Home Blog Page 499

કોંગ્રેસ, RJDએ છઠ્ઠી મૈયાનું અપમાન કર્યુઃ PM મોદી

પટનાઃ બિહાર વિધાનસભા ચૂંટણીપ્રચારમાં આજે PM મોદી મુઝફ્ફરપુર પહોંચ્યા અને જનસભાને સંબોધી હતી. તેમણે ફરી એક વાર લોકોને NDA સરકાર બનાવવા અપીલ કરતાં  કહ્યું હતું કે NDA એટલે સુશાસન, NDA એટલે જનસેવા અને NDA એટલે વિકાસની ખાતરી.. છઠ્ઠ પર્વને લઈને PM મોદીએ કોંગ્રેસ,RJDને આડે હાથ લેતાં કહ્યું હતું કે છઠ્ઠી મૈયાનું અપમાન કર્યું છે. તેમણે કહ્યું હતું કે હું બિહારનો બહુ મોટો ઋણી છું. તેમણે વધુમાં ઉમેર્યું હતું કે કે અમે છઠ્ઠ પર્વને UNESCOની હેરિટેજ સૂચીમાં સામેલ કરવાનો પ્રયાસ કરી રહ્યા છીએ.

કોંગ્રેસ,RJDએ છઠ્ઠી મૈયાનું અપમાન કર્યું

વિપક્ષી મહાગઠબંધન પર પ્રહાર કરતાં તેમણે કહ્યું હતું કે કોંગ્રેસ, RJDએ છઠ્ઠી મૈયાનું અપમાન કર્યું છે, તેઓ છઠ્ઠને ડ્રામા કહે છે. છઠ્ઠી મૈયાનું અપમાન હવે બિહાર સહન નહીં કરે. કોંગ્રેસ, RJDના લોકો નિર્લજ્જતાથી બોલી રહ્યા છે. સદીઓ સુધી બિહારી લોકો આ અપમાન ભૂલશે નહીં. કોંગ્રેસ, RJD ક્યારેય બિહારને વિકાસશીલ બનાવી શકતા નથી. મને બિહારની જનતાનો સાથ જોઈએ છે. જંગલરાજની પાંચ ઓળખ છે — કટ્ટા, ક્રૂરતા, કટુતા, કુશાસન અને કરપ્શન.

બિહારના મારા ભાઈ–બહેનો, બિહારના મારા માલિકો… હું તમારો બહુ મોટો ઋણી છું. અહીં એટલા બધા યુવાનો આવ્યા છે, હું બહુ મોટી સંખ્યામાં માતા–બહેનોનાં દર્શન કરી રહ્યો છું. આ વિશાળ જનસાગર કહી રહ્યો છે, ફરી એક વાર NDA સરકાર, બિહારમાં ફરી સુશાસન સરકાર.

બિહારમાં છઠ્ઠના મહાપર્વ બાદ આ મારી પ્રથમ જનસભા છે. છઠ્ઠ મહાપર્વ બિહાર અને દેશનું ગૌરવ છે. દેશ–વિદેશમાં છઠ્ઠ મહાપર્વ ઊજવાય છે. જ્યારે અમે છઠ્ઠનાં ગીતો સાંભળીએ છીએ ત્યારે ભાવવિભોર થઈ જઈએ છીએ. છઠ્ઠી મૈયાની પૂજામાં માતાની ભક્તિ છે, સમતા છે, મમતા છે અને સામાજિક સમરસતા છે. તમારો આ બેટો દુનિયામાં છઠ્ઠી મૈયાની જય–જયકાર કરાવવામાં લાગેલો છે.

બિહારનું ગૌરવ વધારવું, બિહારની મીઠી બોલીને દુનિયામાં પહોંચાડવી, બિહારની સંસ્કૃતિને વિશ્વના ખૂણેખૂણે લઇ જવી અને બિહારનો વિકાસ— એ NDA અને ભાજપાની સૌથી મોટી પ્રાથમિકતા છે.

