Home Blog Page 2354

‘વર્લ્ડકપ માટે મોહમ્મદ શામીને શુભેચ્છા નહીં આપું’: હસીન જહાં (ભૂતપૂર્વ પત્ની)

કોલકાતાઃ હાલ રમાતી આઈસીસી મેન્સ ODI વર્લ્ડ કપ-2023 સ્પર્ધામાં ભારતીય ટીમ માટે જોરદાર બોલિંગ દેખાવ કરનાર ફાસ્ટ બોલર મોહમ્મદ શામીને શુભેચ્છા આપવાનો એની ભૂતપૂર્વ પત્ની હસીન જહાંએ ઈનકાર કર્યો છે. ઉલ્લેખનીય છે કે, 33 વર્ષીય મોહમ્મદ શામીને સ્પર્ધામાં પહેલી ચાર મેચમાં રમવાનો મોકો મળ્યો નહોતો. પરંતુ પાંચમી મેચમાં એને રમવા મળ્યું એ સાથે જ તે છવાઈ ગયો છે અને હાલ ટીમનો સૌથી સફળ બોલર બન્યો છે. એણે 4 મેચમાં 7.00ની સરેરાશ સાથે 16 વિકેટ લીધી છે. પાંચ-વિકેટનો દેખાવ એણે બે મેચમાં કરી બતાવ્યો છે. તદુપરાંત ચાર-વિકેટ એણે એક મેચમાં લીધી છે. આ સનસનાટીભર્યો દેખાવ એણે ન્યૂઝીલેન્ડ, ઈંગ્લેન્ડ, શ્રીલંકા અને સાઉથ આફ્રિકા સામેની મેચોમાં કર્યો હતો.

આખો દેશ આજે શામીના દેખાવની પ્રશંસા કરી રહ્યો છે અને બાકીની મેચોમાં પણ તે આવો જ દેખાવ કરે એવી તેને શુભેચ્છા આપવામાં આવી રહી છે, પરંતુ એની ભૂતપૂર્વ પત્ની હસીન જહાં શામીને શુભેચ્છા આપવા રાજી નથી. ન્યૂઝ નેશનને આપેલા એક ઈન્ટરવ્યૂમાં એણે કહ્યું કે, હું ભારતીય ટીમને મારી શુભેચ્છા આપીશ, પણ એને નહીં.

હસીન જહાંને મોહમ્મદ શામીથી એક પુત્રી થઈ છે – આયરા. તે આજે 8 વર્ષની થઈ છે.

મોહમ્મદ શામી પર હસીન જહાંએ વ્યભિચાર, વૈવાહિક બળાત્કાર, મેચ-ફિક્સિંગ અને ઘરેલુ હિંસાના આરોપ મૂક્યા બાદ બંને જણ તલાકના ખૂબ કઠિન સમયગાળામાંથી પસાર થયાં હતાં. શામીએ આ બધા આરોપોને રદિયો આપ્યો હતો. શામીની ધરપકડ કરાવવા માટે અરેસ્ટ વોરન્ટ બહાર પાડવામાં આવ્યું હતું. પરંતુ તેના અમલ પર પશ્ચિમ બંગાળની એક સેશન્સ અદાલતે સ્ટે ઓર્ડર મૂક્યો છે. તે ઓર્ડરને રદબાતલ કરાવવા માટે હસીન જહાંએ કલકત્તા હાઈકોર્ટમાં અપીલ કરી હતી, પણ હાઈકોર્ટે તેને નકારી કાઢી હતી. તે પછી હસીન જહાંએ સુપ્રીમ કોર્ટમાં અપીલ કરી છે.

રોઝ સામા પુડીંગ

દિવાળી સ્પેશ્યલ રેસિપી

રોઝ સામા પુડીંગ

સામગ્રીઃ સામો 1 કપ, દૂધ 1 લિટર, ફેંટેલું ક્રીમ, ફળોના ટુકડા (એપલ, કેળા, દ્રાક્ષ, સંતરું) અથવા તમારી પસંદગીના ફળો, કાજુ-પિસ્તા-બદામની કતરણ, એલચી પાવડર, રુહ અફઝા અથવા રોઝ સિરપ 2 ટે.સ્પૂન, સાકર, ગુલાબની પાંખડીઓ

રીતઃ સામાને અડધો કલાક માટે પાણીમાં ભીંજવી રાખો. ત્યારબાદ દૂધને એક કઢાઈમાં ઉકળવા મૂકો. દૂધમાં એક ઉભરો આવે એટલે પલાળેલો સામો ઉમેરીને દૂધને ઉકળવા દો. જ્યાં સુધી દૂધનું પ્રમાણ અડધું થઈ જાય. તવેથા વડે દૂધને સતત હલાવતાં રહેવું, નહીંતર સામો તળિયે ચોંટી જશે.

