયાંવાળો વચ્ચેનો ભાગ કાઢી લેવો અને દૂધીના ટુકડા કરી લઈ, મિક્સીમાં 1 કપ પાણી સાથે તેની બારીક પેસ્ટ કરી લેવી.

એક મોટા વાસણમાં દૂધીની પેસ્ટ, ચોખાનો લોટ, રવો ચમચા વડે મિક્સ કરો. તેમાં 3 કપ જેટલું પાણી થોડું થોડું ઉમેરતાં જઈ પાતળું ખીરું બનાવી લો.

હવે તેમાં લીલા મરચાં તેમજ કાંદો ઝીણાં સમારીને ઉમેરો. ત્યારબાદ સ્વાદ મુજબ મીઠું, ચિલી ફ્લેક્સ, ખમણેલું આદુ, કાળા મરી પાઉડર, સમારેલી કોથમીર મેળવી દો.

ચટણી માટે એક પેનમાં એક ચમચી જેટલું તેલ ગરમ કરી તેમાં આદુ, લસણ સાંતળી લીધા બાદ ટામેટાંના ટુકડા ઉમેરીને સાંતળો. હવે સૂકા લાલ મરચાંના ટુકડા ઉમેરીને થોડું સાંતળી લીધા બાદ આ મિશ્રણ ઠંડું થાય એટલે સ્વાદ મુજબ મીઠું મેળવીને મિક્સીમાં ચટણી પીસી લો.

ઢોસા માટે નોન-સ્ટીક તવો ગરમ કરી એક કળછીમાં ખીરું લઈ તવા ઉપર ફરતે રેડી દો. ત્યારબાદ તેની ઉપર એક ચમચી જેટલું તેલ અથવા ઘી ઢોસાની ઉપર તેમજ ચારે બાજુ રેડીને ઢોસો ક્રિસ્પી થવા દો. ઉપરથી ઢોસો લાલ થવા લાગે એટલે તવેથા વડે ધીરે ધીરે ઉથલાવીને એક પ્લેટમાં કાઢી લો. આ ઢોસાનું ખીરું પાતળું હોવાને કારણે ઢોસો જલ્દી બની જાય છે.

ગરમાગરમ ઢોસા તૈયાર કરેલી ટામેટાંની ચટણી સાથે પીરસો.

પંચાંગ 11/03/2026

૧૧ માર્ચ ૨૦૨૬

LPG બાદ હવે હવાઈ મુસાફરી થઈ ગઈ મોંઘી

પશ્ચિમ એશિયામાં ચાલી રહેલા તણાવ અને યુદ્ધ જેવી પરિસ્થિતિઓનો પ્રભાવ હવે ભારતના સામાન્ય લોકોના જીવન પર સ્પષ્ટ રીતે જોવા મળી રહ્યો છે. રસોઈ ગેસના ભાવોમાં વધારો થયા પછી હવે હવાઈ મુસાફરી પણ મોંઘી બનવા લાગી છે. વધતા જેટ ઇંધણના ખર્ચને ધ્યાનમાં રાખીને Air Indiaએ પોતાના ફ્લાઇટ ટિકિટ પર ફ્યુઅલ સરચાર્જ વધારવાનો નિર્ણય કર્યો છે, જેના કારણે મુસાફરોને હવે વધુ ખર્ચ ચૂકવવો પડશે.

એરલાઇન કંપનીએ જણાવ્યું છે કે આ વધારાને તબક્કાવાર રીતે લાગુ કરવામાં આવશે. આ પગલું માત્ર આંતરરાષ્ટ્રીય ફ્લાઇટ્સ માટે જ નહીં પરંતુ દેશની અંદરની ઉડાનો માટે પણ લાગુ પડશે. વધતા ઇંધણ ખર્ચને કારણે એરલાઇન કંપનીઓ માટે ઓપરેશનલ ખર્ચ સંભાળવો મુશ્કેલ બનતો જઈ રહ્યો છે, જેના કારણે ટિકિટના ભાવે વધારો કરવો અનિવાર્ય બની ગયો છે.

