50 ઇઝરાયલી ફાઇટર જેટ્સે અલી ખામેનીના બંકરને તોડ્યું
તેલ અવીવ: ઇઝરાયલી સંરક્ષણ દળો (IDF) એ શુક્રવારે જાહેર કર્યું કે ૨૮ ફેબ્રુઆરીએ તેમણે તેહરાનમાં હુમલો કર્યો હતો. આ હુમલો ઈરાની શાસનના નેતૃત્વ પરિસર પર કર્યો હતો. જેમાં ૫૦ જેટલા વાયુસેનાના ફાઇટર જેટ સામેલ હતા. હુમલાનમાં ઈરાનના સર્વોચ્ચ નેતા આયાતુલ્લાહ અલી ખામેનીની હત્યા થઈ હતી.
IDF દ્વારા જારી કરાયેલ એક નિવેદનમાં કહેવામાં આવ્યું કે, “ગુપ્તચર નિર્દેશાલયના ચોક્કસ માર્ગદર્શન અને આતંકવાદ વિરોધી નિર્દેશાલયના સહયોગથી, આશરે ૫૦ વાયુસેનાના ફાઇટર જેટ તેહરાનના મધ્યસ્થ સમાન ઈરાની આતંકવાદી શાસનના નેતૃત્વ પરિસર હેઠળ બનેલા અલી ખામેનીના ભૂગર્ભ બંકર પર હુમલો કર્યો હતો.”
“કમ્પાઉન્ડની નીચે બાંધવામાં આવેલ અને નેતા માટે યુદ્ધ કરવા માટે સુરક્ષિત કટોકટી સંપત્તિ તરીકે ઉપયોગમાં લેવાતું ભૂગર્ભ બંકર, ઓપરેશન ‘રોર ઓફ ધ હેરિયર’માં તેનો ઉપયોગ કરે તે પહેલાં જ નાશ પામ્યું હતું. ખામેનીની હત્યા પછી, ઈરાની શાસનના વરિષ્ઠ અધિકારીઓ દ્વારા આ કમ્પાઉન્ડનો ઉપયોગ ચાલુ રહ્યો,” તેમાં ઉમેર્યું.
IDFએ ઉલ્લેખ કર્યો છે કે ઈરાની શાસને તેની લશ્કરી યોજનાઓને આગળ વધારવા માટે એક સ્થાન સ્થાપિત કરવાના ઉદ્દેશ્યથી ઘણા વર્ષોથી ભૂગર્ભ સંકુલ સ્થાપિત કરવામાં પોતાના પ્રયાસો કર્યા હતા. આ અઠવાડિયાની શરૂઆતમાં, IDF એ કહ્યું હતું કે તેણે ઈરાની શાસનના નેતૃત્વ કમ્પાઉન્ડ પર હુમલો કર્યો છે અને કેન્દ્રીય મુખ્ય મથક તોડી પાડવામાં આવ્યું છે.
યુદ્ધ ચાલુ રહે તો ક્રૂડ ઓઈલનો ભાવ $150 પ્રતિ બેરલ થશે
નવી દિલ્હી: કતારના ઊર્જા મંત્રી સાદ અલ-કાબીએ ચેતવણી આપી છે કે મધ્ય પૂર્વમાં યુદ્ધ “થોડા દિવસો” વધુ ચાલુ રહેવાથી ગલ્ફ નિકાસકારો ફોર્સ મેજ્યુર જાહેર કરી શકે છે. ડિલિવરી બંધ કરી શકે છે. ક્રૂડ ઓઈલ $150 પ્રતિ બેરલ અને કુદરતી ગેસ $40 પ્રતિ MMBtu (મેટ્રિક મિલિયન બ્રિટિશ થર્મલ યુનિટ) સુધી પહોંચી શકે છે.
મંત્રીએ જણાવ્યું કે, “જો આ ચાલુ રહેશે તો જે લોકોએ ફોર્સ મેજ્યુર માટે હાકલ કરી નથી તેઓ આગામી થોડા દિવસોમાં કરશે. ગલ્ફ ક્ષેત્રના તમામ નિકાસકારોએ ફોર્સ મેજ્યુર માટે હાકલ કરવી પડશે. જો તેઓ આમ નહીં કરે, તો તેઓ કોઈક સમયે કાયદેસર રીતે તેની જવાબદારી ચૂકવવાના છે, અને તે તેમની પસંદગી છે.”
