Home Blog Page 2027

ફેસબુક અને ઇન્સ્ટાગ્રામ દોઢ કલાક બાદ ફરી થયા શરૂ

દોઢ કલાકથી વધુ સમય સુધી ડાઉન રહ્યા બાદ ફેસબુક અને ઈન્સ્ટાગ્રામની સેવા પુનઃસ્થાપિત કરવામાં આવી છે. મેટાના સોશિયલ મીડિયા પ્લેટફોર્મને સમગ્ર વિશ્વમાં અટકાવવામાં આવ્યું હતું, પરંતુ હવે તેમની સેવા પુનઃસ્થાપિત કરવામાં આવી છે. લગભગ 8.30 વાગ્યાથી ફેસબુક અને ઈન્સ્ટાગ્રામમાં ખલેલ જોવા મળી હતી, ત્યારબાદ ફેસબુક અને ઈન્સ્ટાગ્રામ યુઝર્સના એકાઉન્ટ ઓટોમેટીક લોગ આઉટ થઈ ગયા હતા. જોકે હવે મેટાની સેવા સામાન્ય થઈ ગઈ છે. જ્યારે મેટાના વિવિધ પ્લેટફોર્મ ડાઉન હતા ત્યારે કંપનીના પ્રવક્તા એન્ડી સ્ટોને કહ્યું હતું કે અમે જાણીએ છીએ કે લોકોને અમારી સેવાનો ઉપયોગ કરવામાં મુશ્કેલી પડી રહી છે. અમે તેને ઠીક કરવામાં વ્યસ્ત છીએ. જોકે, હવે કંપનીએ આ સમસ્યા દૂર કરી છે અને મેટાના સર્વર કાર્યરત થઈ ગયા છે.

મેટાએ માફી માંગી

એન્ડીએ X પર કહ્યું કે આજે ટેકનિકલ ખામીને કારણે લોકોને અમારી સેવાનો ઉપયોગ કરવામાં મુશ્કેલીનો સામનો કરવો પડ્યો. અમે તેનાથી પ્રભાવિત લોકો માટે શક્ય તેટલી ઝડપથી આ ખામીને ઠીક કરી છે. મેટાએ યુઝર્સને થયેલી તકલીફ બદલ માફી માંગી છે.

ફેસબુક અને ઇન્સ્ટાગ્રામ પરથી એકાઉન્ટ્સ લોગ આઉટ થયા

આ પહેલા દુનિયાભરમાં ફેસબુક અને ઈન્સ્ટાગ્રામના કરોડો યુઝર્સને ભારે મુશ્કેલીનો સામનો કરવો પડ્યો હતો. ન તો કોઈ ઈન્સ્ટાગ્રામ પર રીલ જોઈ શકતું હતું, ન તો ફેસબુક કામ કરી રહ્યું હતું. મેટાના સોશિયલ મીડિયા પ્લેટફોર્મ પરથી લોકોના એકાઉન્ટ્સ આપમેળે લોગ આઉટ થઈ ગયા હતા. આવી સમસ્યા મેસેન્જર અને થ્રેડમાં પણ જોવા મળી હતી.

વિશ્વભરના વપરાશકર્તાઓને સમસ્યાઓનો સામનો કરવો પડ્યો

DownDetector મુજબ, એક પોર્ટલ જે ઓનલાઈન પ્લેટફોર્મ અને વેબસાઈટ પર નજર રાખે છે, વિશ્વભરના હજારો યુઝર્સે જાણ કરી છે કે ફેસબુક અને ઈન્સ્ટાગ્રામ ડાઉન છે. વિશ્વભરના વપરાશકર્તાઓએ જાણ કરી હતી કે બંને પ્લેટફોર્મ કામ કરી રહ્યા નથી. DownDetector પર, લોકો રીઅલ ટાઇમમાં વેબસાઇટ્સ અને સેવાઓ વિશે જાણ કરી શકે છે.

નોટ આઉટ @ 86 : અરવિંદભાઈ શાહ 

શ્રીમદ્-રાજચંદ્ર-નિજાભ્યાસ-મંડપ તથા વિહાર-ભવન ટ્રસ્ટ(વડવા-ઈડર-અમદાવાદ)ના પ્રમુખ-ટ્રસ્ટી, ગુજરાત ઇન્સ્ટિટ્યુટ ઓફ સિવીલ એન્જિનિયર્સ એન્ડ આર્કિટેક્ટસના ભૂતપૂર્વ પ્રમુખ, તેની સોશિયલ સિક્યુરિટી સ્કિમના સ્થાપક, બત્રીસી જૈન સામાજિક સુરક્ષા યોજનાના સ્થાપક, લાયન્સ ઇન્ટરનેશનલ-ડિસ્ટ્રિક્ટ ૩૨-બીના પૂર્વ કેબિનેટ સેક્રેટરી, “ભ્રાતૃભાવ” મેગેઝીનના સંપાદક, “ચાલો સામાયિક કરીએ, સમતામાં રહીએ” પુસ્તકના સંકલનકર્તા અને જૈન-સમાજના અગ્રણી અરવિંદભાઈ શાહની વાત સાંભળીએ તેમની પાસેથી.