એરલાઇન કંપનીના જણાવ્યા અનુસાર આ વધારો ફેઝ-1 અને ફેઝ-2ના માધ્યમથી અમલમાં મૂકવામાં આવી રહ્યો છે. નવા દરો મુજબ ભારતની ડોમેસ્ટિક ફ્લાઇટ્સ અને SAARC દેશોમાં જતી ઉડાનો માટે ટિકિટ લગભગ 399 રૂપિયા સુધી મોંઘી થઈ શકે છે. આ ઉપરાંત પશ્ચિમ એશિયા, દક્ષિણ-પૂર્વ એશિયા અને આફ્રિકા તરફ જતી આંતરરાષ્ટ્રીય ફ્લાઇટ્સમાં ફ્યુઅલ સરચાર્જમાં વધુ વધારો કરવામાં આવ્યો છે.

માહિતી મુજબ પશ્ચિમ એશિયા માટે ફ્લાઇટ્સ પર લગભગ 10 ડોલર સુધીનો વધારો કરવામાં આવ્યો છે, જ્યારે દક્ષિણ-પૂર્વ એશિયા માટે આશરે 20 ડોલર અને આફ્રિકા માટે 30 ડોલર સુધીનો વધારાનો સરચાર્જ લાગુ કરવામાં આવ્યો છે. કંપનીનું કહેવું છે કે આ નિર્ણય વધતી ઇંધણની કિંમતોને કારણે લેવો પડ્યો છે.

તાજેતરના સમયમાં એવિએશન ટર્બાઇન ફ્યુઅલ, જેને ATF તરીકે ઓળખવામાં આવે છે, તેની કિંમતોમાં ભારે ઉછાળો નોંધાયો છે. વૈશ્વિક સ્તરે કાચા તેલના પુરવઠામાં અવરોધ સર્જાતા જેટ ઇંધણની ઉપલબ્ધતા પર પણ અસર પડી રહી છે. આ કારણે એરલાઇન ઉદ્યોગ પર ખર્ચનો ભાર વધુ વધ્યો છે.

 

સરકારે ઇંધણ સંકટને પહોંચી વળવા માટે કડક પગલાં લીધાં, LPG ઉત્પાદનમાં 10%નો વધારો

પશ્ચિમ એશિયામાં વધતા ભૂરાજકીય તણાવનો પ્રભાવ હવે વિશ્વભરના ઊર્જા બજારો પર દેખાવા લાગ્યો છે અને તેની અસર ભારત સુધી પણ પહોંચવાની શક્યતા વ્યક્ત થઈ રહી છે. ઈરાન, ઇઝરાયેલ અને અમેરિકા વચ્ચે ચાલી રહેલા સંઘર્ષને કારણે હોર્મુઝ જળમાર્ગની આસપાસની પરિસ્થિતિ અત્યંત સંવેદનશીલ બની ગઈ છે. આ જળમાર્ગ વૈશ્વિક ઊર્જા સપ્લાય માટે અત્યંત મહત્વપૂર્ણ માનવામાં આવે છે અને ભારત તેની મોટી માત્રામાં LPG આયાત માટે આ માર્ગ પર નિર્ભર છે.

પરિસ્થિતિની ગંભીરતાને ધ્યાનમાં રાખીને ભારત સરકાર સતર્ક બની ગઈ છે અને સંભવિત ઇંધણ સંકટને ટાળવા માટે અનેક પગલાં લેવા શરૂ કર્યા છે. પેટ્રોલિયમ અને કુદરતી ગેસ મંત્રી હરદીપ સિંહ પુરીએ પ્રધાનમંત્રી નરેન્દ્ર મોદી સાથે મુલાકાત કરી અને દેશની ઊર્જા સુરક્ષા અંગે વિગતવાર ચર્ચા કરી. સરકારનું મુખ્ય ધ્યાન એ પર છે કે દેશની સામાન્ય જનતા અને વેપાર ક્ષેત્રને ગેસની અછતનો સામનો કરવો ન પડે.

તાજેતરના દિવસોમાં વ્યાવસાયિક ગેસ સિલિન્ડરોની અછત અંગે હોટેલ અને રેસ્ટોરન્ટ ઉદ્યોગમાં ચિંતા વ્યક્ત કરવામાં આવી હતી. ઘણા વેપારીઓને આશંકા હતી કે જો સપ્લાયમાં વિક્ષેપ આવશે તો તેમના વ્યવસાય પર ગંભીર અસર પડી શકે છે. જોકે હવે સરકારે આ મુદ્દે સ્પષ્ટતા કરી છે કે દેશમાં પેટ્રોલિયમ ઉત્પાદનોની કોઈ અછત નથી અને પુરવઠા વ્યવસ્થાને વધુ મજબૂત બનાવવામાં આવી રહી છે.