મંત્રીએ કહ્યું કે જો ટેન્કર અને અન્ય જહાજો સ્ટ્રેટમાંથી પસાર થઈ શકતા નથી, તો ક્રૂડના ભાવ બેથી ત્રણ અઠવાડિયામાં $150 પ્રતિ બેરલ સુધી પહોંચી શકે છે, જ્યારે કુદરતી ગેસના ભાવ ચાર ગણા વધી શકે છે. આ અઠવાડિયે બ્રેન્ટ ક્રૂડ ફ્યુચર્સ 20 ટકા વધ્યા છે, જ્યારે વેસ્ટ ટેક્સાસ ઇન્ટરમીડિયેટ (WTI) 25 ટકા વધ્યા છે. શુક્રવારે, બ્રેન્ટ 3 ટકાથી વધુ વધીને $89 પ્રતિ બેરલ પર ટ્રેડ કરી રહ્યો હતો જ્યારે WTI 5 ટકાથી વધુ વધીને $86 પર ટ્રેડ કરી રહ્યો હતો. બંને બેન્ચમાર્ક એપ્રિલ 2024 પછીના તેમના ઉચ્ચતમ સ્તરે ટ્રેડ કરી રહ્યા છે.
વિશ્વના બીજા સૌથી મોટા લિક્વિફાઇડ નેચરલ ગેસ (LNG) ઉત્પાદક કતારએ આ અઠવાડિયે ઈરાની ડ્રોન હુમલા દ્વારા તેની રાસ લાફાન LNG સુવિધા પર હુમલો કર્યા બાદ ફોર્સ મેજ્યુર જાહેર કર્યું હતું. આ દેશનો સૌથી મોટો LNG પ્લાન્ટ છે અને તેને થયેલા નુકસાનનું મૂલ્યાંકન કરવાના પ્રયાસો કરવામાં આવી રહ્યા છે.
મંત્રીએ વધુમાં કહ્યું કે જો હુમલા તાત્કાલિક બંધ થઈ જાય, તો પણ લોજિસ્ટિકલ વિક્ષેપોને કારણે સામાન્ય નિકાસ કામગીરીને પુનઃસ્થાપિત કરવામાં “અઠવાડિયાથી મહિનાઓ” જેટલો સમય લાગી શકે છે. તેમણે કહ્યું કે કતારના 128 LNG કેરિયર્સમાંથી ફક્ત છ કે સાત હાલમાં કાર્ગો લોડ કરવા માટે ઉપલબ્ધ છે.
ઇરાને ખાડીમાં મિસાઇલો અને ડ્રોન છોડ્યા, બહેરીનમાં તેલ રિફાઇનરી પર હુમલો કર્યો.
ડીબીએસ બેંકના તાજેતરના અહેવાલમાં ચેતવણી આપવામાં આવી છે કે ઇરાની નૌકાદળના યુદ્ધજહાજો ન્યૂનતમ ખતરો હોવા છતાં, ઇસ્લામિક રિપબ્લિકની હોર્મુઝ સ્ટ્રેટમાં ખાણો અને અસમપ્રમાણ હુમલાઓ તૈનાત કરવાની ક્ષમતા શિપમેન્ટ ધીમું કરી શકે છે, વીમો, શિપિંગ ખર્ચ અને ઊર્જાના ભાવમાં વધારો કરી શકે છે.
જેતલપુરધામમાં રેવતી-બળદેવજી હરિકૃષ્ણ મહારાજ દ્વિશતાબ્દી મહોત્સવનો પ્રારંભ
જેતલપુર: ભગવાન સ્વામિનારાયણે સ્વહસ્તે સ્થાપેલા પાંચમા ધામ એવા જેતલપુરધામમાં રેવતી-બળદેવજી હરિકૃષ્ણ મહારાજની પ્રાણ પ્રતિષ્ઠાના ૨૦૦ વર્ષ પૂર્ણ થવાના અવસરે ઐતિહાસિક દ્વિશતાબ્દી મહોત્સવનો ઉત્સાહભેર પ્રારંભ થયો છે.
આચાર્ય કોશલેન્દ્રપ્રસાદજી મહારાજ અને તેજેન્દ્રપ્રસાદજી મહારાજની નિશ્રામાં તથા ભાવી આચાર્ય વ્રજેન્દ્રપ્રસાદજી મહારાજના અધ્યક્ષ પદે આ મહોત્સવ ૧૧ માર્ચ સુધી ઉજવાશે.