એમની સાથેની વાતચીતનો એક્સ-રે :

અરવિંદભાઈનો જન્મ અમદાવાદ, દરિયાપુરમાં. પિતા ધાર્મિક શિક્ષક અને જૈન વિધીકાર, જૈન-ધર્મ-પ્રચારક સભામાં આગળ પડતું કામ કરે. શ્રીમદ્ રાજચંદ્રજીને વાંચીને, સમજીને વિશેષ એકાંતમાં રહેતા. વડવામાં શ્રીમદ્ રાજચંદ્ર નિજાભ્યાસ-મંડપના પ્રમુખ. ભાઇ માટે કરેલી ‘શુદ્ધ-ઘી’ની દુકાન, ભાઇના અવસાન બાદ તેઓ ચલાવતા. અરવિંદભાઈને એક ભાઈ અને એક બહેન. શાળાનો અભ્યાસ ન્યુ હાઈસ્કૂલમાં. ડિપ્લોમા-ઇન-સિવિલ-એન્જિનિયરિંગ એલ.ડી. એન્જિનિયરિંગ કોલેજમાંથી. એકાદ વર્ષ સર્વિસ કરીને ડેવલોપર તરીકે કામ શરૂ કર્યું. રંગ શબ્દથી શરૂ થતી (372 ફ્લેટ્સની રંગસાગર સ્કીમ વગેરે) 20 હાઉસિંગ સોસાયટીઓ બનાવી.

નિવૃત્તિની પ્રવૃત્તિ :

નિવૃત્તિ પછી ધાર્મિક-કાર્યોમાં રસ લેવાનું શરૂ કર્યું! સવારે 6:00 વાગે ઊઠે. લાફિગ-ક્લબની સ્ટ્રેચીગ-એકસરસાઇઝ, પ્રાણાયામ પછી રાજપથ ક્લબમાં ચાલે. આવીને પ્રાત:કાળની સ્તુતિ-ભક્તિ કરે, નવકારશી થતા નાસ્તો કરે, દેરાસરમાં સેવા-પુજા કરે, જ્ઞાન-મંદિરમાં 10 થી 11 સ્વાધ્યાય, ઘરે આવી સામાયિક અને દોઢ વાગ્યે જમે. બપોરે આરામ, વાંચન અને સેવાનાં કાર્યો. સાંજે સામાયિક કરે. ચોમાસામાં ચોવિહાર નક્કી, બાકી સાડા સાત સુધીમાં જમી લે. પછી ધાર્મિક વાંચન. ત્યારબાદ ટીવીમાં સમાચાર જુવે 10:30 વાગ્યે સુઈ જાય. સાડા ત્રણ વર્ષ પહેલા, પત્ની અનસુયાબેનનું અવસાન થયું. પત્નીનો દરેક પ્રવૃત્તિમાં સાથ. તેઓ લાયન્સ-ક્લબના સ્થાપક-પ્રમુખ તથા એન્જિનિયરિંગ ઇન્સ્ટિટ્યૂટની લેડિઝ-વિંગના સ્થાપક-પ્રમુખ. તેમને ત્રણ દીકરા છે (ત્રણેને એક-એક દીકરી). દીકરાઓ વારાફરતી રાત્રે એમની સાથે હોય! તેમને બહુ સાચવે છે!

 

શોખના વિષયો :

ધાર્મિક-વાંચન ગમે. છેલ્લાં 25 વર્ષથી રાજચંદ્ર-ગ્યાનમંદિર ખાતે દર શનિ-રવિવારે સ્વાધ્યાયનું આયોજન કરે, પૂજ્ય રાકેશભાઇનો સંપર્ક કરી અમદાવાદમાં દર વર્ષે તેમના જાહેર-વ્યાખ્યાનનું આયોજન કરે. ક્રિકેટનો શોખ. યુવક-ટીમના તેઓ કેપ્ટન હતા! ટીવીમાં મેચ આવતી હોય તો રસપ્રદ મેચો જરૂર જુએ. પ્રવાસનો શોખ. અમેરિકા, કેનેડા, ભારતમાં ધાર્મિક-સ્થળોની યાત્રા, સમેત શિખરજીની પાંચ વાર યાત્રા કરી છે. મિત્રોએ “ફ્રેન્ડ્સ-ફોર-એવર” નામનું ગ્રુપ બનાવ્યું છે. રવિવારે સાંજે જોડે જમે, પ્રવાસ ઉપર જાય. ધાર્મિક ભક્તિ-પદો તથા સુગમ-સંગીત સાંભળવું ગમે.