સરકાર દ્વારા વ્યાવસાયિક ગ્રાહકોની સમસ્યાઓને સમજવા અને ઝડપી ઉકેલ લાવવા માટે એક ત્રણ સભ્યોની વિશેષ સમિતિની રચના કરવામાં આવી છે. આ સમિતિમાં ઇન્ડિયન ઓઇલ કોર્પોરેશન, હિંદુસ્તાન પેટ્રોલિયમ અને ભારત પેટ્રોલિયમના એક્ઝિક્યુટિવ ડિરેક્ટરોનો સમાવેશ કરવામાં આવ્યો છે. આ સમિતિ રેસ્ટોરન્ટ અને હોટેલ એસોસિએશનો સાથે સીધી ચર્ચા કરીને તેમની વાસ્તવિક જરૂરિયાતો સમજશે અને સપ્લાયને અનુરૂપ રીતે પ્રાથમિકતા આપશે.

સરકારની નવી વ્યૂહરચનાનો મહત્વપૂર્ણ ભાગ ઘરેલુ ઉત્પાદન વધારવાનો પણ છે. સપ્લાય ચેઇનને વધુ અસરકારક બનાવવા અને આયાત પરનો દબાણ ઘટાડવા માટે દેશમાં LPG ઉત્પાદન વધારવામાં આવ્યું છે. છેલ્લા કેટલાક દિવસોમાં ઘરેલુ LPG ઉત્પાદન લગભગ 10 ટકા સુધી વધારવામાં આવ્યું હોવાનું જણાવવામાં આવ્યું છે. આ પગલાથી સ્થાનિક બજારમાં પુરવઠાની સ્થિતિ વધુ સ્થિર બનવાની આશા વ્યક્ત કરવામાં આવી રહી છે.

ઈન્ડિગોના CEO પીટર એલ્બર્સનું ક્રાઇસિસના 3 મહિના બાદ રાજીનામું

નવી દિલ્હી: ભારતની સૌથી મોટી એરલાઇન કંપની ઇન્ડિગોના ચીફ એક્ઝિક્યુટિવ ઓફિસર (CEO) પીટર એલ્બર્સે તાત્કાલિક અસરથી પદ પરથી રાજીનામું આપી દીધું છે. કંપનીએ 10 માર્ચના રોજ આ માહિતી આપી હતી. એલ્બર્સના ગયા પછી, હવે કંપનીના મેનેજિંગ ડિરેક્ટર રાહુલ ભાટિયા વચગાળાના ધોરણે એરલાઇનના કામકાજની જવાબદારી સંભાળશે.
બોર્ડ ઓફ ડિરેક્ટર્સે પીટર એલ્બર્સના યોગદાન બદલ તેમનો આભાર માન્યો છે અને ભવિષ્ય માટે શુભેચ્છાઓ પાઠવી છે. જ્યાં સુધી નવા કાયમી લીડરની નિમણૂક ન થાય ત્યાં સુધી રાહુલ ભાટિયા એરલાઇનનો તમામ વહીવટ સંભાળશે. કંપનીએ સંકેત આપ્યા છે કે નવા સીઈઓની જાહેરાત ટૂંક સમયમાં કરવામાં આવશે.

3 મહિના પહેલા ઇન્ડિગોને ભારે ફ્લાઇટ ઓપરેશન્સ સંકટનો સામનો કરવો પડ્યો હતો. તે દરમિયાન લગભગ 3 લાખ મુસાફરો ફસાયા હતા, જેના પછી એવિએશન રેગ્યુલેટર DGCAએ એરલાઇન પર ₹22.20 કરોડનો ભારે દંડ પણ ફટકાર્યો હતો.

ઈન્ડિગો હાલમાં 400થી વધુ એરક્રાફ્ટ સાથે દરરોજ 2200થી વધુ ફ્લાઈટ્સ ઓપરેટ કરે છે. વર્ષ 2025માં તેને ‘બેસ્ટ એરલાઇન ઇન ઇન્ડિયા એન્ડ સાઉથ એશિયા’નો એવોર્ડ પણ મળ્યો હતો. 95થી વધુ ઘરેલુ અને 40થી વધુ આંતરરાષ્ટ્રીય સ્થળોને જોડતી ઈન્ડિગો આજે વિશ્વની સૌથી ઝડપથી વિકસતી એરલાઇન્સમાંની એક છે.