સરદાર પટેલ એક વ્યક્તિ નહીં વિચારધારા છે: અમિત શાહ

કેન્દ્રીય ગૃહમંત્રી અમિત શાહે બિહારની રાજધાની પટનામાં એક પત્રકાર પરિષદને સંબોધિત કરી હતી. આ પત્રકાર પરિષદ મુખ્યત્વે રાષ્ટ્રીય એકતા દિવસ નિમિત્તે આયોજિત કરવામાં આવી હતી, જે 31 ઓક્ટોબરે સરદાર વલ્લભભાઈ પટેલની 150મી જન્મજયંતિ નિમિત્તે આવે છે.

કેન્દ્રીય ગૃહ મંત્રાલય દ્વારા આજે પટનામાં એક પત્રકાર પરિષદનું આયોજન કરવામાં આવ્યું હતું. કેન્દ્રીય ગૃહમંત્રી અમિત શાહે આ પરિષદને સંબોધિત કરી હતી, તેમની સાથે કેન્દ્રીય ગૃહ રાજ્યમંત્રી નિત્યાનંદ રાય પણ હતા. પત્રકાર પરિષદમાં કેન્દ્રીય ગૃહમંત્રી અમિત શાહે જણાવ્યું હતું કે સરદાર પટેલ કોઈ વ્યક્તિ નહીં, પરંતુ એક વિચારધારા હતા. તેમણે વધુમાં જણાવ્યું હતું કે સરદાર પટેલ આઝાદીના કરોડરજ્જુ હતા અને રાષ્ટ્રનિર્માણમાં તેમનું યોગદાન મહત્વપૂર્ણ હતું.

એકતા નગર કેવડિયા કોલોનીમાં ભવ્ય પરેડ

આ દરમિયાન તેમણે કહ્યું કે પૂજ્ય સરદાર વલ્લભભાઈ પટેલની 150મી જન્મજયંતિની ઉજવણી માટે એકતા નગર કેવડિયા કોલોનીમાં યોજાઈ રહેલી ભવ્ય પરેડમાં હાજરી આપવા માટે દરેકને આમંત્રણ આપવામાં આવ્યું છે. તેમણે વધુમાં કહ્યું,”આપણે બધા જાણીએ છીએ કે સ્વતંત્રતા પછી દેશને એક કરવામાં અને આજે આપણે જે ભારત જાણીએ છીએ તેના નિર્માણમાં સરદાર પટેલે કેટલું મોટું યોગદાન આપ્યું છે.”

સરદાર પટેલની 150મી જન્મજયંતિ પર ખાસ કાર્યક્રમ

આ દરમિયાન ગૃહમંત્રી અમિત શાહે કહ્યું, “સરદાર પટેલની 150મી જન્મજયંતિની ઉજવણી માટે એક ખાસ કાર્યક્રમનું આયોજન કરવામાં આવ્યું છે, અને ગૃહ મંત્રાલયે પણ નિર્ણય લીધો છે કે આજથી દર 31 ઓક્ટોબરે આવી જ ભવ્ય પરેડ યોજવામાં આવશે.” દેશની એકતા અને અખંડિતતા સુનિશ્ચિત કરવા માટે આ પરેડનું આયોજન દરેક રાજ્યના તમામ કેન્દ્રીય અર્ધલશ્કરી દળો અને પોલીસ દળોના સન્માન માટે કરવામાં આવે છે, અને દેશની એકતા અને અખંડિતતાના મૂર્ત સ્વરૂપ સરદાર પટેલની પ્રતિમા સામે યોજવામાં આવશે.