ઉંમર સાથે કેવી રીતે કદમ મિલાવો છો?:

પ્રભુ કૃપા છે! બંને ઘૂંટણનાં ઓપરેશન થયાં છે પણ ચાલવામાં કોઈ તકલીફ નથી. સ્ટ્રેસ્ચિંગ-એક્સરસાઇઝ તથા પ્રાણાયમથી ફીટ રહેવાય છે. ઇડરનાં 400 પગથિયાં ચડી જાય છે! બીપી-કોલેસ્ટ્રોલની ગોળી રોજ લે છે. દરવર્ષે એકવાર ફુલ ચેકઅપ કરાવે છે.

 

યાદગાર પ્રસંગ:  

લાયન્સ-ક્લબ ઓફ નોર્થ-અમદાવાદના પ્રમુખ તરીકેના વર્ષમાં 200 પ્રવૃત્તિઓ કરેલી, લાયન્સ-ઇન્ટરનેશનલ તથા ડિસ્ટ્રિક્ટ તરફ્થી અનેક એવોર્ડ પ્રાપ્ત કરેલ, દત્તક લીધેલ તેલાવ ગામના વિકાસ માટે શાળામાં મેદાન, પંચાયતનો રૂમ, રક્તદાન કેમ્પ અને ગ્રામ-વિકાસનાં કાર્યો કર્યાં. અઠવાડિયાની શિબિરમાં દરરોજ તત્કાલીન મુખ્યમંત્રી બાબુભાઈ પટેલની મિનિસ્ટ્રીમાંથી એક-એક મિનિસ્ટર આવતા. ગુજરાત-ઇન્સ્ટિટયૂટ-ઓફ-સિવિલ-એન્જિનિયર્સના બે વાર પ્રમુખ હતા. નવો કોન્ફરન્સ-હોલ તથા એન્વાયર્નમેન્ટ-લેબોરેટરીની શરુઆત કરી, સ્વયં-સંચાલિત સોશિયલ-સિક્યુરિટી સ્કીમ શરૂ કરાવી. જ્ઞાતિમાં પણ સામાજિક-સુરક્ષા યોજના શરૂ કરી. પછી કેટલીક જ્ઞાતિઓમાં પણ સોશિયલ-સિક્યુરિટી-સ્કીમ કરાવી. સત્કાર્ય-સેવા-સંઘ-રોગ-નિદાન-કેન્દ્રમાં 45 વર્ષ માનદ-મંત્રી રહ્યા. પાલડી વિસ્તારમાં વાસણા-બેરેજના પાણીનું લેવલ નક્કી કરાવ્યું જેથી ચાલુ બાંધકામવાળા ઘરોને અસર ન થાય. પ્રજ્ઞાચક્ષુ કાંતિભાઇ ગાંધીના નિવાસસ્થાન થી અંધ-કલ્યાણ-કેન્દ્રની પ્રવૃત્તિઓ કરતા. રાહત દરે રાણીપ ખાતે જમીન ફાળવણી કરાવી, જ્યાં 2 માળના વિશાળ મકાનમાં અંધ-બહેનો માટે હોસ્ટેલ બની છે.

નવી ટેકનોલોજી કેટલી વાપરો છો ?:

મોબાઇલ અને ટેકનોલોજીનું વ્યસન થઈ જાય છે તેથી તેનો મર્યાદિત ઉપયોગ કરે છે પણ સંસ્થાઓના કામકાજમાં ટેકનોલોજી પૂરેપૂરી વપરાય છે.

શું ફેર લાગે છે “ત્યાર”માં અને “અત્યાર”માં? 

સમાજમાં અને સ્વૈચ્છિક સંસ્થાઓમાં પહેલા ખરેખર સેવા થતી. આજે સેવાની સાથે દેખાડો વધી ગયો છે. યુવાનોને વડીલોએ સાચો રસ્તો બતાવી નિસ્વાર્થ-સેવા તરફ વાળવા જોઈએ.

 

આજની પેઢી સાથે સંકળાયેલા છો? 

ધાર્મિક સંસ્થાઓની શિબિરોમાં વડિલો સાથે યુવાનો પણ પ્રવૃત્ત રહે છે. આજનો યુવાન ધર્મ પ્રત્યે નેગેટિવ છે. ઘરના ધાર્મિક સંસ્કાર હોય તો જલ્દી કેચ-અપ કરી લે. અંધ-કલ્યાણ-કેન્દ્રમાં તેઓ પ્રમુખ હતા ત્યારે અંધ યુવાનોને નેશનલ અને ઇન્ટરનેશનલ-લેવલ સુધી ચેસ-ટુર્નામેન્ટ રમાડતા.