દૂધ ઉકળીને અડધું થઈ જાય એટલે તેમાં સૂકામેવાની કતરણ, સાકર તેમજ એલચી પાવડર મેળવીને 5 મિનિટ બાદ ગેસ બંધ કરી દો.

Reena Mohnot

દૂધ એકદમ ઠંડું થયા બાદ તેમાં ફેંટેલું ક્રીમ, રોઝ સિરપ, પસંદગીના ફળોના ટુકડા, ગુલાબની પાંખડીઓ ઉમેરીને રેફ્રીજરેટરમાં 2-3 કલાક માટે રાખ્યા બાદ ઠંડું પીરસો.

(રીના મોહનોત)

(સાયન્સ ગ્રેજ્યુએટ રીના મોહનોતને એમની પેશન રાજસ્થાની રસોઈકળા તરફ દોરી ગઈ અને નિર્માણ થયું ક્લાઉડ કિચન, ધોરા!  જે અમદાવાદના સ્વાદ રસિયાઓને પીરસે છે અસલ પરંપરાગત રાજસ્થાની સ્વાદિષ્ટ વાનગીઓ! અનેક કઠિનાઈ, પેન્ડેમિકનો ફટકો સહીને પણ ક્લાઉડ કિચન ચાલુ રાખવાના મક્કમ નિર્ધારને કારણે રીનાબહેન, ટાઈમ્સ ફુડ એવોર્ડ, રાષ્ટ્રવ્યાવી મેરીટ એવોર્ડ અને મહિલાપ્રેન્યોર જેવા અનેક એવોર્ડના સતત વિજેતા રહ્યાં છે!)

નોટ આઉટ @ 86 : કીર્તિકાંત નાણાવટી

દાદા અને પિતા પાસેથી જેમને વકીલાતની આવડત ગળથૂથીમાંથી મળી છે તેવા અમદાવાદના પ્રખ્યાત વકીલ કીર્તિકાંત નાણાવટીની વાત સાંભળીએ તેમની પાસેથી.

એમની સાથેની વાતચીતનો એક્સ-રે : 

જન્મ જંબુસરમાં અને પ્રાથમિક શિક્ષણ પણ જંબુસરમાં જ લીધું. દાદા જંબુસરમાં વકીલ હતા અને તેમણે કાયમ જંબુસરમાં વકીલ તરીકે પ્રેક્ટિસ કરી, જ્યારે પિતાએ શરૂઆતમાં વકીલ તરીકે પ્રેક્ટિસ કરી, પછી ડિસ્ટ્રિક્ટ-જજ તરીકે વડોદરામાં કામ કર્યું અને ત્યારબાદ વડોદરામાં જ વકીલાતની પ્રેક્ટિસ કરી. જંબુસરથી અમદાવાદ આવી કીર્તિકાંતભાઈએ બીકોમ, એલએલબીનો અભ્યાસ કર્યો અને તરત જ કાયદાની પ્રેક્ટિસમાં લાગી ગયા.

નિવૃત્તિની પ્રવૃત્તિ : 

તેઓ સવારે 6:00 વાગે ઊઠી નિત્યકાર્ય પતાવી, ચા-પાણી કરી સીધા વાંચનમાં લાગી જાય! ઘરમાં જ ઓફિસ છે એટલે નવ વાગ્યાથી પ્રોફેશનલ કામકાજ શરૂ થઈ જાય. કોર્ટમાં કામ હોય ત્યારે આખો દિવસ કોર્ટમાં જ હોય. કોર્ટમાંથી સાંજે આવી નાસ્તો કરે. (કોર્ટમાં હોય ત્યારે બપોરનું જમતા નથી). ઘરની ઓફિસમાં આઠ વાગ્યા સુધી કામ કરે. જમીને ટીવી જુએ. શનિવારે મિત્રોને મળે, ગપ્પા મારે, સાથે જમે અને પત્તા રમે.

શોખના વિષયો : 

ગુજરાતી અને અંગ્રેજી નોવેલ્સ વાંચવી ઘણી ગમે છે. હવે ધાર્મિક વાંચન પણ કરે છે. સંગીત સાંભળવું ગમે. સુગમ સંગીત અને જુના ફિલ્મી ગીતો સાંભળવા ખૂબ ગમે. ફરવાનો ઘણો શોખ છે, આખું ભારત અને પરદેશ ફરી વળ્યા છે! પત્તા રમવાનો શોખ છે. શનિવારે મિત્રો સાથે પત્તાની રમત જામે!