રન ફોર યુનિટીનું ભવ્ય આયોજન

ગૃહમંત્રી અમિત શાહે જણાવ્યું હતું કે આ વર્ષે રન ફોર યુનિટીનું ભવ્ય આયોજન કરવાનો નિર્ણય લેવામાં આવ્યો છે. દેશભરના દરેક રાજ્ય, કેન્દ્રશાસિત પ્રદેશ, જિલ્લા, પોલીસ સ્ટેશન, શાળા અને યુનિવર્સિટીમાં રન ફોર યુનિટીના કાર્યક્રમોનું આયોજન કરવામાં આવ્યું છે. દેશની એકતા અને અખંડિતતા માટે પ્રતિજ્ઞા લેવા માટે દરેક નાગરિક માટે એક કાર્યક્રમનું આયોજન કરવામાં આવ્યું છે. આ વર્ષે ભગવાન બિરસા મુંડાની 150મી જન્મજયંતિની ઉજવણી માટે એકતા નગરમાં ભારત પર્વનું આયોજન કરવામાં આવ્યું છે, જે 1 નવેમ્બરથી 15 નવેમ્બર, ભગવાન બિરસા મુંડાની જન્મજયંતિ સુધી ચાલશે અને 15 નવેમ્બરે આદિવાસી સંસ્કૃતિ અને સાંસ્કૃતિક કાર્યક્રમો દર્શાવતા ભવ્ય કાર્યક્રમ સાથે સમાપ્ત થશે.

બિહાર વિધાનસભાની ચૂંટણીમાં NDAની સરકાર બનવાની શક્યતાઃ સર્વે

પટનાઃ બિહાર વિધાનસભા ચૂંટણીમાં જીત-હારને લઈને દાવ લગાવતા રાજસ્થાનના ફલોદી સટ્ટાબજારના પણ અંદાજ મુજબ આ વખતે પણ બિહારમાં NDAની સરકાર બનવાની શક્યતા છે. સટ્ટા બજારના તાજા અનુમાન મુજબ NDA ગઠબંધનને 135-138 બેઠકો મળશે એવી સંભાવના વ્યક્ત કરવામાં આવી છે, જે ચૂંટણી સર્વેની તુલનાએ ઘણી વધુ છે.

બીજી તરફ મહાગઠબંધનની વાત કરીએ તો સટોડિયાના અનુમાન મુજબ તેમને માત્ર 93થી 96 બેઠકો મળવાની શક્યતા  છે. જોકે ફલોદી સટ્ટા બજારના સટોડિયાએ વ્યક્તિગત ઉમેદવારની જીત-હારને લઈને કોઈ ભાવ જાહેર નથી કર્યો.

આ પહેલાં વોટ વાયબના સર્વેમાં મહાગઠબંધનને આગળ બતાવવામાં આવ્યું હતું. જ્યારે બિહારમાં લોકો પાસે પૂછવામાં આવ્યું કે આ વખત કયું ગઠબંધન જીતશે, ત્યારે 34.7 ટકા લોકોએ કહ્યું કે મહાગઠબંધન જીતશે. જ્યારે 34.4 ટકાએ કહ્યું હતું કે આ વખતે પણ NDA જીતશે. 12.3 ટકા લોકોએ જનસુરાજની જીતની વાત કરી. 10.1 ટકા લોકોએ કહ્યું કે તેઓ કંઈ કહી શકતા નથી.

વોટ વાયબના ફાઉન્ડરએ શું કહ્યું

વોટ વાયબના ફાઉન્ડર અમિતાભ તિવારીએ એક ચેનલ સાથેની વાતચીતમાં કહ્યું કે જન સુરાજને કારણે આ વખત ત્રિકોણીય ચૂંટણી થઈ રહી છે. પ્રશાંત કિશોરની પાર્ટી કોના વધુ મત કાપશે તે અંગે હજી અસ્પષ્ટતા છે. તેમણે જણાવ્યું હતું કે તેજસ્વી યાદવના “દરેક ઘરમાં સરકારી નોકરી”ના વચનથી ક્યાંક ને ક્યાંક મહાગઠબંધનને ફાયદો થતો નજરે પડે છે. તેમણે એ પણ કહ્યું કે આ વખતની બિહાર ચૂંટણીમાં પ્રશાંત કિશોરનો પ્રવેશ આ મુકાબલાને સંપૂર્ણપણે ત્રિકોણીય બનાવી રહ્યો છે. એવામાં લોકોમાં ક્યાંક ને ક્યાંક ગૂંચવણની સ્થિતિ જોવા મળી રહી છે.