સ્થાનિક સ્વરાજ્યની ચૂંટણી, કોંગ્રેસે ઉમેદવારો માટે QR કોડ જાહેર કર્યો

અમદાવાદ: આગામી સ્થાનિક સ્વરાજ્યની ચૂંટણીને લઈને કોંગ્રેસ પાર્ટી ઉમેદવારોની પસંદગી પ્રક્રિયાને લઈને એક્શન મોડમાં આવી ગઈ છે. આગામી 11 માર્ચથી તાલુકા, જિલ્લા અને મહાનગરમાં ઉમેદવારોની પસંદગી પ્રક્રિયા શરૂ કરશે. 11 માર્ચથી લઈને 20 માર્ચ સુધી ઉમેદવારી કરવા માંગતા લોકોને રૂબરૂ બોલાવીને સાંભળવામાં આવશે. એટલું જ નહીં કોંગ્રેસ દ્વારા QR કોડ મારફતે ઉમેદવારી કરવા માંગતા લોકોની અરજી મંગાવવામાં આવી છે. QR કોડ પણ ગુજરાત કોંગ્રેસ દ્વારા જાહેર કરવામાં આવ્યો છે.15 મહાનગરપાલિકાની બેઠકો માટે ઉમેદવારો QR કોડ સ્કેન કરીને પણ અરજી કરી શકશે. જે બાદ સ્થાનિક લેવલ પર ઉમેદવારોની સાંભળવાની પ્રક્રિયા શરૂ કરવામાં આવશે. એટલું જ નહીં આ વખતે સ્થાનિક લેવલ પર જ ઉમેદવારોની પસંદગી પ્રક્રિયા કરવામાં આવશે. પ્રદેશ કક્ષાએથી કોઈપણ દખલગીરી ન કરવાનો પણ નિર્ણય લેવામાં આવ્યો છે. તેમજ રાહુલ ગાંધી અને મલ્લિકાર્જુન ખડગેના આદેશ કોંગ્રેસ આગામી સ્થાનિક સ્વરાજ્યની ચૂંટણી માટે 50 ટકા યુવા ઉમેદવારોને મેદાને ઉતારવાની છે. જે લોકોની ઉંમર 50 કરતા ઓછી હશે તેવા ઉમેદવારોને 50 ટકા બેઠક પર ઉમેદવાર તરીકે પસંદ કરવામાં આવશે. કોંગ્રેસ દ્વારા આગામી ચૂંટણીમાં 50 ટકા બેઠકો પર મહિલાઓને ટિકિટ આપવામાં આવશે. તેમજ કોંગ્રેસનું શાસન આવશે તો મેયર કોણ હશે તેની પણ જાહેરાત ચૂંટણી પહેલા કરવાની કોંગ્રેસે તૈયારી દર્શાવી છે. ભાજપના ભ્રષ્ટાચાર સામે પ્રજાને પ્રાથમિક સુવિધાઓ આપવાના સ્લોગન સાથે કોંગ્રેસ સ્થાનિક સ્વરાજ્યની ચૂંટણી લડવાની તૈયારી કરી રહી છે.આખા ગુજરાતમાં સ્થાનિક સ્વરાજ્યની ચૂંટણી આવી રહી છે. SIRની પ્રક્રિયાને કારણે સ્થાનિક સ્વરાજ્યની ચૂંટણીમાં વિલંબ થયો હતો. 15 મહાનગરપાલિકાની 1044 બેઠક, 34 જિલ્લા પંચાયતમાં 1084 બેઠક, 262 તાલુકા પંચાયતમાં 5214 બેઠક, 83 નગરપાલિકાની 2596 બેઠક પર ચૂંટણી યોજાવાની છે. ત્યારે કોંગ્રેસ દ્વારા આગામી સમયમાં 10 હજાર જેટલી બેઠક પર ચૂંટણી યોજાવાની છે. જેના માટેની તમામ કક્ષાએ તૈયારીઓ પૂર્ણ કરી દેવામાં આવી છે. જિલ્લા અને તાલુકામાં જઈને લોકો સાથે સંવાદ અને કાર્યક્રમ કરવામાં આવ્યા હતા. લોકોનો મેનિફેસ્ટો બને તે માટે લોકોના ઘરે જઈને તેમના સૂચનાઓ લેવામાં આવ્યા હતા, જેથી આગામી સ્થાનિક સ્વરાજ્યની ચૂંટણીમાં જનતાના સૂચનોના આધારે મેનિફેસ્ટો તૈયાર કરવામાં આવશે.ઉમેદવારોની પસંદગી પ્રક્રિયાને લઈને પ્રદેશ કોંગ્રેસ પ્રમુખ અમિત ચાવડાએ જણાવ્યું હતું કે, તમામ જિલ્લા, તાલુકા અને શહેર કક્ષાએ સ્થાનિક સ્વરાજ્યની ચૂંટણી લડવા માંગતા ઉમેદવારોને રૂબરૂ સાંભળવામાં આવશે. તેમજ 11 માર્ચથી 20 માર્ચ સુધી તમામ જગ્યા પર સંભવિત ઉમેદવારોને રૂબરૂ બોલાવીને પેનલ તૈયાર કરવામાં આવશે. આખા ગુજરાતના તમામ મહાનગરો, તાલુકાઓ અને જિલ્લાઓમાં સંભાવિત ઉમેદવારોને રૂબરૂ મુલાકાત કરી એમને સાંભળવામાં આવશે અને પેનલ બનાવવાની કાર્યવાહી કરવામાં આવવાની છે.