પ્રથમ દિવસ: ધર્મ અને રાષ્ટ્રભક્તિનો સંગમ
મહોત્સવના પ્રારંભે રાજ્યપાલ આચાર્ય દેવવ્રત, RSS સરસંઘચાલક મોહન ભાગવત અને અન્ય મહાનુભાવો ઉપસ્થિત રહ્યા હતા. આ પ્રસંગે મોહન ભાગવતે કહ્યું, “જે કાર્ય સંઘ 100 વર્ષથી કરી રહ્યો છે, તે જ કાર્ય સ્વામિનારાયણ સંપ્રદાય ૨૦૦ વર્ષથી કરી રહ્યો છે.” તેમણે સમરસતા અને વ્યસનમુક્તિના કાર્યોને બિરદાવ્યા હતા. રાજ્યપાલ આચાર્ય દેવવ્રતે પ્રાકૃતિક ખેતી અપનાવવા આહ્વાન કર્યું હતું, જ્યારે આચાર્ય મહારાજે સંપ્રદાય અને સંઘના કાર્યોને અખંડ ભારત અને વિશ્વ શાંતિ માટે પૂરક ગણાવ્યા હતા.
બીજો દિવસ: કલા અને સાહિત્યના રત્નોનું સન્માન
મહોત્સવના બીજા દિવસે વિવિધ ક્ષેત્રના પદ્મશ્રી સન્માનિત મહાનુભાવોનું વિશેષ સન્માન કરવામાં આવ્યું હતું. જેમાં લોકગાયક ભીખુદાન ગઢવી, હાસ્ય કલાકાર શાહબુદ્દીન રાઠોડ, સાહિત્યકાર રઘુવીર ચૌધરી, ચંદ્રકાંત શેઠ, રતિલાલ બોરીસાગર, વિષ્ણુ પંડ્યા સહિતના મહાનુભાવોને બિરદાવવામાં આવ્યા હતા.
આ સાથે કાશી વિશ્વનાથ મંદિરના પૂજારી તીર્થરાજ ત્રિપાઠીજી અને સાંસદ દેવુસિંહ ચૌહાણ પણ દર્શનાર્થે ઉપસ્થિત રહ્યા હતા. આ મહોત્સવમાં મોટી સંખ્યામાં હરિભક્તો ઉમટી રહ્યા છે, જે આગામી 11 માર્ચ- પાટોત્સવ સુધી ચાલશે.
હુરુન ગ્લોબલ રિચ લિસ્ટ: મુકેશ અંબાણી એશિયાના સૌથી શ્રીમંત વ્યક્તિ તરીકે યથાવત્
નવી દિલ્હીઃ હુરુન ગ્લોબલ રિચ લિસ્ટ 2026 મુજબ આ વર્ષે ભારતમાં અરબપતિઓની સંખ્યામાં નોંધપાત્ર વધારો થયો છે. આ યાદીમાં 57 નવા લોકોનો સમાવેશ થયો છે. તેની સાથે દેશમાં કુલ અરબપતિઓની સંખ્યા 308 થઈ ગઈ છે. આથી ભારત હવે ચીન અને અમેરિકાના બાદ દુનિયામાં અરબપતિઓની સંખ્યાના મામલે ત્રીજા ક્રમે આવી ગયું છે. હુરુનના રિપોર્ટ અનુસાર આ વર્ષે યાદીમાં જોડાયેલા ઘણા નવા અરબપતિઓ હેલ્થકેર, ઓટો કોમ્પોનન્ટ્સ, એનર્જી અને ફાઇનાન્સિયલ સર્વિસિસ જેવાં ક્ષેત્રોમાંથી આવ્યા છે. જોકે કેટલાક લોકો આ વર્ષે અરબપતિઓની ક્લબમાંથી બહાર પણ થયા છે.
ભારતીય અરબપતિઓની સરેરાશ સંપત્તિ ચીન કરતાં વધુ
ભારત અરબપતિઓની સંખ્યાના મામલે વિશ્વમાં ત્રીજા ક્રમે છે. ભારત હવે માત્ર ચીન અને અમેરિકા પાછળ છે. ભારતીય અરબપતિઓની કુલ સંપત્તિ લગભગ રૂ. 112 લાખ કરોડ સુધી પહોંચી ગઈ છે. હુરુન ગ્લોબલ રિચ લિસ્ટ 2026 મુજબ ભારતીય અરબપતિઓની સરેરાશ સંપત્તિ લગભગ રૂ. 36,570 કરોડ છે, જે ચીનના અરબપતિઓની સરેરાશ સંપત્તિ કરતાં વધુ છે.