ઉંમર સાથે કેવી રીતે કદમ મિલાવો છો?: 

તબિયત સારી છે, હસતાં-હસતાં ઉમેરે છે કે જૂની એમ્બેસેડર ગાડી ખખડ્યા કરે પણ ચાલે તો ખરી જ! તેમને ત્રણ વાર હૃદયના ઓપરેશન (એનજીઓ પ્લાસ્ટિ અને બાયપાસ) કરેલાં છે. ઘૂંટણનું ની-રિપ્લેસમેન્ટનું ઓપરેશન પણ કરેલું છે. તેઓ રોજ સામાન્ય કસરતો કરે છે. ઘરમાં ચાલે છે, ક્લબમાં પણ ચાલે છે, એટલે આ ઉંમરે પણ કોર્ટમાં તેઓ પોતાનું કામ સરસ રીતે સાંભળી રહ્યા છે.

યાદગાર પ્રસંગ:  

પ્રેક્ટિસના શરૂઆતના વર્ષોમાં તેમણે ખૂબ કામ કર્યું છે. એકવાર રાત્રે 12:00 વાગે ઘેર પાછા આવ્યા. ઘરનાં બધાં તો ઘસઘસાટ સૂઈ ગયાં હતાં, એટલે તેઓ બહાર હિંચકા ઉપર જ સૂઈ ગયા અને છેક સવારે જ ઉઠ્યા! એકવાર ઘરમાં આગ લાગી હતી. તે વખતે ફોન તો ક્યાં હતા? ઘરવાળા તેમને શોધે પણ ક્યાં? તેઓ કામ પરથી પાછા આવ્યા અને જોયું તો ઘર પાસે તો ફાયર બ્રિગેડ અને એમ્બ્યુલન્સની લાઈનો હતી. તેઓ હૃદયનો એક થડકારો ચૂકી ગયા! જો કે ખાસ નુકસાન થયું ન હતું એટલું સારું હતું! તેમને સામાન્ય સંજોગોમાં રડવું આવે નહીં, પણ દીકરીના લગ્ન વખતે આંખમાં પાણી આવી ગયું હતું!

નવી ટેકનોલોજી કેટલી વાપરો છો ?:  

હવે તો આખી કાયદાની અને કોર્ટની સિસ્ટમ કોમ્પ્યુટરરાઈઝ્ડ થઈ ગઈ છે એટલે કોમ્પ્યુટરનો ઉપયોગ તો ઘણો બધો કરવો જ પડે, પણ બધું બેઝિક સેટઅપ ઓફિસનો સ્ટાફ કરી આપે પછી તેઓ ઓનલાઇન કેસ પણ ચલાવે છે. ટેકનોલોજી માટે તેઓ ખૂબ પોઝિટિવ છે અને માને છે કે વિકાસ માટે ટેકનોલોજી અનિવાર્ય છે.

શું ફેર લાગે છે “ત્યાર”માં અને “અત્યાર”માં? 

કાયદા પણ બદલાયા અને કામ કરવાની આખી સિસ્ટમ પણ બદલાઈ ગઈ છે. કોરોના પછી તો ઓનલાઇન કામ પણ ઘણું બધું થઈ રહ્યું છે. એટલે પહેલાની અને અત્યારની પ્રેક્ટિસમાં ઘણો જ ફેર પડી ગયો છે. અમે પ્રેક્ટિસના શરૂઆતનાં વર્ષોમાં ઘણું કામ કરતા, રાતના બાર-બાર વાગ્યા સુધી કેસને લગતું વાંચવાનું ચાલતું. આજના યુવાનોને એવું ઓછું ગમે છે!

આજની પેઢી સાથે સંકળાયેલા છો? 

તેઓ કુટુંબના યુવાનો સાથે સારા સંપર્કમાં છે. ઘરના પણ બધાં યુવાનો વકીલાત અથવા તેને લાગત-વળગતી કેરિયરમાં જ છે. તેમને બે દીકરા અને એક દીકરી તથા પાંચ પૌત્ર-પૌત્રી છે. ઓફિસમાં પણ યુવાન સ્ટાફ છે. આજના યુવાનો પોતાની કારકિર્દી માટે બહુ ફોકસ્ડ છે પણ તેમને ઓછી મહેનતે જલ્દી અને વધારે સફળતા જોઈએ છે! ઝટ મંગની અને પટ શાદી!

સંદેશો :  

કાયમ કોર્ટ અને ક્લાઈન્ટ સાથે ઓનેસ્ટ અને ટ્રાન્સપરન્ટ રહો. ખૂબ મહેનત કરો. લાંબા ગાળે તો ઓનેસ્ટી, ટ્રાન્સપરન્સી અને હાર્ડવર્કને જ સફળતા મળે છે.