સંદેશો :

યુવાનીમાં માણસ પોતાના સ્વાસ્થ્ય માટે જાગૃત હોતા નથી. યુવા-ઉમરે જાગૃત થાય, ઘરનાં બાળકો અને સ્ત્રી-વર્ગને જાગૃત કરે તો સ્વાસ્થ્યના પ્રશ્નો ઓછા થાય અને ઘણાં કુટુંબો હેરાન થતાં બચી જાય. પરિણામ કર્મજન્ય છે, છતાં પુરુષાર્થ અવશ્ય કરવો જોઇએ.

 

CBI ને શેખ શાહજહાંની કસ્ટડી ન મળતા ED કોલકાતા હાઈકોર્ટ પહોંચી

સેન્ટ્રલ તપાસ એજન્સી એન્ફોર્સમેન્ટ ડિરેક્ટોરેટ (ED) એ CBIને શેખ શાહજહાંની કસ્ટડી ન મળવાને લઈને કોલકાતા હાઈકોર્ટનો સંપર્ક કર્યો છે. EDએ કોલકાતા હાઈકોર્ટના ચીફ જસ્ટિસને જણાવ્યું કે સીબીઆઈને રાજ્ય પોલીસ હેડક્વાર્ટરમાં શું સામનો કરવો પડ્યો. કોલકાતા હાઈકોર્ટે EDને બુધવારે અરજી દાખલ કરવા જણાવ્યું છે.

 

ED સત્તાવાર હુમલો: પશ્ચિમ બંગાળ પોલીસની સીઆઈડીએ કોલકાતા હાઈકોર્ટના આદેશ પછી પણ ઈડી અધિકારીઓ પર હુમલાના મુખ્ય આરોપી શેખ શાહજહાંને સીબીઆઈને સોંપ્યો નથી. શેખને કસ્ટડીમાં લેવા માટે સીબીઆઈની ટીમ અર્ધલશ્કરી દળો સાથે કોલકાતામાં સીઆઈડી ઓફિસ પહોંચી હતી, પરંતુ કેન્દ્રીય તપાસ એજન્સીને ખાલી હાથે પરત ફરવું પડ્યું હતું.

બંગાળની મમતા સરકારે હાઈકોર્ટના નિર્ણય સામે સુપ્રીમ કોર્ટનો સંપર્ક કર્યો છે. કોર્ટમાં બુધવારે (6 માર્ચ, 2024) કેસની સુનાવણી થઈ શકે છે. વાસ્તવમાં, બંગાળ સરકાર તરફથી હાજર રહેલા વરિષ્ઠ વકીલ અભિષેક સિંઘવીએ જસ્ટિસ સંજીવ ખન્ના અને જસ્ટિસ દીપાંકર દત્તાની બેંચ સમક્ષ આ બાબતનો ઉલ્લેખ કર્યો હતો અને મંગળવારે તાત્કાલિક સુનાવણીની માંગ કરી હતી. આ વાત એવા સમયે સામે આવી રહી છે જ્યારે EDએ શાહજહાં શેખના એપાર્ટમેન્ટ અને જમીન સહિત રૂ. 12.78 કરોડની સંપત્તિ જપ્ત કરી છે.

કલકત્તા હાઈકોર્ટે શું આદેશ આપ્યો છે?

5 જાન્યુઆરીએ કોલકાતા હાઈકોર્ટે ઈડી અધિકારીઓ પર હુમલાની તપાસ સીબીઆઈને સોંપવાનો આદેશ આપ્યો હતો. કોર્ટે એમ પણ કહ્યું હતું કે શાહજહાં શેખની કસ્ટડી સાંજે 4.30 વાગ્યા સુધી સીબીઆઈને આપવામાં આવે.

ED અને બંગાળ સરકારનું શું કહેવું છે?

ઈડી અને પશ્ચિમ બંગાળ સરકારે 17 જાન્યુઆરીના આદેશ સામે હાઈકોર્ટમાં અરજી કરી હતી. આ આદેશમાં કહેવામાં આવ્યું હતું કે ED અધિકારીઓ પર ટોળાના હુમલાની તપાસ માટે CBI અને રાજ્ય પોલીસની સંયુક્ત વિશેષ તપાસ ટીમ (SIT)ની રચના કરવામાં આવે. આના સંદર્ભમાં, ઇડી ઇચ્છે છે કે તપાસ ફક્ત સીબીઆઇને સોંપવામાં આવે, જ્યારે રાજ્ય સરકાર ઇચ્છે છે કે આ કેસ ફક્ત બંગાળ પોલીસને સોંપવામાં આવે.

