Home Blog Page 1981

વેજ પનીર જાલફ્રેજી

રંગોના તહેવાર હોળીની જેમ તમારી રસોઈમાં પણ રંગબેરંગી, ચટપટું, ટેન્ગી, સ્પાઈસી સ્વાદિષ્ટ શાક બનાવીને હોળીનો તહેવાર ઉજવી લો! આ યમ્મી ટેસ્ટી શાક બાળકોને તો બહુ જ ભાવશે!

સામગ્રીઃ

  • માખણ 2-2 ટે.સ્પૂન
  • ટામેટું 1
  • બેબી કોર્ન 3-4
  • લીલું સિમલા મરચું 1
  • લાલ સિમલા મરચું 1
  • પીળું સિમલા મરચું 1
  • ગાજર 1
  • ફણસી 50 ગ્રામ
  • વટાણા 100 ગ્રામ
  • પનીર 200 ગ્રામ
  • ફ્લાવર 200 ગ્રામ
  • આદુનો ટુકડો 1 ઈંચ
  • કાંદો 1

મસાલોઃ તેલ 2-3 ટે.સ્પૂન, જીરુ 1 ટી.સ્પૂન, સૂકા લાલ મરચાં 2, લીલા મરચાં 2, કાંદા 2, ટામેટાં 2, આદુનો ટુકડો 1 ઈંચ, લસણની કળી 15-20, હળદર પાઉડર ½ ટી.સ્પૂન, તીખું લાલ મરચાં પાઉડર 2 ટી.સ્પૂન, કાશ્મીરી મરચાં પાઉડર 1 ટી.સ્પૂન, કસૂરી મેથી 1 ટી.સ્પૂન,  ગરમ મસાલો ½ ટી.સ્પૂન, કાળાં મરી પાઉડર  ¼ ટી.સ્પૂન, ટામેટા સોસ 2 ટે.સ્પૂન

રીતઃ બેબી કોર્નના લાંબા 2 ઈંચ જેટલા ટુકડા કરી લો. ત્રણેય સિમલા મરચાં તેમજ ગાજર, ફણસીને 1.5 ઈંચ લંબાઈમાં પાતળા કટ કરી લો. ફ્લાવરને પણ છૂટું કરી લો. એક ટામેટું લાંબી પાતળી ચીરીમાં સમારી લો અને એક કાંદાને થોડી જાડી લાંબી સ્લાઈસમાં સમારી લો.

એક ફ્રાઈ પેનમાં 2 ટે.સ્પૂન માખણ ગરમ કરી, તેમાં ફ્લાવરના ટુકડા તેમજ ગાજરના ટુકડા 2-3 મિનિટ માટે સાંતળી લો. ત્યારબાદ તેમાં ફણસી, બેબી કોર્ન અને કાંદાની સ્લાઈસ 2 મિનિટ સાંતડીને ટામેટાં તથા ત્રણેય સિમલા મરચાંની સ્લાઈસ નાખીને 2 મિનિટ સાંતળો. ગેસની આંચ તેજ રાખવી. બધાં શાક થોડાં ક્રન્ચી થયા બાદ ગેસ બંધ કરીને ફ્રાઈ પેનમાંથી એક બીજા વાસણમાં કાઢી લો. પનીરના 1.5 ઈંચ લાંબી સ્લાઈસ કરી લો. ખાલી થયેલા ફ્રાઈ પેનમાં ફરીથી 2 ટે.સ્પૂન માખણ નાખી પનીરને બંને બાજુએથી થોડો ગુલાબી રંગ થાય તેટલું સાંતળો. પનીર સાંતળી લીધા બાદ તેને પણ એક વાસણમાં કાઢી લો.

આ જ પેનમાં તેલ 2-3 ટે.સ્પૂન ગરમ કરી તેમાં જીરુ તતડાવીને લાલ સૂકાં મરચાંના બે ટુકડા કરીને સાંતડો. હવે તેમાં ઝીણાં સમારેલાં કાંદા તેમજ વટાણા નાખો. કાંદા લાલ થાય ત્યાં સુધી સાંતડો તેમાં વટાણા પણ ચઢી જશે અને ક્રન્ચી પણ રહેશે. ખમણેલાં આદુ અને લસણ 1 મિનિટ માટે સાંતડીને સૂકા મસાલા તેમજ કસૂરી મેથી ઉમેરીને 2 ટે.સ્પૂન પાણી નાખી મસાલા સાંતડો. હવે તેમાં ઝીણાં સમારેલાં ટામેટાં નરમ થાય ત્યાં સુધી સાંતડો. મસાલો સૂકો થતો જણાય તો ફરીથી 2 ટે.સ્પૂન પાણી ઉમેરીને સાંતડો. મસાલો સાંતળી લીધા બાદ તેમાં સાંતડેલા શાક તેમજ પનીર નાખીને 2 મિનિટ બાદ ગેસ બંધ કરીને નીચે ઉતારી લો.