મહાગઠબંધન ઠગોની દુકાનઃ CM રેખા ગુપ્તાનો આરોપ

નવી દિલ્હીઃ દિલ્હીનાં મુખ્ય મંત્રી રેખા ગુપ્તા પણ બિહાર ચૂંટણીઓમાં પ્રચાર કરવા પહોંચી ગયાં છે. પટના પહોંચતાં જ તેમણે મહાગઠબંધન પર મોટો હુમલો કર્યો હતો. તેમણે મહાગઠબંધનને ઠગોની દુકાન ગણાવી હતી. તેમણે મિડિયાને કહ્યું હતું કે આ મહા-ઠગ-બંધન છે, ઠગોની દુકાન છે. જે ચારો ખાઈ ગયા, હવે દાણા નાખીને વિચાર કરે છે કે જનતા આ દાણાની જાળમાં આવી જશે, પણ આવું થવાનું નથી.

ગઈ કાલના રાહુલ ગાંધીએ વડા પ્રધાન નરેન્દ્ર મોદી માટે આપેલા નિવેદન પર ટિપ્પણી કરતાં તેમણે કહ્યું હતું કે મને જે શીખવવામાં આવે છે, તેઓ તે પોપટની જેમ આવીને બોલી જાય છે. તેમને ખબર નથી હોતી કે તેઓ શું બોલી રહ્યા છે.રાહુલ ગાંધી, જેને ખબર નથી જલેબી ક્યાં બને છે, કેવી રીતે બને છે, જેને ખબર નથી આલુ ક્યાં મળે છે, જ્યારે એવો માણસ ભારતમાં, બિહારમાં ઊભો રહીને ભાષણ કરે છે, ત્યારે મને હસવું આવે છે. તેમને ખબર નથી કે તે શું બોલી રહ્યા છે, કોના માટે બોલી રહ્યા છે. આવી વ્યક્તિના કોઈ પણ નિવેદન પર ટિપ્પણી કરતાં મને શરમ આવે છે, એમ તેમણે કહ્યું હતું.

બિહારમાં આજે દિગ્ગજોની સભાઓ

 

વડાપ્રધાન નરેન્દ્ર મોદી, ગૃહ મંત્રી અમિત શાહ, કોંગ્રેસ નેતા રાહુલ ગાંધી અને ભાજપાધ્યક્ષ જેપી નડ્ડા બિહારમાં અનેક જનસભાઓ કરશે. પીએમ નરેન્દ્ર મોદી મુઝફ્ફરપુર અને સારણ જિલ્લામાં બે સભાઓને સંબોધશે.

રાહુલ ગાંધી નાલંદા અને શેખપુરા જિલ્લામાં સભાઓ સંબોધશે, જ્યારે અમિત શાહની લખિસરાય, મુંગેર, નાલંદા અને પટણા જિલ્લામાં ચાર ચૂંટણી સભાઓ પ્રસ્તાવિત છે. જેપી નડ્ડા બક્સર અને પટના જિલ્લામાં સભાઓ સંબોધશે.

સુવિચાર – ૩૦ ઑક્ટોબર ૨૦૨૫

૩૦ ઑક્ટોબર ૨૦૨૫

કબીરવાણી: સંકલ્પથી સિદ્ધિનો માર્ગ

 

જલ મેં બસૈ કમોદિની, ચંદા બસૈ અકાસ,

 જો હૈ જા કો ભાવતા, સો તાહી કે પાસે.