પંચાંગ 08/11/2023

AUS vs AFG: મેક્સવેલે બેવડી સદી ફટકારી હારેલી મેચ જીતાડી, ઓસ્ટ્રેલિયા સેમિફાઈનલમાં પહોંચ્યું

ગ્લેન મેક્સવેલે વાનખેડે, મુંબઇમાં બેવડી સદી ફટકારીને ઇતિહાસ રચ્યો. ટાર્ગેટનો પીછો કરતી વખતે મેક્સવેલે સૌથી મોટી ઇનિંગ રમી અને ઓસ્ટ્રેલિયાને હારેલી મેચ જીતાડી હતી. એક સમયે ઓસ્ટ્રેલિયાએ માત્ર 91 રનમાં સાત વિકેટ ગુમાવી દીધી હતી. ત્યારે એવું લાગતું હતું કે અફઘાનિસ્તાનની ટીમ આસાનીથી મેચ જીતી જશે, પરંતુ ગ્લેન મેક્સવેલે 201* રનની ઇનિંગ રમીને પોતાની ટીમને હારેલી મેચ જીતાડી હતી. આ જીત સાથે ઓસ્ટ્રેલિયા ટૂર્નામેન્ટની સેમિફાઈનલમાં પહોંચનારી ત્રીજી ટીમ બની ગઈ છે.

અફઘાનિસ્તાને પ્રથમ બેટિંગ કરતા 291 રન બનાવ્યા હતા. જવાબમાં ઓસ્ટ્રેલિયાએ 91 રન અને સાત વિકેટ ગુમાવી દીધી હતી. આ પછી, મેક્સવેલ અને કમિન્સે 202* રનની ભાગીદારી કરી અને અફઘાનિસ્તાનના મોં પરથી જીત છીનવી લીધી. આ વિશાળ ઇનિંગ્સમાં, મેક્સવેલને તેના 33 રનના વ્યક્તિગત સ્કોર પર ચૂકી ગયેલા કેચને કારણે જીવનદાન મળ્યું જેનો તેણે પૂરો ફાયદો ઉઠાવ્યો. વર્લ્ડ કપમાં ઓસ્ટ્રેલિયા માટે આ સૌથી મોટો રન ચેઝ હતો.

292 રનના લક્ષ્યનો પીછો કરવા ઉતરેલી ઓસ્ટ્રેલિયન ટીમની શરૂઆત ખૂબ જ ખરાબ રહી હતી. ટીમે બીજી ઓવરમાં ટ્રેવિસ હેડ (0)ના રૂપમાં પ્રથમ વિકેટ ગુમાવી હતી. આ પછી છઠ્ઠી ઓવરમાં ત્રીજા નંબરે આવેલા મિશેલ માર્શે 11 બોલમાં 2 ચોગ્ગા અને 2 છગ્ગાની મદદથી 24 રન બનાવ્યા હતા. ટીમ બીજી વિકેટના આંચકામાંથી બહાર આવી રહી હતી જ્યારે 9મી ઓવરના પહેલા બોલ પર બીજો ઓપનર ડેવિડ વોર્નર 18 રનની ઇનિંગ રમી રહેલા અઝમતુલ્લાહ ઓમરઝાઈનો શિકાર બન્યો હતો.

આ પછી પણ ટીમની વિકેટ ગુમાવવાનો સિલસિલો અટક્યો ન હતો અને બીજા જ બોલ પર જોશ ઈંગ્લિસ પણ ઉમરઝાઈનો શિકાર બન્યો હતો. ત્યાર બાદ 15મી ઓવરના પહેલા બોલ પર માર્નસ લાબુશેન 14 રન બનાવી પેવેલિયન પરત ફર્યો હતો. ત્યારબાદ 17મી ઓવરમાં માર્કસ સ્ટોઈનિસ 06 રન બનાવીને આઉટ થયો હતો અને 19મી ઓવરમાં મિચેલ સ્ટાર્ક 03 રન બનાવીને આઉટ થયો હતો. આ પછી મેક્સવેલ અને કેપ્ટન કમિન્સે જવાબદારી લીધી અને ઓસ્ટ્રેલિયાની જીત સુનિશ્ચિત કરી.