આ ગરમાગરમ સ્વાદિષ્ટ શાક પરોઠા, નાન, કે ભાત સાથે પણ સારું લાગશે!

દેશમાં હોળી-ધુળેટીએ રૂ. 50,000 કરોડના વેપાર

નવી દિલ્હીઃ દેશમાં હોળી-ધુળેટીની ધૂમ છે. હોળીના રંગોનું સૌથી મોટું બજાર છે. દેશમાં હોળીના રંગબિરંગી રંગ ખરીદવા લોકોની ભીડ છે. લોકોએ છેલ્લાં ત્રણ-ચાર વર્ષ કોરોના રોગચાળાને કારણે હોળીનો તહેવાર ઠીક રીતે ઊજવ્યો નથી, પણ આ વખતે હોળીના તહેવારને લઈને ખૂબ ક્રેઝ જોવા મળી રહ્યો છે.

આ વર્ષે હોળીના તહેવારને લઈને દિલ્હી સહિત દેશભરના વેપારીઓમાં એક નવો ઉમંગ અને ઉત્સાહ જોવા મળી રહ્યો છે. જે રીતે લોકો સામાન ખરીદી રહ્યા છે, એ જોતાં આ વખતે અંદાજ છે કે ગયા વર્ષની સરખામણીએ દેશભરના વેપારમાં 50 ટકાનો વધારો થશે. એકલા દિલ્હીમાં જ આશરે રૂ. 5000 કરોડના વેપારની સંભાવના છે.

દેશમાં હોળીના તહેવારે રૂ. 50,000 કરોડથી વધુના વેપાર થવાનો અંદાજ છે. જેનાથી ભારતીય અર્થતંત્રને નવું બળ મળશે. સામાન્ય રીતે હોળીમાં ગુજિયા, દહીંવડા, પકોડી, પકવાન જેવી ચીજવસ્તુઓ ખરીદે છે. આ ઉપરાંત મેદો સૂજી, ખાંડ, સૂકા મેવા, મસાલા વગેરેની પણ લોકો ખરીદે છે. હોળીના તહેવારે બાળકો માટે પિચકારી જરૂર ખરીદવામાં આવે છે. જોકે આ વખતે હોળીના માલસામાનને લઈને ચીનની ભાગીદારી નહીંવત્ છે. પાછલાં વર્ષોની જેમ ચીની માલસામાનનો જ માત્ર વેપારીઓએ જ નહીં પણ સામાન્ય લોકોએ બહિષ્કાર કર્યો છે. નાના વેપારીઓની સંસ્થા CAITનું કહેવું છે કે પહેલાં હોળીથી જોડાયેલા માલસામાનોની દેશમાં આયાત આશરે રૂ. 10,000 કરોડની થતી હતી, જે આ વખતે બિલકુલ નગણ્ય રહી છે.

 

 

 

 

 

ડુંગળીની નિકાસ પરનો પ્રતિબંધ અનિશ્ચિત કાળ સુધી લંબાવાયો

નવી દિલ્હીઃ કેન્દ્ર સરકારે સામાન્ય ચૂંટણી પહેલાં ડુંગળીની નિકાસ પર પ્રતિબંધને અનિશ્ચિત કાળ માટે વધારી દીધો છે. સરકારે ડુંગળીની નિકાસ પર ડિસેમ્બર, 2023માં પ્રતિબંધ લગાવ્યો હતો, જે 31 માર્ચે ખતમ થતો હતો. વેપારીઓનો અંદાજ હતો કે એ પ્રતિબંધને દૂર કરવામાં આવશે, કેમ કે નિકાસ પ્રતિબંધ લાગુ થયા પછી સ્થાનિક બજારોમાં ડુંગળીની કિંમતો લગભગ અડધી થઈ હતી અને આ સીઝનનો પાકનો સપ્લાય શરૂ થઈ ગયો છે.

કેન્દ્ર સરકાર નથી ઇચ્છતી કે સામાન્ય ચૂંટણી દરમ્યાન ડુંગળીની કિંમતો વધે. સરકારના આ નિર્ણયથી કેટલાંક વિદેશી બજારોમાં કિંમતો આકાશને આંબે એવી શક્યતા છે.