 

ગુજરાતીમાં કહેવત છે કે, “મન હોય તો માળવે જવાય.” મનુષ્યમાત્ર વિચારના પ્રવાહમાં સતત તણાતો રહે છે. વિચાર દૃઢ બને છે ત્યારે સંકલ્પ બને છે. સંકલ્પનું પુરુષાર્થ દ્વારા સિદ્ધિમાં રૂપાંતર થાય છે.

કબીરજી આ સાખીમાં ઈચ્છિત ચીજની પ્રાપ્તિનાં બે ઉદાહરણો આપે છે. જેમ કમળનો ઉદ્ભવ કીચડ અને જળમાં થાય છે તેમ તેનું પોષણ પણ જળ દ્વારા જ થાય છે.

કમળ માટે જળ જીવનનો સ્રોત હોય તે તેને પસંદ પડે છે. તેનો નિવાસ જળ – તળાવમાં, સરોવરમાં છે. ચંદ્ર આકાશની શોભા છે. તેની સતત વધઘટ થતી રહે છે પણ અબજો તારાઓના ઝંડ વચ્ચે ચંદ્ર દૈદીપ્યમાન છે. આકાશને અજવાળે છે. ચાંદની રાતની શીતળતા અનોખી છે.

જે વસ્તુમાં આપણે ભાવ રાખીએ છીએ તે પ્રભુ આપણને સુલભ કરાવે તો નિતિ આનંદ થાય. સાખીના શબ્દો જે વર્ણન કરે છે તેની સાથે કબીરજીનો સંદેશો ગર્ભિત છે. ઈશ્વરભક્તિમાં જો ચિત્ત ચોંટે તો તેના દર્શન થાય. તેની સમીપ પહોંચાય. હકીકતે સર્વત્ર ચૈતન્યનો એકાત્મભાવ જન્મે તો કમળ અને ચંદ્રની જેમ આપણે પણ મનપસંદ માહોલમાં એકાકાર થઈએ.

(લેખક પ્રવીણ કે. લહેરી નિવૃત્ત સનદી અધિકારી છે. ગુજરાત રાજ્યના મુખ્ય સચિવ સહિત અનેક હોદ્દાઓ પર કામ કરી ચૂકયા છે. વહીવટી અને સમાજજીવનનો બહોળો અનુભવ ધરાવે છે. હાલમાં શ્રી સોમનાથ ટ્રસ્ટ અને સદવિચાર પરિવાર સાથે જોડાયેલા છે. સમાજજીવનના વિવિધ પ્રવાહો પર એ નિયમિત લખતા રહે છે.)

પંચાંગ 30/10/2025

CEPT યુનિવર્સિટી દ્વારા UNM ફાઉન્ડેશનના બે પાર્કને શ્રેષ્ઠ ઉદ્યાન એવોર્ડ-2025

અમદાવાદ: ટોરેન્ટ ગ્રુપની સેવાભાવી સંસ્થા UNM ફાઉન્ડેશનની ‘પ્રતિતિ’ પહેલ હેઠળ પુનઃવિકાસિત બે જાહેર ઉદ્યાનોને CEPT યુનિવર્સિટી દ્વારા શ્રેષ્ઠ ઉદ્યાન 2025 એવોર્ડ એનાયત કરવામાં આવ્યો છે. અમદાવાદના સ્વાતિ બંગલો પાર્ક (1.5 થી 2 એકર શ્રેણી) અને સુકાન પાર્ક (2 થી 2.6 એકર શ્રેણી) એ આ એવોર્ડ જીત્યા છે. શહેરમાં હરિયાળી વિસ્તારોને સંવર્ધન માટે CEPT યુનિવર્સિટીના MLA પ્રોગ્રામ અને ખંડવાલા ક્રિએટિવ ફાઉન્ડેશન દ્વારા આયોજિત આ એવોર્ડમાં કુલ 127 ઉદ્યાનોમાંથી મૂલ્યાંકન કરીને 36 પાર્કને શોર્ટલિસ્ટ કરવામાં આવ્યા હતા.