Facebook-Instagram અચાનક DOWN, એકાઉન્ટ્સ log out

સોશિયલ મીડિયા પ્લેટફોર્મ ફેસબુક અને ઇન્સ્ટાગ્રામ મંગળવારે રાત્રે અચાનક ડાઉન થઈ ગયા. યુઝર્સના સોશિયલ મીડિયા એકાઉન્ટ્સ અચાનક લોગ આઉટ થઈ રહ્યા છે. મેટાની ઘણી સેવાઓ ડાઉન છે. ઘણા લોકોના ફેસબુક એકાઉન્ટ્સ જાતે જ લોગ આઉટ થઈ રહ્યા છે. જ્યારે ઈન્સ્ટાગ્રામના ઘણા ફીચર્સ કામ નથી કરી રહ્યા.

યોગી કેબિનેટનું વિસ્તરણ : 4 નવા મંત્રીઓએ લીધા શપથ

ઉત્તર પ્રદેશમાં યોગી સરકારના બીજા કાર્યકાળના પ્રથમ કેબિનેટ વિસ્તરણ માટે ધારાસભ્યોની શપથવિધિ યોજાઈ હતી. રાજ્યપાલ આનંદી બેન પટેલે સુહેલદેવ ભારતીય સમાજ પાર્ટીના અધ્યક્ષ ઓપી રાજભરને શપથ લેવડાવ્યા હતા. આ સિવાય બીજેપી એમએલસી દારા સિંહ ચૌહાણે પણ મંત્રી પદના શપથ લીધા છે.

યોગી કેબિનેટમાં શપથ લેનારા ત્રીજા ધારાસભ્યનું નામ અનિલ કુમાર છે, જેઓ રાષ્ટ્રીય લોકદળ તરફથી પુરકાજી બેઠક પરથી ચૂંટાયા હતા. તેઓ ત્રણ વખત ધારાસભ્ય છે અને જયંત ચૌધરીના નજીકના માનવામાં આવે છે. આ સિવાય સાહિબાબાદના ધારાસભ્ય સુનીલ શર્માએ પણ મંત્રી પદના શપથ લીધા છે. સુનીલ શર્માની ગણતરી યુપીના મોટા બ્રાહ્મણ ચહેરાઓમાં થાય છે. 2022માં તેમને સૌથી વધુ મતોથી જીતનારા ધારાસભ્યોની યાદીમાં સામેલ કરવામાં આવ્યા હતા. તેઓ સાહિબાબાદથી ત્રણ વખત ધારાસભ્ય ચૂંટાયા છે.

કોલકાતા હાઈકોર્ટે સંદેશખાલી કેસની તપાસ CBIને સોંપી

કોલકાતા હાઈકોર્ટે પશ્ચિમ બંગાળના સંદેશખાલીમાં એન્ફોર્સમેન્ટ ડિરેક્ટોરેટ (ED) અધિકારીઓ પરના હુમલાની તપાસ CBIને સોંપી. કોર્ટે આ કેસના મુખ્ય આરોપી શાહજહાં શેખને આજે સાંજે 4.30 વાગ્યા સુધીમાં સીબીઆઈને સોંપવાનો આદેશ આપ્યો છે. હાઈકોર્ટના આ નિર્ણય સામે પશ્ચિમ બંગાળની મમતા સરકારે સુપ્રીમ કોર્ટમાં અરજી કરી છે. કોલકાતા હાઈકોર્ટના મુખ્ય ન્યાયાધીશ ટી.એસ. શિવજ્ઞાનમની અધ્યક્ષતાવાળી ડિવિઝન બેન્ચે આદેશ આપ્યો કે મંગળવારે સાંજે 4.30 વાગ્યા સુધીમાં આ આદેશનો અમલ કરવામાં આવે.

ED અને બંગાળ સરકારે કયા આદેશને પડકાર્યો?

ED અને પશ્ચિમ બંગાળ સરકાર બંનેએ ED અધિકારીઓ પર ટોળાના હુમલાની તપાસ માટે CBI અને રાજ્ય પોલીસની સંયુક્ત વિશેષ તપાસ ટીમ (SIT) ની રચના કરવાના 17 જાન્યુઆરીના આદેશને પડકારતી અલગ-અલગ અપીલ દાખલ કરી હતી. આદેશ આપવામાં આવ્યો હતો. EDએ કહ્યું કે આ કેસની તપાસ માત્ર CBIએ કરવી જોઈએ. પશ્ચિમ બંગાળ સરકારે કોર્ટને અપીલ કરી હતી કે અધિકારીઓ પર હુમલાની તપાસ રાજ્ય પોલીસને સોંપવામાં આવે.

શું છે મામલો?