રણદીપ હુડ્ડા અને લિન લેશરામના ઘરે પારણું બંધાયું

મુંબઈ: બોલિવૂડ એક્ટર રણદીપ હુડ્ડા પિતા બની ગયા છે. પત્ની લિન લેશરામે દીકરીને જન્મ આપ્યો છે. રણદીપ હુડ્ડાએ મંગળવારે સોશિયલ મીડિયા પર પોસ્ટ મૂકીને ચાહકોને ખુશ ખબર આપી છે.

 

View this post on Instagram

 

A post shared by Randeep Hooda (@randeephooda)

દાદાના જન્મદિવસે જ પૌત્રીનો જન્મ થયો

રણદીપના પિતા રણવીર હુડ્ડાનો પણ આજે જ જન્મદિવસ છે. રણદીપે પોતાના પિતા અને દીકરીનો ફોટો શેર કરતા હરિયાણવી ભાષામાં લખ્યું, ‘દાદા અર પોતી નૈ જનમદિન કી ઘણીએ બધાઈ.’

આ પછી રણદીપે લખ્યું, ‘પાપા આજે, જ્યારે હું પિતા બન્યો છું, ત્યારે તમારા માટે મારું સન્માન વધી ગયું છે. સૌથી મહત્વની વાત- લિનને ખૂબ જ અભિનંદન, મને પિતા બનાવવા માટે અને આપણી નાની બાળકીને આ દુનિયામાં લાવવા બદલ આભાર. એક નાની છોકરી અને આજીવન પ્રેમ.’
રણદીપ અને લિને નવેમ્બર 2025માં સોશિયલ મીડિયા દ્વારા પ્રેગ્નેન્સીની માહિતી આપી હતી. લગ્નની બીજી વર્ષગાંઠે જ એક્ટરે આ ખુશખબર શેર કરી હતી. પોસ્ટમાં તેમણે લખ્યું હતું કે, ‘પ્રેમ અને સાહસના બે વર્ષ અને હવે…એક નાનું મહેમાન આવવાનું છે. એક દિવસ પહેલાં જ મેટરનિટિ ફોટોશૂટના ફોટોગ્રાફ પણ શેર કર્યા હતા.

અદાણી યુનિવર્સિટી દ્વારા આંતરરાષ્ટ્રીય મહિલા દિનની ઉજવણી

અમદાવાદ: અદાણી યુનિવર્સિટી દ્વારા “ગિવ ટુ ગેઇન”ની વૈશ્વિક થીમ પર આંતરરાષ્ટ્રીય મહિલા દિવસ ૨૦૨૬ની ઉજવણી કરવામાં આવી. ૮ માર્ચે યોજાયેલા આ કાર્યક્રમમાં ૨૫૦થી વધુ વિદ્યાર્થીઓ અને કર્મચારીઓએ સંવાદ, ચિંતન અને સહિયારા શિક્ષણના મનનમાં ભાગ લીધો હતો.