મુંબઈ હજુ પણ ભારતના અરબપતિઓનું મુખ્ય કેન્દ્ર
મુંબઈ હજુ પણ ભારતના અરબપતિઓનું સૌથી મોટું કેન્દ્ર છે. શહેરમાં કુલ 95 અરબપતિ છે. જોકે એશિયાની અરબપતિઓની રાજધાની તરીકેનું સ્થાન હવે શેનઝેન પાસે ગયું છે. આ વર્ષે મુંબઈમાં 15 નવા અરબપતિ ઉમેરાયા, જે ન્યુ યોર્ક (14) અને લંડન (9) કરતાં વધારે છે. કુલ મળીને 199 ભારતીય અરબપતિઓની સંપત્તિમાં વધારો થયો છે, જ્યારે 109 લોકોની સંપત્તિ ઘટી છે અથવા તેમાં કોઈ ફેરફાર થયો નથી.
મુકેશ અંબાણી ભારત અને એશિયાની સૌથી શ્રીમંત વ્યક્તિ
રિલાયન્સ ઇન્ડસ્ટ્રીઝના ચેરમેન મુકેશ અંબાણી ભારતના તેમ જ એશિયાના સૌથી શ્રીમંત વ્યક્તિ તરીકે યથાવત્ રહ્યા છે. તેમની સંપત્તિમાં નવ ટકાનો વધારો થઈ લગભગ રૂ. 9.8 લાખ કરોડ થઈ ગઈ છે.
ગૌતમ અદાણી બીજા નંબરના સૌથી ધનિક ભારતીય રહ્યા, જેમની સંપત્તિ લગભગ રૂ. 7.5 લાખ કરોડ છે. HCL ટેક્નોલોજીસનાં રોશની નાદર મલ્હોત્રા અને પરિવાર રૂ. 3.2 લાખ કરોડની સંપત્તિ સાથે ત્રીજા સ્થાને છે. તેઓ ભારતના ટોપ 10 સૌથી ધનિક લોકોમાં એકમાત્ર મહિલા છે.
UPSCનું પરિણામ જાહેર, રાજસ્થાનના ડોક્ટર અનુજ અગ્નિહોત્રી ટોપર
નવી દિલ્હી: રાજસ્થાનના અનુજ અગ્નિહોત્રીએ સિવિલ સર્વિસ પરીક્ષા 2025 માં ટોચનું સ્થાન મેળવ્યું છે જ્યારે તમિલનાડુના રાજેશ્વરી સુવે એમ.એ પરીક્ષામાં બીજું સ્થાન મેળવ્યું છે. પરિણામમાં 958 ઉમેદવારો IAS (ભારતીય વહીવટી સેવા), IFS (ભારતીય વિદેશ સેવા), IPS (ભારતીય પોલીસ સેવા) અને અન્ય સેવાઓમાં પસંદગી માટે સફળતા મેળવી છે. રાજેશ્વરી સુવે એમ. CSE 2025માં પ્રથમ ક્રમાંકિત મહિલા ઉમેદવાર છે. ટોચના 10 ઉમેદવારોમાં બે વધુ મહિલાઓ છે.
અનુજ અગ્નિહોત્રી રાજસ્થાનના ચિત્તોડગઢ જિલ્લાના છે. કોટાની M.B. પબ્લિક સિનિયર સેકન્ડરી સ્કૂલમાંથી બારમું ધોરણ પૂર્ણ કર્યું. ઓલ ઈન્ડિયા ઇન્સ્ટિટ્યૂટ ઓફ મેડિકલ સાયન્સ (AIIMS) જોધપુરમાંથી તેમણે MBBS કર્યું છે. બીજું સ્થાન મેળવતા પહેલા, રાજેશ્વરી TMPSC ગ્રુપ 1 (ડેપ્યુટી કલેક્ટર)માં ટોચનું સ્થાન મેળવી ચૂક્યા હતા. યાદીમાં ત્રીજા ક્રમે ચંદીગઢના આકાશ ધુલ છે.