ED PDS કૌભાંડ કેસમાં શાહજહાં શેખના પરિસરમાં સર્ચ કરી રહી હતી. આ દરમિયાન ટોળાએ EDની ટીમ પર હુમલો કર્યો હતો. આ અંગે સેન્ટ્રલ ઇન્વેસ્ટિગેશન એજન્સીએ નિવેદન જારી કરીને કહ્યું હતું કે 800થી 1000 લોકોએ જીવ લેવાના ઇરાદે હુમલો કર્યો હતો. આ કેસનો મુખ્ય આરોપી શાહજહાં શેખ હાલમાં મહિલાઓની જાતિય સતામણી અને જમીન પચાવી પાડવાના ગુનામાં સંદેશખાલીની જેલમાં છે.

ઉનાળા પહેલાં બેંગલુરુમાં પાણીના ધાંધિયાઃ CMને ત્યાં જળસંકટ

બેંગલુરુઃ કર્ણાટના હાઇટેક શહેર બેંગલુરુ જળસંકટથી ઝઝૂમી રહ્યું છે. ક્યારેક ગાર્ડન સિટીને નામે ઓળખાતું શહે ટીપેટીપાં માટે તરસી રહ્યું છે. આ માત્ર બેંગલુરુ માટે ચિંતાનો વિષય નથી, પણ દેશઆખા માટે એક મોટો સબક છે. શહરનો એક મોટો હિસ્સો ટેન્કરો પર નિર્ભર છે.

અહીં લાખો લોકો પાણી માટે વલખાં મારી રહ્યા છે. સોસાયટીઓ અને કોલોનીઓમાં પાણીની બહુ ખેંચ છે, જેથી ટેન્કરોથી પાણી મગાવવામાં આવી રહ્યું છે, તેમ છતાં પાણીની જરૂરિયાત પૂરી નથી થતી.

મુખ્ય મંત્રી નિવાસસ્થાને પણ પાણીની ખેંચ વર્તાવા માંડી છે. તેમના નિવાસસ્થાને પણ ટેન્ક આવ-જા કરી રહ્યાં છે. સરકાર લોકોની સમસ્યાને ઉકેલવા પ્રયાસ કરી રહી છે.

શહેરની એક હાઉસિંગ સોસાયટીમાં ગંભીર જળસંકટને પગલે પાણીના દુરુપયોગ પર રૂ. 5000નો દંડ લગાવવાની નોટિસ જારી કરવામાં આવી છે. આવી નોટિસ અનેક સોસાયટીઓમાં જારી કરવામાં આવી રહી છે. આ સ્થિતિ પર નજર રાખવા એક વિશેષ સુરક્ષા કર્મચારીને તહેનાત કરવાનો નિર્ણય કરવામાં આવ્યો છે. અનેક હાઉસિંગ સોસાયટીઓમાં રહેવાસીઓને દૈનિક પાણીના ઉપયોગમાં સાવધાની વર્તવાની સલાહ આપવામાં આવી છે. શહેરના પ્રભાવિત વિસ્તારોમાં વ્હાઇટફીલ્ડ, યેલહંકા અને કનકપુરા સામેલ છે.

શહેરવાસીઓને દિવસદીઠ 3000 મિલિયન લિટર પાણીની જરૂર છે, પરંતુ તેમને કાવેરી નદીથી 1450 મિલિયન લિટર પાણી જ મળી રહ્યું છે. આવામાં શહેરવાસીઓને પ્રતિ દિન 1680 મિલિયન લિટર પાણીની ખેંચનો સામનો કરવો પડે છે.

રાજ્યના ઉપ મુખ્ય મંત્રી ડી. શિવકુમારે રાજ્યમાં જળ ટેન્કરોના માલિકોને સાત માર્ચ સુધી ટેન્કરોના રજિસ્ટ્રેશનનો આદેશ આપ્યો છે, અન્યથા તેમના ટેન્કર જપ્ત કરવામાં આવશે. મહાનગરપાલિકાના મુજબ બેંગલુરુમાં કુલ 3500 પાણીનાં ટેન્કરોમાંથી માત્ર 10 ટકા (219 ટેન્કરો)એ જ રજિસ્ટ્રેશન કરાવ્યાં છે.

 

 

 

 

પૂર્વ સાંસદ ધનંજય સિંહ અપહરણ કેસમાં દોષી જાહેર, આવતીકાલે સજાનું એલાન

પૂર્વ સાંસદ ધનંજય સિંહ અને સહયોગી સંતોષ વિક્રમને એડિશનલ સેશન જજ શરદ ત્રિપાઠીએ અપહરણ અને ખંડણીના કેસમાં દોષિત ઠેરવ્યા હતા. બુધવારે સજાની સુનાવણી હાથ ધરવામાં આવશે. મુઝફ્ફરનગરના રહેવાસી નમામી ગંગેના પ્રોજેક્ટ મેનેજર અભિનવ સિંઘલે 10 મે 2020ના રોજ લાઈન બજાર પોલીસ સ્ટેશનમાં ધનંજય અને તેના ભાગીદાર વિક્રમ વિરુદ્ધ અપહરણ, ખંડણી અને અન્ય કલમો હેઠળ FIR નોંધાવી હતી.