વરિષ્ઠ સ્ત્રી રોગ વિજ્ઞાની ડૉ. નીતા ઠાકરેના નેતૃત્વમાં એક ઇન્ટરેક્ટિવ આરોગ્ય અને સુખાકારી સત્રથી ઉજવણીનો આરંભ થયો હતો. તેમણે આરોગ્ય સંભાળ, સ્વાસ્થ્યની ચિંતાઓ અંગે પ્રારંભિક જાગૃતિ અને મહિલાઓની સુખાકારીને આધાર આપતી રોજિંદી પ્રથાઓના મહત્વ પર પ્રકાશ પાડ્યો હતો. આરોગ્ય જાગૃતિ પરની ચર્ચામાં ઉપસ્થિત સહુએ ભાગ લીધો હતો.

અદાણી યુનિવર્સિટીના પ્રમુખ અને અદાણી ફાઉન્ડેશનના અધ્યક્ષ ડૉ. પ્રીતિ અદાણી સાથે આ ઉજવણી પ્રસંગે થયેલી પેનલ ચર્ચામાં વિવિધ વ્યાવસાયિક ક્ષેત્રના મહિલા અગ્રણીઓ જોડાયા હતા. જેમાં સિરિલ અમરચંદ મંગળદાસ, અમદાવાદના ભાગીદાર અને વડા પરિધિ અદાણી; સેક ઇસરો, અમદાવાદના રીસ્પોન્ડના ’એસજી’ અને મુખ્ય વડા સાયન્ટીસ્ટ-એન્જીનિયર ડૉ. આભા છાબરા, વાયજે ત્રિવેદી એન્ડ કંપનીના વરિષ્ઠ ભાગીદાર ગોપી ત્રિવેદી, માઇકાના ડીન અને પ્રિન્સિપાલ પ્રાધ્યાપક ગીતા હેગ્ડે અને નોર્થસ્ટાર ડાયગ્નોસ્ટિક્સ અને નોર્થસ્ટાર લોંગેવિટીના સ્થાપક.ડૉ. તુલસી મહાદેવિયાનો સમાવેશ થાય છે.

વ્યાવસાયિક યાત્રાઓમાંથી પ્રાપ્ત કરેલા નેતૃત્વ, દ્રઢતા અને માર્ગદર્શન પરના તેમના અનુભવોનું ભાથું આ પેનલિસ્ટોએ ઉપસ્થિતો સાથે શેર કર્યું ત્યારે તેમના અનુભવોમાં જ્ઞાન, માર્ગદર્શન અને તકની વહેંચણી અન્ય લોકો માટે વિકાસના પથને કેવી રીતે કંડારે છે, તેનું પ્રતિબિંબ “ગીવ ટુ ગેઇન” થીમના સારને પ્રદર્શિત કરતું હતું.

અદાણી યુનિવર્સિટીના પ્રવક્તાએ જણાવ્યું કે આપણા શૈક્ષણિક સમુદાયમાં મહિલાઓના નેતૃત્વ અને સિદ્ધિઓને ઓળખવા માટેનો આજે આંતરરાષ્ટ્રીય મહિલા દિવસ છે. પરામર્શ, માર્ગદર્શન અને સહિયારા શિક્ષણને પ્રોત્સાહન આપીને, મહિલાઓ એકબીજાને આધાર આપે તેમજ આત્મવિશ્વાસ અને હેતુ સાથે નેતૃત્વ કરતા રહે એવા વાતાવરણનું નિર્માણ કરવાની આશા રાખીએ છીએ

અદાણી યુનિવર્સિટી સમાવેશકતા, નેતૃત્વ વિકાસ અને સમાન તકોને પ્રોત્સાહન આપતી પહેલોને અવિરત આગળ વધારતી રહે છે. જ્યારે વ્યક્તિઓ એકબીજાના વિકાસમાં રોકાણ કરે છે, ત્યારે તેનો સામૂહિક પ્રભાવ સંસ્થાઓને મજબૂતી બક્ષીને વધુ સમાવેશી ભવિષ્ય નિર્માણમાં ફાળો આપે છે. મહિલા દિવસની ઉજવણીએ યુનિવર્સિટીના આ વિશ્વાસને ફરી પુષ્ટિ આપી છે.