મેક્સવેલે 157.03ના સ્ટ્રાઈક રેટથી 128 બોલમાં 201 રનની ઐતિહાસિક ઈનિંગ રમી જેમાં 21 ચોગ્ગા અને 10 છગ્ગાનો સમાવેશ થાય છે. આ ઇનિંગ દરમિયાન, મેક્સવેલને ઘણી વખત ખેંચાણનો સામનો કરવો પડ્યો, પરંતુ નિવૃત્તિ લીધા પછી, તે ક્રિઝ પર રહ્યો અને તેની ટીમને જીત તરફ દોરી ગયો. દોડતી વખતે મેક્સવેલ ઘણી મુશ્કેલીમાં દેખાઈ રહ્યો હતો. બીજી તરફ, કેપ્ટન કમિન્સે મેક્સવેલને સારો સાથ આપ્યો અને 68 બોલમાં 1 ફોરની મદદથી 12* રનની ઇનિંગ રમી. આ રીતે ઓસ્ટ્રેલિયાએ વર્લ્ડ કપ 2023ની સૌથી રોમાંચક જીત પર પોતાનું નામ લખાવ્યું.

ઈબ્રાહિમ ઝદરાનની ઐતિહાસિક સદી વ્યર્થ ગઈ

અફઘાનિસ્તાનના ઓપનર ઈબ્રાહિમ ઝદરાને પ્રથમ દાવમાં 143 બોલમાં 8 ચોગ્ગા અને 3 છગ્ગાની મદદથી 129 રનની ઐતિહાસિક સદી ફટકારી હતી, જેને મેક્સવેલે સંપૂર્ણપણે બરબાદ કરી દીધી હતી. ઝદરાન અફઘાનિસ્તાન તરફથી વર્લ્ડ કપમાં સદી ફટકારનાર પ્રથમ બેટ્સમેન બન્યો છે.

ભારત 22 નવેમ્બરના રોજ G20 મીટિંગ ડિજિટલી હોસ્ટ કરશે

22 નવેમ્બરે વડાપ્રધાન નરેન્દ્ર મોદીની અધ્યક્ષતામાં G-20 નેતાઓની ડિજિટલ સમિટ યોજાશે. તેમાં રશિયા-યુક્રેન યુદ્ધ, ઈઝરાયેલ-હમાસ સંઘર્ષ અને વૈશ્વિક દક્ષિણ સામેના પડકારો જેવા મુખ્ય મુદ્દાઓ પર ચર્ચા થવાની અપેક્ષા છે. આ બાબતની જાણકારી ધરાવતા લોકોએ મંગળવારે આ જાણકારી આપી. સપ્ટેમ્બરમાં નવી દિલ્હીમાં G-20 સમિટના અંતે, ભારતે જાહેરાત કરી હતી કે તે તેના અધ્યક્ષપદના અંત પહેલા જૂથના નેતાઓની ડિજિટલ બેઠક યોજશે.

ભારતે ડિજિટલ સમિટ માટે G-20 સભ્ય દેશોના નેતાઓને પહેલાથી જ આમંત્રણ મોકલ્યું છે. એવું માનવામાં આવે છે કે ભારત જૂથ માટે તેના વિકાસ એજન્ડા પર ધ્યાન કેન્દ્રિત કરશે જે વૈશ્વિક દક્ષિણ અથવા વિકાસશીલ દેશો દ્વારા સામનો કરવામાં આવતા પડકારો પર ધ્યાન કેન્દ્રિત કરશે. સમિટના અંતે જારી કરવામાં આવેલ કોઈ વહેંચાયેલ પરિણામ દસ્તાવેજ હશે નહીં. રાજદ્વારી સૂત્રોએ જણાવ્યું હતું કે રશિયા-યુક્રેન યુદ્ધ અને ઇઝરાયેલ-હમાસ સંઘર્ષ પર ચર્ચા થવાની અપેક્ષા છે. જો કે, ભારત ડિજિટલ પબ્લિક ઇન્ફ્રાસ્ટ્રક્ચર, ક્લાઇમેટ ફાઇનાન્સ અને સ્વચ્છ ઊર્જાના ક્ષેત્રોમાં પહેલ સહિત તેના વિકાસ એજન્ડા પર ધ્યાન કેન્દ્રિત કરે તેવી અપેક્ષા છે.

છેલ્લા કેટલાક વર્ષોમાં, ભારત વૈશ્વિક દક્ષિણ અથવા વિકાસશીલ દેશો, ખાસ કરીને આફ્રિકન ખંડની ચિંતાઓ, પડકારો અને આકાંક્ષાઓને ઉઠાવવામાં એક અગ્રણી અવાજ તરીકે પોતાને સ્થાપિત કરી રહ્યું છે. વિદેશ મંત્રી એસ જયશંકરે મંગળવારે દ્વારકામાં ઈન્ડિયા ઈન્ટરનેશનલ કન્વેન્શન સેન્ટર (IICC) ખાતે G-20 દેશોના રાજદૂતોનું આયોજન કર્યું હતું. IICC યશોભૂમિ કન્વેન્શન સેન્ટર તરીકે પણ ઓળખાય છે.