આ વર્ષના CSEમાં, કુલ 958 સફળ ઉમેદવારોમાંથી, 317 સામાન્ય શ્રેણીના ઉમેદવારોએ CSE પરીક્ષા પાસ કરી છે, જ્યારે 104 આર્થિક રીતે નબળા વર્ગ (EWS)ના ઉમેદવારો, 306 અન્ય પછાત વર્ગ (OBC)ના ઉમેદવારો અને 73 અનુસૂચિત જનજાતિ (ST) શ્રેણીના ઉમેદવારોએ અંતિમ પરીક્ષા પાસ કરી છે. ઓગસ્ટ 2025માં યોજાયેલી લેખિત પરીક્ષા અને ડિસેમ્બર 2025થી ફેબ્રુઆરી 2026 વચ્ચે વ્યક્તિત્વ પરીક્ષણના સ્કોરનો સમાવેશ થાય છે. એક સત્તાવાર નિવેદનમાં જણાવાયું છે કે સરકાર દ્વારા ભરવામાં આવનારી ખાલી જગ્યાઓની સંખ્યા કુલ 1,087 છે.
પરીક્ષા માટેના નિયમોમાં સમાવિષ્ટ જોગવાઈઓને ધ્યાનમાં રાખીને ઉપલબ્ધ ખાલી જગ્યાઓની સંખ્યા અનુસાર વિવિધ સેવાઓમાં નિમણૂકો કરવામાં આવશે, જેમાં ઉમેર્યું હતું કે 1,087 ખાલી જગ્યાઓમાં 180 IAS, 55 IFS, 150 IPS, 507 સેન્ટ્રલ સર્વિસીસ ગ્રુપ ‘A’, 195 ગ્રુપ ‘B’ સેવાઓનો સમાવેશ થાય છે, એમ તેમાં જણાવાયું છે.
ઇઝરાઇલ-ઈરાન યુદ્ધઃ ફાર્મા એક્સપોર્ટર્સને રૂ. 5000 કરોડ સુધીના નુકસાનની શક્યતા
નવી દિલ્હીઃ વેસ્ટ એશિયામાં ફાર્મા શિપમેન્ટ લગભગ સંપૂર્ણપણે બંધ થવાને કારણે માત્ર આ મહિનામાં જ નિકાસ મૂલ્યમાં રૂ.2500થી રૂ. 5000 કરોડ સુધીનું નુકસાન થવાની શક્યતા છે, કારણ કે અમેરિકા-ઇઝરાઇલ અને ઈરાન વચ્ચે વધતા જતા યુદ્ધને કારણે ફ્રેઇટ રેટ લગભગ બમણા થઈ ગયા છે, એવી ચેતવણી ફાર્માસ્યુટિકલ્સ એક્સપોર્ટ પ્રમોશન કાઉન્સિલ ઓફ ઇન્ડિયા (Pharmexcil)એ આપી છે.
એક્સપોર્ટર્સને દરેક શિપમેન્ટ પર $ 4000થી $ 8000 સુધીનો વધારાનો સરચાર્જ ચૂકવવો પડી રહ્યો છે. જેને કારણે ગલ્ફ દેશો અને વેસ્ટ એશિયા માર્કેટ પર ખૂબ જ આધારિત દવા ઉત્પાદકો માટે લોજિસ્ટિક્સ ખર્ચ વધ્યો છે. વધેલા ઈન્શ્યોરન્સ પ્રીમિયમ, ઇંધણના વધેલા ભાવ અને લાંબા માર્ગો અપનાવવાને કારણે થતા ઓપરેશનલ વિલંબ આ વધારાનાં મુખ્ય કારણો છે.
Pharmexcilના ચેરમેન નમિત જોષીએ જણાવ્યું હતું કે કાચા તેલના વધેલા ભાવ અને અનિશ્ચિત ટ્રાંઝિટ સમયને કારણે એક્ટિવ ફાર્માસ્યુટિકલ ઇન્ગ્રેડિયન્ટ્સ (API) ખરીદવાની કિંમત અને ઇન્વેન્ટરી મેનેજમેન્ટ બંને મુશ્કેલ બન્યા છે. તેને કારણે મોટા અને મધ્યમ કદના ફાર્મા એક્સપોર્ટર્સની વર્કિંગ કેપિટલ સાયકલ પર દબાણ વધી રહ્યું છે. તેમણે કહ્યું હતું કે લોજિસ્ટિક્સનું દબાણ ખૂબ ઝડપથી વધી રહ્યું છે. આ યુદ્ધને કારણે શિપમેન્ટ માટે મહત્વપૂર્ણ જળમાર્ગ સ્ટ્રેટ ઓફ હોર્મુઝ પણ પ્રભાવિત થયો છે. અહીંથી ભારતનું લગભગ 50 ટકા તેલ અને લગભગ 80 ટકા નેચરલ ગેસ પસાર થાય છે. દવાઓ, API અને ટેમ્પરેચર-સેન્સિટિવ ફોર્મ્યુલેશન્સની સમયસર ડિલિવરી માટે જરૂરી રેડ સી અને ગલ્ફના મુખ્ય સમુદ્રી માર્ગો પણ અસરગ્રસ્ત થયા છે.