ડેરિલ મિશેલ પર બોલ ફેંકવા બદલ ICCની અર્શદીપ સિંહ પર કાર્યવાહી

આઇસીસી પુરુષ ટી20 વર્લ્ડ કપ 2026ના ફાઇનલ મુકાબલા દરમિયાન ભારતીય ટીમના ઝડપી બોલર અર્શદીપ સિંહને મેદાન પર થયેલી એક ઘટનાને કારણે આંતરરાષ્ટ્રીય ક્રિકેટ પરિષદ (ICC) દ્વારા દંડનો સામનો કરવો પડ્યો છે. અમદાવાદમાં રમાયેલા ભારત અને ન્યૂઝીલેન્ડ વચ્ચેના મહત્વપૂર્ણ ફાઇનલ મેચ દરમિયાન અર્શદીપ સિંહના વર્તનને આચાર સંહિતાના ઉલ્લંઘન તરીકે ગણાવી તેમની મેચ ફીમાંથી 15 ટકા દંડ ફટકારવામાં આવ્યો છે. આ નિર્ણય ક્રિકેટ જગતમાં ચર્ચાનો વિષય બન્યો છે.

આ ઘટના ન્યૂઝીલેન્ડની ઇનિંગ્સ દરમિયાન બની હતી, જ્યારે મેચ ખૂબ જ મહત્વપૂર્ણ તબક્કે પહોંચી ગઈ હતી. ન્યૂઝીલેન્ડની બેટિંગ દરમિયાન 11મા ઓવરમાં અર્શદીપ સિંહ બોલિંગ કરી રહ્યા હતા. બોલ નાખ્યા બાદ તેઓ પોતાના ફોલો-થ્રૂમાં ફીલ્ડિંગ કરવા આગળ વધ્યા હતા અને ત્યારે જ તેમણે બોલ ઉઠાવીને બેટ્સમેન ડેરિલ મિચેલ તરફ આક્રમક રીતે ફેંકી દીધો હતો. બોલ સીધો મિચેલના પેડ પર વાગ્યો હતો, જેને અંપાયરો દ્વારા અનાવશ્યક અને ખોટી હરકત તરીકે જોવામાં આવી હતી.

આ ઘટનાને ધ્યાનમાં રાખીને મેદાન પર હાજર અંપાયરો દ્વારા આ મુદ્દે સત્તાવાર ફરિયાદ નોંધાવવામાં આવી હતી. મેદાની અંપાયર રિચર્ડ ઇલિંગવર્થ અને એલેક્સ વ્હાર્ફ ઉપરાંત ત્રીજા અંપાયર અલાહુદ્દીન પલેકર અને ચોથા અંપાયર એડ્રિયન હોલ્ડસ્ટોકએ મળીને આ મામલે કાર્યવાહી કરવાની ભલામણ કરી હતી. ત્યારબાદ આઇસીસી દ્વારા તપાસ હાથ ધરવામાં આવી અને અંતે અર્શદીપ સિંહને આચાર સંહિતાના લેવલ-1 ઉલ્લંઘન માટે જવાબદાર ઠેરવવામાં આવ્યા.

આઇસીસીના નિયમો અનુસાર આ પ્રકારની ઘટના ખેલાડીઓ માટે બનાવેલી આચાર સંહિતાના કલમ 2.9 હેઠળ આવે છે. આ નિયમ અનુસાર કોઈ પણ આંતરરાષ્ટ્રીય મેચ દરમિયાન ખેલાડી દ્વારા અન્ય ખેલાડી તરફ ખતરનાક અથવા ખોટી રીતે બોલ કે ક્રિકેટ સાથે સંબંધિત સાધન ફેંકવું આચાર સંહિતાનો ભંગ માનવામાં આવે છે. આ કારણે અર્શદીપ સિંહને તેમની મેચ ફીમાંથી 15 ટકા દંડ ફટકારવામાં આવ્યો છે.

આર્થિક દંડ સિવાય અર્શદીપ સિંહના શિસ્તભંગના રેકોર્ડમાં એક ડિમેરિટ પોઇન્ટ પણ ઉમેરવામાં આવ્યો છે. છેલ્લા 24 મહિનામાં અર્શદીપ સિંહ દ્વારા કરવામાં આવેલ આ પ્રથમ ઉલ્લંઘન હોવાનું જણાવવામાં આવ્યું છે. જેના કારણે તેમને સૌથી ઓછો દંડ આપવામાં આવ્યો છે. સામાન્ય રીતે લેવલ-1ના ઉલ્લંઘન માટે ખેલાડી પર મેચ ફીનો 50 ટકા સુધીનો દંડ લગાવવામાં આવી શકે છે અને એકથી બે ડિમેરિટ પોઇન્ટ આપવામાં આવે છે.

1...191192193...5,095Page 192 of 5,095