મહારાષ્ટ્રનાં કેટલાંક જથ્થાબંધ બજારોમાં ડુંગળીની કિંમતો ડિસેમ્બરમાં રૂ. 4500 પ્રતિ 100 કિલોગ્રામ હતી, જે ઘટીને હવે રૂ. 1200 પ્રતિ કિલોગ્રામ પર આવી હતી, પરંતુ સરકારે આદેશ જારી કરી દીધો છે કે આગામી આદેશ સુધી ડુંગળીની નિકાસ પર પ્રતિબંધ જારી રહેશે. આ વખતે આ આદેશ ડિરેક્ટોરેટ જનરલ ઓફ ફોરેને ટ્રેડ (DGFT)એ જારી કર્યો છે. DGFT વેપાર મંત્રાલય હેઠળ આવે છે અને આયાત-નિકાસથી જોડાયેલા મુદ્દાઓને જુએ છે.

બંગલાદેશ, મલેશિયા, નેપાળ અને UAE જેવા દેશો ડુંગળી પુરવઠા મામલે ભારતથી આયાત પર નિર્ભર છે. એમાંથી કેટલાય દેશો ભારતના ડુંગળી પરના પ્રતિબંધ પછી ડુંગળીની ઊંચી કિંમતોથી ઝઝૂમી રહ્યા છે.

નાણાકીય વર્ષ 2023-24માં ડુંગળીના ઉત્પાદનમાં ઘટાડો રહેવાની શક્યતા છે. કૃષિ ઉત્પાદન 2023-24માં આશરે 254.73 લાખ ટન રહેવાની અપેક્ષા છે. ગયા વર્ષે એ આશરે 302.08 લાખ ટન હતું.

 

 

 

 

 

સાબરકાંઠાના ભાજપના ઉમેદવાર ભીખાજી ઠાકોરે મેદાન છોડ્યું

ગુજરાતમાં લોકસભાની ચૂંટણીમાં ભાજપે અત્યાર સુધીમાં 22 ઉમેદવારો જાહેર કર્યાં છે. જેમાં વડોદરા અને સાબરકાંઠા બેઠક પર ભાજપમાં ભૂકંપ સર્જાયો છે. વડોદરાના ઉમેદવાર રંજનબેન ભટ્ટે આજે ચૂંટણી નહીં લડવાની જાહેરાત કરી હતી. ત્યારે હવે સાબરકાંઠા બેઠક પર જાહેર થયેલા ઉમેદવાર ભીખાજી ઠાકોરે પણ સોશિયલ મીડિયામાં પોસ્ટ લખીને ઉમેદવારી નહીં કરવાની જાહેરાત કરી છે. બંને બેઠકો પર ઉમેદવાર ખસી જતાં ભાજપે હવે નવા ઉમેદવારોની શોધ કરવી પડશે. ભાજપના આંતરિક સુત્રો કહે છે કે, હજુ પણ એક કે બે સીટ પર ફેરફાર થાય તેવી શક્યતાઓ છે.

કોંગ્રેસમાં પણ ભરત સોલંકી, જગદીશ ઠાકોર, શૈલેષ પરમાર સહિતના દિગ્ગજ નેતાઓ ચૂંટણીના મેદાનમાંથી ખસી ગયાં છે. અમદાવાદ પૂર્વ બેઠક પર કોંગ્રેસના ઉમેદવાર તરીકે જાહેર થયેલા રોહન ગુપ્તાએ પિતાની નાદુરસ્ત તબિયતનું બહાનું આગળ ધરીને મેદાન છોડી દીધું હતું અને ત્યાર બાદ તેમણે પક્ષમાંથી પણ રાજીનામું આપી દીધું છે. કોંગ્રેસના અસંખ્ય દિગ્ગજોએ કેસરિયા કરી લીધા છે. ત્યારે ભાજપમાં હવે ઉકળતો લાવા જોવા મળી રહ્યો છે. વડોદરા લોકસભા બેઠક ઉપર ભાજપના ઉમેદવાર તરીકે રંજનબેન ભટ્ટ મેદાનમાં ઉતર્યા હતા. જો કે, સતત ત્રીજી વાર રંજનબેન ભટ્ટનું નામ જાહેર થતાં ભાજપમાં આંતરિક ડખા વધ્યા હતા. ઉમેદવાર તરીકે તેમનું નામ આવતા પાર્ટીના નેતાઓએ નારાજગી વ્યક્ત કરી હતી. વડોદરાના પૂર્વ મેયર જ્યોતિ પંડ્યાએ પણ તેમના ઉમેદવારી પર વાંધો ઉઠાવ્યો હતો. જેના પરિણામ સ્વરૂપ તેમને પાર્ટીમાંથી સસ્પેન્ડ કરવામાં આવ્યા હતા. ત્યાર બાદ સાવલીના ધારાસભ્ય કેતન ઇમાનદારે પણ ધારાસભ્ય પદેથી રાજીનામું આપી દેતા રાજકારણ ગરમાયું હતું.