આ દરમિયાન, તેમણે G-20 સભ્ય દેશોનો સમૂહના ભારતના અધ્યક્ષપદ માટે પૂરા દિલથી સમર્થન આપવા બદલ આભાર માન્યો. જયશંકરે ટ્વિટર પર લખ્યું: “આજે યશોભૂમિ કન્વેન્શન સેન્ટરમાં G-20 સભ્યો, અતિથિ દેશોના રાજદૂતો અને આંતરરાષ્ટ્રીય સંસ્થાઓનું આયોજન કરીને આનંદ થયો. અમારા પ્રમુખપદ દરમિયાન તેમના પૂરા દિલથી સમર્થન બદલ તેમનો આભાર માન્યો. તેમણે કહ્યું, અમારા G-20 અધ્યક્ષપદની જેમ, આ અત્યાધુનિક સંમેલન અને એક્સ્પો સેન્ટર ભારતની ક્ષમતાઓનું પ્રદર્શન કરે છે. મને વિશ્વાસ છે કે આવનારા સમયમાં પ્રતિષ્ઠિત આંતરરાષ્ટ્રીય ઈવેન્ટ્સ માટે તે એક અદ્ભુત સ્થળ હશે.

ચૂંટણી: મિઝોરમમાં 77.39 ટકા મતદાન થયું, CM ની સીટ પર સૌથી ઓછું મતદાન

મંગળવારે દેશના બે રાજ્યોમાં વિધાનસભા ચૂંટણી માટે મતદાન થયું. પ્રથમ તબક્કામાં છત્તીસગઢની 20 બેઠકો પર મતદાન થયું હતું, જ્યારે મિઝોરમની તમામ 40 બેઠકો પર મતદાન થયું હતું. 5 વાગ્યા સુધીના આંકડા મુજબ છત્તીસગઢમાં 71.11 ટકા લોકોએ મતદાન કર્યું, મિઝોરમમાં 77.39 ટકા લોકોએ પોતાના મતાધિકારનો ઉપયોગ કર્યો. આ સાથે જ બંને રાજ્યોમાં ચૂંટણી લડી રહેલા 397 ઉમેદવારોનું ભાવિ ઈવીએમમાં ​​સીલ થઈ ગયું હતું. હવે 3 ડિસેમ્બરે ખબર પડશે કે જનતાએ કોને પસંદ કર્યો.

પૂર્વોત્તર રાજ્ય મિઝોરમમાં મતદાન સમાપ્ત થઈ ગયું છે. સાંજે 5 વાગ્યા સુધીના આંકડા મુજબ રાજ્યમાં કુલ 77.39% મતદાન નોંધાયું છે. ગત વખતે રાજ્યમાં કુલ 80.03% મતદાન નોંધાયું હતું. આજે જ્યાં ચૂંટણી યોજાઈ હતી તે લોકપ્રિય બેઠકોમાંની એક આઈઝોલ ઈસ્ટ-એલ છે. અહીંથી મુખ્યમંત્રી જોરામથાંગા મેદાનમાં છે. આ સીટ પર 65.97% વોટ પડ્યા હતા. 2018ની વિધાનસભા ચૂંટણીમાં આ સીટ પર 80.3 ટકા મતદાન થયું હતું.

કઈ બેઠકો પર વધુ મતદાન થયું અને કઈ બેઠકો પર ઓછું મતદાન થયું?

5 વાગ્યા સુધીની માહિતી મુજબ આ વખતે સૌથી વધુ 83.73% મતદાન સેરછીપ બેઠક પર નોંધાયું છે. આ પછી, તુઇકુમ સીટ પર 83.07% અને સેરલુઇ સીટ પર 83.03% વોટિંગ થયું. આ વખતે સૌથી ઓછું મતદાન આઈઝોલ ઈસ્ટ-એલ સીટ પર નોંધાયું છે. અહીં 65.97% મતદાન થયું હતું. આ પછી આઈઝોલ ઈસ્ટ-એલ સીટ પર 68.77% અને આઈઝોલ નોર્થ-એલ સીટ પર 70.51% વોટિંગ થયું હતું.

2018માં કેવું રહ્યું મતદાન?

છેલ્લી ચૂંટણીમાં સૌથી વધુ 87.65% મતદાન તુકુમ સીટ પર નોંધાયું હતું. આ પછી, લુંગલેઈ નોર્થ સીટ પર 87.5% અને આઈઝોલ સાઉથ-III માં 87.28% વોટિંગ થયું હતું. 2018 માં, લોંગતલાઈ પૂર્વ સીટ પર સૌથી ઓછી 75.95% મતદાન ટકાવારી હતી. આ પછી આઈઝોલ નોર્થ-III સીટ પર 77.38% વોટ અને આઈઝોલ નોર્થ-1 સીટ પર 76.5% વોટ પડ્યા હતા.