મિડલ ઈસ્ટ ભારતની દવા ઉદ્યોગ માટે મહત્વપૂર્ણ માર્કેટ
આ વિસ્તારોમાં ભારતની ફાર્મા નિકાસ નાણાકીય વર્ષ 2021માં $ 1.32 અબજ હતી, જે નાણાકીય વર્ષ 2025માં વધીને $ 1.75 અબજ થઈ છે. UAE, સાઉદી અરેબિયા, ઓમાન અને કુવૈત જેવાં મોટાં બજારો ભારતીય સસ્તી અને જેનેરિક દવાઓ પર ભારે પ્રમાણમાં નિર્ભર છે, જેને કારણે ભારત આ વિસ્તારમાં એક મહત્વપૂર્ણ લાઇફલાઇન સપ્લાયર બની ગયું છે.
દુર્લભ વનસ્પતિઓનું રક્ષણ કરવા માટે નવી હાઇ-ટેક નર્સરી
બનાસકાંઠા: વન વિભાગ ડીસા તાલુકાના દાવસ ગામમાં પ્રથમ હાઇ-ટેક નર્સરી સ્થાપિત કરવા માટે તૈયાર છે. જે અંદાજે 13 એકર જમીનને આવરી લેશે અને તેનો અંદાજિત ખર્ચ રૂ. 3.5 કરોડ થશે. વન વિભાગ અને સામાજિક વનીકરણ વિભાગ દ્વારા દેખરેખ હેઠળ આ પ્રોજેક્ટનો હેતુ રાજ્યભરમાં વનીકરણના પ્રયાસોને મજબૂત બનાવવા અને દુર્લભ વનસ્પતિ પ્રજાતિઓનું જતન કરવાનો છે. આ નર્સરી પર્યાવરણીય સંરક્ષણ માટે એક અનુકરણીય મોડેલ તરીકે સેવા આપશે.
“મુખ્ય ઉદ્દેશ્ય અદ્યતન ટેકનોલોજી, નિયંત્રિત વાતાવરણ અને વૈજ્ઞાનિક પદ્ધતિઓનો ઉપયોગ કરીને ઉચ્ચ ગુણવત્તાવાળા, રોગમુક્ત અને મજબૂત છોડનું ઉત્પાદન કરવાનો છે. આ પહેલ મોટા પાયે વનીકરણને ટેકો આપશે અને રાજ્યના પર્યાવરણીય સંરક્ષણના પ્રયાસોને વધારશે,” તેમણે જણાવ્યું હતું.
હાઇ-ટેક નર્સરી વાર્ષિક 10 લાખથી વધુ રોપાઓનું ઉત્પાદન કરશે. મિસ્ટ ચેમ્બર, અંકુરણ ચેમ્બર, પોલીહાઉસ અને નેટ હાઉસ સહિતની અદ્યતન સુવિધાઓ પ્રતિકૂળ હવામાન પરિસ્થિતિઓમાં પણ શ્રેષ્ઠ વૃદ્ધિ સુનિશ્ચિત કરશે. માટી વગર છોડ ઉગાડવા જેવી ખાસ તકનીકોનો ઉપયોગ લુપ્ત થવાની આરે રહેલી વનસ્પતિ પ્રજાતિઓનું સંરક્ષણ કરવા માટે કરવામાં આવશે, જે ઝડપી અને સ્વસ્થ વિકાસને પ્રોત્સાહન આપશે. એક બીજ બેંક અને બીજ પ્રક્રિયા એકમ સુવિધાનો ભાગ હશે, જે દુર્લભ અને મૂલ્યવાન બીજને લાંબા ગાળાના સંરક્ષણ માટે વૈજ્ઞાનિક રીતે સંગ્રહિત કરવાની મંજૂરી આપશે.