અવકાશી ડિઝાઇન, જૈવવિવિધતા, પર્યાવરણીય ગુણવત્તા, વપરાશકર્તાનો અનુભવ અને માળખાગત સુવિધા જેવા પરિમાણોના આધારે બંને ઉદ્યાનો વિજેતા જાહેર કરવામાં આવ્યા હતા. CEPT કેમ્પસ ખાતે આયોજિત સન્માન સમારોહમાં મુખ્ય અતિથિ તરીકે જાણીતા પર્યાવરણવિદ શ્રી કાર્તિકેય સારાભાઈ ઉપસ્થિત રહ્યા હતા. પાર્કોની જાળવણીમાં પ્રતિબદ્ધ બાગાયત અને સુરક્ષા ટીમોને CEPT દ્વારા તૈયાર કરાયેલ ‘ઓલ-સીઝન ગાર્ડનર્સ કીટ’ ભેટ આપવામાં આવી.


UNM ફાઉન્ડેશનની ‘પ્રતિતિ’ પહેલ ટકાઉ શહેરી હરિયાળી જાળવવા માટે PPP મોડલ હેઠળ બગીચા અને તળાવોનો વિકાસ અને સંભાળ કાર્ય કરે છે. અત્યાર સુધીમાં આશરે 8.44 લાખ ચોરસ મીટર હરિયાળી જગ્યા વિકસાવવામાં આવી છે અને વધુ વિસ્તરણ માટે મહારાષ્ટ્ર સુધી પહેલનો વ્યાપ વધારવાની યોજના છે.


શહેરના પર્યાવરણ અને સામુદાયિક જીવનને સમૃદ્ધ બનાવવાની પ્રતિબદ્ધતાને CEPT તથા જ્યુરી દ્વારા મળેલ આ માન્યતાએ વધુ પ્રેરણા પૂરી પાડી છે.

ભારત-રશિયા વચ્ચે કરાર: દેશમાં બનશે SJ-100 પેસેન્જર વિમાન

બેંગલુરુ/મોસ્કો: ભારત અને રશિયા વચ્ચે વધતા વ્યૂહાત્મક સંબંધોની નવી કડી તરીકે, હિંદુસ્તાન એરોનોટિક્સ લિમિટેડ (HAL) અને રશિયાની યુનાઇટેડ એરક્રાફ્ટ કોર્પોરેશન (UAC) વચ્ચે 27 ઓક્ટોબર, 2025ના રોજ મોસ્કોમાં મેમોરેન્ડમ ઓફ અન્ડરસ્ટેન્ડિંગ (MoU) પર હસ્તાક્ષર થયા છે. આ કરાર હેઠળ ભારતમાં SJ-100 નામના રશિયન ડિઝાઇનના ટ્વિન-એન્જિન નેરો-બોડી પેસેન્જર વિમાનનું ઉત્પાદન થશે. આ ભારત માટે નાગરિક વિમાન ઉત્પાદનની દિશામાં મહત્વનું પગલું છે, જે 1988માં AVRO HS-748 પ્રોજેક્ટના અંત પછી પ્રથમ વખત સંપૂર્ણ વિમાનનું ઉત્પાદન શરૂ કરશે.