કે કવિતાની અરવિંદ કેજરીવાલ સાથે પૂછપરછ કરવામાં આવશે

બીઆરએસ નેતા કે. કવિતાને રાઉઝ એવન્યુ કોર્ટ દ્વારા 26મી સુધી ED રિમાન્ડ પર મોકલવામાં આવ્યા છે. ઉપરાંત, કોર્ટમાં, EDએ રિમાન્ડ માટે દલીલ કરી હતી કે કવિતાને પુરાવા અને કેસમાં અન્ય આરોપીઓ સાથે મુકાબલો કરવો જરૂરી છે. ગઈ કાલે, ધરપકડ બાદ અરવિંદ કેજરીવાલને કોર્ટમાં રજૂ કરતી વખતે, EDએ દલીલ કરી હતી કે અરવિંદ કેજરીવાલ આ દારૂ કૌભાંડનો માસ્ટરમાઈન્ડ છે અને કે કવિતા મનીષ સિસોદિયા અને કેજરીવાલના સંપર્કમાં હતા. કોર્ટે કેજરીવાલને 28 માર્ચે બપોરે 2 વાગ્યા સુધી ED રિમાન્ડ પર મોકલી દીધા છે. હવે એવા સમાચાર છે કે અરવિંદ કેજરીવાલ, કે કવિતા અને મનીષ સિસોદિયાને સાથે બેસીને પૂછપરછ થઈ શકે છે.

100 કરોડની લાંચનું મની ટ્રેલ કે કવિતા સાથે જોડાયેલું છે

EDએ એવી પણ દલીલ કરી હતી કે કે કવિતા દ્વારા જ દક્ષિણ લોબી (દક્ષિણ ભારતના દારૂના વેપારીઓ)એ રૂ. 100 કરોડની લાંચ આપીને નવી દારૂની નીતિમાં પ્રવેશ કર્યો હતો… રૂ. 100 કરોડની આ લાંચમાંથી, આમ આદમી પાર્ટીએ સ્વીકાર્યું હતું. ગોવાની ચૂંટણીમાં 45 કરોડ રૂપિયાનો ખર્ચ કરવામાં આવ્યો હતો.
આવી સ્થિતિમાં, ED સૂત્રોનું કહેવું છે કે દિલ્હીના મુખ્યમંત્રી અરવિંદ કેજરીવાલ અને કે કવિતા વચ્ચે સામ-સામે હોવું ખૂબ જ મહત્વપૂર્ણ છે, જેથી નવી દારૂની નીતિ અને મુખ્યત્વે મની ટ્રેઇલ પાછળના ષડયંત્રનો પર્દાફાશ કરી શકાય અને રિકવર કરી શકાય.

કેજરીવાલ-કવિતાએ આ સવાલોના જવાબ આપવા પડશે

EDની તપાસ ટીમે રિમાન્ડ દરમિયાન કવિતા અને અરવિંદ કેજરીવાલ વચ્ચે થયેલા સામસામે એન્કાઉન્ટર અંગેનું હોમવર્ક લગભગ પૂરું કરી લીધું છે, એટલે કે સવાલોની યાદી તૈયાર કરી લેવામાં આવી છે, જેના જવાબો માત્ર કેજરીવાલ પાસેથી જ નહીં પણ લેવામાં આવશે.

કેજરીવાલની ધરપકડ પર જર્મનીની ટિપ્પણી, ભારતે આપ્યો જવાબ

દિલ્હીના મુખ્યમંત્રી અરવિંદ કેજરીવાલની ધરપકડ પર જર્મનીના વિદેશ મંત્રાલય દ્વારા કરવામાં આવેલી ટિપ્પણી સામે ભારતે સખત વાંધો વ્યક્ત કર્યો છે. ભારતની આંતરિક બાબતો પર તેમની ટિપ્પણીઓને ટાંકીને કેન્દ્ર સરકારે શનિવારે જર્મન એમ્બેસીના ડેપ્યુટી હેડ જ્યોર્જ એન્ઝવેઈલરને સમન્સ પાઠવ્યું હતું. જે બાદ જ્યોર્જ એન્ઝવેઈલર શનિવારે વિદેશ મંત્રાલયના અધિકારીઓને મળ્યા હતા. સૂત્રોના જણાવ્યા અનુસાર વિદેશ મંત્રાલયે જર્મનીના રાજદૂત જ્યોર્જ એન્ઝવેઈલર સમક્ષ ભારતની આંતરિક બાબતોમાં દખલગીરી સામે જોરદાર વિરોધ નોંધાવ્યો છે.