આ ઉપરાંત, ‘નર્સરી માહિતી કેન્દ્ર’ વિદ્યાર્થીઓ, ખેડૂતો અને પર્યાવરણ ઉત્સાહીઓને છોડની ખેતી, વનીકરણ અને કુદરતી સંરક્ષણ પર માર્ગદર્શન પૂરું પાડશે. આ પ્રોજેક્ટમાં સ્વસ્થ છોડના વિકાસ માટે કાર્બનિક ખાતર ઉત્પન્ન કરવા માટે વર્મીકમ્પોસ્ટિંગ યુનિટનો પણ સમાવેશ થશે. રાજ્યભરમાં મોટા પાયે વૃક્ષારોપણ કાર્યક્રમોને ટેકો આપતા ઊંચા અને મજબૂત રોપાઓ વિકસાવવાની પદ્ધતિઓ અમલમાં મૂકવામાં આવશે. અધિકારીઓએ ભાર મૂક્યો કે નર્સરી માત્ર ગુજરાતના હરિયાળા આવરણમાં વધારો કરશે નહીં. પરંતુ પર્યાવરણીય સંતુલન પણ જાળવી રાખશે અને લુપ્તપ્રાય વનસ્પતિ પ્રજાતિઓના સંરક્ષણમાં નોંધપાત્ર યોગદાન આપશે.
પોલીસ વિભાગમાં મોટા પાયે ફેરફાર: ૩૭ IPS અધિકારીઓની બદલી
ગાંધીનગર: ગુજરાત સરકારે રાજ્ય પોલીસ વહીવટમાં મોટો ફેરફાર કર્યો છે, જેમાં ૩૭ ભારતીય પોલીસ સેવા (IPS) અધિકારીઓની બદલી કરવામાં આવી છે અને તેમને નવી જવાબદારીઓ સોંપવામાં આવી છે. 
મુખ્ય ફેરફારોમાં, ૨૦૧૦ બેચના IPS અધિકારી નિર્લિપ્ત રાયને ગાંધીનગરમાં સ્ટેટ મોનિટરિંગ સેલ (SMC)માંથી બદલી કરવામાં આવી છે અને તેમને રાજકોટ રેન્જના ડેપ્યુટી ઇન્સ્પેક્ટર જનરલ ઓફ પોલીસ (DIG) તરીકે નિયુક્ત કરવામાં આવ્યા છે. ૨૦૦૩ બેચના IPS અધિકારી અશોક કુમાર, જે રાજકોટ રેન્જના ઇન્સ્પેક્ટર જનરલ ઓફ પોલીસ (IGP) તરીકે ફરજ બજાવતા હતા, તેમને ગાંધીનગરમાં IGP, CID (ઇન્ટેલિજન્સ) તરીકે બદલી કરવામાં આવી છે. ૧૯૯૧ બેચના સિનિયર આઈપીએસ અધિકારી ડૉ. શમશેર સિંહને અમદાવાદમાં સિવિલ ડિફેન્સના ડિરેક્ટર અને હોમગાર્ડ્સના કમાન્ડન્ટ જનરલ તરીકે નિયુક્ત કરવામાં આવ્યા છે. ડૉ. શમશેર સિંહ તાજેતરમાં જ બોર્ડર સિક્યુરિટી ફોર્સમાં ડેપ્યુટેશન પરથી ગુજરાત પરત ફર્યા હતા અને જાન્યુઆરીથી પોસ્ટિંગની રાહ જોઈ રહ્યા હતા.
બીજી એક મહત્વપૂર્ણ નિમણૂકમાં, ૨૦૦૫ બેચના આઈપીએસ અધિકારી રાઘવેન્દ્ર વત્સને સુરત શહેરના જોઈન્ટ કમિશનર ઓફ પોલીસ (ક્રાઈમ) પદ પરથી બદલી કરવામાં આવ્યા છે અને તેમને અમદાવાદ રેન્જના આઈજીપી તરીકે નિયુક્ત કરવામાં આવ્યા છે. સરકારે નવી બનાસકાંઠા રેન્જ પણ બનાવી છે, જેનાથી રાજ્યમાં પોલીસ રેન્જની કુલ સંખ્યા ૧૦ થઈ ગઈ છે. ૨૦૦૭ બેચના આઈપીએસ અધિકારી પરિક્ષિતા રાઠોડ, જે સીઆઈડી ક્રાઈમના ઇન્સ્પેક્ટર જનરલ તરીકે ફરજ બજાવી રહ્યા હતા, તેમને નવી રચાયેલી રેન્જના આઈજી તરીકે નિયુક્ત કરવામાં આવ્યા છે.