ફરિયાદીનું અપહરણ

સંતોષ વિક્રમ તેના બે સહયોગીઓ સાથે મળીને ફરિયાદીનું અપહરણ કરીને તેને પૂર્વ સાંસદના ઘરે લઈ ગયો હતો, જ્યાં ધનંજય સિંહ પિસ્તોલ લઈને આવ્યો હતો અને તેની સાથે દુર્વ્યવહાર કર્યો હતો અને ફરિયાદી પર હલકી ગુણવત્તાની સામગ્રી સપ્લાય કરવા દબાણ કર્યું હતું. ઇનકાર કરવા પર, તેણે ધમકી આપી અને ખંડણી માંગી. આ મામલે FIR નોંધવામાં આવી હતી. આ પછી પૂર્વ સાંસદની ધરપકડ કરવામાં આવી હતી અને બાદમાં તેમને જામીન મળી ગયા હતા. કોર્ટે આજે ધનંજય સિંહને દોષી ઠેરવ્યો હતો અને તેને જેલમાં મોકલી આપ્યો હતો.

લોકસભા ચૂંટણી પહેલા ધનંજય સિંહને મોટો આંચકો

લોકસભા ચૂંટણી પહેલા પૂર્વ સાંસદ ધનંજય સિંહને મોટો ઝટકો લાગ્યો છે. ધનંજય સિંહ 2024માં જૌનપુર લોકસભા સીટ પરથી પોતાનું નસીબ અજમાવવાની તૈયારી કરી રહ્યા છે. 2 માર્ચે, તેણે સોશિયલ મીડિયા પ્લેટફોર્મ X પર પોસ્ટ કર્યું ‘મિત્રો! તૈયાર રહો…લક્ષ્ય માત્ર એક લોકસભા 73, જૌનપુર છે. ‘જીતેગા જૌનપુર, જીતેંગે હમ’ મેસેજ સાથેની એક પોસ્ટ શેર કરવામાં આવી હતી. તેણે પોતાની પોસ્ટ દ્વારા પોતાનો ઈરાદો સ્પષ્ટ કર્યો. હવે તમામની નજર આવતીકાલે સજાની સુનાવણી પર છે.લધનંજય સિંહે 27 વર્ષની વયે 2002માં જૌનપુરથી અપક્ષ ઉમેદવાર તરીકે વિધાનસભા ચૂંટણી લડી હતી અને જીતીને વિધાનસભામાં પહોંચ્યા હતા. 2007માં તેઓ ફરી એકવાર JDUની ટિકિટ પર ચૂંટણી લડ્યા અને ધારાસભ્ય બન્યા. 2009માં તેમણે BSPની ટિકિટ પર જૌનપુર લોકસભા સીટથી પોતાનું નસીબ અજમાવ્યું અને જીતીને સંસદમાં પહોંચ્યા.

Paytmને બનાવીશું એશિયાનો લીડરઃ વિજય શેખર શર્મા

ટોક્યોઃ Paytm હાલના સમયે નિયામકીય મુશ્કેલીઓ સામે ઝઝૂમી રહી છે. જોકે Paytmના સ્થાપક વિજય શેખર શર્માનું માનવું છે કે ટૂંક સમયમાં આ મુશ્કેલીઓ દૂર થશે અને એક મજબૂત મંચનું કામ કરશે. જાપાનના ટોક્યોમાં આયોજિત એક ફાઇનાન્શિયલ ટેક કોન્ફરન્સમાં કહી હતી. RBIએ જ્યારથી Paytmની વિરુદ્ધ કાર્યવાહી કરી છે, ત્યારથી અત્યાર સુધી સૌપ્રથમ વાર Paytmના CEO વિજય શેખર શર્માએ જાહેરમાં ઉપસ્થિત થયા હતા.

કેટલીક વાર તમારી ટીમના લોકો અને સલાહકાર એને યોગ્ય રીતે સમજાવવામાં નિષ્ફળ જાય છે. આવામાં તમે એ બાબતને કેવી રીતે જુઓ છો, એ મહત્ત્વનું છે. દેશમાં સ્ટાર્ટઅપ માટે હેલ્થી માહોલ બનાવવામાં નિયામકની મોટી ભૂમિકા છે. આ એક મોટો દિવસ છે, જ્યારે તેમની પાસે શીખવા માટે અનેક બાબત છે અને ઝઝૂમવા માટે નવી તકો છે. એશિયાની પાસે આગામી પેઢી માટે એક નાણાકીય સિસ્ટમ બનાવવાની તક છે અને તેઓ Paytmને એશિયાના લીડર બનતા જોવા માગે છે.