 

અમારી ન્યાયિક પ્રક્રિયામાં હસ્તક્ષેપ: વિદેશ મંત્રાલય

ભારતીય વિદેશ મંત્રાલયના પ્રવક્તા રણધીર જયસ્વાલે એક નિવેદન જારી કરીને કહ્યું કે, આજે મેં નવી દિલ્હીમાં જર્મન મિશનના ડેપ્યુટી ચીફને ફોન કરીને વિદેશ મંત્રાલય દ્વારા અમારી આંતરિક બાબતો પર કરવામાં આવેલી ટિપ્પણીનો ભારતનો સખત વિરોધ વ્યક્ત કર્યો છે. અમારી ન્યાયિક પ્રક્રિયામાં દખલગીરી અને ન્યાયતંત્રની સ્વતંત્રતાને ક્ષીણ કરનાર તરીકેની ટિપ્પણીઓ. ભારત કાયદાના શાસન સાથે જીવંત અને મજબૂત લોકશાહી છે. ભારતમાં અને અન્ય લોકશાહી દેશોમાં જે રીતે કાયદો ચાલે છે, આ કેસમાં પણ કાયદો પોતાનો માર્ગ અપનાવશે. આ કિસ્સામાં પક્ષપાતી ધારણાઓ કરવી અયોગ્ય છે.

જર્મનીના વિદેશ મંત્રાલયે ટિપ્પણી કરી હતી

એન્ફોર્સમેન્ટ ડિરેક્ટોરેટે ગુરુવારે મોડી રાત્રે દિલ્હી લિકર પોલિસીના સંબંધમાં મુખ્યમંત્રી અરવિંદ કેજરીવાલની ધરપકડ કરી હતી. કેજરીવાલની ધરપકડ પર ટિપ્પણી કરતા જર્મનીના વિદેશ મંત્રાલયે કહ્યું હતું કે અમે તેની નોંધ લીધી છે. ભારત એક લોકશાહી દેશ છે. અમે આશા રાખીએ છીએ કે ન્યાયતંત્રની સ્વતંત્રતા અને મૂળભૂત લોકતાંત્રિક સિદ્ધાંતો સંબંધિત તમામ ધોરણો આ કેસમાં પણ લાગુ કરવામાં આવશે. કેજરીવાલને ન્યાયી સુનાવણીનો સંપૂર્ણ અધિકાર છે. જર્મન વિદેશ મંત્રાલયે વધુમાં કહ્યું હતું કે, અન્ય આરોપોનો સામનો કરી રહેલા અન્ય વ્યક્તિઓની જેમ કેજરીવાલ પણ ન્યાયી સુનાવણી માટે હકદાર છે. તેમને કોઈપણ પ્રતિબંધ વિના તમામ કાનૂની માર્ગો પર આગળ વધવાનો અધિકાર છે. એવું પણ કહેવામાં આવ્યું હતું કે નિર્દોષતાની ધારણા એ એક અયોગ્ય છે. કાયદાના શાસનનું મુખ્ય તત્વ અને તે આ કિસ્સામાં પણ લાગુ થવું જોઈએ.

કેજરીવાલ 28 માર્ચ સુધી ED રિમાન્ડ પર

રાઉઝ એવન્યુ કોર્ટે સીએમ અરવિંદ કેજરીવાલને 28 માર્ચ સુધી ED રિમાન્ડ પર મોકલી દીધા છે. EDએ કેજરીવાલને કોર્ટમાં રજૂ કરીને દસ દિવસના રિમાન્ડની માંગણી કરી હતી, પરંતુ કોર્ટે તપાસ એજન્સીને છ દિવસના રિમાન્ડ આપ્યા છે. હવે તેને 28 માર્ચે બપોરે 2 વાગ્યે કોર્ટમાં રજૂ કરવામાં આવશે. કોર્ટમાંથી 6 દિવસના ED રિમાન્ડ મળ્યા બાદ સીએમ અરવિંદ કેજરીવાલે કહ્યું કે હું રાજીનામું નહીં આપીશ. હું સ્વસ્થ છું અને જેલમાંથી જ સરકાર ચલાવીશ.