છત્તીસગઢ ચૂંટણી : પ્રથમ તબક્કામાં 71.11% મતદાન થયું

છત્તીસગઢની કુલ 90 વિધાનસભા બેઠકોમાંથી 20ના પ્રથમ તબક્કાનું મતદાન આજે પૂર્ણ થયું છે. જેમાં બસ્તર વિભાગની 12 અને દુર્ગ વિભાગની 8 બેઠકો પર મતદાન થયું હતું. સાંજે 7.15 વાગ્યા સુધી જારી કરાયેલા આંકડા મુજબ રાજ્યમાં 71.11% મતદાન થયું હતું. પ્રથમ તબક્કામાં જે 20 બેઠકો પર મતદાન થયું હતું ત્યાં 2018માં કુલ 77.23% મતદાન થયું હતું. ચૂંટણી પંચના જણાવ્યા અનુસાર, સાંજે 5 વાગ્યા સુધી સૌથી વધુ મતદાન ખૈરાગઢ-છુઈખાદાન-ગંડાઈ જિલ્લામાં થયું હતું, જ્યાં 76.31% લોકોએ મતદાન કર્યું હતું. બીજાપુર જિલ્લામાં સૌથી ઓછું મતદાન થયું હતું. સાંજે 5 વાગ્યા સુધી અહીં માત્ર 40.98% મતદાન થયું હતું. ચાલો જાણીએ ગત ચૂંટણીની સરખામણીમાં આ વખતે સીટ મુજબ કેટલા ટકા મતદાન થયું.

કયા જિલ્લામાં કેટલું મતદાન?

સૌથી વધુ મતદાન ખૈરાગઢ-છુઈખાદાન-ગંડાઈ જિલ્લામાં થયું હતું. અહીં 76.31% મતદારોએ તેમના મતાધિકારનો ઉપયોગ કર્યો હતો. બીજાપુર જિલ્લામાં સૌથી ઓછું મતદાન થયું હતું. અહીં માત્ર 40.98 ટકા મતદાન થયું હતું. ઉત્તર-બસ્તર-કાંકેર, રાજનાંદગાંવ, મોહલા માનપુર-અંબાગઢ ચોકી, કોંડાગાંવ જિલ્લામાં 75 ટકાથી વધુ મતદાન થયું હતું. તેમજ બસ્તર-જગદલપુર, કબીરધામમાં 70 ટકાથી વધુ મતદાન થયું હતું.

રાજનાંદગાંવ સીટ પર શું થયું?

રાજનાંદગાંવ બેઠક પરથી પૂર્વ મુખ્યમંત્રી ડો.રમણ સિંહ ચૂંટણી લડી રહ્યા છે. આ બેઠક પર સાંજે 5 વાગ્યા સુધી 74.00 ટકા મતદાન થયું હતું. 2018ની વિધાનસભા ચૂંટણીમાં આ સીટ પર 78.87 ટકા મતદાન થયું હતું. એટલે કે ગત વખત કરતાં 4.87 ટકા ઓછું મતદાન થયું હતું.

બસ્તર વિભાગની તમામ 12 બેઠકો હાલમાં કોંગ્રેસ પાસે છે

20 બેઠકોમાં સૌથી મહત્વપૂર્ણ બસ્તર વિભાગની છે, જ્યાંથી કુલ 90 બેઠકોમાંથી 12 બેઠકો આવે છે. આદિવાસી પ્રભુત્વ ધરાવતા બસ્તર વિભાગમાં કુલ સાત જિલ્લાઓ આવે છે. સાત જિલ્લાના વિભાગમાં છત્તીસગઢની 12 વિધાનસભા અને એક લોકસભા બેઠક છે. બસ્તર વિભાગની 12 વિધાનસભા બેઠકોમાંથી, 11 વિધાનસભા બેઠકો અનુસૂચિત જનજાતિ (ST) માટે છે અને એક બેઠક સામાન્ય છે. આમાં, બસ્તર, કાંકેર, ચિત્રકોટ, દંતેવાડા, બીજાપુર, કોન્ટા, કેશકલ, કોંડાગાંવ, નારાયણપુર, અંતાગઢ, ભાનુપ્રતાપપુરની બેઠકો એસટી માટે અનામત છે. જ્યારે જગદલપુર વિધાનસભા બેઠક સામાન્ય છે. હાલમાં કોંગ્રેસ પાસે 12 વિધાનસભા બેઠકો છે.