SJ-100 વિમાન વિશે માહિતી

  • ડિઝાઇન અને ક્ષમતા: SJ-100 (પહેલાં Sukhoi Superjet 100 તરીકે ઓળખાતું) એક રિજનલ જેટ છે. જે 100થી 103 મુસાફરોને લઈ જઈ શકે છે. તેની ફ્લાઇટ રેન્જ 3,530 કિલોમીટર છે અને તે ટૂંકા અંતરની ઉડાનો માટે આદર્શ છે. આ વિમાન -55 ડિગ્રીથી +45 ડિગ્રી સુધીના તાપમાનમાં કામ કરી શકે છે, જે તેને વિવિધ વાતાવરણ માટે યોગ્ય બનાવે છે. વિશ્વભરમાં 200થી વધુ SJ-100 વિમાન 16થી વધુ એરલાઇન્સ દ્વારા ઉપયોગમાં લેવાય રહ્યા છે.
  • ભારતીય સંદર્ભ: HALને આ વિમાનના ભારતીય ગ્રાહકો માટે ઉત્પાદનના અધિકાર મળશે. તે UDAN (ઉડાન) યોજના હેઠળ ટૂંકા અંતરના હવાઈ કનેક્ટિવિટીને વેગ આપશે, જે નાના શહેરો અને કસ્બાઓને હવાઈ મુસાફરી સુલભ બનાવવાનો ઉદ્દેશ ધરાવે છે. ભારતમાં આગામી દાયકામાં 200થી વધુ જેટની જરૂરિયાત છે, જેમાં આ વિમાન મહત્વની ભૂમિકા ભજવશે.

કરારનું મહત્વ

  • આત્મનિર્ભર ભારત: HALના અનુસાર, આ કરાર નાગરિક વિમાન ક્ષેત્રમાં ‘આત્મનિર્ભર ભારત’નું સ્વપ્ન સાકાર કરવાની દિશામાં મહત્વનું પગલું છે. તે ઘરઆંગણાના ઉત્પાદનને પ્રોત્સાહન આપશે, ખાનગી ક્ષેત્રને આકર્ષિત કરશે અને હવાઈ ઉદ્યોગમાં સીધા-પરોક્ષ રોજગારોનું સર્જન કરશે.
  • ઐતિહાસિક સંદર્ભ: 1961થી 1988 સુધી ચાલેલા AVRO HS-748 પ્રોજેક્ટ પછી આ પ્રથમ વખત છે જ્યારે ભારતમાં સંપૂર્ણ પેસેન્જર વિમાન બનશે. હાલમાં ભારતનું વ્યાવસાયિક વિમાન બેઝ Boeing અને Airbus પર આધારિત છે, જે વૈશ્વિક બજારના 90%થી વધુ ભાગ ધરાવે છે.
  • ભારત-રશિયા સંબંધ: આ કરાર બંને દેશો વચ્ચેના લાંબા સમયના સહયોગને મજબૂત કરે છે. જો કે, UAC અમેરિકા, યુરોપિયન યુનિયન અને બ્રિટનની સંક્રમણો હેઠળ છે. જે ઉડાન ઉત્પાદનમાં પશ્ચિમી ભાગોની અછતને કારણે પડકારો ઉભા કરી શકે છે. રશિયા હવે માત્ર રશિયન ભાગો વાપરીને વિમાન વિકસાવવાનો પ્રયાસ કરી રહ્યું છે, પરંતુ તેમાં વિલંબ થઈ રહ્યા છે.

ભવિષ્યની શક્યતાઓ

આ MoU હેઠળ ટેક્નોલોજી ટ્રાન્સફર અને રોકાણની વિગતો હજુ સ્પષ્ટ નથી. પરંતુ તે ભારતને વૈશ્વિક એરોસ્પેસ ઉત્પાદન હબ તરીકે સ્થાપિત કરવામાં મદદ કરશે. રક્ષા મંત્રી રાજનાથ સિંહે તેને નાગરિક વિમાન ક્ષેત્ર માટે ‘લેન્ડમાર્ક’ પગલું ગણાવ્યું છે. આ કરારથી ભારતના હવાઈ બંદરોની સંખ્યા 2047 સુધીમાં 350 સુધી વધારવાના લક્ષ્યને પણ પુષ્ટિ મળશે.
1...498499500...5,142Page 499 of 5,142