પાણી પહેલાં પાળઃ ઉનાળામાં વીજ ગૂલ નહીં થાય

નવી દિલ્હીઃ આ વખતે દેશમાં આકરી ગરમી પડવાનાં એંધાણ છે, જેથી પાવરની માગ પિક પર પહોંચવાની અપેક્ષા છે સરકારે ગરમી વધતાં પહેલાં વીજ સપ્લાય વધારવાની તૈયારી શરૂ કરી દીધી છે. કેન્દ્રીય વીજ મંત્રી આરકે સિંહે આ વિશે 22 માર્ચે એક બેઠક બોલાવી હતી. આ ઉચ્ચ સ્તરીય બેઠકમાં ગેસથી ઇલેક્ટ્રિક બનાવતી કંપનીઓને બોલાવવામાં આવી હતી. એમાં ગરમી વધતાં પહેલાં કંપનીઓને કુલ એનર્જીમાં ગેસ આધારિત ઇલેક્ટ્રિસિટીનો હિસ્સો વધારવાના ઉપાય કરવાના નિર્દેશ આપવામાં આવ્યા છે.

તેમણે ગેસની કિંમતોમાં નરમાઈને લીધે ગેસની ખરીદદારી વધારવાના નિર્દેશ આપ્યા છે. છેલ્લા છ મહિનામાં નેચલ ગેસની કિંમતોમાં આશરે 30 ટકા ઘટ્યા છે. આ વખતે દેશમાં આકરી ગરમી પડવાનાં એંધાણ છે, જેથી પાવરની માગ પિક પર પહોંચવાની અપેક્ષા છે. આ પહેલાં સરકાર ગેસ આધારિત પાવર ઉત્પાદન વધારીને 10,000 MW કરવા ઇચ્છે છે. સેન્ટ્રલ ઇલેક્ટ્રિસિટી ઓથોરિટી (CEA)એ 16 માર્ચથી 30 જૂનની વચ્ચે વીજ માગ ઝડપથી વધવાનો અંદાજ વ્યક્ત કર્યો છે. 10,000 મેગાવોટનું એ ઉત્પાદન NTPCની ગેસ આધારિત 5000 MWની ઉત્પાદન ક્ષમતાથી વધારાનું હશે. 

હાલ ગેસથી આશરે 3200-4200 MW વીજનું ઉત્પાદન થઈ રહ્યું છે, એમાંથી આશરે 2000-3000 MWનું ઉત્પાદન NTPC કરી રહી છે. બાકીના 1200 MW સરકાર બહારથી ખરીદી રહી છે. આ બેઠકમાં સામેલ સિનિયર અધિકારીઓએ જણાવ્યું હતું કે વીજ ઉત્પાદન કરતી બધી કંપનીઓને  ગેસ આધારિત પાવર પ્લાન્ટ્સ ચલાવવા માટે નિર્દેશ આપવામાં આવ્યા છે. વિતરણ કંપનીઓ જો એને નહીં ખરીદે તો એને પાવર એક્સચેન્જોને વેચવા માટે કહેવામાં આવ્યું છે.

 

 

 

 

 

 

ડાકોરના પથ પર પદયાત્રીઓ માટે ચાલતો મહાસેવાયજ્ઞ

અમદાવાદ: દર વર્ષે,  હોળી નિમિત્તે લાખો ભક્તો પગપાળા ડાકોર રણછોડજીના દર્શને જતા હોય છે. આ પદયાત્રીઓ માટે રસ્તામાં અનેક સેવાયજ્ઞ સમાન કેમ્પ ચાલતા હોય છે. જેમાં પગપાળા જતાં ભક્તોને મફત જમવાનું તેમજ રહેવાની સગવડ આપવામાં આવે છે. આવો જ એક સેવાયજ્ઞ ચલાવી રહ્યું છે ચિરીપાલ ગ્રુપ.

અમદાવાદથી થોડાક કિલોમીટરના અંતરે સિહુંજ ગામ નજીક આવેલ ચિરીપાલ દેવકીનંદન વિશ્રામ ગૃહ ખાતે આ સેવા યજ્ઞ ચાલી રહ્યો છે. ડાકોરની મુલાકાત લેનારા અસંખ્ય ભક્તોની જરૂરિયાતોને પૂરી કરવા કેમ્પ ચોવીસ કલાક ચાલુ રાખવામાં આવેલ છે. જેમા ચિરીપાલ સેવા શિબિર તમામ ભક્તોને મફત ભોજન અને દવાઓ આપે છે. અહીં ચિરીપાલ જૂથના સેવાભાવી અગ્રણી બ્રિજમોહન ચિરીપાલની દેખરેખમાં 200થી વધુ સ્વયંસેવકો ત્રણ દિવસ દરમિયાન 7 લાખથી વધુ ભક્તોની સેવા માટે ખડેપગે હાજર રાખવામાં આવ્યા છે. આ વર્ષે આ ઉમદા પ્રયાસનું સતત 29મું વર્ષ છે.