CSMT જતી લોકલ ટ્રેન ખાંદેશ્વર સ્ટેશને ઊભી ન રહી; મોટરમેન સસ્પેન્ડ

મુંબઈઃ મધ્ય રેલવેની હાર્બર લાઈન પર આજે એક ચોંકાવનારો બનાવ બન્યો હતો. પનવેલથી છત્રપતિ શિવાજી મહારાજ ટર્મિનસ (સીએસએમટી) જતી એક લોકલ ટ્રેન ખાંદેશ્વર સ્ટેશને હોલ્ટ હોવા છતાં ત્યાં આશ્ચર્યજનક રીતે ઊભી રહી નહોતી. એને ચૂકાવીને જતી રહી હતી. એને કારણે ખાંદેશ્વર ઉતરવા માગતા ટ્રેનના પ્રવાસીઓ અને ખાંદેશ્વર સ્ટેશને ઊભેલા પ્રવાસીઓને ચિંતા-ડરની લાગણી થઈ હતી અને મોટું આશ્ચર્ય થયું હતું. ઘણાયને ગુંચવણ પણ થઈ હતી. ખાંદેશ્વર ઉતરવા માગતા પ્રવાસીઓ અટવાઈ ગયા હતા.

મધ્ય રેલવેના એક અધિકારીએ કહ્યું કે આ ગંભીર ચિંતાજનક બાબત છે. આની વિસ્તૃતપણે તપાસ કરાશે. જવાબદાર ટ્રેન ક્રૂ સભ્યોને ચાર્જશીટ સુપરત કરાશે.

ઉક્ત ટ્રેન જ્યારે તે પછીના માનસરોવર સ્ટેશને ઊભી રહી કે તરત જ એના મોટરમેનને ફરજ પરથી હટાવી દેવામાં આવ્યો હતો. એની સામે તપાસ ચાલુ કરી દેવાઈ છે.

ગુજરાત એસ.ટી. નિગમના ફિક્સ પગારના કર્મચારીઓને લઈને મોટો નિર્ણય

તાજેતરમાં જ રાજ્યના ફિક્સ પગારના કર્મચારીઓના પગારમાં ૩૦ ટકા જેટલો વધારો કરવાનો સરકારે નિર્ણય કર્યો હતો ત્યારે આજે ગુજરાત એસ.ટી. નિગમના ફિક્સ પગારના કર્મચારીઓને પણ હવે આ લાભ આપવા સંદર્ભે મહત્વપુર્ણ નિર્ણય લેવામાં આવ્યો છે. આ નિર્ણયથી ગુજરાત એસ.ટી. નિગમના ૭ હજારથી વધુ કર્મચારીઓને લાભ થશે.

આ મહત્વપૂર્ણ જાહેરાત કરતા વાહન વ્યવહાર મંત્રી હર્ષ સંઘવીએ જણાવ્યું હતું કે, વાર-તહેવાર ભૂલીને રાજ્યના ૨૫ લાખથી વધુ પરિવારોને યાતાયાતની સુવિધા પુરી પાડવાનું ઉત્તમ કાર્ય કરી રહેલા ગુજરાત એસ.ટી. વિભાગના સૌ કર્મચારીઓ અભિનંદનને પાત્ર છે. તાજેતરમાં જ એસ.ટી. યુનિયન સાથે બેઠક કરીને વિવિધ પ્રશ્નો અંગે વિસ્તારપૂર્વક ચર્ચા કરી મોટા ભાગના પ્રશ્નોના નિરાકરણ લાવવામાં આવ્યા હતા.

એસ.ટી. વિભાગના યુનિયનની વાહન વ્યવહાર મંત્રી સાથે બેઠક યોજાઈ

આજે એસ.ટી. વિભાગના વિવિધ યુનિયન અને વાહન વ્યવહાર મંત્રી વચ્ચે બેઠક યોજાઇ હતી. જેમાં સૌ યુનિયનના હોદ્દેદારો તેમજ નિગમમાં ફરજ બજાવતા ફિક્સ પગારના કર્મચારીઓ ઉપરાંત એસ.ટી. નિગમના અધિકારીઓ જોડાયા હતા. ગુજરાત એસ.ટી. નિગમના ફિક્સ પગારના કર્મચારીઓને વેતનમાં થયેલા વધારાના નિર્ણયને આવકારીને એસ.ટી નિગમના વિવિધ યુનિયનના હોદ્દેદારો તેમજ કર્મચારીઓ દ્વારા વાહન વ્યવહાર મંત્રીનું અભિવાદન કરી સન્માન કરવામાં આવ્યુ હતું.

1...2,3532,3542,355...5,164Page 2,354 of 5,164