અન્ય ઘણા અધિકારીઓને પણ નવી જવાબદારીઓ સોંપવામાં આવી છે. અમદાવાદ શહેરમાં એડિશનલ કમિશનર ઓફ પોલીસ (સ્પેશિયલ બ્રાન્ચ) તરીકે ફરજ બજાવ્યા બાદ IPS અધિકારી વિધિ ચૌધરી (2009 બેચ)ને પંચમહાલ-ગોધરા રેન્જના ડેપ્યુટી ઇન્સ્પેક્ટર જનરલ તરીકે નિયુક્ત કરવામાં આવ્યા છે. 2010 બેચના અધિકારી અને વડોદરામાં એડિશનલ કમિશનર ઓફ પોલીસ (ક્રાઇમ એન્ડ લો એન્ડ ઓર્ડર) તરીકે ફરજ બજાવતા ડૉ. લીના પાટિલને ગુજરાત પોલીસ એકેડેમીમાં ટ્રાન્સફર કરવામાં આવ્યા છે. અમદાવાદમાં, શહેર પોલીસ માળખામાં એક નવો ઝોન-8 બનાવવામાં આવ્યો છે. IPS અધિકારી મયુર પાટિલને નવા રચાયેલા ઝોનના ડેપ્યુટી કમિશનર ઓફ પોલીસ તરીકે નિયુક્ત કરવામાં આવ્યા છે. અન્ય ફેરફારોમાં મકરંદ ચૌહાણને IGP પદ પર બઢતી અને ગાંધીનગરમાં DIG (લો એન્ડ ઓર્ડર) તરીકે નિયુક્ત કરવાનો સમાવેશ થાય છે, જ્યારે વાબાંગ જમીરને પોસ્ટિંગ માટે રાહ જોઈ રહ્યા છે. વહીવટી સુધારાના ભાગ રૂપે સુરત, વડોદરા અને રાજ્યના ગુપ્તચર અને ભ્રષ્ટાચાર વિરોધી એકમોમાં ઘણા અધિકારીઓની ઉચ્ચ હોદ્દાઓ પર નિમણૂક કરવામાં આવી છે.
ગુજરાતના 7 જિલ્લામાં ગરમીનું યલો ઍલર્ટ
અમદાવાદ: રાજ્યના મોટાભાગના વિસ્તારોમાં વહેલી સવારે અને મધ્ય રાત્રિ દરમિયાન ઠંડુ વાતાવરણ હોય છે. બપોરથી સાંજ દરમિયાન ગરમ હવામાન રહે છે. આ દરમિયાન કાળઝાળ ગરમીને લઈને હવામાન વિભાગે(IMD) આગાહી કરી છે. જેમાં IMDએ 6 માર્ચથી 10 માર્ચ, 2026 સુધી સૌરાષ્ટ્ર અને દક્ષિણ ગુજરાતના 7 જેટલાં જિલ્લામાં હીટવેવને લઈને યલો ઍલર્ટ જાહેર કર્યું છે. આ સાથે ગુજરાતના દરિયાકાંઠાના કેટલાક વિસ્તારોમાં ગરમ અને ભેજવાળુ હવામાન રહેવાની આગાહી છે.
— IMD Ahmedbad (@IMDAHMEDABAD) March 6, 2026
ગુજરાતભરમાં ગરમીની અસર હવે વર્તાઈ રહી છે. રાજ્યમાં આગામી 4 દિવસ ગરમીનો પારો હાઈ રહેશે. હવામાન વિભાગની આગાહી મુજબ, રાજ્યમાં 6-7 માર્ચમાં ભાવનગર જિલ્લામાં હીટવેવને લઈને યલો ઍલર્ટ જાહેર કરવામાં આવ્યું છે. આ બે દિવસ દરમિયાન ગુજરાતના દરિયાકાંઠાના વિસ્તારોમાં ગરમીનું પ્રમાણ વધુ જોવા મળશે.
— IMD Ahmedbad (@IMDAHMEDABAD) March 6, 2026
આગામી 8 માર્ચથી 10 માર્ચ આ ત્રણ દિવસ દરમિયાન સૌરાષ્ટ્ર અને દક્ષિણ ગુજરાતના 7 જિલ્લામાં હીટવેવની આગાહી છે. જેમાં પોરબંદર, ગીર સોમનાથ, ભાવનગર, ભરૂચ, સુરત, નવસારી અને વલસાડ જિલ્લામાં ગરમીને લઈને યલો ઍલર્ટ જાહેર કર્યું છે. હવામાન વિભાગની આગાહીને પગલે આ 4 દિવસ દરમિયાન મહત્તમ તાપમાન 35 ડિગ્રી અને લઘુતમ તાપમાન 22 ડિગ્રી રહેવાની શક્યતા છે.