આ અંગે ચિરીપાલ ગ્રૂપના પ્રમોટર રોનક ચિરીપાલે જણાવ્યું હતું કે, “જાહેર સેવા ચિરીપાલ ગ્રૂપના મૂળમાં છે, અને અમે સમાજના લાભ માટે અમારો સમય અને અમારા સંસાધનો આપવા માટે પ્રતિબદ્ધ છીએ. છેલ્લા 29 વર્ષથી અહીં ભક્તોના સમુદાયની સેવા કરવામાં અમને ખૂબ જ આનંદ થાય છે, અને અમે ભવિષ્યમાં પણ આ મહા સેવા કાર્ય કરતા રહીશું.”

ભક્તોની તબીબી જરૂરિયાતો  માટે  ડૉક્ટર્સ,  નર્સિસ અને માલિશ કરનારની સમર્પિત ટીમ ઉપલબ્ધ કરાવવામાં આવી છે. લાંબી મુસાફરીને કારણે સ્નાયુઓના તાણ અને થાકને દૂર કરવા માટે પગની મસાજ અહીં કરી આપવામાં આવતી હોય છે. જ્યારે સામાન્ય બિમારીઓ માટે મફત દવાઓ પણ ઉપલબ્ધ કરાવવામાં આવે છે. શિબિરમાં ભક્તિમય ગીતો અને ભજનો સાથે આધ્યાત્મિક વાતાવરણ હોય છે.

આતંકવાદી હુમલોઃ રશિયાના પૂર્વ રાષ્ટ્રપતિની યુક્રેનને ધમકી

મિલિટરી યુનિફોર્મ પહેરેલા આતંકીઓ રશિયાની રાજધાની મોસ્કોમાં એક મોટા કોન્સર્ટ હોલમાં ઘૂસી ગયા અને ત્યાં હાજર લોકો પર અંધાધૂંધ ગોળીબાર કર્યો. આ હુમલામાં 70 લોકોના મોત થયા હતા જ્યારે 145થી વધુ લોકો ઘાયલ થયા હતા. પ્રત્યક્ષદર્શીઓના જણાવ્યા અનુસાર, આ 5 આતંકવાદીઓએ ખુલ્લેઆમ ગોળીબાર કર્યો હતો અને બોમ્બ પણ ફોડ્યા હતા. રશિયામાં આ ઘટના વ્લાદિમીર પુતિન પાંચમી વખત રાષ્ટ્રપતિ બન્યા તેના બે દિવસ બાદ બની છે.

આ મામલે રશિયાના પૂર્વ રાષ્ટ્રપતિ મેદવેદેવે યુક્રેનને ધમકી આપતા કહ્યું કે જો મોસ્કો કોન્સર્ટ હોલ હુમલામાં કિવ શાસનનું નામ આવશે તો યુક્રેનના ટોચના નેતૃત્વનો આતંકવાદીઓની જેમ ક્રૂરતાથી સફાયો કરી દેવામાં આવશે. તે જ સમયે, યુક્રેનના રાષ્ટ્રપતિ સલાહકારે જવાબ આપ્યો કે કિવને મોસ્કોમાં થયેલા હુમલા સાથે કોઈ લેવાદેવા નથી.

ISIS-K એ હુમલાની જવાબદારી લીધી હતી

મોસ્કોમાં થયેલા આતંકવાદી હુમલાની જવાબદારી ISIS-Kએ લીધી છે. તેણે પોતાની ટેલિગ્રામ ચેનલ પર લખ્યું, ઇસ્લામિક સ્ટેટના લડવૈયાઓએ રશિયાની રાજધાની મોસ્કોના ક્રાસ્નોગોર્સ્કમાં સ્થિત ક્રોકસ સિટી હોલમાં ખ્રિસ્તીઓના એક મોટા મેળાવડા પર હુમલો કર્યો. “આ હુમલામાં સેંકડો લોકો માર્યા ગયા અને ઘાયલ થયા અને મોટા પ્રમાણમાં વિનાશ થયો.