RBIએ Paytm પેમેન્ટ્સ બેન્ક પર 29 ફેબ્રુઆરી પછી નવી ડિપોઝિટ્સ લેવા અને ક્રેડિટ ટ્રાન્ઝેક્શન્સ પર પ્રતિબંધ મૂકી દીધો હતો. અને પછી Paytmના શેરો 42 ટકા તૂટ્યા હતા. વિજય શેખર શર્માની એમાં 51 ટકા  હિસ્સો છે અને બાકીનો હિસ્સો Paytmનો છે. હાલમાં એનું બોર્ડ ફરી બનાવવાની પહેલ હેઠળ વિજય શર્માએ રાજીનામું આપી દીધું છે.  જોકે તેઓ કંપનીને ટ્રેક કર લાવવાના પ્રયાસ કરી રહ્યા છે. કંપનીએ એક્સિસ બેન્કની સાથે સોદો કરી લીધો છે અને હવે અન્ય બેન્ક સાથે ભાગીદારી માટે વાતચીત જારી છે.   

 

 

 

 

 

 

 

બળવાખોર વિધાનસભ્યોએ SCમાં સ્પીકરના નિર્ણયને પડકાર્યો

નવી દિલ્હીઃ હિમાચલ પ્રદેશના કોંગ્રેસના છ બળવાખોર વિધાનસભ્યોએ સુપ્રીમ કોર્ટમાં ધા નાખી છે. આ વિધાનસભ્યોએ સ્પીકરના અયોગ્ય ઠેરવવાના નિર્ણયને કોર્ટમાં પડકાર આપ્યો છે. સ્પીકરે વિધાનસભામાં બજેટ દરમ્યાન ગેરહાજર રહેવાને આધારે આ વિધાનસભ્યોને ગેરલાયક ઠેરવ્યા હતા. વિધાનસભ્યોએ સ્પીકરના આ નિર્ણયને ખોટો ઠેરવતાં રદ કરવાની માગ કરી છે.

હાલમાં રાજ્યસભાની ચૂંટણીમાં કોંગ્રેસના આ છ વિધાનસભ્યોએ ક્રોસ વોટિગ કર્યું હતું, જેને પગલે ભાજપના હર્ષ મહાજનને વિજયી જાહેર કરવામાં આવ્યા હતા અને કોંગ્રેસી ઉમેદવાર અભિષેક મનુ સિંધવીએ હારનો સામનો કરવો પડ્યો હતો.

ત્યાર બાદ આ વિધાનસભ્યો ભાજપના સમર્થનમાં નિવેદનો કરતા જોવા મળ્યા હતા. આ વિધાનસભ્યોની ક્રોસ વોટિંગ પછી રાજ્યના સુખવિંદર સુખુની સરકાર પર સંકટના વાદળો ઘેરાવા લાગ્યાં છે, જ્યારે કોંગ્રેસના બળવાખોર વિધાનસભ્યો સામે આકરાં પગલાં લેવાની માગ થઈ હતી.

બીજી બાજુ, ભાજપે એ વિધાનસભ્યોની વિરુદ્ધ કાર્યવાહી શરૂ કરી દીધી છે,મ જેના પર 28 ફેબ્રુઆરીએ વિધાનસભામાં બજેટ પસાર કરતાં પહેલાં હંગામો કરવાનો આરોપ લાગેલો છે. એ કેસ વિશેષાધિકાર સમિતિને મોકલવામાં આવ્યો છે.

જોકે વિધાનસભા અધ્ય કુલદીપ સિંહ પઠાનિયાએ મિડિયાને કહ્યું હતું કે હંગામા મામલે કેટલાક સભ્યોને નોટિસ મળી છે અને મેં પણ એની નોંધ લીધી છે. સંસદની અંદર ભાજપના વિધાનસભ્યો દ્વારા આચરવામાં આવેલી ગેરશિસ્ત નિયમો અને બંધારણીય જોગવાઈઓના ઉલ્લંઘન હેઠળ કાર્યવાહી યોગ્ય છે અને આ સંબંધે નોટિસ જારી કરવામાં આવી રહી છે. તેમણે કહ્યું હતું કે વિધાનસભ્યોએ ગરિમાપૂર્ણ રીતે વિરોધ દર્શાવી શક્યા હોત, પરંતુ તેમણે કાગળ ફેંકીને વિરોધ દર્શાવ્યો હતો, જે સ્વીકાર્ય નથી.

 

 

 

 

 

 

 

 

1...2,0262,0272,028...5,116Page 2,027 of 5,116