અમેરિકાએ રશિયા સાથે માહિતી શેર કરી હતી

અમેરિકન ગુપ્તચર એજન્સીના એક અધિકારીએ સમાચાર એજન્સી એસોસિએટેડ પ્રેસ (એપી)ને જણાવ્યું કે અમેરિકન ગુપ્તચર એજન્સીઓને માહિતી મળી હતી કે અફઘાનિસ્તાનમાં આ જૂથની એક શાખા મોસ્કોમાં હુમલાની યોજના બનાવી રહી છે. તેણે આ માહિતી રશિયન અધિકારીઓ સાથે પણ શેર કરી હતી. અમેરિકાનું કહેવું છે કે ISIS-K રશિયન રાષ્ટ્રપતિ વ્લાદિમીર પુતિનનો વિરોધ કરે છે અને છેલ્લા ઘણા વર્ષોમાં એવું જોવા મળ્યું છે કે તે પોતાના પ્રચારમાં પુતિનની ટીકા કરી રહ્યું છે.

હિમાચલના છ બળવાખોર વિધાનસભ્યો ભાજપમાં સામેલ

સિમલાઃ હિમાચલ કોંગ્રેસના છ બળવાખોર વિધાનસભ્યો ભાજપમાં સામેલ થયા છે. માહિતી અને પ્રસારણપ્રધાન અનુરાગ ઠાકુરે પાર્ટીની ઓફિસમાં આ છ બળવાખોર વિધાનસભ્યોને દિલ્હીમાં પાર્ટીમાં સામેલ કર્યા હતા. આ બળવાખોર વિધાનસભ્યોએ હિમાચલમાં રાજ્યસભા ચૂંટણીમાં ક્રોસ વોટિંગ કર્યું હતું, જે પછી આ વિધાનસભ્યોને સ્પીકરે સસ્પેન્ડ કર્યા હતા.

હવે કોંગ્રેસના ધર્મશાલાથી સુધીર શર્મા, સુજાનપુરથી રાજિન્દર રાણા, લોહોલ સ્પિતીથી રવિ ઠાકુર, બડસરથી ઇન્દ્રદત્ત લખનપાલ, ગગરેટથી ચૈતન્ય શર્મા અને કુટલહેડથી દેવેન્દ્ર કુમાર ભુટ્ટો હવે ભાજપમાં સામેલ થયા છે. હિમાચલના બળવાખોર વિધાનસભ્ય સુધીર શર્માએ કહ્યું હતું કે અમે હર્ષ મહાજનને એટલા માટે મત આપ્યો હતો, કેમ કે તેઓ અમારા જિલ્લાના છે.

હિમાચલ પ્રદેશ વિધાનસભાના અધ્યક્ષ કુલદીપ સિંહ પઠાનિયાએ રાજ્યસભાની ચૂંટણીમાં બળવો કરનાર છ બળવાખોર ધારાસભ્યોને અયોગ્ય ઠેરવ્યા હતા. તેમણે કહ્યું હતું કે પક્ષપલટાવિરોધી કાયદા હેઠળ છ ધારાસભ્યો વિરુદ્ધ ફરિયાદ ધારાસભ્ય અને મંત્રી હર્ષવર્ધન દ્વારા અમારા સચિવાલયને મળી હતી, ત્યાર બાદ તેમણે બંને પક્ષોને સાંભળ્યા અને પોતાનો નિર્ણય આપ્યો હતો. સસ્પેન્ડ કરાયેલા ધારાસભ્યોએ વ્હીપનું ઉલ્લંઘન કર્યું હતું.

હિમાચલ પ્રદેશ વિધાનસભામાં કોંગ્રેસના 40 ધારાસભ્યો હતા. 68 સભ્યોની વિધાનસભામાં બહુમતી માટે જરૂરી આંકડો 35 હતો. છ ધારાસભ્યોના બળવા પછી કોંગ્રેસ નંબર ગેમમાં 40થી ઘટીને 34 પર આવી ગઈ છે, જે બહુમતી માટે જરૂરી આંકડા કરતાં એક ઓછી છે. પરંતુ બળવાખોર ધારાસભ્યોને સભ્યપદેથી અયોગ્ય ઠેરવ્યા બાદ હવે વિધાનસભાની સંખ્યા 62 થઈ ગઈ છે. આવી સ્થિતિમાં બહુમત માટે જરૂરી આંકડો હવે 32 થઈ ગયો છે. તેથી હાલમાં વિધાનસભામાં માત્ર કોંગ્રેસ જ આગળ છે.

 

 

 

 

 

 

 

 

1...1,9801,9811,982...5,106Page 1,981 of 5,106